1-3. (a) Wetin bin de mɔna Devid? Wetin bin kɔrej am we in at bin pwɛl? (b) Wetin kin mɔna wi we wi sin? Us kɔnfidɛns Jiova dɔn gi wi?

DEVID bin rayt se: “Mi sin dɛn so bɔku, dɛn tu ebi fɔ mi. Mi bɔdi ɔl brok; a nɔ fiba misɛf igen.” (Sam 38:​4, 8) Devid bin no di bad we aw pɔsin kin fil we in kɔnshɛns de mɔna am we i dɔn du bad. Bɔt sɔntin bin kɔrej Devid we in at bin pwɛl. I bin ɔndastand se pan ɔl we Jiova et sin, i nɔ et di pɔsin we sin if i rili ripɛnt ɛn lɛf di bad tin we i bin de du. Bikɔs Devid bin rili biliv se Jiova rɛdi fɔ fɔgiv di wan dɛn we dɔn ripɛnt, i bin tɔk se: “Yu na gud PAPA GƆD [“Jiova,” NWT] ɛn yu de fɔgiv.”—Sam 86:​5.

² We wisɛf sin, wi kɔnshɛns kin mɔna wi bad bad wan. I fayn fɔ mek wi fil bad we wi sin. I kin ɛp wi fɔ du sɔntin fɔ kɔrɛkt di mistek dɛn we wi dɔn mek. Bɔt i bad fɔ mek wi at pwɛl pasmak. Wi at we kin kɔndɛm wi kin pin se Jiova nɔ go fɔgiv wi, ilɛk aw wi ripɛnt. If wi at “pwɛl pasmak,” Setan go tray fɔ mek wi givɔp ɛn mek wi fil se Jiova nɔ valyu wi, ɔ i de si wi as pipul dɛn we nɔ fit fɔ wɔship am.—2 Kɔrintians 2:​5-11.

³ Fɔ se Jiova nɔ valyu wi? Nɔto so i bi atɔl! Wan we aw Jiova de sho se i rili lɛk wi na we i de fɔgiv wi. Insay in Wɔd, di Baybul, i gi wi kɔnfidɛns se if wi rili ripɛnt wit ɔl wi at, i rɛdi fɔ fɔgiv wi. (Prɔvabs 28:​13) Fɔ mek wi lɛf fɔ tink se Jiova nɔ de fɔgiv wi, mek wi tɔk bɔt wetin mek Jiova de fɔgiv ɛn aw i de fɔgiv.

4. Wetin Jiova nɔ de fɔgɛt bɔt wi? Aw dat de afɛkt di we aw i de trit wi?

⁴ Jiova no wetin wi nɔ ebul fɔ du. Sam 103:​14 se: “I no aw i mek wi; i nɔ de fɔgɛt se na dɔti i tek mek wi.” I nɔ de fɔgɛt se wi gɛt say dɛn we wi wik, bikɔs wi nɔ pafɛkt. We di Baybul se Jiova no “aw i mek wi,” i de mek wi mɛmba se di Baybul kɔmpia Jiova to man we de wok wit kle ɛn wi na di tin dɛn we i de mek wit kle. * (Jɛrimaya 18:​2-6) Jiova we na di wan we sabi wok wit kle pas ɔl de trit wi akɔdin to aw wi wik ɛn akɔdin to aw wi lisin to in advays dɛn ɔ nɔ lisin.

5. Aw di Baybul buk we nem Romans ɛksplen aw sin grip wi?

⁵ Jiova ɔndastand di pawa we sin gɛt. In Wɔd ɛksplen se sin na pawaful sɔntin we grip mɔtalman. Aw sin grip mɔtalman? Insay di Baybul buk we nem Romans, di apɔsul Pɔl ɛksplen se: “Sin de rul” wi jɔs lɛk aw sojaman dɛn kɔmanda de rul dɛn (Lɛta Fɔ Rom 3:​9, Krio Fɔs Oli Baybul); sin dɔn “rul” mɔtalman lɛk kiŋ (Romans 5:​21); i “de insay” wi (Romans 7:​17, 20); in “lɔ” de wok insay wi bɔdi ɔltɛm, ɛn i de tray fɔ kɔntrol wi. (Romans 7:​23, 25) Fɔ tru, sin grip wi tayt tayt wan!—Romans 7:​21, 24.

