1, 2. (a) Us kwɛstyɔn dɛn yu go lɛk fɔ aks Gɔd? (b) Us kwɛstyɔn Mozis bin aks Gɔd?

YU DƆN ɛva imajin yu ɛn Gɔd de tɔk? Fɔ ivin tink se di Wan we de rul di wan ol wɔl de tɔk to yu de mek yu wɔnda! Yu fred fɔs, bɔt leta yu manej fɔ tɔk. I lisin, i tɔk to yu, ɛn i ivin mek yu fil fri fɔ aks ɛni kwɛstyɔn we yu want fɔ aks. So us kwɛstyɔn yu go aks?

² Trade trade, wan man bin de we dis sem tin bin apin to. In nem na Mozis. Di kwɛstyɔn we i bin disayd fɔ aks Gɔd go sɔprayz yu. I nɔ bin aks bɔt insɛf, bɔt in tumara bambay, ɔ ivin mɔtalman prɔblɛm. Bifo dat, i bin aks fɔ Gɔd in nem. Yu go si am strenj bikɔs Mozis bin ɔlrɛdi no Gɔd in nem. So i go mɔs bi se in kwɛstyɔn gɛt dip minin. Infakt, na bin di kwɛstyɔn we impɔtant pas ɔl di kwɛstyɔn dɛn we Mozis bin fɔ ɛva aks. Di ansa afɛkt wi ɔl. I go ɛp yu fɔ du wan impɔtant tin fɔ go nia Gɔd. Aw? Lɛ wi tɔk bɔt da spɛshal tɔk we Gɔd ɛn Mozis bin tɔk.

3, 4. Wetin-ɛn-wetin apin bifo Mozis tɔk wit Gɔd? Wetin dɛn tɔk bɔt?

³ Mozis bin ol 80 ia. I bin dɔn rɔnawe kɔmɔt na Ijipt fɔ 40 ia, ɛn da tɛm de, in pipul dɛn we na di Izrɛlayt dɛn na bin slev dɛn na Ijipt. Wan de, we i bin de mɛn in fadɛnlɔ in ship dɛn, i si wan strenj ɛn wɔndaful tin. Faya bin de kech pan wan chukchuk tik, bɔt di tik nɔ bin de bɔn. Di faya bin jɔs de kech pan am ɛn shayn brayt wan na di mawntin. Mozis go nia fɔ wach. I go mɔs dɔn sɔprayz we i yɛri vɔys de tɔk to am midul di faya! Gɔd bin yuz wan enjɛl fɔ mek in ɛn Mozis tɔk fɔ lɔng tɛm. Ɛn as yu no, na da tɛm de Gɔd bin tɛl Mozis  fɔ lɛf di say we i de ɛn go bak na Ijipt fɔ go pul di Izrɛlayt dɛn pan slev layf.—Ɛksodɔs 3:​1-12.

⁴ Mozis bin fɔ dɔn aks Gɔd ɛni kwɛstyɔn. Bɔt notis di kwɛstyɔn we i bin aks. I se: “If in go to di Izrɛlayt dɛn ɛn tɛl dɛn se di PAPA GƆD we dɛn papa dɛn bin de wɔship sɛn am to dɛn, . . . ɛn if dɛn aks am se, ‘wetin nain nem,’ wetin in fɔ ansa dɛn se.”—Ɛksodɔs 3:​13.

5, 6. (a) Wetin Mozis in kwɛstyɔn tich wi? (b) Us bad tin pipul dɛn dɔn du wit Gɔd in nem? (c) Wetin mek i rili impɔtant we Gɔd dɔn sho wi in nem?

⁵ Di fɔs tin we da kwɛstyɔn de tich wi na dat Gɔd gɛt nem. Wi nɔ fɔ tek dis mek ple ple. Bɔt na dat bɔku pipul dɛn de du. Dɛn dɔn pul Gɔd in nem kɔmɔt na bɔku Baybul dɛn we dɛn dɔn translet ɛn put taytul dɛn de lɛk “Lɔd” ɛn “Gɔd.” Dis na bad ɛn sɔri tin we pas ɔl we dɛn dɔn du bikɔs ɔf rilijɔn. Infakt, we yu mit pɔsin fɔ di fɔs tɛm, wetin na di fɔs tin we yu kin du? Yu nɔ kin aks am fɔ in nem? Na di sem tin we wi want fɔ no Gɔd. Nɔto fɔ se i nɔ gɛt nem, i de fa frɔm wi, ɛn wi nɔ go ebul fɔ no ɔ ɔndastand am. Pan ɔl we wi nɔ de si am, in na pɔsin, ɛn i gɛt nem we na Jiova.

