CHAPTA 23
“Na In Fɔs Lɛk Wi”
1-3. Wetin na sɔm tin dɛn we mek Jizɔs in day difrɛn frɔm ɔl ɔda day dɛn?
I DƆN ɔlmost 2,000 ia we dɛn bin tɔk wan inosɛnt man in kes, dɛn sɛntɛns am fɔ kraym dɛn we i nɔ wande du, ɛn dɛn wikɛd am te i day. Nɔto di fɔs tɛm dat we dɛn de kil pɔsin da bad we de we dɛn nɔ gɛt rayt fɔ kil am, ɛn i sɔri fɔ no se dat nɔto bin di las tɛm. Bɔt da man de in day bin difrɛn frɔm ɔl di ɔda wan dɛn.
2 As da man de bin de sɔfa bad bad wan jɔs bifo i day, di tin dɛn we apin na di skay sho se wetin bin apin rili impɔtant. Pan ɔl we na bin san santɛm, di ples jɔs dak wantɛm wantɛm. Wan istorian se “di san lɛf fɔ shayn.” (Lyuk 23:44, 45) Dɔn, jɔs bifo di man day, i tɔk dɛn wɔd dɛn ya: “I dɔn dɔn!” Fɔ tru, we i gi in layf, i du sɔntin we wɔndaful. Di sakrifays we i mek na di bɛst lɔv we ɛni mɔtalman dɔn ɛva sho.—Jɔn 15:13; 19:30.
3 Da man de na bin Jizɔs Krays. Bɔku pipul dɛn sabi di we aw i bin sɔfa ɛn day Naysan 14, insay di ia 33. Bɔt bɔku tɛm, dɛn kin fɔgɛt wan impɔtant tin. Pan ɔl we Jizɔs bin rili sɔfa, sɔmbɔdi de we bin sɔfa pas am. Infakt, sɔmbɔdi bin ivin sakrifays pas am da de de—di sakrifays we di pɔsin mek na di bɛst lɔv we ɛnibɔdi dɔn ɛva sho na ɛvin ɛn dis wɔl. Wetin di pɔsin bin du? Di ansa briŋ wi kam to wan impɔtant tin, dat na, Jiova in lɔv.
Di Bɛst Lɔv we Ɛnibɔdi Dɔn Ɛva Sho
4. Aw wan Roman sojaman kam fɔ no se Jizɔs nɔto ɔdinari mɔtalman? Wetin di sojaman se?
4 Di Roman ɔfisa we bin de oba di wan dɛn we de kil Jizɔs bin sɔprayz we di ples dak bifo Jizɔs day ɛn we bad bad atkwek apin afta i day. Di ɔfisa se: “Fɔ tru, dis na Gɔd in Pikin.” (Matyu 27:54) I bin klia se Jizɔs nɔto ɔdinari mɔtalman. Da sojaman de bin dɔn ɛp fɔ kil Gɔd we De Pantap Ɔlman, in wangren Pikin we insɛf sɛf mek! Uskayn we di Papa lɛk dis in Pikin?
5. Ɔmɔs ia di Pikin bin dɔn liv wit in Papa na ɛvin bifo i kam na di wɔl?
5 Di Baybul se na Jizɔs “fɔs Gɔd mek bifo ɛni ɔda tin.” (Koloshians 1:15) Jɔs tink bɔt dis—Jiova in Pikin bin dɔn de bifo I mek di wɔl, di sta dɛn, ɛn ɔda planɛt dɛn. So aw lɔng di Papa ɛn di Pikin dɔn de togɛda? Sɔm sayɛnsman dɛn se di wɔl, di sta dɛn, ɛn ɔda planɛt dɛn dɔn de fɔ 13 bilyɔn ia. Yu ebul fɔ imajin aw lɔng dat bi? Ivin if wetin dɛn se kɔrɛkt, Jiova in Pikin dɔn liv pas 13 bilyɔn ia! Wetin i bin de du ɔl dɛn tɛm dɛn de?
6. (a) Wetin Jiova in Pikin bin de du bifo i kam na di wɔl as mɔtalman? (b) Uskayn we Jiova ɛn in Pikin lɛk dɛnsɛf?