6, 7. (a) Aw Jiova de si di wan dɛn we dɔn ripɛnt wit ɔl dɛn at ɛn beg am fɔ mek i fɔgiv dɛn? (b) Wetin mek wi nɔ fɔ tek Jiova in sɔri-at as sɔntin we nɔ min natin?

⁶ So, Jiova no se i nɔ pɔsibul fɔ mek wi obe am pafɛkt wan, ilɛk aw wi rili want fɔ du dat. I mek wi gɛt kɔnfidɛns se we wi ripɛnt wit ɔl wi at ɛn beg am fɔ fɔgiv wi, i go fɔgiv wi. Sam 51:​17 se: “Yu lɛk we wi gɛt  rayt atityud fɔ sho se wi na natin bifo yu. PAPA GƆD yu go gladi fɔ ɛnibɔdi we nɔ de es insɛf ɔp, bɔt we de sɔri fɔ in sin ɛn beg yu fɔ fɔgiv am.” Jiova nɔ go ɛva tɔn in bak pan pɔsin we in at pwɛl bikɔs ɔf di bad tin we i du.

⁷ Bɔt fɔ se wi fɔ tek Jiova in sɔri-at as sɔntin we nɔ min natin, ɛn yuz di pafɛkt we wi nɔ pafɛkt as ɛkskyuz fɔ de sin? Nɔ-o! Jiova nɔ jɔs de du tin bikɔs ɔf aw i de fil. In sɔri-at gɛt say we i de stɔp. I nɔ go ɛva fɔgiv di wan dɛn we dɔn mek am abit fɔ de sin bay wilful ɛn we nɔ de ripɛnt. (Ibruz 10:​26) Bɔt we i si se pɔsin dɔn ripɛnt wit ɔl in at, i rɛdi fɔ fɔgiv am. Naw mek wi tɔk bɔt sɔm pan di fayn fayn wɔd dɛn we dɛn yuz na di Baybul fɔ ɛksplen dis wɔndaful we aw Jiova de sho lɔv.

8. Wetin Jiova kin du we i fɔgiv wi sin dɛn? Us kɔnfidɛns dis mek wi gɛt?

⁸ We Devid ripɛnt i tɔk se: “A mekɔp mi maynd se ‘A mɔs kɔnfɛs mi sin to PAPA GƆD.’ Wɛn a du am, yu fɔgiv mi ɛn nɔ pɔnish mi igen.” (Na wi mek am italiks; Sam 32:​5) Di Ibru wɔd we dɛn translet as “fɔgiv” min fɔ “es ɔp” ɔ “kɛr go.” We dɛn yuz am na ya, i min fɔ kɛr go “sin.” So Jiova es Devid in sin dɛn ɛn kɛr dɛn go. Dis go dɔn mek Devid in at nɔ pwɛl tumɔs igen. (Sam 32:​3) Wisɛf fɔ gɛt kɔnfidɛns pan di Gɔd we de fɔgiv di wan dɛn we gɛt fet pan Jizɔs in sakrifays ɛn kɛr dɛn sin dɛn go.—Matyu 20:​28.