⁶ Pantap dat, we Gɔd sho in nem, dat de sho se gud ɛn wɔndaful tin de fɔ wi. I de kɔl wi fɔ kam no am. I want wi fɔ disayd fɔ du di bɛst tin na wi layf we na fɔ kam nia am. Bɔt Jiova nɔ jɔs sho wi in nem. I dɔn tich wi bɔt di pɔsin we gɛt di nem.

7. (a) Wetin Gɔd in nem min? (b) Wetin Mozis bin rili want fɔ no we i aks Gɔd fɔ In nem?

⁷ Na Jiova insɛf sɛf gi insɛf nem, ɛn na nem we rili gɛt minin. Di nem “Jiova” min “I De Mek Wetin I Want Bi.” Jiova spɛshal na di wan ol wɔl, bikɔs na in mek  ɔltin, ɛn i de mek ɔl wetin i want bi. Dis de mek wi wɔnda. Bɔt fɔ se Gɔd in nem gɛt ɛni ɔda minin? Mozis bin want fɔ no mɔ. I bin no se na Jiova mek ɔltin, ɛn i bin no Gɔd in nem. Gɔd in nem nɔ bin nyu to am. Pipul dɛn bin dɔn de yuz am fɔ lɔng lɔng tɛm. So we Mozis bin de aks fɔ Gɔd in nem, i bin de aks bɔt di pɔsin we gɛt di nem. I jɔs tan lɛk se i bin de aks se: ‘Wetin a go tɛl yu pipul dɛn bɔt yu we go mek dɛn gɛt fet pan yu ɛn biliv se yu go rili fri dɛn?’

8, 9. (a) Aw Jiova bin ansa Mozis in kwɛstyɔn? Wetin rɔng wit di we aw bɔku pipul dɛn de translet di ansa we i bin gi Mozis? (b) Wetin dɛn wɔd dɛn ya min, “A go bi wetin a want fɔ bi”?

⁸ We Jiova bin de ansa Mozis, I bin sho wan wɔndaful tin bɔt di kayn pɔsin we I bi, we gɛt sɔntin fɔ du wit wetin In nem min. I tɛl Mozis se: “A go bi wetin a want fɔ bi.” (Ɛksodɔs 3:​14, NWT) Dɛn kin translet dis insay bɔku Baybul dɛn as: “Na mi na udat a bi.” Bɔt di wan dɛn we tek tɛm translet dis vas mek wi no se Gɔd nɔ bin jɔs de tɔk se i de. Bifo dat, Jiova bin de tich Mozis, ɛn infakt wi ɔl, se I “go bi,” ɔ disayd fɔ bi, ɛnitin we i nid fɔ bi fɔ du di tin dɛn we i dɔn prɔmis. J.  B.  Rodaam translet dis vas klia wan se: “A Go Bi ɛnitin we a want.” Wan masta sabi bukman we sabi di Ibru we dɛn yuz fɔ rayt di Baybul bin ɛksplen wetin de na da vas de se: “Ilɛk wetin apin ɔ us nid de . . . , Gɔd go ‘bi’ di solushɔn.”

⁹ Wetin dat bin min fɔ di Izrɛlayt dɛn? Ilɛk uskayn prɔblɛm bin de bifo dɛn, ilɛk aw di prɔblɛm we dɛn go gɛt go mɔna dɛn, Jiova go bi ɛnitin we i nid fɔ bi fɔ pul dɛn pan slev layf ɛn kɛr dɛn go na di land we i bin dɔn prɔmis dɛn. Fɔ tru, da nem de bin mek dɛn gɛt kɔnfidɛns pan Gɔd. Ɛn i kin du di sem tin fɔ wi bak tide. (Sam 9:​10) Wetin mek?

10, 11. Aw Jiova in nem de mek wi si am as pɔsin we sabi du bɔku tin ɛn as di bɛst Papa we wi go ɛva tink bɔt? Gi ɛgzampul.