6 Di Pikin bin gladi fɔ de nia in Papa as “man we sabi wok.” (Prɔvabs 8:30, NWT) Di Baybul se: “Natin nɔ de we Gɔd nɔ yuz [di Pikin] fɔ mek.” (Jɔn 1:3) So Jiova ɛn in Pikin bin wok togɛda fɔ mek ɔl di ɔda tin dɛn. Dɛn go dɔn rili ɛnjɔy dɛnsɛf da tɛm de! Bɔku pipul dɛn go gri se mama ɛn papa dɛn kin rili lɛk dɛn pikin dɛn. Ɛn lɔv “de mek pipul dɛn rili gɛt wanwɔd.” (Koloshians 3:14) Udat pan wi go bigin fɔ ɔndastand di kayn lɔv we dɔn de bitwin di Papa ɛn di Pikin frɔm we dɛn de togɛda ɔl dɛn tɛm dɛn de? Dis dɔn sho klia wan se di we aw Jiova Gɔd ɛn in Pikin lɛk dɛnsɛf, in kayn nɔ ɛva de.
7. We Jizɔs baptayz, aw Jiova bin sho aw i fil bɔt in Pikin?
7 Bɔt pan ɔl dat, di Papa sɛn in Pikin na di wɔl fɔ mek dɛn bɔn am as bebi. We Jiova du dis, dat min se fɔ sɔm tɛm in ɛn in Pikin we i rili lɛk nɔ go de togɛda na ɛvin. Jiova bin rili bisin bɔt Jizɔs, so i bin de wach am we i de gro ɔp as pafɛkt mɔtalman. Jizɔs bin ol lɛk 30 ia so we i baptayz. Wi nɔ nid fɔ gɛs aw Jiova bin fil we i du dat. Di Papa insɛf sɛf tɔk frɔm ɛvin se: “Na mi Pikin dis, di wan we a rili lɛk, ɛn we a gladi fɔ.” (Matyu 3:17) Jizɔs in Papa go dɔn rili gladi we i du ɔl wetin dɛn bin dɔn tɔk se i go du, dat na, ɔl wetin I bin tɛl am fɔ du!—Jɔn 5:36; 17:4.
8, 9. (a) Wetin bin apin to Jizɔs Naysan 14, insay di ia 33? Aw in Papa we de na ɛvin bin fil? (b) Wetin mek Jiova alaw in Pikin fɔ sɔfa ɛn day?
8 Bɔt aw Jiova bin fil Naysan 14, insay di ia 33? Aw i bin fil we dɛn kɔmɔt biɛn Jizɔs ɛn wan grup arɛst am na nɛt? Aw i bin fil we Jizɔs in padi dɛn lɛf am ɛn we dɛn nɔ tɔk in kes di rayt we? Aw i bin fil we dɛn bin de provok am, pit pan am, ɛn bɔks am? Aw i bin fil we dɛn bin de bit am ɛn wund wund in bak? Aw i bin fil we dɛn nel in an ɛn fut dɛn na wan stret tik ɛn lɛf am fɔ ɛng de ɛn bɔku pipul dɛn de tɛl am bad wɔd? Aw di Papa bin de fil we in Pikin we i rili lɛk bin de kray to am we i bin de fil siriɔs pen? Aw Jiova bin fil we Jizɔs bin day, as dis na di fɔs tɛm we in Pikin we i rili lɛk nɔ gɛt layf frɔm we i bigin mek tin dɛn?—Matyu 26:14-16, 46, 47, 56, 59, 67; 27:38-44, 46; Jɔn 19:1.
“Gɔd . . . gi in wangren Pikin we insɛf sɛf mek”
9 Wi nɔ gɛt wɔd fɔ tɔk. Bikɔs Jiova de fil, wɔd nɔ de we de sho di pen we i bin fil we in Pikin day. Di tin we wi go ebul fɔ tɔk na di rizin we mek Jiova alaw dat fɔ apin. Wetin mek di Papa alaw insɛf fɔ sɔfa da kayn we de? Jiova tɛl wi sɔntin we wɔndaful na Jɔn 3:16. Dis na vas we so impɔtant dat pipul dɛn de kɔl am di smɔl Gɔspɛl. I se: “Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.” So Jiova du dis bikɔs ɔf lɔv. Jiova in gift, dat na, di sɛn we i sɛn in Pikin fɔ sɔfa ɛn day fɔ wi, na di bɛst lɔv we ɛnibɔdi dɔn ɛva sho.
