1, 2. Ustɛm Jizɔs bin vɛks? Wetin mek?

JIZƆS bin rili vɛks ɛn i bin gɛt gud rizin fɔ du dat. Bikɔs Jizɔs na bin ɔmbul pɔsin, i go at fɔ imajin se i go vɛks. (Matyu 21:​5) I bin stil ebul fɔ kɔntrol insɛf bikɔs di wamat we i bin gɛt na fɔ di rayt rizin. * Bɔt wetin go dɔn mek dis man we lɛk pis vɛks so? Dis patikyula tɛm pipul dɛn nɔ bin de du tin tret wan.

² Jizɔs bin rili valyu di tɛmpul we bin de na Jerusɛlɛm. Na di wangren ples dis na di wan ol wɔl we dɛn mek fɔ wɔship in Papa we de na ɛvin. Di Ju dɛn we bin de na bɔku say dɛn bin de kɔmɔt fa fa say fɔ kam wɔship de. Ivin Jɛntayl dɛn we de fred Gɔd bin de kam na di tɛmpul, na di say we dɛn mek fɔ dɛn fɔ yuz. Bɔt we Jizɔs bin jɔs bigin fɔ prich, i bin ɛnta di tɛmpul, na de i si sɔntin we rili bad. Di ples bin fiba makit, i nɔ bin fiba say fɔ wɔship! Biznɛsman dɛn ɛn dɛn wan dɛn we de chenj mɔni bin ful-ɔp de. Wetin dɛn bin de du we nɔ rayt? Dɛn man dɛn ya bin jɔs de si Gɔd in tɛmpul as ples fɔ kruk pipul dɛn ɛn fɔ ivin tif dɛn. Aw dɛn bin de du dat?—Jɔn 2:​14.

3, 4. Us kruk tin dɛn bin de apin na Jiova in os? Wetin Jizɔs bin du fɔ kɔrɛkt dɛn tin dɛn de?

³ Di bigman dɛn pan Gɔd biznɛs bin put lɔ se na wan patikyula kɔyn di pipul dɛn fɔ yuz fɔ pe taks na di tɛmpul. Di wan dɛn we bin de kam na di tɛmpul bin nid fɔ chenj  dɛn mɔni fɔ gɛt da kɔyn de. So di wan dɛn we bin de chenj mɔni bin de put dɛn tebul dɛn rayt insay di tɛmpul, ɛn dɛn bin de mek pipul dɛn pe fɔ ɛni mɔni we dɛn chenj. Di wan dɛn we bin de sɛl animal dɛn bak bin de gɛt bɔku prɔfit. Di wan dɛn we want fɔ mek sakrifays kin bay animal frɔm ɛni biznɛsman na di siti, bɔt di bigman dɛn na di tɛmpul kin se i nɔ fit fɔ yuz as sakrifays. Bɔt dɛn go gri fɔ tek ɛni animal we dɛn bay na di tɛmpul. Bikɔs di biznɛsman dɛn bin no se di pipul dɛn nɔ gɛt natin fɔ du, dɛn bin de chaj bɔku bɔku mɔni. * Dis bin wɔs pas kruk; na tif dɛn bin de tif di pipul dɛn!

⁴ Jizɔs nɔ go alaw da kayn tin de fɔ apin. Dis na in Papa in os! So i tek rop dɛn fɔ mek wip ɛn drɛb di kaw ɛn ship dɛn kɔmɔt na di tɛmpul. Dɔn i go to di wan dɛn we bin de chenj mɔni ɛn tɔnoba dɛn tebul dɛn. Imajin aw ɔl dɛn kɔyn dɛn de go de skata na di grɔn we de shayn lɛk tayl! I tɛl ɔl di wan dɛn we de sɛl dɔv dɛn se: “Una pul dɛn tin ya kɔmɔt na ya!” (Jɔn 2:​15, 16) Nɔbɔdi nɔ bin gɛt maynd fɔ chalenj am.

5-7. (a) Bikɔs Jizɔs bin dɔn de na ɛvin bifo i kam na di wɔl, aw dat go dɔn afɛkt di we aw i de si jɔstis? Wetin wi go lan we wi stɔdi in ɛgzampul? (b) Aw Krays dɔn fɛt fɔ protɛkt in Papa in nem ɛn In rayt fɔ rul?

