1, 2. Us bad tin dɛn we kin mɔna pipul dɛn tide? Aw dɛn tin dɛn de de afɛkt wi?

IMAJIN se wan pikin lɔs in tɔys ɔ pwɛl am, dɔn i bɔs kray. Di we aw i de kray sɔriful. Bɔt yu dɔn ɛva si aw di pikin kin gladi we in mama ɔ papa gi am bak di tin we i lɔs ɔ pwɛl? To di mama ɔ papa, na smɔl tin fɔ fɛn di tɔys we lɔs ɔ fɔ mek am. Bɔt di pikin kin gladi ɛn i kin kɔle. I dɔn gɛt bak di tin we i bin tink se i nɔ go ɛva gɛt igen.

² Jiova we na di Papa we pas ɔl, gɛt di pawa fɔ mek sɔntin lɛk aw i bin de pan ɔl we in pikin dɛn we de na di wɔl go tink se dɛn nɔ go ɛva gɛt da tin de bak. Bɔt nɔto ɔdinari tɔys wi de tɔk bɔt. Insay dɛn tɛm ya we “tin go tranga ɛn bad,” wi go lɔs bɔku tin dɛn we rili impɔtant. (2 Timoti 3:​1-5) I tan lɛk se bɔku pan di tin dɛn we pipul dɛn rili lɛk nɔ sef, lɛk os, prɔpati, wok, ɛn wɛlbɔdi. Wi at kin pwɛl bak we wi tink bɔt aw pipul dɛn de pwɛl di wɔl, we dɔn mek difrɛn kayn plant ɛn animal dɛn we bin de trade nɔ de igen. Natin nɔ de we de mɔna wi pas we sɔmbɔdi we wi lɛk day. Di filin fɔ se wi dɔn lɔs ɔltin ɛn wi nɔ gɛt pawa fɔ du ɛnitin igen kin pasmak.—Sɛkɛn Samiɛl 18:​33.

3. Wetin de na Akt 3:​21 we go mek wi gladi? Wetin Jiova go yuz fɔ mek dat bi?

³ Wi kin rili gladi fɔ lan bɔt di pawa we Jiova gɛt fɔ mek sɔntin bak lɛk aw i bin de! As wi go lan, wi go si bɔku tin dɛn we Gɔd ebul mek bak lɛk aw dɛn bin de fɔ in pikin dɛn we de na di wɔl, ɛn i go du dat. Infakt, di Baybul sho se Jiova want fɔ mek “ɔltin kam bak lɛk aw dɛn bin de.” (Akt 3:​21) Fɔ du dis, Jiova go yuz di Kiŋdɔm we in Pikin, Jizɔs Krays de rul. Di  tin dɛn we de apin de sho se dis Kiŋdɔm bin dɔn bigin fɔ rul na ɛvin insay 1914. * (Matyu 24:​3-14) Wetin Jiova go mek bak lɛk aw i bin de? Lɛ wi tɔk bɔt sɔm wɔndaful tin dɛn we Jiova dɔn mek bak lɛk aw dɛn bin de. Wan pan dɛn tin dɛn de na tin we de apin to wi ɛn wi de si am. Ɔda wan dɛn go apin mɔ tumara bambay.

4, 5. Wetin apin to Gɔd in pipul dɛn insay di ia 607 bifo Krays? Us op Jiova bin gi dɛn?

⁴ Wan tin we Jiova dɔn ɔlrɛdi mek bak lɛk aw i bin de na tru wɔship. Fɔ lɛ wi ɔndastand wetin dat min, lɛ wi tɔk smɔl bɔt di istri bɔt di kiŋdɔm na Juda. If wi du dat, wi go ɔndastand aw Jiova dɔn de yuz in pawa fɔ mek tin dɛn lɛk aw dɛn bin de.—Romans 15:​4.

