1, 2. Us prɔblɛm dɛn bin mit di Izrɛlayt dɛn we dɛn ɛnta Saynay insay di ia 1513 bifo Krays? Aw Jiova bin ɛnkɔrej dɛn?

DI IZRƐLAYT DƐN bin de pan denja we dɛn jɔs ɛnta na Saynay insay di ia 1513 bifo Krays. Dɛn fɔ travul wan lɔng patrol “na di ɛmti ples we pɔsin nɔ go ebul tap, we na soso snek ɛn skɔpiɔn de de.” (Ditarɔnɔmi 8:​15) Ɔda neshɔn dɛn we et dɛn go atak dɛn bak. Na Jiova dɔn briŋ in pipul dɛn na dis ples. As dɛn Gɔd, yu tink se i go ebul fɔ protɛkt dɛn?

² Di wɔd dɛn we Jiova bin tɛl dɛn go ɛnkɔrej dɛn. I bin se: “Dɛn dɔn si fɔ dɛnsɛf aw a trit di Ijipshian dɛn. Dɛn si aw a tot dɛn lɛkɛ aw igul kin tot in pikin dɛn ɛn briŋ dɛn kam na ya to misɛf.” (Ɛksodɔs 19:​4) Jiova bin mɛmba in pipul dɛn se i dɔn fri dɛn frɔm di Ijipshian dɛn, jɔs lɛk we igul de kɛr in pikin dɛn na sef say. Bɔt ɔda rizin dɛn de we mek Gɔd yuz igul in ɛgzampul fɔ sho aw i de protɛkt in pipul dɛn.

3. Wetin mek di igul in wiŋ na fayn ɛgzampul fɔ sho aw Gɔd de protɛkt in pipul dɛn?

³ Di igul nɔ de jɔs yuz in brɔd ɛn strɔng wiŋ fɔ flay go ɔp ɔp. We di ples kin wam, di kɔmbra kin prɛd in wiŋ dɛn we lɔng lɛk sɛvin fit (2 mita) so fɔ protɛkt in pikin dɛn frɔm di it we de kɔmɔt frɔm di san. Ɔda tɛm dɛn, i kin rap in wiŋ dɛn rawnd in pikin dɛn fɔ protɛkt dɛn frɔm di kol briz we kin blo. Jɔs lɛk aw igul kin protɛkt in pikin dɛn, na so Jiova bin protɛkt di Izrɛlayt dɛn. Naw we in pipul dɛn de na di ɛmti ples we pɔsin nɔ go ebul fɔ liv, i go kɔntinyu fɔ protɛkt dɛn wit in pawaful wiŋ if dɛn kɔntinyu fɔ fetful to am. (Ditarɔnɔmi 32:​9-11; Sam 36:​7) Bɔt wi go ɛkspɛkt Gɔd fɔ protɛkt wi tide?

4, 5. Wetin mek wi biliv tranga wan di prɔmis we Gɔd dɔn mek fɔ se i go protɛkt in pipul dɛn?

⁴ Jiova ebul fɔ protɛkt in savant dɛn. In na “PAPA GƆD Ɔlmayti.” Da taytul de de sho se i gɛt pawa we pɔsin nɔ go ebul fɔ chalenj. (Jɛnɛsis 17:​1) Jɔs lɛk aw pɔsin nɔ ebul fɔ stɔp swɛlin na si, na so nɔbɔdi nɔ go ebul fɔ stɔp Jiova we i de yuz in pawa. Bikɔs i ebul fɔ du ɛnitin we i want, dat fɔ mek wi aks wisɛf se, ‘Fɔ se Jiova go want fɔ yuz in pawa fɔ protɛkt in pipul dɛn?’

⁵ Di ansa na yɛs! Jiova dɔn prɔmis se i go protɛkt in pipul dɛn. Sam 46:​1 (NWT) tɔk se: “Gɔd tan lɛk ples fɔ ayd ɛn na in kin gi wi trɛnk. I rɛdi fɔ ɛp wi ɛnitɛm we wi gɛt prɔblɛm.” Wi biliv tranga wan di prɔmis we Gɔd dɔn mek fɔ se i go protɛkt wi bikɔs i “nɔ de lay.” (Taytɔs 1:​2) Lɛ wi tɔk bɔt sɔm pan di ɛgzampul dɛn we Jiova kin yuz fɔ sho klia wan aw i kin protɛkt in pipul dɛn.