⁵ Di biznɛsman dɛn bin kam bak leta. Afta lɛk tri ia so, Jizɔs bin dil wit dis sem tin bak. Dis tɛm, i bin yuz di sem wɔd dɛn we Jiova bin yuz we i de tɔk bɔt di wan dɛn we bin tɔn In os to “ples we tifman dɛn de ayd.” (Matyu 21:​13;  Jɛrimaya 7:​11) Jizɔs bin fil di sem we lɛk in Papa we i si di bad we aw dɛn de pul mɔni na pipul dɛn an ɛn di we aw dɛn bin de dɔti Gɔd in tɛmpul. Ɛn wi nɔ fɔ sɔprayz! Wetin mek? Na bikɔs fɔ lɔng lɔng tɛm, Jizɔs in Papa we de na ɛvin bin dɔn de tich am. So dat bin mek insɛf lɛk jɔstis jɔs lɛk Jiova. Di we aw i liv in layf sho wetin pipul dɛn min we dɛn kin se, “Bɔn mi a fiba yu.” So if wi want fɔ no bɔt Jiova in jɔstis gud gud wan, wi fɔ tink gud gud wan bɔt Jizɔs Krays in ɛgzampul.—Jɔn 14:​9, 10.

⁶ Jiova in wangren Pikin bin de di tɛm we Setan kɔl Jiova Gɔd layman ɛn tɔk se I nɔ gɛt rayt fɔ rul. Dat na big big lay! Leta, di Pikin bin yɛri bak we Setan de tɔk se nɔbɔdi nɔ go sav Gɔd bikɔs i lɛk am. Dɛn lay lay tɔk dɛn ya go mɔs dɔn mek di Pikin in at pwɛl. I go mɔs dɔn gladi fɔ no se i gɛt impɔtant tin fɔ du fɔ sɔlv dis prɔblɛm! (2 Kɔrintians 1:​20) Aw i go du dat?

⁷ Jɔs lɛk aw wi bin lan na Chapta 14, Jizɔs Krays bin gi di bɛst ansa to di chalenj we Setan bin chalenj di rizin we mek Jiova in savant dɛn de waka tret wit am. Dis tin we Jizɔs du na di fɔs we dat fɔ sho se na Jiova gɛt di rayt fɔ rul ɛn fɔ mek In nem oli. As di pɔsin we Jiova mek Chif Lida, Jizɔs go mek shɔ se Gɔd in jɔstis de ɔlsay na di wɔl. (Akt 5:​31) Di we bak aw i liv in layf na di wɔl sho se i de fala Gɔd in jɔstis. Jiova bin tɔk bɔt am se: “A go put mi spirit pan am, ɛn i go mek di neshɔn dɛn no wetin rayt.” (Matyu 12:​18) Aw Jizɔs bin du dis tin we Jiova se?

8-10. (a) Aw di lɔ dɛn we di bigman dɛn pan di Ju rilijɔn bin mek de sho se dɛn nɔ gɛt wan rɛspɛkt fɔ pipul dɛn we nɔto Ju ɛn fɔ uman dɛn? (b) Aw dɛn lɔ dɛn de tɔn Jiova in Sabat lɔ to big big wok?

⁸ Jizɔs lɛk Jiova in Lɔ ɛn i de fala am. Bɔt di bigman dɛn  pan Gɔd biznɛs we bin de insay Jizɔs in tɛm bin twis Gɔd in Lɔ ɛn dɛn nɔ bin yuz am fayn. Jizɔs bin tɛl dɛn se: “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! . . . Una nɔ de pe atɛnshɔn to di tin dɛn we rili impɔtant na di Lɔ, we na, fɔ du tin tret, fɔ gɛt sɔri-at, ɛn fɔ fetful.” (Matyu 23:​23) Dɛn pipul dɛn de we bin fɔ tich pipul dɛn Gɔd in Lɔ nɔ bin de mek pipul dɛn no “wetin rayt” bay wilful. Bifo dat, dɛn nɔ bin de fala Gɔd in jɔstis. Aw? Lɛ wi tɔk bɔt sɔm ɛgzampul dɛn.

