To di Wan We De Rid Dis Buk:

Yu de fil se yu de nia Gɔd? Bɔku pipul dɛn de tink se dat nɔ pɔsibul. Sɔm de fred se Gɔd de tu fa frɔm dɛn; ɔda wan dɛn de fil se dɛn nɔ fit fɔ go nia Gɔd. Bɔt di Baybul ɛnkɔrej wi se: “Una kam nia Gɔd, ɛn insɛf go kam nia una.” (Jems 4:​8) Jiova ivin prɔmis di wan dɛn we de wɔship am se: “Mi PAPA GƆD [“Jiova,” NWT] we na yu Gɔd, ol yu raytan; na mi de tɛl yu se, ‘Nɔ fred, A go ɛp yu.’”—Ayzaya 41:​13.

Aw wi go tray fɔ gɛt da kayn tayt padi biznɛs de wit Gɔd? Di tin we go mek wi padi biznɛs tayt wit ɛnibɔdi na we wi tray fɔ no di pɔsin, dɔn wi kɔle ɛn valyu di pɔsin in spɛshal kwaliti dɛn we i gɛt. So i rili impɔtant fɔ lɛ wi stɔdi Gɔd in kwaliti dɛn na di Baybul ɛn di we aw i de du tin. Wi go kam nia Gɔd we wi tink gud gud wan bɔt di we dɛn aw i de sho ɛniwan pan in kwaliti dɛn, we wi si aw Jizɔs falamakata dɛn kwaliti dɛn ya gud gud wan, ɛn we wi ɔndastand aw wisɛf go gɛt dɛn sem kwaliti dɛn de. Wi go kam fɔ si se Jiova gɛt rayt fɔ rul di wan ol wɔl ɛn in na di bɛst Pɔsin fɔ du dat. Wetin pas ɔl na dat in na di Papa we wi ɔl nid. Bikɔs i pawaful, i de du tin tret wan, i gɛt sɛns, ɛn i de sho lɔv, i nɔ de ɛva kɔmɔt biɛn in fetful pikin dɛn.

Wi op se dis buk go ɛp yu fɔ rili kam nia Jiova Gɔd, fɔ gɛt tayt padi biznɛs wit am we nɔ go ɛva dɔn, so dat yu go kɔntinyu fɔ prez am sote go.