Wi ɔl nid mɔni fɔ bay di tin dɛn we wi famili nid. (Prɔvabs 30:8) Afta ɔl, i fayn fɔ “kip mɔni fɔ bambay.” (Ɛkliziastis 7:12) We una mared i nɔ kin izi fɔ tɔk bɔt mɔni biznɛs, bɔt una nɔ fɔ mek mɔni briŋ prɔblɛm na una mared-os. (Lɛta Fɔ Ɛfisɔs 4:32) Maredman ɛn mareduman fɔ biliv dɛnsɛf ɛn wok togɛda we dɛn de disayd bɔt aw fɔ spɛn mɔni.

DI BAYBUL SE: “Uswan pan una go want bil os, we nɔ go sidɔm tink if di kɔpɔ we i gɛt go du fɔ bil di os?” (Lyuk 14:28) I impɔtant fɔ mek una tu tɔk bɔt aw una fɔ yuz mɔni. (Emɔs 3:3) Una disayd wetin una nid fɔ bay ɛn ɔmɔs una go ebul fɔ spɛn. (Prɔvabs 31:16) Bikɔs yu gɛt mɔni fɔ bay sɔntin nɔ min se yu fɔ bay am. Una tray fɔ avɔyd dɛt. Una spɛn di mɔni nɔmɔ we una gɛt. —Prɔvabs 21:5; 22:7.

DU DIS:

• If mɔni lɛf we di mɔnt dɔn, na una tu fɔ disayd wetin fɔ du wit am

• If una spɛn pas ɔmɔs una de gɛt, una fɔ tek tɛm plan aw fɔ ridyus di tin dɛn we una de spɛn mɔni pan. Fɔ ɛgzampul, i bɛtɛ fɔ kuk pas fɔ de bay af-af it

DI BAYBUL SE: “Wi mekɔp fɔ du wetin rayt, bifo Gɔd ɛn bifo man.” (Sɛkɛn Lɛta Fɔ Kɔrint 8:21) Na fɔ tɔk tru to yu man ɔ wɛf bɔt ɔmɔs mɔni yu de gɛt ɛn ɔmɔs yu de spɛn.

Na fɔ tɔk wit yu man ɔ yu wɛf fɔs bifo yu disayd ɔmɔs fɔ spɛn pan sɔntin. (Prɔvabs 13:10) We una tɔk bɔt mɔni biznɛs, dat go ɛp fɔ mek pis de na una mared-os. Nɔ luk di mɔni we yu de gɛt lɛk se na yu wan gɛt am, luk am lɛk se na di famili gɛt am.—Fɔs Lɛta To Timoti 5:8.

DU DIS:

• Una disayd ɔmɔs mɔni una go spɛn we una nɔ go nid fɔ aks di ɔda pɔsin fɔs

• Nɔ wet te una gɛt prɔblɛm bifo una tɔk bɔt mɔni biznɛs