⁵ Jɔs imajin aw fetful Ju dɛn bin fil insay di ia 607 bifo Krays we dɛn dɔnawe wit Jerusɛlɛm. Dɛn siti we dɛn bin lɛk bin dɔn pwɛl pwɛl, di wɔl dɛn ɔl bin dɔn fɔdɔm fɔdɔm. Wetin wɔs pas dat, di fayn fayn tɛmpul we Sɔlɔmɔn bin dɔn bil, we na di wangren say usay dɛn bin de wɔship Jiova di rayt we na di wɔl, bin dɔn pwɛl pwɛl. (Sam 79:​1) Dɛn bin kɛr go di wan dɛn we bin sev, na Babilɔn. Ɛn dɛn om-tɔŋ bin lɛf ɛmti wan usay wayl animal dɛn de. (Jɛrimaya 9:​11) To mɔtalman, i bin tan lɛk se ɔltin dɔn dɔn fɔ dɛn. (Sam 137:​1) Bɔt Jiova we bin dɔn tɔk lɔng tɛm fɔ se dis kayn tin go apin, bin gi dɛn op fɔ se tɛm go kam we i go mek ɔltin bak lɛk aw dɛn bin de.

6-8. (a) Us tin dɛn we di Ibru prɔfɛt dɛn bin rayt bɔt bɔku tɛm? Aw di fɔs pat pan di prɔfɛsi dɛn bin apin? (b) Insay dis wi yon tɛm, aw Gɔd in pipul dɛn dɔn si we bɔku prɔfɛsi dɛn we tɔk bɔt aw Gɔd go mek ɔltin bak lɛk aw dɛn bin de, dɔn apin?

 ⁶ Infakt, fɔ lɛ Gɔd mek sɔntin lɛk aw i bin de bak na tin we di Ibru prɔfɛt dɛn bin rayt bɔt bɔku tɛm. * Jiova bin yuz dɛn fɔ prɔmis se i go mek di land fayn bak ɛn pipul dɛn go de de, di grɔn go fayn fɔ plant, ɛn I go protɛkt dɛn frɔm dɛn ɛnimi dɛn ɛn wayl animal dɛn. I bin tɔk se dɛn land we i go mek bak go tan lɛk rial Paradays. (Ayzaya 65:​25; Izikɛl 34:​25; 36:​35) Pantap dat, tru wɔship go kam bak, ɛn dɛn go bil di tɛmpul bak. (Mayka 4:​1-5) Dɛn prɔfɛsi dɛn ya bin gi op to di Ju dɛn we dɛn bin kɛr go, i ɛp dɛn fɔ bia di 70 ia we dɛn bin de na Babilɔn.

⁷ Afta lɔng tɛm, di tɛm bin rich fɔ lɛ Jiova mek ɔltin bak lɛk aw dɛn bin de. Di Ju dɛn bin fri frɔm Babilɔn, dɛn kam bak na Jerusɛlɛm, ɛn bil bak Jiova in tɛmpul. (Ɛzra 1:​1, 2) If dɛn sɔpɔt tru wɔship, Jiova go blɛs dɛn ɛn mek dɛn land fayn fɔ plant. I bin protɛkt dɛn frɔm dɛn ɛnimi dɛn ɛn frɔm wayl animal dɛn we bin dɔn de na dɛn land fɔ lɔng tɛm. Jɔs imajin aw dɛn go dɔn gladi we Jiova yuz in pawa fɔ mek ɔltin bak lɛk aw dɛn bin de! Bɔt dɛn tin dɛn ya we apin na jɔs di fɔs pat pan di prɔfɛsi dɛn we de tɔk bɔt aw Gɔd go mek ɔltin bak lɛk aw dɛn bin de. “Di tɛm go kam,” dat na insay wi yon tɛm, we di sɛkɔn pat we pas di fɔs wan go apin, we di Pɔsin we dɛn bin dɔn tɔk bɔt we kɔmɔt na Kiŋ Devid in famili layn go bigin rul.—Ayzaya 2:​2-4; 9:​6, 7.