⁹ Jiova bin tɛl in pipul dɛn fɔ lɛ dɛn nɔ miks wit di pegan neshɔn dɛn we bin de arawnd dɛn. (Fɔs Kiŋ 11:​1, 2) Bɔt sɔm bigman dɛn pan Gɔd biznɛs bin de ɛnkɔrej di pipul dɛn nɔ fɔ gɛt wan rɛspɛkt fɔ ɛnibɔdi we nɔto Ju. Di Mishna bin ivin gɛt wan lɔ we se: “Una nɔ fɔ lɛf una kaw dɛn na di jɛntayl dɛn gɛstaws fɔ lɛ dɛn nɔ ledɔm wit dɛn.” Dɛn kayn bad we aw dɛn bin de trit pipul dɛn we nɔto Ju nɔ bin rayt, ɛn i de agens wetin di Lɔ we Gɔd Bin Gi Mozis de tich. (Lɛvitikɔs 19:​34) Ɔda lɔ dɛn we di pipul dɛn bin de mek nɔ bin valyu uman dɛn. Wan lɔ se mareduman nɔ fɔ waka na in man in sayd, bɔt i fɔ de biɛn am. Dɛn bin de wɔn man dɛn nɔ fɔ tɔk wit uman na pɔblik, ilɛksɛf na dɛn wɛf. Dɛn nɔ bin de alaw uman dɛn fɔ gi witnɛs na kɔt jɔs lɛk slev dɛn. Dɛn bin ivin gɛt wan prea we di man dɛn kin pre fɔ tɛl Gɔd tɛnki fɔ we dɛn nɔto uman.

¹⁰ Di bigman dɛn pan Gɔd biznɛs bin lɛf fɔ yuz Gɔd in Lɔ ɛn bigin fala di bɔku bɔku lɔ dɛn we dɛnsɛf sɛf mek. Fɔ ɛgzampul, di lɔ bɔt di Sabat bin se dɛn nɔ fɔ du ɛni wok da de de, na tɛm we dɛn fɔ yuz fɔ wɔship Gɔd ɛn blo. Bɔt di Faresi dɛn bin mek da lɔ de at fɔ obe. Dɛn bin disayd se na dɛn fɔ sho wetin pɔsin go du we go sho se na “wok” i de wok. Dɛn kɔl 39 difrɛn tin dɛn we pɔsin go du as wok, lɛk fɔ pik tin fɔ it ɔ fɔ ɔntin. Dɛn difrɛn difrɛn tin dɛn ya go mek pɔsin aks bɔku kwɛstyɔn dɛn. If pɔsin kil flay Sabat de, fɔ se na ɔntin i de ɔntin? If i pik sɔntin fɔ it as i de waka, fɔ  se na avɛst i de avɛst? If i mɛn pɔsin we sik, fɔ se na wok i de wok? Dɛn bin mek bɔku ɔda strikt lɔ dɛn fɔ ansa dɛn kwɛstyɔn dɛn ya.

11, 12. Aw Jizɔs bin sho se i de agens di Faresi dɛn tradishɔn dɛn we dɛn mek?

¹¹ Wit ɔl dɛn tin dɛn ya we bin de apin, aw Jizɔs bin fɔ ɛp pipul dɛn fɔ ɔndastand wetin na jɔstis? Bay wetin Jizɔs bin de tich ɛn di we aw i liv in layf, i bin gɛt maynd fɔ tinap tranga wan agens di bigman dɛn pan Gɔd biznɛs. Lɛ wi tɔk fɔs bɔt sɔm pan in tichin dɛn. I bin kɔndɛm di bɔku bɔku lɔ dɛn we dɛn mek bay we i se: “Una dɔn mek Gɔd in wɔd nɔ gɛt wan valyu bikɔs una de fala una gret gret granpa dɛn tradishɔn.”—Mak 7:​13.

¹² Jizɔs bin de tich se di Faresi dɛn nɔ bin de tich di rayt tin bɔt di Sabat lɔ. Infakt, i bin se dɛn nɔ ɔndastand wetin di lɔ bin de bɔt. Jizɔs bin ɛksplen se di Mɛsaya na di “Masta fɔ di Sabat,” so i gɛt rayt fɔ mɛn pipul dɛn di Sabat de. (Matyu 12:​8) Fɔ mek pipul dɛn ɔndastand klia wan wetin i bin de tɔk, i bin de pafɔm mirekul fɔ mɛn pipul dɛn Sabat de usay ɔlman de si. (Lyuk 6:​7-10) Dɛn mirekul dɛn de we i bin de pafɔm bin de sho wetin i go du tumara bambay insay in Wan Tawzin Ia Rul. Da Wan Tawzin Ia Rul go bi di Sabat we pas ɔl, we ɔl fetful mɔtalman go rɛst frɔm di yagba we sin ɛn day dɔn put pan dɛn fɔ lɔng lɔng tɛm.