6, 7. (a) Aw di shɛpad dɛn we bin de di tɛm we dɛn bin de rayt di Baybul bin de protɛkt dɛn ship dɛn? (b) Us ɛgzampul di Baybul yuz fɔ sho se Jiova rili rɛdi fɔ protɛkt ɛn kia fɔ in ship dɛn?

⁶ Jiova na shɛpad, ɛn “wi nain pipul we tan lɛk ship we i de mɛn.” (Sam 23:​1; 100:​3) Na wan wan animal dɛn de we nɔ ebul du natin fɔ protɛkt dɛnsɛf jɔs lɛk ship dɛn. Di shɛpad dɛn we bin de di tɛm we dɛn bin de rayt di Baybul bin nid fɔ gɛt maynd fɔ protɛkt dɛn ship dɛn frɔm layɔn dɛn, wulf dɛn, bia dɛn, ɛn tifman dɛn. (Fɔs Samiɛl 17:​34, 35; Jɔn 10:​12, 13) Bɔt tɛm dɛn bin de bak we di shɛpad nid fɔ du tin saful wan we i de protɛkt in ship dɛn. We di ship kin bɔn pikin fa frɔm usay dɛn de, shɛpad we lɛk in animal dɛn go gayd di kombra insay dis tɛm we i nɔ ebul fɔ du natin fɔ insɛf, ɛn i kin tek di yɔŋbebi ship we nɔ ebul fɔ du natin fɔ insɛf ɛn kɛr am go to di ɔda wan dɛn.

 ⁷ We Jiova de kɔmpia insɛf to shɛpad, i de prɔmis wi se i rili want fɔ protɛkt wi. (Izikɛl 34:​11-16) Mɛmba wetin Jiova bin tɔk bɔt insɛf na Ayzaya 40:​11 (NWT) we wi bin tɔk bɔt na Chapta 2 insay dis buk. I bin se: “Jɔs lɛk shɛpad, i go kia fɔ in ship dɛn. I go gɛda di ship pikin dɛn wit in an, ɛn i go ol dɛn nia in chɛst.” Aw di yɔŋbebi ship go kam fɔ de nia di shɛpad in chɛst ɔ di pat pan in klos we fol fol? Sɔntɛm di yɔŋbebi ship go kam nia di shɛpad ɛn ivin ling pan in fut. Bɔt na di shɛpad fɔ butu, tek di yɔŋbebi ship, ɛn put am saful wan nia in chɛst fɔ kip am sef. Dis na fayn ɛgzampul fɔ sho aw wi Gret Shɛpad rɛdi fɔ protɛkt wi!

8. (a) Na udat dɛn Gɔd prɔmis se i go protɛkt? Aw Prɔvabs 18:​10 (NWT) sho dat? (b) Wetin pɔsin fɔ du if i want fɔ yuz Gɔd in nem fɔ protɛkt insɛf?

⁸ Bɔt nɔto ɔlman Gɔd go protɛkt; na di wan dɛn nɔmɔ we de kam nia am. Prɔvabs 18:​10 (NWT) tɔk se: “Jiova in nem na strɔng tawa. Di wan we de du wetin rayt de rɔn go de ɛn i de protɛkt am.” Insay di tɛm we dɛn bin de rayt di Baybul, dɛn bin de bil tawa dɛn na di wildanɛs as ples we sef fɔ ayd. Bɔt i bin lɛf wit di pɔsin we de pan denja fɔ rɔn go na dɛn tawa dɛn de so dat natin nɔ go apin to am. Na di sem tin wit Gɔd in nem we pɔsin de yuz am fɔ protɛkt insɛf. I nɔ fɔ jɔs de kɔl kɔl Gɔd in nem; Gɔd in nem nɔ tan lɛk sɔntin we gɛt majik we pɔsin de yuz fɔ protɛkt insɛf. Bɔt wi nid fɔ no di Pɔsin we gɛt di nem ɛn abop pan am, ɛn wi fɔ liv wi layf akɔdin to di we aw i want. I rili fayn we Jiova prɔmis wi se if wi gɛt fet pan am ɛn beg am fɔ ɛp wi, i go tan lɛk tawa fɔ wi!

9. Aw Jiova sho se i nɔ jɔs prɔmis se i go protɛkt in pipul dɛn?

⁹ Jiova nɔ jɔs prɔmis se i go protɛkt in pipul dɛn; i dɔn du pas dat. Insay di tɛm we dɛn bin de rayt di Baybul, i yuz mirekul dɛn fɔ sho se i ebul fɔ protɛkt in pipul dɛn.  Insay di tɛm we di Izrɛlayt dɛn bin de, Jiova bin de yuz in pawaful “an” fɔ protɛkt dɛn frɔm pawaful ɛnimi dɛn. (Ayzaya 25:​10, 11) Bɔt Jiova bin yuz bak in pawa fɔ protɛkt in savant dɛn wan bay wan.