⁸ Jɔs afta we Jizɔs bin bigin fɔ rul na ɛvin insay 1914, i du sɔntin fɔ ɛp Gɔd in fetful pipul dɛn na dis wɔl fɔ gɛt tayt padi biznɛs wit Gɔd. Jɔs lɛk aw di Pashian kiŋ, Sayrɔs, bin fri sɔm Ju dɛn frɔm Babilɔn insay di ia 537 bifo Krays, na so Jizɔs bin fri di wan dɛn we de fala am, frɔm Babilɔn we de tide, dat na ɔl di lay lay rilijɔn dɛn na di wɔl. (Romans 2:​29; Rɛvɛleshɔn  18:​1-5) Frɔm 1919, tru Kristian dɛn dɔn de wɔship Gɔd di rayt we lɛk aw i bin de fɔs. (Malakay 3:​1-5) Frɔm da tɛm de, i tan lɛk se Jiova in pipul dɛn dɔn de wɔship am insay in spirichwal tɛmpul, dat na di arenjmɛnt we Gɔd dɔn mek fɔ wɔship am di rayt we. Wetin mek dis impɔtant to wi tide?

9. Afta di apɔsul dɛn tɛm, wetin lay lay Kristian dɛn du fɔ ambɔg tru wɔship? Wetin Jiova dɔn du insay wi tɛm?

⁹ Tink bɔt di istri bɔt tru wɔship. Di Kristian dɛn we bin de insay di apɔsul dɛn tɛm bin de ɛnjɔy bɔku blɛsin dɛn we i kam pan Gɔd biznɛs. Bɔt Jizɔs ɛn di apɔsul dɛn bin dɔn tɔk se pipul dɛn go ambɔg tru wɔship ɛn i go at fɔ fɛn. (Matyu 13:​24-30; Akt 20:​29, 30) Afta di apɔsul dɛn tɛm, lay lay Kristian dɛn bin bigin. Di bigman dɛn pan lay lay rilijɔn bin bigin fɔ gri wit di tin dɛn we di pegan dɛn bin de tich ɛn di we aw dɛn bin de du tin. Dɛn mek bak i nɔ izi fɔ go nia Gɔd bay we dɛn de tich se Gɔd na Triniti we at fɔ ɔndastand. Dɔn, dɛn de tich bak se pipul dɛn fɔ kɔnfɛs dɛn sin to prist ɛn dɛn fɔ pre to Meri ɛn ɔda “sent dɛn,” bifo dɛn pre to Jiova. Wetin Jiova dɔn du afta lɔng tɛm we pipul dɛn dɔn ambɔg tru wɔship? Di wɔl tide ful-ɔp wit lay lay rilijɔn dɛn we de tich lay lay tin dɛn ɛn we de du bɔku bɔku dɔti tin dɛn. Bɔt Jiova dɔn du sɔntin fɔ mek tru wɔship kam bak! Wi go tɔk se fɔ lɛ Jiova mek pipul dɛn wɔship am di rayt we na wan pan di impɔtant tin dɛn we dɔn apin insay wi tɛm.

10, 11. (a) Us tu tin dɛn de insay di spɛshal paradays? Wetin dat gɛt fɔ du wit yu? (b) Uskayn pipul dɛn Jiova dɔn put insay di spɛshal paradays? Wetin dɛn go gɛt di ɔnɔ fɔ si?