13. Afta Krays dɔn in prichin wok na di wɔl, us lɔ i bin gi? Aw i difrɛn frɔm di Lɔ we Gɔd Bin Gi Mozis?

¹³ Afta we Jizɔs dɔn in prichin wok na di wɔl, i sho klia wan wetin na jɔstis bay we i mek wan nyu lɔ, we na “Krays in lɔ.” (Galeshians 6:​2) Di nyu lɔ nɔ tan lɛk di wan we bin de bifo am we na di Lɔ we Gɔd Bin Gi Mozis, bikɔs di nyu lɔ gɛt fɔ du wit prinsipul, nɔto lɔ dɛn we dɛn rayt. Bɔt i gɛt sɔm dayrɛkt lɔ dɛn. Jizɔs bin kɔl wan pan dɛn lɔ dɛn ya “nyu lɔ.” Jizɔs bin tich di wan dɛn we de fala am fɔ lɛk dɛn kɔmpin jɔs lɛk aw i lɛk dɛn. (Jɔn 13:​34, 35) Fɔ tru, ɔl di  wan dɛn we de fala “Krays in lɔ” fɔ lɛk dɛn kɔmpin dɛn wit ɔl dɛn at.

14, 15. Aw Jizɔs sho se i nɔ ebul fɔ du ɔltin? Wetin mek dis de ɛnkɔrej wi?

¹⁴ Jizɔs nɔ bin jɔs tich bɔt lɔv, i du pas dat. I liv in layf akɔdin to “Krays in lɔ.” Wi kin si dis klia wan pan wetin i bin de du. Lɛ wi tɔk bɔt tri we dɛn we Jizɔs in ɛgzampul mek wi no klia wan wetin jɔstis min.

¹⁵ Fɔs, Jizɔs mek shɔ se i avɔyd ɛnitin we go mek i nɔ du tin tret wan. Sɔntɛm yu go dɔn notis se we pipul dɛn prawd ɛn de du ɛnitin we dɛn fil fɔ du bikɔs dɛn gɛt pawa, dat de mek dɛn nɔ de du tin tret wan. Jizɔs nɔ bin de da we de. Wan tɛm, wan man bin mit Jizɔs ɛn aks am se: “Ticha, tɛl mi brɔda lɛ i gi mi mi yon prɔpati pan di tin dɛn we wi papa lɛf fɔ wi.” Jizɔs aks am se: “Udat mek mi jɔj ɔ midulman fɔ una tu?” (Lyuk 12:​13, 14) Dat nɔ rili wɔndaful? Di sɛns we Jizɔs bin gɛt, di we aw i de jɔj, ɛn di kayn pawa we Gɔd gi am, pas di wan we ɛnibɔdi gɛt na dis wɔl. Bɔt i nɔ bin put an pan dis tin we dis man aks am fɔ du bikɔs i nɔ bin gɛt di rayt fɔ du dat. Ɔltɛm, Jizɔs bin dɔn de sho se nɔto ɔltin i ebul du, ivin bifo i kam na dis wɔl as mɔtalman. (Jud 9) Bikɔs Jizɔs bin abop pan Jiova fɔ sho wetin rayt, dat de mek wi si fayn kwaliti bɔt am we wi fɔ kɔle.

16, 17. (a) Aw Jizɔs sho jɔstis we i de prich di gud nyuz bɔt Gɔd in Kiŋdɔm? (b) Aw di we aw Jizɔs bin de sho jɔstis sho se i gɛt sɔri-at?