10, 11. Us Baybul ɛgzampul dɛn sho aw Jiova bin yuz in pawa fɔ protɛkt in pipul dɛn wan bay wan?

¹⁰ We di tri yɔŋ Ibru dɛn we na Shedrak, Mishak, ɛn Abɛdnigo nɔ bin gri fɔ butu bifo Kiŋ Nɛbyukadnɛza in imej we i mek wit gold, dat bin mek di kiŋ vɛks ɛn trɛtin se i go trowe dɛn na wan say usay ɔt ɔt faya de. Nɛbyukadnɛza we na bin di pawaful rula na di wɔl, bin tɔk se: “Us gɔd we go ebul sev una?” (Daniɛl 3:​15) Di tri yɔŋman dɛn bin rili abop pan di pawa we dɛn Gɔd gɛt fɔ protɛkt dɛn, bɔt dɛn nɔ bin tɔk se i go du dat. So dɛn bin tɛl di kiŋ se: “[If] na so i fɔ bi, [wi] PAPA GƆD we wi de wok fɔ go ebul sev wi.” (Daniɛl 3:​17) Fɔ tru, pan ɔl we dɛn bin wam da big big ovin we faya de kech sɛvin tɛm pas aw i kin de, i nɔ bin stɔp di tri Ibru dɛn Gɔd we pawaful pas ɔlman, fɔ sev dɛn. I bin ebul fɔ protɛkt dɛn, ɛn dat bin mek di kiŋ tɔk se: “Nɔn ɔda gɔd nɔ de we ebul fɔ sev pɔsin dis kayn we.”—Daniɛl 3:​29.

¹¹ Jiova bin sho bak se i rili gɛt pawa fɔ protɛkt in pipul dɛn di tɛm we i bin transfa in wangren Bɔypikin in layf na wan Ju vajin we nem Meri, in bɛlɛ. Wan enjɛl bin tɛl Meri se i go “gɛt bɛlɛ ɛn bɔn bɔypikin.” Di enjɛl bin tɔk bak se: “Oli spirit go kam pan yu, ɛn di Wan we De Pantap Ɔlman go yuz in pawa fɔ kɔba yu.” (Lyuk 1:​31, 35) Tɛm nɔ bin ɛva de we Gɔd in Pikin bin de pan denja ɛn nɔ ebul fɔ du sɔntin fɔ protɛkt insɛf lɛk dis tɛm. Fɔ se di sin we di mama we nɔ pafɛkt gɛt go ambɔg di bebi na in bɛlɛ? Fɔ se Setan go ebul fɔ du bad to di Pikin ɔ kil am bifo dɛn bɔn am? Dat nɔ pɔsibul! Jiova bin de protɛkt Meri fɔ lɛ natin nɔ damej di bebi we bin de gro insay in bɛlɛ, frɔm di tɛm  we i gɛt in bɛlɛ te to di tɛm we i bɔn am. I protɛkt am frɔm tin dɛn lɛk di pafɛkt we mɔtalman nɔ pafɛkt, tin dɛn we go du am bad, pɔsin we go want fɔ kil am, ɔ ɛni dimɔn. Jiova bin kɔntinyu fɔ protɛkt Jizɔs di tɛm we i bin yɔŋ. (Matyu 2:​1-15) Dɛn nɔ bin ebul fɔ du Gɔd in Pikin natin pas te Gɔd in tɛm rich.

12. Wetin mek Jiova bin yuz mirekul fɔ protɛkt sɔm patikyula pipul dɛn insay di tɛm we dɛn bin de rayt di Baybul?

¹² Wetin mek Jiova bin yuz mirekul fɔ protɛkt sɔm patikyula pipul dɛn? Bɔku tɛm, Jiova kin protɛkt sɔm pipul dɛn so dat i go protɛkt sɔntin we rili impɔtant, dat na fɔ mek wetin i want bi. Fɔ ɛgzampul, fɔ protɛkt Jizɔs in bebi wan bin impɔtant fɔ lɛ wetin Gɔd want bi, we go rili bɛnifit ɔl mɔtalman. Di tin dɛn we dɛn bin rayt bɔt di bɔku we dɛn we Jiova bin yuz in pawa fɔ protɛkt in pipul dɛn de pat pan di Skripchɔ dɛn we ‘dɛn bin dɔn rayt trade fɔ tich wi, so dat di bia we wi de bia ɛn di kɔrej we di Skripchɔ dɛn de kɔrej wi go mek wi gɛt op.’ (Romans 15:​4) Dɛn ɛgzampul dɛn ya mek wi gɛt mɔ fet pan wi Gɔd we pawaful pas ɔlman. Bɔt us we wi fɔ ɛkspɛkt Gɔd fɔ protɛkt wi tide?