Wetin Gɔd in Lɔv Min?
10. Wetin mɔtalman dɛn nid? Wetin dɔn apin to di minin we di wɔd “lɔv” gɛt?
10 Wetin di wɔd “lɔv” min? Dɛn se lɔv na di tin we mɔtalman nid pas ɛni ɔda tin. Frɔm we dɛn bɔn pipul dɛn te dɛn day, dɛn de tray fɔ mek dɛn sho dɛn lɔv, dɛn de du wɛl we dɛn sho dɛn lɔv, dɛn de ivin sɔfa ɛn day we dɛn nɔ sho dɛn lɔv. Bɔt stil, i at fɔ sho wetin lɔv min. Na tru se pipul dɛn de tɔk bɔku bɔt lɔv. Di buk dɛn, siŋ dɛn, ɛn pɔym dɛn we de tɔk tɔk bɔt lɔv nɔ de dɔn. Dɛn nɔ de sho wi klia wan wetin lɔv min. Infakt, pipul dɛn kin so yuz di wɔd dat, i at fɔ ɔndastand wetin i rili min.
11, 12. (a) Usay wi kin lan bɔku tin bɔt lɔv? Wetin mek na de? (b) Wetin na di difrɛn wɔd dɛn fɔ lɔv we bin de insay di Grik langwej trade? Us wɔd fɔ “lɔv” dɛn yuz pas di ɔda wan dɛn na di Kristian Grik Skripchɔ dɛn? (Luk bak di futnot.) (c) Wetin na agape?
11 Bɔt di Baybul de tich klia wan wetin lɔv min. Vine’s Expository Dictionary of New Testament Words se: “Di wangren we we pɔsin go no bɔt lɔv na frɔm di tin dɛn we i de mek sɔmbɔdi du.” Di tin dɛn we Jiova du we de na di Baybul de tich wi bɔku tin dɛn bɔt Jiova in lɔv, dat na, di lɛk we i rili lɛk di wan dɛn we i mek. Fɔ ɛgzampul, wetin go tɛl wi mɔ bɔt dis kwaliti pas di bɛst ɛgzampul we Jiova insɛf sɛf sho we wi bin dɔn tɔk bɔt? Insay di chapta dɛn we de afta dis wan, wi go si bɔku ɛgzampul dɛn bɔt tin dɛn we Jiova du we sho se i gɛt lɔv. Pantap dat, wi go lan sɔntin frɔm di orijinal wɔd dɛn we di Baybul yuz fɔ “lɔv.” Insay di Grik langwej we bin de trade, dɛn bin gɛt 4 wɔd dɛn fɔ “lɔv.” * Pan dɛn ɔl, di wan we dɛn yuz mɔ insay di Kristian Grik Skripchɔ dɛn na agape. Wan Baybul dikshɔnari tɔk se dis na “di wɔd we pawaful pas ɔl we pɔsin kin imajin fɔ lɔv.” Wetin mek?
12 Agape na we pɔsin de yuz prinsipul fɔ sho lɔv. I pas di we aw pɔsin de fil bɔt ɔda pɔsin we di pɔsin du ɔ se sɔntin. I de mek pɔsin tink bifo i du sɔntin ɛn gɛt rizin fɔ du am. Pantap dat, agape de mek lɛ pɔsin nɔ jɔs bisin bɔt insɛf nɔmɔ. Fɔ ɛgzampul, luk Jɔn 3:16 bak. Wetin na “di wɔl” we Gɔd rili lɛk we mek i gi in wangren Pikin we insɛf sɛf mek? Na di mɔtalman dɛn we Gɔd go bay bak. Bɔku pan dɛn na pipul dɛn we de liv bad layf. Fɔ se Jiova lɛk dɛn as padi lɛk aw i bin lɛk Ebraam we bin fetful? (Jems 2:23) Nɔ-o, bɔt Jiova de du gud to ɔlman, ivin if i min se i go sakrifays sɔntin. I want lɛ ɔlman ripɛnt ɛn chenj di we aw dɛn de liv dɛn layf. (2 Pita 3:9) Ɛn bɔku pipul dɛn de du dat. Na dɛn wan ya i kin gladi fɔ tek as in padi dɛn.