¹⁶ Sɛkɔn, Jizɔs sho jɔstis bay di we aw i bin de prich di gud nyuz bɔt Gɔd in Kiŋdɔm. I nɔ bin bayas. Bifo dat, i bin de du ɔl wetin i ebul fɔ prich to ɔlkayn pipul dɛn, ilɛk dɛn jɛntri ɔ dɛn po. Di Faresi dɛn nɔ bin de gri lɛ di po pipul dɛn kam nia dɛn, ɛn dɛn bin de kɔl dɛn ʽam-ha·ʼaʹrets, ɔ “netiv pipul dɛn.” Jizɔs bin gɛt maynd fɔ du tin di rayt we. We  i bin de tich pipul dɛn di gud nyuz, infakt, we i bin de it wit dɛn, fid dɛn, mɛn dɛn, ɔ we i bin de ivin gi layf bak to di wan dɛn we bin day, i bin de sɔpɔt di Gɔd we lɛk jɔstis we want “ɔlkayn pipul dɛn” fɔ kam nia am. *—1 Timoti 2:​4.

¹⁷ Tɔd, di we aw Jizɔs bin lɛk jɔstis bin de sho se i gɛt sɔri-at. I bin de du ɔl wetin i ebul fɔ ɛp sina dɛn. (Matyu 9:​11-13) I bin rɛdi fɔ ɛp pipul dɛn we nɔ bin gɛt pawa fɔ protɛkt dɛnsɛf. Fɔ ɛgzampul, Jizɔs nɔ bin jɔyn di bigman dɛn pan Gɔd biznɛs fɔ trit di Jɛntayl dɛn bad. I bin de ɛp ɛn tich sɔm pan dɛn pipul dɛn de, pan ɔl we i bi se in men wok na fɔ tich di Ju pipul dɛn. I bin gri fɔ pafɔm wan mirekul fɔ wan Roman ami ɔfisa, ɛn i tɔk se: “A nɔ si ɛnibɔdi na Izrɛl we gɛt dis kayn fet.”—Matyu 8:​5-13.

18, 19. (a) Us we dɛn Jizɔs bin ɔnɔ uman dɛn? (b) Aw Jizɔs in ɛgzampul ɛp wi fɔ si wetin jɔstis gɛt fɔ du wit fɔ gɛt maynd?

¹⁸ Semweso, Jizɔs nɔ bin de sɔpɔt di bad we aw dɛn bin de trit uman dɛn. Bifo dat, i bin gɛt maynd fɔ du tin di rayt we. Dɛn bin biliv se di Samɛritan uman dɛn nɔ klin jɔs lɛk di Jɛntayl dɛn. Bɔt Jizɔs nɔ bin fred fɔ prich to di Samɛritan uman na di wɛl na Sayka. Infakt, na dis uman na di fɔs pɔsin we Jizɔs bin tɛl klia wan se in na di Mɛsaya we bin fɔ kam. (Jɔn 4:​6, 25, 26) Di Faresi dɛn bin de tɔk se dɛn nɔ fɔ tich uman dɛn Gɔd in Lɔ, bɔt Jizɔs in bin spɛn bɔku pan in tɛm ɛn ɛnaji fɔ tich uman dɛn. (Lyuk 10:​38-42) Ɛn pan ɔl we dɛn bin gɛt tradishɔn fɔ se dɛn nɔ fɔ trɔst uman dɛn fɔ gi kɔrɛkt witnɛs, Jizɔs in bin ɔnɔ sɔm uman dɛn bay we i gi dɛn di chans fɔ lɛ dɛn fɔs si am afta i gɛt layf bak. I bin  ivin tɛl dɛn fɔ go tɛl in disaypul dɛn we na man dɛn bɔt dis impɔtant tin we apin!—Matyu 28:​1-10.

¹⁹ Fɔ tru, Jizɔs bin mek di neshɔn dɛn no klia wan wetin jɔstis min. Bɔku tɛm, i bin de tek risk fɔ du dɛn tin dɛn de. Jizɔs in ɛgzampul ɛp wi fɔ si se wi nid fɔ gɛt maynd fɔ du tin di rayt we. Na dat mek i fit we dɛn kɔl am “di Layɔn we de na Juda in trayb.” (Rɛvɛleshɔn 5:​5) Mɛmba se di Baybul yuz layɔn fɔ tɔk bɔt di maynd we Gɔd gɛt fɔ sho in jɔstis. I nɔ go te igen, Jizɔs go du tin tret wan pas aw i bin de du am trade. Fɔ tru tru, i go “mek jɔstis sidɔm tranga wan na di wɔl.”—Ayzaya 42:​4.