13. Na paopa se Jiova fɔ yuz mirekul fɔ sev wi? Ɛksplen.

¹³ Jiova in prɔmis fɔ protɛkt in pipul dɛn nɔ min se paopa i go yuz mirekul dɛn fɔ sev wi. Wi Gɔd nɔ gi wi di garanti se wi layf nɔ go gɛt wan prɔblɛm insay dis tɛm we wi de. Bɔku pan Jiova in fetful savant dɛn dɔn gɛt siriɔs prɔblɛm dɛn, lɛk siknɛs, po, wɔ, ɛn day. Jizɔs bin tɛl in disaypul dɛn klia wan se dɛn go kil sɔm pan dɛn bikɔs ɔf dɛn fet. Na dat mek Jizɔs bin de tɛl dɛn ɔltɛm se dɛn nid fɔ bia te di ɛnd kam. (Matyu 24:​9, 13) If Jiova bin de yuz in pawa ɔltɛm fɔ de protɛkt in pipul dɛn, Setan fɔ dɔn yuz dat fɔ provok am ɛn tɔk se nɔto fɔ natin wi de biɛn wi Gɔd.—Job 1:​9, 10.

14. Us ɛgzampul dɛn sho se nɔto ɔltɛm Jiova de yuz di sem we fɔ protɛkt in savant dɛn?

 ¹⁴ Ivin insay di tɛm we dɛn bin de rayt di Baybul, Jiova nɔ bin de yuz in pawa fɔ protɛkt ɔl in savant dɛn fɔ lɛ dɛn nɔ kil dɛn. Fɔ ɛgzampul, Ɛrɔd bin kil di apɔsul Jems arawnd di ia 44; dɔn i nɔ tu te, Jiova bin sev Pita “na Ɛrɔd in an.” (Akt 12:​1-11) Ɛn Jɔn we na bin Jems in brɔda, bin liv lɔng pas Pita ɛn Jems. Dis sho klia wan se wi nɔ go ɛkspɛkt Gɔd fɔ protɛkt ɔl in savant dɛn di sem we. Apat frɔm dat, “tin dɛn we wi nɔ no se go apin” kin mit wi ɔl. (Ɛkliziastis 9:​11, NWT) So aw Jiova de protɛkt wi tide?

15, 16. (a) Wetin de sho se Jiova dɔn protɛkt di wan dɛn we de wɔship am fɔ lɛ bad tin nɔ apin to dɛn ɔl as grup? (b) Wetin mek wi biliv tranga wan se Jiova go protɛkt in savant dɛn naw ɛn di tɛm we “di big big trɔbul” go kam?

¹⁵ Lɛ wi tɔk fɔs bɔt di protɛkt we Jiova de protɛkt in pipul dɛn mek bad tin nɔ apin to dɛn. As pipul dɛn we de wɔship Jiova, wi go ɛkspɛkt se Jiova go protɛkt wi as grup. If nɔto dat, i go izi fɔ lɛ Setan dɔnawe wit wi. Tink bɔt dis: Setan “we de rul dis wɔl,” go lɛk fɔ dɔnawe wit tru wɔship. (Jɔn 12:​31; Rɛvɛleshɔn 12:​17) Sɔm pan di pawaful gɔvmɛnt dɛn na dis wɔl dɔn ban wi prichin wok, ɛn dɛn dɔn tray fɔ dɔnawe wit wi ɔl. Bɔt Jiova in pipul dɛn dɔn tinap tranga wan, ɛn dɛn dɔn kɔntinyu fɔ prich ɛn nɔ taya! Wetin mek dɛn pawaful kɔntri dɛn nɔ ebul fɔ stɔp di wok we dɛn Kristian dɛn ya we nɔ bɔku de du, pan ɔl we i tan lɛk se dɛn nɔ gɛt pɔsin fɔ protɛkt dɛn? Na bikɔs Jiova de kɔba dɛn wit in pawaful wiŋ dɛn!—Sam 17:​7, 8.