 ¹⁰ Fɔ ɛgzampul: Mama ɛn papa dɛn no se dɛn fɔ sabi du bɔku tin we dɛn de mɛn dɛn pikin dɛn. Insay wangren de, dɛn go bi nɔs, pɔsin we de kuk, ticha, pɔsin we de gi kɔrɛkshɔn, jɔj, ɛn bɔku ɔda tin dɛn. We bɔku mama ɛn papa dɛn kin tink bɔt ɔl di difrɛn tin dɛn we dɛn fɔ du, dɛn kin fil se i tu bɔku. Dɛn kin rili sɔprayz we dɛn kin si di kayn we aw dɛn pikin dɛn biliv dɛn pan ɔltin, ɛn nɔ de ɛva dawt se Mɔmi ɔ Dadi kin mek di pen ridyus we dɛn wund, sɛtul ɛni plaba we dɛn gɛt, mek ɛni tɔys we pwɛl, ɛn ansa ɛni kwɛstyɔn we kam na dɛn maynd. Sɔm mama ɛn papa dɛn kin fil se dɛn nɔ fit fɔ mek dɛn pikin dɛn gɛt dis kayn kɔnfidɛns pan dɛn, ɛn dɛn kin fil bad bɔt di tin dɛn we dɛn nɔ kin ebul fɔ du. Dɛn kin rili fil se dɛn nɔ kwalifay fɔ du ɔl dɛn wok dɛn de.

¹¹ Jiova insɛf na papa we lɛk in pikin dɛn. Bɔt bikɔs i pafɛkt, natin nɔ de we i nɔ go ebul bi fɔ kia fɔ in pikin dɛn na di wɔl di bɛst we. So in nem, Jiova, de mek wi si am as di bɛst Papa we wi go ɛva tink bɔt. (Jems 1:​17) Mozis ɛn ɔl di ɔda fetful Izrɛlayt dɛn bin kam fɔ si se Jiova de du wetin in nem min. Dɛn bin kɔle we dɛn de wach aw Jiova bi Ami Kɔmanda we nɔbɔdi nɔ ebul win pan fɛt, di Masta we de kɔntrol di si, di briz, ɛn ɔda tin dɛn we i mek, di bɛst Pɔsin we de gi lɔ, Jɔj, Pɔsin we de drɔ plan, Pɔsin we de gi it ɛn wata, Pɔsin we de mek klos ɛn sandal nɔ de pwɛl; ɛn dɛn si we i du bɔku ɔda tin dɛn.

12. Aw di we we Fɛro si Jiova difrɛn frɔm di we aw Mozis si am?

¹² So Gɔd dɔn mek wi no in nem, i dɔn sho bɔku wɔndaful tin dɛn bɔt di pɔsin we gɛt di nem, ɛn i dɔn  ivin du tin dɛn fɔ sho se wetin i tɔk bɔt insɛf na tru. Wi nɔ gɛt wan dawt fɔ se Gɔd want wi fɔ no am. Wetin wi fɔ du? Mozis bin want fɔ no Gɔd. Dis bin mek Mozis liv in layf difrɛn we, ɛn i bin rili go nia in Papa we de na ɛvin. (Di Nɔmba Dɛm 12:​6-8; Ibruz 11:​27) Bɔt i sɔri fɔ no se bɔku pipul dɛn insay Mozis in tɛm nɔ bin want fɔ no bɔt Jiova. We Mozis bin kɔl Jiova in nem to Fɛro, da prawd Ijipshian kiŋ de bin aks se: “Udat na Jiova?” (Ɛksodɔs 5:​2, NWT) Fɛro nɔ bin want fɔ lan mɔ bɔt Jiova. Bifo dat, i mek lɛk se di Izrɛlayt dɛn Gɔd nɔ impɔtant, ɛn i nɔ gɛt ɛnitin fɔ du wit am. Na da we de bɔku pipul dɛn de si Gɔd tide. Ɛn dat de mek dɛn nɔ de si Jiova as di Masta we De Rul Ɔlman, we na wan pan di tru tin dɛn bɔt Gɔd we rili impɔtant.

13, 14. (a) Wetin mek Jiova gɛt bɔku taytul dɛn na di Baybul? Wetin na sɔm pan dɛn? (Luk di bɔks we gɛt di taytul, “Sɔm pan Jiova in Taytul Dɛn.“) (b) Wetin mek na Jiova nɔmɔ fit fɔ lɛ dɛn kɔl am di “Masta we De Rul Ɔlman”?