20, 21. Insay dis wi yon tɛm, aw di Kiŋ fɔ Gɔd in Kiŋdɔm dɔn ɛp fɔ lɛ dɛn du tin tret wan ɔlsay na di wɔl ɛn insay di Kristian kɔngrigeshɔn?

²⁰ Frɔm we Jizɔs dɔn bi Kiŋ fɔ Gɔd in Kiŋdɔm insay 1914, i dɔn de ɛp fɔ du tin tret na di wɔl. Aw? I dɔn de ɛp fɔ mek di prɔfɛsi we i bin tɔk na Matyu 24:​14 bi. Di wan dɛn we de fala Jizɔs dɔn tich pipul dɛn di trut bɔt Jiova in Kiŋdɔm ɔlsay na di wɔl. Jɔs lɛk Jizɔs, dɛnsɛf nɔ bayas we dɛn de prich, ɛn dɛn de gi ɔlman di chans fɔ no Jiova we na di Gɔd we lɛk jɔstis, ilɛk na ol ɔ yɔŋ pɔsin, jɛntriman ɔ poman, man ɔ uman.

²¹ As edman fɔ di kɔngrigeshɔn, Jizɔs de ɛp bak fɔ lɛ dɛn du tin tret wan na di Kristian kɔngrigeshɔn. Jɔs lɛk aw dɛn bin dɔn tɔk, Jizɔs de gi “man dɛn as gift” we na Kristian ɛlda dɛn we fetful, fɔ de bifo na di kɔngrigeshɔn. (Ɛfishians 4:​8-12) We dɛn man ya de kia fɔ Gɔd in ship dɛn we valyu to am, dɛn de fala Jizɔs Krays in ɛgzampul fɔ du tin tret wan. Dɛn de mɛmba ɔltɛm se Jizɔs want dɛn fɔ trit in ship dɛn fia wan, ilɛk us pozishɔn dɛn gɛt ɔ if dɛn po ɔ jɛntri.

22. Aw Jiova de fil we jɔstis nɔ de ɔlsay na di wɔl tide? Wetin i dɔn pik in Pikin fɔ du bɔt dat?

 ²² Bɔt i nɔ go te igen, Jizɔs go du tin tret na di wɔl pas aw i de du rayt naw. Jɔstis nɔ de ɔlsay na dis wɔl we kɔrɔpt. We ɛni pikin day bikɔs bɛtɛ tin nɔ de fɔ it, dat de apin bikɔs jɔstis nɔ de, mɔ we wi tink bɔt di kayn mɔni ɛn tɛm we dɛn de yuz fɔ mek wɛpɔn dɛn fɔ fɛt wɔ ɛn fɔ mek tin dɛn fɔ pipul dɛn we lɛk fɔ ɛnjɔy dɛnsɛf. Di bɔku bɔku pipul dɛn we de day ɛni ia de apin bikɔs jɔstis nɔ de, ɛn ɔl dis de mek Jiova vɛks bikɔs i lɛk fɔ du tin tret. Jiova dɔn pik in Pikin fɔ fɛt wan wɔ fɔ pul ɔl di wikɛd tin dɛn we de apin bikɔs jɔstis nɔ de, ɛn i go mek dɛn nɔ apin igen.—Rɛvɛleshɔn 16:​14, 16; 19:​11-15.

23. Afta Amagɛdɔn, aw Krays go ɛp fɔ mek jɔstis de na di wɔl sote go?

²³ Bɔt Jiova in jɔstis nɔto fɔ jɔs dɔnawe wit di wan dɛn we wikɛd. I dɔn pik in Pikin fɔ rul as “Prins ɔf Pis.” Afta Amagɛdɔn, Jizɔs go mek pis de ɔlsay na di wɔl, ɛn i go rul “wit jɔstis.” (Ayzaya 9:​6, 7) Datɛnde, Jizɔs go gladi fɔ pul ɔl di bad tin dɛn we de mek pipul dɛn sɔfa na di wɔl. I go kɔntinyu fɔ sɔpɔt Jiova in pafɛkt jɔstis sote go. I impɔtant naw fɔ lɛ wi falamakata Jiova in jɔstis. Lɛ wi si aw wi go du dat.