9. Aw fa Jiova de put wi sin dɛn?

⁹ Devid bin yuz ɔda wɔd dɛn fɔ ɛksplen klia wan aw Gɔd de fɔgiv. I bin tɔk se: “Lɛkɛ aw Ist de fa frɔm Wɛst,  na so PAPA GƆD dɔn push wi sin fa frɔm wi.” (Na wi mek am italiks; Sam 103:​12) Aw fa ist de frɔm di wɛst? Wi no se Ist de fa fa say frɔm wɛst; di tu say dɛn nɔ go ɛva mit. Wan masta sabi bukman bin tɔk se dɛn wɔd ya min “as fa as wi kin imajin.” Di wɔd dɛn we Gɔd mek Devid rayt mek wi no se we Jiova fɔgiv wi, i de put wi sin dɛn fa frɔm wi as wi kin imajin.

10. We Jiova fɔgiv wi sin dɛn, wetin mek wi nɔ fɔ fil se dɛn sin dɛn de go kɔntinyu fɔ de pan wi te wi day?

¹⁰ Yu dɔn ɛva tray fɔ pul sten pan klos we gɛt layt kɔlɔ? Sɔntɛm pan ɔl we yu tray tranga wan fɔ pul am, di sten stil lɛf de. Notis di kayn we aw Jiova ɛksplen aw i de fɔgiv: “Pan ɔl we una sin dɛn tan lɛk rɛd rɛd klos, a go mek dɛn wayt lɛk sno; pan ɔl we dɛn fiba klos we dɛn day wit rɛd, a go mek dɛn wayt lɛk wul.” (Ayzaya  1:​18, NWT) Ilɛk aw wi tray, wi nɔ go ɛva ebul fɔ pul wi sin. Bɔt Jiova ebul pul wi sin dɛn we tan lɛk rɛd rɛd klos ɔ klos we dɛn day wit rɛd ɛn mek dɛn wayt lɛk sno ɔ wul we dɛn nɔ day. We Jiova fɔgiv wi sin dɛn, wi nɔ fɔ fil se dɛn sin dɛn de go kɔntinyu fɔ de pan wi te wi day.

11. Aw Jiova de trowe wi sin dɛn biɛn in bak?

¹¹ We Ɛzikaya bin de rayt wan fayn siŋ fɔ tɛl Jiova tɛnki fɔ we i sev am frɔm wan sik we fɔ bin dɔn kil am, i bin tɔk bɔt Jiova se: “Yu dɔn trowe ɔl mi sin dɛn biɛn yu bak.” (Ayzaya 38:​17, NWT) Na dis vas, wi si se Jiova de tek pɔsin we dɔn ripɛnt, in sin dɛn ɛn trowe am biɛn Am usay I nɔ de si dɛn ɔ notis dɛn igen. Akɔdin to wan buk, dɛn wɔd ya min: “Yu dɔn tek [mi sin] dɛn lɛk se dɛn nɔ apin.” Dis nɔ mek wi gɛt kɔnfidɛns?

12. Aw prɔfɛt Mayka bin sho se we Jiova fɔgiv wi, I dɔn fɔgiv wi sote go?

¹² Di prɔfɛt Mayka bin sho se i biliv se Jiova go fɔgiv in pipul dɛn we dɔn ripɛnt bay we i tɔk se: “Us Gɔd tan lɛk yu, we de fɔgiv in pipul dɛn we dɔn lɛf . . . Yu go trowe ɔl wi sin dɛn na di dip say na di si.” (Mayka 7:​18, 19, NWT) Imajin wetin dɛn wɔd ya bin min fɔ di wan dɛn we bin de insay di tɛm we dɛn de rayt di Baybul. Yu tink se ɛni we bin de fɔ gɛt sɔntin bak we dɛn dɔn trowe “na di dip say na di si”? Di wɔd dɛn we Mayka bin rayt sho se we Jiova fɔgiv fɔ wi sin dɛn, i dɔn fɔgiv wi sote go.