¹⁰ So tru Kristian dɛn tide de ɛnjɔy wan spɛshal paradays. Wetin-ɛn-wetin de insay dis paradays? Na tu men tin dɛn. Di fɔs wan na di rayt we aw wi de wɔship di tru Gɔd, Jiova. I dɔn mek wi de wɔship am di rayt we we nɔ gɛt wan lay lay ɛn bɛnbɛn. I de gi wi tin dɛn we de mek wi gɛt tayt padi biznɛs wit am. Dis de ɛp wi fɔ lan bɔt wi Papa we de na ɛvin, fɔ du  wetin de mek i gladi, ɛn fɔ kam nia am. (Jɔn 4:​24) Di sɛkɔn tin we wi de ɛnjɔy na dis paradays gɛt fɔ du wit pipul dɛn. Jɔs lɛk wetin Ayzaya bin tɔk, “di tɛm go kam” we Jiova go tich di wan dɛn we de wɔship am aw fɔ gɛt pis. Tide, i dɔn mek wi nɔ de fɛt wisɛf. Pan ɔl we wi nɔ pafɛkt, i dɔn ɛp wi fɔ gɛt “di nyu abit dɛn.” I de sho se i gladi fɔ wetin wi de du bay we i de gi wi in oli spirit we de mek wi gɛt fayn fayn kwaliti dɛn. (Ɛfishians 4:​22-24; Galeshians 5:​22, 23) We yu du wetin Gɔd in spirit want, dat de sho se yu de pat pan di spɛshal paradays.

¹¹ Jiova dɔn briŋ kam pipul dɛn we i lɛk fɔ de insay dis paradays, dat na pipul dɛn we lɛk am, we lɛk pis, ɛn we “no se dɛn nid fɔ lan bɔt Gɔd.” (Matyu 5:​3) Na dɛn kayn pipul dɛn de go gɛt di ɔnɔ fɔ si di wɔndaful tɛm we Gɔd go mek ɔltin bak lɛk aw i bin want, dat na mɔtalman ɛn di wɔl.

12, 13. (a) Wetin mek wi go se di prɔfɛsi dɛn bɔt aw Gɔd go mek ɔltin bak lɛk aw dɛn bin de stil gɛt fɔ apin ɔda we? (b) Wetin Jiova bin sho klia wan na Idɛn bɔt wetin i want fɔ di wɔl? Wetin mek dis gi wi op fɔ tumara bambay?

¹² Bɔku pan di prɔfɛsi dɛn we de tɔk bɔt aw Gɔd gɛt fɔ mek ɔltin bak lɛk aw dɛn bin de nɔ jɔs gɛt fɔ du wit tru wɔship. Fɔ ɛgzampul, Ayzaya bin tɔk bɔt tɛm we di wan dɛn we sik, di wan dɛn we kripul dɛn, di wan dɛn we blayn, ɛn di wan dɛn we dɛf go wɛl ɛn day sɛf nɔ go de igen. (Ayzaya 25:​8; 35:​1-7) Dɛn prɔmis dɛn ya nɔ bin apin trade trade na Izrɛl. Bikɔs wi dɔn si dɛn prɔmis dɛn ya apin to Gɔd in pipul dɛn wan spɛshal we insay wi yon tɛm, dat mek wi biliv tranga wan se ɔl dɛn tin ya go rili apin na di wan ol wɔl tumara bambay. Aw wi no dat?

¹³ Trade trade, na di gadin we bin de na Idɛn, Jiova bin sho klia wan wetin i want fɔ di wɔl. I bin want di wɔl fɔ ful-ɔp wit pipul dɛn we gladi, we gɛt wɛlbɔdi, ɛn we gɛt wanwɔd. Mɔtalman bin fɔ kia fɔ di wɔl ɛn fɔ ɔl di animal dɛn, ɛn tɔn di wan ol wɔl to Paradays. (Jɛnɛsis 1:​28) Dis difrɛn fa fawe frɔm wetin de apin tide. Bɔt na fɔ biliv tranga wan se wetin  Jiova want nɔ go ɛva pwɛl. (Ayzaya 55:​10, 11) Na Jizɔs, we na di Kiŋ fɔ Gɔd in Kiŋdɔm, go mek di wɔl bi Paradays.—Lyuk 23:​43.

14, 15. (a) Aw Jiova go mek “ɔltin nyu”? (b) Aw layf go tan lɛk na Paradays? Wetin mɔ yu go lɛk na Paradays?