¹⁶ Aw Gɔd go protɛkt wi mek bad tin nɔ mit wi di tɛm we di “big big trɔbul” go kam? Wi nɔ nid fɔ fred di tɛm we Gɔd go kam fɔ jɔj mɔtalman. “Jiova no aw fɔ pul pipul dɛn we fetful to am, pan prɔblɛm, ɛn i no bak aw fɔ  kip di wan dɛn we nɔ de du wetin rayt so dat i go dɔnawe wit dɛn di de we i go jɔj.” (Rɛvɛleshɔn 7:​14; 2 Pita 2:​9) Bɔt fɔ naw, tu tin dɛn de we wi shɔ bɔt ɔltɛm. Fɔs, Jiova nɔ de ɛva alaw pipul dɛn fɔ dɔnawe wit ɔl in fetful savant dɛn na di wɔl. Sɛkɔn, i go blɛs ɔl di wan dɛn we fetful to am wit layf we go de sote go na di nyu wɔl usay ɔlman go de du wetin rayt, ɛn i go ivin gi layf bak to di wan dɛn we dɔn day. Fɔ di wan dɛn we dɔn day, no ɔda sef ples nɔ de we dɛn go de, pas fɔ de na Gɔd in maynd.—Jɔn 5:​28, 29.

17. Aw Jiova de yuz in Wɔd fɔ protɛkt wi?

¹⁷ Ivin naw, Jiova de yuz in “wɔd” fɔ protɛkt wi. Da “wɔd” de gɛt di pawa fɔ muv pipul dɛn so dat dɛn go gɛt gudat ɛn dɛn go liv gud layf. (Ibruz 4:​12) We wi fala di prinsipul dɛn na Gɔd in Wɔd, dat go protɛkt wi frɔm sɔm pan di bad tin dɛn we kin apin to pipul dɛn. Ayzaya 48:​17 tɔk se: “Na mi na PAPA GƆD [“Jiova,” NWT] . . . we de tich yu aw fɔ prɔfit.” Wi nɔ gɛt wan dawt fɔ se if wi fala wetin de na Gɔd in Wɔd, dat go mek wi gɛt lɔng layf ɛn wɛlbɔdi. Fɔ ɛgzampul, bikɔs wi de fala di advays we di Baybul gi wi fɔ avɔyd mami ɛn dadi biznɛs di we aw Gɔd nɔ want ɛn klin wisɛf lɛ no dɔti nɔ de pan wi, dat go ɛp wi fɔ avɔyd di dɔti tin dɛn we pipul dɛn de put an pan ɛn di bad abit dɛn we de briŋ kam prɔblɛm na bɔku pipul dɛn layf we nɔ de obe Gɔd. (Akt 15:​29; 2 Kɔrintians 7:​1) Wi tɛl Jiova tɛnki fɔ we i de yuz in Wɔd fɔ protɛkt wi!

18. Wetin Jiova de du fɔ protɛkt wi padi biznɛs wit am?

¹⁸ Di tin we impɔtant pas ɔl na dat Jiova de protɛkt wi frɔm di tin dɛn we go ambɔg wi padi biznɛs wit am. Wi Gɔd we lɛk wi de protɛkt wi frɔm ɛnitin we go ambɔg wi padi biznɛs wit am bay we i de gi wi di tin dɛn we wi nid fɔ bia we wi gɛt prɔblɛm dɛn ɛn fɔ gɛt tayt padi biznɛs wit am. So  Jiova kin du sɔntin fɔ mek wi gɛt layf, nɔto fɔ jɔs shɔt tɛm bɔt fɔ de sote go. Lɛ wi tɔk bɔt sɔm pan di tin dɛn we Gɔd dɔn gi wi fɔ protɛkt wi padi biznɛs wit am.

19. Aw Jiova in spirit de ɛp wi fɔ bia ɛni prɔblɛm we de mit wi?

¹⁹ Jiova na di Wan “we de ansa wi prea.” (Sam 65:​2) Ɛnitɛm we i tan lɛk se di prɔblɛm dɛn na layf de mɔna wi, wi kin pre to am ɛn tɛl am wetin de na wi at ɛn dat kin mek wi gɛt kolat. (Filipians 4:​6, 7) I nɔ go yuz mirekul fɔ pul wi prɔblɛm dɛn, bɔt i go ansa wi prea bay we i de gi wi di sɛns we wi nid fɔ bia wit wi prɔblɛm dɛn. (Jems 1:​5, 6) Pantap dat, Jiova de gi in oli spirit to di wan dɛn we de aks fɔ am. (Lyuk 11:​13) Da pawaful spirit de go ɛp wi fɔ bia wit ɛni prɔblɛm we de mit wi. I go gi wi “di pawa we pas mɔtalman in yon” fɔ bia te di nyu wɔl we nɔ de fa igen kam we Jiova go dɔn pul ɔl di prɔblɛm dɛn we de mɔna wi.—2 Kɔrintians 4:​7.