13. Wetin Jizɔs in wɔd dɛn “Fɔgiv wi fɔ wi dɛt dɛn” min?

¹³ Fɔ sho aw Jiova de fɔgiv, Jizɔs bin gi ɛgzampul bɔt pɔsin we de trɔs ɛn pɔsin we dɛn trɔs to. Jizɔs bin tɛl wi fɔ pre se: “Fɔgiv wi fɔ wi dɛt dɛn.” (Matyu 6:​12, futnot) Jizɔs kɔmpia sin dɛn to dɛt. (Lyuk 11:​4) We wi sin, wi  dɔn gɛt “dɛt” fɔ pe Jiova. Wan buk se, di Grik vab we dɛn translet as “fɔgiv” min: “Fɔ fɔgɛt bɔt di dɛt ɛn nɔ aks fɔ am igen.” So we Jiova de fɔgiv wi, i de mek wi nɔ pe di dɛt igen we wi fɔ pe am. Dis go kɔrej di wan dɛn we dɔn ripɛnt. Jiova nɔ go ɛva tɛl wi fɔ pe dɛt we i bin dɔn se wi nɔ fɔ pe fɔ igen!—Sam 32:​1, 2.

14. Wetin di wɔd dɛn “wep kɔmɔt” de briŋ kam na pɔsin in maynd?

¹⁴ Akt 3:​19 ɛksplen bak aw Jiova de fɔgiv. Da vas de se: “Ripɛnt ɛn tɔn rawnd so dat una sin dɛn go wep kɔmɔt.” Di wɔd dɛn “wep kɔmɔt” na Grik vab we min “fɔ kansul ɔ dɔnawe wit.” Akɔdin to sɔm masta sabi bukman dɛn, di tin we de kam na pɔsin in maynd na we pɔsin de wep sɔntin we dɛn dɔn rayt. Aw dat pɔsibul? Trade trade, dɛn bin de mek di ink we dɛn de yuz wit kabɔn, gɔm, ɛn wata. Pɔsin kin tek spɔnj we sok ɛn wep di raytin jɔs afta i yuz di ink fɔ rayt. Dis na fayn we fɔ sho aw Jiova de fɔgiv wi. We i fɔgiv wi sin dɛn, i tan lɛk we i tek spɔnj ɛn wep dɛn.

15. Wetin Jiova want mek wi no bɔt am?

¹⁵ We wi tink bɔt dɛn difrɛn ɛgzampul dɛn ya, dat nɔ sho klia wan se Jiova want mek wi no se i rili rɛdi fɔ fɔgiv wi as lɔng as wi ripɛnt wit ɔl wi at? Wi nɔ fɔ fred se i go pɔnish wi fɔ dɛn sin dɛn de tumara bambay. Wi no dis bikɔs di Baybul tɛl wi sɔntin bɔt di we aw Jiova de fɔgiv: We i fɔgiv, i de fɔgɛt.

16, 17. Wetin i min we di Baybul se Jiova de fɔgɛt wi sin dɛn? Ɛksplen.

¹⁶ Jiova prɔmis di wan dɛn we de na di nyu agrimɛnt se: “A go fɔgiv dɛm fɔ dɛn wikɛdnɛs, ɛn a nɔ go mɛmba dɛn sin igen.” (Jɛrimaya 31:​34) Fɔ se dis min se we  Jiova fɔgiv wi, i nɔ de ebul fɔ mɛmba wi sin dɛn igen? Nɔ, nɔto dat i min. Di Baybul tɛl wi bɔt bɔku pipul dɛn we kɔmit sin ɛn Jiova fɔgiv dɛn; wan pan dɛn na Devid. (Sɛkɛn Samiɛl 11:​1-17; 12:​13) Jiova stil no di sin dɛn we dɛn bin kɔmit. Na fɔ wi yon bɛnifit mek dɛn rayt dɛn sin dɛn, di ripɛnt we dɛn ripɛnt, ɛn di fɔgiv we Gɔd fɔgiv dɛn. (Romans 15:​4) So, wetin di Baybul min we i se we Jiova fɔgiv pɔsin i nɔ de “mɛmba” in sin dɛn igen?