13, 14. Wetin sho se agape na lɔv we de mek pɔsin rili lɛk in kɔmpin?
13 Bɔt sɔm pipul dɛn de tink di rɔng we bɔt agape. Dɛn tink se agape na lɔv we de mek pipul dɛn nɔ bisin bɔt pɔsin ɔ na lɔv we nɔ de kɔmɔt na pɔsin in at. Bɔt agape na lɔv we de mek pɔsin rili lɛk in kɔmpin. Fɔ ɛgzampul, we Jɔn bin rayt se, “Di Papa lɛk di Pikin,” i bin yuz di wɔd agape. Fɔ se di Papa nɔ bin rili lɛk di Pikin? Luk wetin Jizɔs se, “Di Papa rili lɛk di Pikin.” Na ya i yuz di wɔd fileo. (Jɔn 3:35; 5:20) Jiova kin sho bɔku tɛm se i rili gɛt lɔv. Bɔt i nɔ de sho lɔv jɔs bikɔs ɔf aw i de fil. I de yuz in prinsipul dɛn we mek sɛns ɛn we fia ɔltɛm we i de sho lɔv.
14 As wi dɔn si, Jiova in kwaliti dɛn ɔl na di bɛst, dɛn pafɛkt, ɛn dɛn de mek wi want fɔ kam nia am. Bɔt na in lɔv de mek wi want fɔ kam nia am mɔ. Natin nɔ de we de mek wi kam nia Jiova pas lɔv. I fayn fɔ no se lɔv na in men kwaliti. Aw wi no dat?
“Gɔd Na Lɔv”
15. Wetin di Baybul tɔk bɔt Jiova in kwaliti we na lɔv? Wetin mek i spɛshal? (Luk bak di futnot.)
15 Di Baybul tɔk sɔntin bɔt lɔv we i nɔ ɛva tɔk bɔt Jiova in ɔda men kwaliti dɛn. Di Baybul nɔ se Gɔd na pawa ɔ Gɔd na jɔstis ɔ ivin se Gɔd na sɛns. I gɛt dɛn kwaliti dɛn de, na frɔm am dɛn kɔmɔt, ɛn pɔsin nɔ go kɔmpia am to ɛnibɔdi ɔ ɛnitin we i kam pan dɛn tri kwaliti dɛn de. Bɔt we i kam to di kwaliti we mek 4, dɛn tɔk sɔntin bɔt am we mek i gɛt mɔ wet. Dɛn se: “Gɔd na lɔv.” * (1 Jɔn 4:8) Wetin dat min?
16-18. (a) Wetin mek di Baybul se “Gɔd na lɔv”? (b) Pan ɔl di tin dɛn we Gɔd mek na dis wɔl, wetin mek na mɔtalman fit fɔ tinap fɔ Jiova in kwaliti we na lɔv?
16 Fɔ se “Gɔd na lɔv” nɔto simpul mat, lɛk we pɔsin de se, “Gɔd ikwal to lɔv.” Wi nɔ go ebul fɔ tɔn di wɔd dɛn ɛn se “lɔv na Gɔd.” Jiova nɔto jɔs kwaliti we wi nɔ de si. In na pɔsin we gɛt filin, ɛn i gɛt ɔda kwaliti dɛn apat frɔm lɔv. Bɔt lɔv rili de insay Jiova. Wan buk bin tɔk bɔt dis vas se: “Gɔd insɛf sɛf na lɔv ɔ ɔltin bɔt Gɔd na lɔv.” Wi kin tink bɔt am dis we: Jiova in pawa de mek i ebul fɔ du sɔntin. In jɔstis ɛn in sɛns de sho am aw i fɔ du sɔntin. Bɔt Jiova in lɔv na in de mek i du sɔntin. Ɛn we i de yuz in ɔda kwaliti dɛn, i de du am wit lɔv ɔltɛm.