20. Aw Jiova de yuz wi brɔda ɛn sista dɛn fɔ sho se i de yuz in pawa fɔ protɛkt wi?

²⁰ Sɔntɛnde, Jiova kin yuz wi brɔda ɛn sista dɛn fɔ protɛkt wi. Jiova dɔn briŋ in pipul dɛn fɔ mek dɛn ‘lɛk ɔl dɛn brɔda dɛn’ we de ɔlsay na di wɔl. (1 Pita 2:​17; Jɔn 6:​44)  Frɔm di lɔv we wi de gɛt frɔm wi brɔda dɛn, wi de si klia wan di pawa we Gɔd in oli spirit gɛt fɔ mek pipul dɛn du gud. Da spirit de de mek wi gɛt fayn kwaliti dɛn lɛk lɔv, fɔ du gud, ɛn fɔ gɛt gudat. (Galeshians 5:​22, 23) So we wi gɛt prɔblɛm, dɔn wi brɔda ɔ sista gi wi advays fɔ ɛp wi ɔ i tɛl wi wɔd dɛn we de ɛnkɔrej wi, wi fɔ tɛl Jiova tɛnki fɔ yuz dɛn we dɛn ya fɔ sho se i kia bɔt wi.

21. (a) Wetin Jiova dɔn yuz “di slev we fetful ɛn gɛt sɛns” fɔ gi wi di rayt tɛm fɔ lan bɔt am? (b) Aw yu dɔn bɛnifit frɔm di tin dɛn we Jiova de gi wi fɔ protɛkt wi padi biznɛs wit am?

²¹ Jiova de gi wi wan ɔda tin bak fɔ protɛkt wi, we na di tin dɛn we wi nid fɔ lan bɔt am, ɛn i de gi wi dɛn di rayt tɛm. Jiova dɔn gi “di slev we fetful ɛn gɛt sɛns” di wok fɔ gi wi wetin wi nid fɔ lan bɔt am fɔ ɛp wi fɔ bɛnifit frɔm in Wɔd. Da fetful slev de, de yuz tin dɛn we dɛn dɔn print lɛk Di Wachtawa ɛn Awake! magazin dɛn, ɛn di mitin dɛn, asɛmbli dɛn, ɛn kɔnvɛnshɔn dɛn fɔ gi wi “it di rayt tɛm.” Dɛn kin gi wi wetin wi nid ɛn di tɛm we wi nid am. (Matyu 24:​45) Yu dɔn ɛva yɛri sɔntin na mitin, ilɛk na frɔm kɔmɛnt we pɔsin gi, tɔk, ɔ ivin prea, we gi yu di trɛnk ɛn ɛnkɔrejmɛnt we yu nid? Yu dɔn ɛva rid wan atikul we de na wi magazin dɛn we afɛkt yu layf? Mɛmba se Jiova de gi wi ɔl dɛn tin dɛn ya fɔ protɛkt wi padi biznɛs wit am.

22. Us we Jiova kin yuz in pawa ɔltɛm? Wetin mek wi go se di tin dɛn we i du go bɛnifit wi?

²² Fɔ tru, Jiova de kɔba “ɔl di wan dɛn we de go to am fɔ ayd.” (Sam 18:​30, NWT) Wi no se i nɔ de yuz in pawa fɔ protɛkt wi frɔm ɔl di prɔblɛm dɛn naw. Bɔt i de yuz in pawa fɔ protɛkt, fɔ mek shɔ se wetin i want bi. As tɛm de go, di tin dɛn we i de du go bɛnifit in pipul dɛn. If wi kam nia Jiova ɛn mek i kɔntinyu fɔ lɛk wi, i go gi wi pafɛkt layf we go de sote go. We wi tink bɔt dat, i go ɛp wi fɔ si ɛni sɔfa we wi de sɔfa naw as tin we de fɔ “shɔt tɛm ɛn i smɔl.”—2 Kɔrintians 4:​17.