¹⁴ Imajin se di wan ol wɔl bi Paradays! Jiova bin tɔk bɔt da tɛm de se: “Luk! A de mek ɔltin nyu.” (Rɛvɛleshɔn 21:​5) Tink bɔt wetin dat go min. We Jiova go dɔn dɔn fɔ yuz in pawa fɔ dɔnawe wit dis wikɛd wɔl, na di “nyu ɛvin ɛn nyu wɔl” nɔmɔ go de. Dis min se wan nyu gɔvmɛnt na ɛvin go rul pipul dɛn we de na di wɔl we lɛk Jiova ɛn we de du wetin i want. (2 Pita 3:​13) Setan ɛn in dimɔn dɛn nɔ go gɛt pawa fɔ du ɛnitin igen. (Rɛvɛleshɔn 20:​3) Fɔ di fɔs tɛm, mɔtalman go fri frɔm dɛn kɔrɔpt ɛn wikɛd tin dɛn we dɛn bin de du. No dawt nɔ de fɔ se di kolat we wi go gɛt go rili pasmak.

¹⁵ Dɛn tɛm dɛn de, wi go ebul fɔ kia fɔ dis fayn fayn planɛt di we aw Gɔd bin want wi fɔ du am. Di ath gɛt di pawa fɔ mek insɛf bak. Watasay dɛn we dɔn dɔti ebul fɔ klin dɛnsɛf bak if di tin we de mek dɛn dɔti nɔ de igen; say dɛn we dɛn dɔn damej bikɔs ɔf wɔ go mek fayn bak if wɔ dɔn. Wi go gladi fɔ ɛp fɔ mek di ath bak lɛk fayn fayn gadin we gɛt difrɛn difrɛn plant ɛn animal dɛn. Mɔtalman nɔ go jɔs de kil animal ɛn pwɛl plant dɛn jɔs lɛk dat, bifo dat, dɛn go liv fayn wan wit plant ɛn animal dɛn. Ivin smɔl pikin dɛnsɛf nɔ go fred wayl animal dɛn igen.—Ayzaya 9:​6, 7; 11:​1-9.

16. Insay Paradays, us wɔndaful tin dɛn go apin to fetful pipul dɛn we Gɔd go dɔn mek ɔltin bak lɛk aw dɛn bin de?

¹⁶ Gɔd go yuz bak in pawa fɔ mek mɔtalman bɔdi lɛk aw i fɔ de. Afta Amagɛdɔn, Gɔd go mɛn ɔl di wan dɛn we go sev ɔlsay na di wɔl. Jɔs lɛk wetin Jizɔs bin du we i bin de na di wɔl, i go yuz di pawa we Gɔd dɔn gi am fɔ mek di wan dɛn we blayn si, di wan dɛn we dɛf yɛri, ɛn fɔ mek di wan dɛn we kripul ɛn di wan dɛn we sik gɛt wɛlbɔdi. (Matyu 15:​30) Di wan dɛn we dɔn ol go gladi we dɛn go yɔŋ bak, gɛt wɛlbɔdi, ɛn trɛnk. (Job 33:​25) Dɛn rinkul dɛn go lɔs, dɛn fut dɛn go stret, ɛn dɛn  mɔsul dɛn go gɛt pawa bak. Ɔl fetful mɔtalman dɛn go si we di tin dɛn we de apin to wi bikɔs ɔf sin ɛn we wi nɔ pafɛkt, de dɔn smɔl smɔl. Wi go rili tɛl Jiova tɛnki fɔ in wɔndaful pawa fɔ mek ɔltin bak lɛk aw i bin de! Lɛ wi pe atɛnshɔn naw to wan wɔndaful tin we Gɔd gɛt fɔ du di tɛm we i go mek ɔltin bak lɛk aw dɛn bin de.

17, 18. (a) Wetin mek Jizɔs bin tɔk pan di Sadyusi dɛn? (b) Wetin-ɛn-wetin bin apin we mek Ilayja beg Jiova fɔ gi layf bak to wan pikin we day?