17 Bɔku tɛm dɛn kin se Jiova na di bɛst ɛgzampul we i kam pan lɔv. So, if wi want fɔ lan bɔt agape, wi fɔ lan bɔt Jiova. Na tru se wi kin si dis fayn kwaliti bak pan mɔtalman dɛn. Bɔt wetin mek dɛn gɛt am? We Gɔd bin de mek di wɔl, i tɛl in Pikin se: “Lɛ wi mek mɔtalman we go tan lɛkɛ wi.” (Jɛnɛsis 1:26) Pan ɔl di tin dɛn we Gɔd mek na dis wɔl, na man ɛn uman nɔmɔ kin disayd fɔ sho lɔv ɛn falamakata dɛn Papa we de na ɛvin. Mɛmba se Jiova yuz difrɛn animal dɛn fɔ tinap fɔ in men kwaliti dɛn. Bɔt Jiova yuz di bɛst pan ɔl di tin dɛn we i mek na di wɔl, dat na, mɔtalman, fɔ tinap fɔ in kwaliti we pas ɔl, we na lɔv.—Izikɛl 1:10.
18 We wi yuz prinsipul ɛn wi nɔ jɔs tink bɔt wisɛf we wi de sho lɔv, wi de falamakata Jiova in kwaliti we pas ɔl. I jɔs tan lɛk wetin apɔsul Jɔn bin rayt, we i se: “Wi de sho lɔv, bikɔs na in fɔs lɛk wi.” (1 Jɔn 4:19) Us we dɛn Jiova dɔn sho se na in fɔs lɛk wi?
Na Jiova Fɔs Du Sɔntin
19. Wetin mek wi go se lɔv na wan men tin we mek Jiova bigin fɔ mek tin dɛn?
19 Lɔv nɔto nyu tin. Wetin mek Jiova bigin fɔ mek tin dɛn naw? Nɔto bikɔs i fil se na in wangren de, ɛn i nid pɔsin fɔ de nia am. Jiova gɛt ɔltin, natin nɔ de we i nɔ gɛt we pɔsin fɔ gi am. Bɔt na in lɔv we i de sho na in mek i gi layf to enjɛl ɛn mɔtalman dɛn we go sho se dɛn gladi fɔ da gift de. “Di fɔs pɔsin we Gɔd mek bifo i mek ɛni ɔda tin” na in wangren Pikin we insɛf sɛf mek. (Rɛvɛleshɔn 3:14) Dɔn Jiova yuz dis in Pikin, we na man we sabi wok, fɔ mek ɔl di ɔda tin dɛn; na di enjɛl dɛn fɔs dɛn mek. (Job 38:4, 7; Koloshians 1:16) Gɔd bin blɛs dɛn pawaful spirit ya wit fridɔm, sɛns, ɛn filin, so dɛn bin gɛt di chans fɔ sho lɔv to dɛn kɔmpin dɛn ɛn to Jiova Gɔd. (2 Kɔrintians 3:17) So, dɛn sho lɔv bikɔs dɛn bin dɔn sho dɛn lɔv.
20, 21. Aw Jiova bin sho se i lɛk Adam ɛn Iv? Wetin Adam ɛn Iv bin du?
20 Na di sem tin bi wit mɔtalman. Frɔm di biginin, Jiova sho Adam ɛn Iv lɔv pasmak. Ɛnisay we dɛn luk na di Paradays we dɛn bin de na Idɛn, dɛn bin de si se dɛn Papa lɛk dɛn. Luk wetin di Baybul se: “PAPA GƆD [“Jiova,” NWT] mek wan fam [“gadin,” NWT] na Idɛn we de na di ist ɛn put di man we i bin dɔn mek de.” (Jɛnɛsis 2:8) Yu dɔn ɛva go na gadin we rili rili fayn? Wetin mɔ yu bin lɛk? Na di layt we de shayn tru di lif dɛn na wan kɔna? Na di difrɛn difrɛn kɔlɔ dɛn we di flawa dɛn gɛt? Na di sawnd we di wata we de rɔn, di bɔd dɛn we de siŋ, ɛn di insɛkt dɛn we de ɔm de mek? Na di sɛnt we di tik dɛn, frut dɛn, ɛn flawa dɛn gɛt? Ilɛk aw da gadin de fayn, no gadin nɔ de tide we pɔsin go kɔmpia to di wan we bin de na Idɛn. Wetin mek?