¹⁷ Di Ibru vab “go mɛmba” nɔ jɔs min fɔ mɛmba bɔt wetin bin dɔn apin trade. Di Theological Wordbook of the Old Testament tɔk se “i min bak fɔ du sɔntin bɔt  dat.” Na dis say, fɔ “mɛmba” min fɔ du sɔntin agens di wan dɛn we dɔn sin. (Ozie 9:​9) Bɔt we Gɔd se “a nɔ go mɛmba dɛn sin igen,” i de mek wi gɛt kɔnfidɛns se we i dɔn fɔgiv di wan dɛn we dɔn ripɛnt, i nɔ go du sɔntin to dɛn tumara bambay bikɔs ɔf dɛn sin dɛn. (Izikɛl 18:​21, 22) We Jiova fɔgɛt, i min se i nɔ de mɛmba wi sin dɛn igen so dat i go de pɔnish wi. We wi no se wi Gɔd de fɔgiv ɛn fɔgɛt, dat nɔ rili ɛnkɔrej wi?

18. Wetin mek we Jiova dɔn fɔgiv pɔsin we ripɛnt, dat nɔ min se no bad tin nɔ go apin to am?

¹⁸ Fɔ se bikɔs Jiova rɛdi fɔ fɔgiv, dat min se ivin we pɔsin dɔn ripɛnt natin bad nɔ go apin to am? Nɔ, nɔto so i bi. Wi nɔ go sin ɛn tink se natin bad nɔ go apin to wi. Pɔl bin rayt se: “Wetin pɔsin de plant, na in i go avɛst.” (Galeshians 6:​7) Wi sin dɛn kin mek sɔntin bad apin to wi. Dis nɔ min se afta we Jiova dɔn fɔgiv wi, i go mek bad tin apin to wi. We prɔblɛm mit Kristian, i nɔ fɔ fil se: ‘Sɔntɛm na Jiova de pɔnish mi fɔ mi sin dɛn trade.’ (Jems 1:​13) Bɔt, Jiova nɔ go protɛkt wi frɔm ɔl di bad tin dɛn we go apin to wi bikɔs ɔf wi sin dɛn. Sɔm pan di bad tin dɛn we kin apin to wi we wi nɔ go ebul fɔ avɔyd na dayvɔs, bɛlɛ we wi nɔ want, sik frɔm mami ɛn dadi biznɛs, ɛn wi kin lɔs wi rɛspɛkt ɔ dɛn nɔ go trɔst wi igen. Mɛmba se afta we Jiova dɔn fɔgiv Devid fɔ in sin dɛn we gɛt fɔ du wit Batshiba ɛn Yuraya, Jiova nɔ bin protɛkt am frɔm di bad tin dɛn we bin apin to am fɔ dɛn sin dɛn de.—Sɛkɛn Samiɛl 12:​9-12.

19-21. (a) Aw di lɔ we de na Lɛvitikɔs 6:​1-7 bin de bɛnifit di wan we dɛn du bad to ɛn di pɔsin we du bad to am? (b) If di bad tin we wi dɔn du ambɔg ɔda pipul dɛn, wetin wi go du we go mek Jiova gladi fɔ wi?

 ¹⁹ Ɔda bad tin dɛn kin apin we wi sin, mɔ if di tin we wi du ambɔg ɔda pipul dɛn. Fɔ ɛgzampul, tink bɔt wetin de na Lɛvitikɔs chapta 6. Di Lɔ we Gɔd bin gi Mozis tɔk bɔt pɔsin we du sɔntin we rili bad, we i siz in kɔmpin Izrɛlayt in prɔpati bay we i tif am, trɛtin am, ɔ kruk am. Dɔn di pɔsin dinay se nɔto so i bi, ɛn i ivin swɛ. Wetin i tɔk nɔ gri wit wetin di ɔda pɔsin se. Bɔt leta di pɔsin we du in kɔmpin bad in kɔnshɛns mɔna am ɛn i tɔk di tru. Fɔ mek Gɔd go fɔgiv am, i fɔ du tri ɔda tin dɛn: i fɔ gi di pɔsin bak wetin i dɔn tek na in an, i fɔ pe 20 pasɛnt fayn ɔf wetin i tif na di pɔsin in an, ɛn i fɔ gi wan man ship fɔ sin sakrifays. Dɔn di Lɔ se: “Di man we de mek sakrifays fɔ pipul sin go beg PAPA GƆD [“Jiova,” NWT] padin fɔ am.”—Lɛvitikɔs 6:​1-7.