¹⁷ Insay di apɔsul dɛn tɛm, sɔm bigman dɛn pan Gɔd biznɛs we dɛn bin de kɔl di Sadyusi dɛn, nɔ bin biliv se di wan dɛn we dɔn day go gɛt layf bak. Jizɔs bin tɔk pan dɛn se: “Una dɔn mistek, bikɔs una nɔ no di Skripchɔ dɛn ɔ di pawa we Gɔd gɛt.” (Matyu 22:​29) Fɔ tru, di Baybul mek wi no se Gɔd gɛt di pawa fɔ gi layf bak to di wan dɛn we dɔn day. Aw wi no dat?

¹⁸ Imajin wetin bin apin di tɛm we Ilayja bin de. Wan uman we in man bin dɔn day, bin ol in wangren bɔypikin in dedebɔdi na in an. Di prɔfɛt Ilayja we bin de as strenja na dis uman in os, go mɔs dɔn shɔk. I nɔ te yet we i ɛp fɔ mek angri nɔ kil di pikin. I go mɔs bi se Ilayja bin dɔn rili yus to dis bɔbɔ. Di mama in at bin rili pwɛl. Ɛnitɛm we i bin de si di pikin, i kin mɛmba in man we bin dɔn day. I go mɔs dɔn de op se na in pikin go kia fɔ am we in go dɔn ol. Di pwɛlat bin de mek di uman tink se na pɔnishmɛnt i de gɛt fɔ di bad tin dɛn we i bin dɔn du. Ilayja nɔ bin ebul fɔ bia we i de si di prɔblɛm dɛn jɔs de ad. I tek di pikin saful wan na in mama in an, kɛr am go ɔp na in rum, ɛn beg Jiova fɔ lɛ i mek di pikin gɛt layf bak.—Fɔs Kiŋ 17:​8-21.

19, 20. (a) Aw Ebraam bin sho se i gɛt fet pan di pawa we Jiova gɛt fɔ mek ɔltin bak lɛk aw dɛn bin de? Wetin bin mek i gɛt da kayn fet de? (b) Aw Jiova bin blɛs Ilayja bikɔs ɔf in fet?

¹⁹ Nɔto Ilayja na bin di fɔs pɔsin fɔ biliv se di wan dɛn we dɔn day go gɛt layf bak. Lɔng tɛm bifo dis, Ebraam bin biliv se  Jiova gɛt di pawa fɔ mek ɔltin bak lɛk aw dɛn bin de, ɛn i bin gɛt gud rizin fɔ biliv dat. We Ebraam bin ol 100 ia ɛn Sera bin ol 90 ia, Jiova bin pafɔm mirekul fɔ lɛ Sera ebul fɔ bɔn pikin. (Jɛnɛsis 17:​17; 21:​2, 3) Leta we dɛn pikin dɔn big, Jiova bin tɛl Ebraam fɔ lɛ i sakrifays am. Ebraam bin sho se i gɛt fet, i bin biliv se Jiova ebul fɔ gi layf bak to in pikin Ayzak we i rili lɛk. (Ibruz 11:​17-19) Dis kayn fet we Ebraam bin gɛt ɛp wi fɔ ɔndastand wetin mek i bin tɛl in savant dɛn ivin bifo dɛn go ɔp di mawntin se in ɛn Ayzak go kam bak.—Jɛnɛsis 22:​5.

²⁰ Jiova nɔ bin alaw Ebraam fɔ kil Ayzak, so nid nɔ bin de fɔ lɛ i gi Ayzak layf bak da tɛm de. Bɔt fɔ Ilayja, di uman in pikin bin ɔlrɛdi dɔn day, bɔt i nɔ bin day fɔ lɔng. Jiova bin blɛs di prɔfɛt bikɔs ɔf in fet bay we i gi layf bak to di pikin. Ilayja bin gi di bɔbɔ to in mama, ɛn “tɛl am se in pikin dɔn gɛt layf bak.” Di uman nɔ go ɛva fɔgɛt dɛn wɔd dɛn ya!—Fɔs Kiŋ 17:​22-24.