21 Na Jiova insɛf sɛf bin mek da gadin de! Wɔd nɔ de fɔ ɛksplen aw di gadin bin fayn. Ɔlkayn tik we de mek ples fayn ɛn we gɛt frut dɛn we swit bin de de. Bɔku wata bin de na di gadin, i bin big, ɛn difrɛn kayn animal dɛn bin de de. Adam ɛn Iv bin gɛt ɔltin we fɔ mek dɛn gladi ɛn ɛnjɔy layf; dɛn bin gɛt fayn wok fɔ du ɛn dɛn tu bin pafɛkt. Na Jiova in fɔs lɛk dɛn, ɛn dɛn bin gɛt bɔku rizin fɔ lɛk Jiova bak. Bɔt dɛn nɔ du dat. Bifo dɛn obe dɛn Papa we de na ɛvin bikɔs dɛn lɛk am, dɛn tɔn dɛn bak pan am bikɔs dɛn jɔs bisin bɔt dɛnsɛf.—Jɛnɛsis, chapta 2.
22. Aw Jiova sho se in lɔv de de sote go bay wetin i du we Adam ɛn Iv tɔn dɛn bak pan am na Idɛn?
22 Dat go dɔn mek Jiova in at rili pwɛl! Fɔ se dis tɔn we dɛn tɔn dɛn bak pan am mek i nɔ de sho lɔv igen? Nɔ-o! “In lɔv de de sote go.” (Sam 136:1) So, wantɛm wantɛm i mek arenjmɛnt dɛn fɔ fri Adam ɛn Iv dɛn pikin dɛn we rili sho se dɛn want fɔ gɛt layf we go de sote go. As wi bin dɔn si, wan pan di arenjmɛnt dɛn na fɔ mek in Pikin we i rili lɛk kam day fɔ pe di prayz fɔ pul wi pan sin, pan ɔl we dis na bin sakrifays we nɔ izi fɔ am.—1 Jɔn 4:10.
23. Wetin na wan pan di rizin dɛn we mek Jiova na “di Gɔd we gladi”? Us impɔtant kwɛstyɔn wi go tɔk bɔt insay di nɛks chapta?
23 Fɔ tru, frɔm di biginin na Jiova fɔs dɔn sho se i lɛk mɔtalman. Bɔku bɔku we dɛn de we Jiova dɔn sho se “na in fɔs lɛk wi.” Lɔv de mek wanwɔd ɛn gladi-at de, so no wɔnda we di Baybul se Jiova na “di Gɔd we gladi.” (1 Timoti 1:11) Bɔt wan kwɛstyɔn de we impɔtant. Jiova rili lɛk wi wan bay wan? Di nɛks chapta go ansa da kwɛstyɔn de.
^ par. 11 Dɛn yuz di vab fileo we min “fɔ rili lɛk (lɛk aw pɔsin de fil bɔt in tayt padi ɔ brɔda),” bɔku tɛm insay di Kristian Grik Skripchɔ dɛn. Dɛn yuz di wɔd stɔgi, ɔ lɔv we kin de bitwin di wan dɛn we de na di sem famili, na 2 Timoti 3:3 fɔ sho se da kayn lɔv de nɔ go rili de insay di las dez. Dɛn nɔ yuz di wɔd ɛrɔs, ɔ lɔv we kin de bitwin man ɛn uman, insay di Kristian Grik Skripchɔ dɛn, pan ɔl we dɛn tɔk bɔt da kayn lɔv de na di Baybul.—Prɔvabs 5:15-20.
^ par. 15 Ɔda skripchɔ dɛn de we fiba dis wan. Fɔ ɛgzampul, “Gɔd na layt” ɛn “Gɔd na faya we de pwɛl kpatakpata.” (1 Jɔn 1:5; Ibruz 12:29) Bɔt wi go ɔndastand dis as mɛtafɔ, bikɔs dɛn de kɔmpia Jiova to tin dɛn we wi de si. Jiova tan lɛk layt, bikɔs i oli ɛn i de du tin tret. “Daknɛs” nɔ de pan am ɛn i nɔ dɔti. Ɛn dɛn kin kɔmpia am to faya, bikɔs i kin yuz in pawa fɔ dɔnawe wit pipul dɛn ɔ tin dɛn.