²⁰ Dis lɔ na bin fayn arenjmɛnt we Gɔd mek fɔ sho se i gɛt sɔri-at. I de bɛnifit di pɔsin we dɛn ritɔn in prɔpati to, ɛn wi nɔ gɛt wan dawt se i go rili fil fayn we di pɔsin we du bad gri se i dɔn sin. Semweso, i de bɛnifit bak di wan we in kɔnshɛns ɛp am fɔ gri se i dɔn du bad ɛn tray fɔ du tin di rayt we. Fɔ tru, if i nɔ du dat, Gɔd nɔ go fɔgiv am.

²¹ Pan ɔl we wi nɔ de ɔnda di Lɔ we Gɔd bin gi Mozis, di Lɔ mek wi no di we aw Jiova de tink we i kam to fɔ fɔgiv. (Koloshians 2:​13, 14) If di bad tin we wi dɔn du ambɔg ɔda pipul dɛn, Gɔd kin gladi we wi de du ɔl wetin wi ebul fɔ kɔrɛkt wi mistek. (Matyu 5:​23, 24) Dis kin min se wi fɔ gri se wi dɔn sin, tɔk se wi dɔn du bad, ɛn ivin beg di pɔsin. Dɔn, wi kin beg Jiova tru Jizɔs in sakrifays ɛn gɛt kɔnfidɛns se i dɔn fɔgiv wi.—Ibruz 10:​21, 22.

22. Wetin bak Jiova kin du we i dɔn fɔgiv wi?

 ²² Jɔs lɛk papa we lɛk in pikin, Jiova kin fɔgiv wi ɛn kɔrɛkt wi. (Prɔvabs 3:​11, 12) Kristian we dɔn ripɛnt kin lɔs in wok as ɛlda, ministerial savant, ɛn as pɔsin we de yuz bɔku pan in tɛm fɔ prich. I go rili fil am we i lɔs dɛn wok ya fɔ sɔm tɛm, pan ɔl we i bi se dɛn impɔtant to am. Bɔt da kɔrɛkshɔn de nɔ min se Jiova nɔ fɔgiv am. Wi fɔ mɛmba se we Jiova kɔrɛkt wi, dat min se i lɛk wi. If wi tek di kɔrɛkshɔn ɛn fala in advays, i go bɛnifit wi.—Ibruz 12:​5-11.

23. Wetin mek wi nɔ fɔ ɛva tink se Jiova nɔ go fɔgiv wi? Wetin mek wi fɔ falamakata Jiova we i kam pan di we aw i de fɔgiv?

²³ Wi gladi fɔ no se wi Gɔd “de fɔgiv” wi! Ilɛk uskayn mistek dɛn wi dɔn mek, wi nɔ fɔ ɛva tink se Jiova nɔ go fɔgiv wi. If wi rili ripɛnt, wi du tin dɛn fɔ kɔrɛkt wi mistek, ɛn beg Jiova wit ɔl wi at fɔ fɔgiv wi tru Jizɔs in blɔd, dat go mek wi biliv tranga wan se Jiova go fɔgiv wi. (1 Jɔn 1:​9) Lɛ wi falamakata di we aw Jiova de fɔgiv we i kam pan di we aw wi de trit wi brɔda ɛn sista dɛn. If Jiova we nɔ de sin de fɔgiv wi, yu nɔ tink se wi mɔtalman we de sin fɔ tray wi bɛst fɔ de fɔgiv wi kɔmpin dɛn?