21, 22. (a) Wetin mek dɛn bin tɔk bɔt pipul dɛn we bin dɔn gɛt layf bak na di Baybul? (b) Insay Paradays, ɔmɔs pipul dɛn go gɛt layf bak? Udat go gi dɛn layf bak?

²¹ Dis na di fɔs tɛm insay di Baybul we wi rid se Jiova yuz in pawa fɔ gi layf bak to pɔsin we dɔn day. Leta, Jiova bin gi pawa to Ilaysha, Jizɔs, Pɔl, ɛn Pita fɔ gi layf bak to pipul dɛn we bin day. Na tru se di wan dɛn we bin gɛt layf bak dɛn tɛm dɛn de bin day bak leta. Bɔt dɛn stori dɛn ya na di Baybul ɛp wi fɔ no di wɔndaful tin dɛn we go apin tumara bambay.

²² Insay Paradays, Jizɔs go du di tin we i bin tɔk we i se: “Na mi de gi layf bak ɛn na mi na di layf.” (Jɔn 11:​25) I go gi layf bak to bɔku bɔku pipul dɛn, ɛn dat go gi dɛn di chans fɔ liv sote go na Paradays na dis wɔl. (Jɔn 5:​28, 29) Imajin di tɛm we padi ɛn fambul dɛn go si dɛnsɛf bak afta we day dɔn sɛpret dɛn fɔ lɔng tɛm; dɛn go ɔg dɛnsɛf ɛn dɛn go rili gladi! Ɔlman go prez Jiova fɔ di pawa we i gɛt fɔ mek ɔltin bak lɛk aw dɛn bin de.

23. Wetin na di bɛst we aw Jiova dɔn sho in pawa? Aw dis gi wi garanti fɔ di op we wi gɛt fɔ tumara bambay?

 ²³ Jiova dɔn gi strɔng garanti fɔ se dɛn tin dɛn ya go mɔs bi. Di bɛst we aw Jiova dɔn sho in pawa na we i gi in Pikin, Jizɔs, layf bak as pawaful spirit pɔsin, ɛn gi am ay pozishɔn we na Jiova nɔmɔ de pantap am. Jizɔs we bin dɔn gɛt layf bak, bin apia to bɔku bɔku pipul dɛn we bin si am. (1 Kɔrintians 15:​5, 6) Dat bin du fɔ lɛ ivin pipul dɛn we gɛt dawt, biliv se Jizɔs bin gɛt layf bak. Jiova gɛt di pawa fɔ gi layf bak to di wan dɛn we dɔn day.

24. Wetin mek wi biliv tranga wan se Jiova go gi layf bak to di wan dɛn we dɔn day? Us op wi ɔl fɔ gladi fɔ?

²⁴ Jiova nɔ jɔs gɛt di pawa fɔ gi layf bak to di wan dɛn we dɔn day, bɔt i want fɔ du dat. Jiova bin mek Job rayt se I rili want fɔ gi layf bak to di wan dɛn we dɔn day. (Job 14:​15) Yu nɔ go lɛk fɔ go nia wi Gɔd we rili want fɔ yuz in pawa dis kayn we fɔ mek ɔltin bak lɛk aw dɛn bin de? Bɔt mɛmba se we Jiova de gi layf bak to di wan dɛn we dɔn day, na wan pan di tin dɛn dat we Jiova gɛt fɔ du tumara bambay we i de mek ɔltin bak lɛk aw dɛn bin de. As yu de kam nia Jiova mɔ ɛn mɔ, na fɔ gladi fɔ di wɔndaful op we yu gɛt fɔ se yu go de fɔ si we Jiova go “mek ɔltin nyu.”—Rɛvɛleshɔn 21:​5.