¹³ Jiova de du bɔku tin dɛn, ɛn i kin rili ebul fɔ ajɔst, so na dat mek i fayn we i gɛt bɔku bɔku taytul dɛn na di Baybul. Dɛn taytul dɛn ya nɔ impɔtant pas in nem, bɔt dɛn de tich wi mɔ bɔt wetin di nem tinap fɔ. Fɔ ɛgzampul, dɛn kin kɔl am “Jiova di Masta we De Rul Ɔlman.” (2 Samiɛl 7:​22, NWT) Da impɔtant taytul de we dɛn yuz bɔku bɔku tɛm insay di Baybul, de tɛl wi bɔt Jiova in pozishɔn. Na in nɔmɔ gɛt di rayt fɔ bi Rula na di wan ol wɔl. Lɛ wi si wetin mek.

¹⁴ Jiova spɛshal bikɔs na in mek ɔltin. Rɛvɛleshɔn 4:​11 tɔk se: “Jiova wi Gɔd, yu fit fɔ gɛt di glori, di ɔnɔ, ɛn di pawa, bikɔs na yu mek ɔltin, ɛn yu mek dɛn bikɔs na dat yu want.” Na Jiova nɔmɔ dɛn wɔndaful wɔd dɛn ya fit. Na in mek ɔl wetin de na di wan ol wɔl! Wi nɔ gɛt  wan dawt fɔ se Jiova fit fɔ gɛt di ɔnɔ, pawa, ɛn glori we di Masta we De Rul Ɔlman ɛn we mek ɔltin fɔ gɛt.

15. Wetin mek dɛn kɔl Jiova “Kiŋ we bin dɔn de ɛn we go de sote go”?

¹⁵ Di ɔda taytul we na Jiova nɔmɔ fit fɔ gɛt na “Kiŋ we bin dɔn de ɛn we go de sote go.” (1 Timoti 1:​17; Rɛvɛleshɔn 15:​3) Wetin dis min? I nɔ izi fɔ wi as mɔtalman fɔ ɔndastand, bɔt Jiova bin dɔn de frɔm trade trade ɛn go de bak sote go. Sam 90:​2 tɔk se: “Yu bin dɔn bi di PAPA GƆD we wi de wɔship, ɛn yu go stil bi wi PAPA GƆD sote go.” So Jiova nɔ ɛva gɛt biginin; i bin dɔn de frɔm tɛm. I fit fɔ lɛ dɛn kɔl am “Enshɛnt ɔf Dez,” bikɔs i bin dɔn de frɔm tɛm bifo ɛnibɔdi ɔ ɛnitin de na di wan ol wɔl! (Daniɛl 7:​9, 13, 22) Udat go gɛt rizin fɔ tɔk se Jiova nɔ gɛt rayt fɔ bi di Masta we De Rul Ɔlman?

16, 17. (a) Wetin mek wi nɔ de si Jiova? Wetin mek dat nɔ fɔ mek wi sɔprayz? (b) Wetin mek Jiova rial pas ɛnitin we wi de si ɔ tɔch?

¹⁶ Bɔt jɔs lɛk Fɛro, sɔm pipul dɛn kin se Jiova nɔ gɛt da rayt de. Wan rizin we kin mek dɛn tink so na dat mɔtalman kin gɛt mɔ kɔnfidɛns pan wetin dɛn de si wit dɛn yay. Wi nɔ de si di Masta we De Rul Ɔlman. In na spirit, mɔtalman nɔ de si am. (Jɔn 4:​24) Apat frɔm dat, if mɔtalman tinap rayt bifo Jiova Gɔd, i go day. Jiova insɛf sɛf bin tɛl Mozis se: “A nɔ go mek yu si mi fes, bikɔs ɛnibɔdi we si mi fes go day.”—Ɛksodɔs 33:​20; Jɔn 1:​18.

¹⁷ Dis nɔ fɔ mek wi sɔprayz. Mozis bin si smɔl pat pan Jiova in glori, ɛn i go mɔs bi se na enjɛl Jiova bin yuz fɔ du dat. Wetin bin apin to Mozis afta dat? Fɔ sɔm tɛm, Mozis in fes bin de “shayn.” Di Izrɛlayt dɛn bin de ivin fred fɔ luk Mozis in fes. (Ɛksodɔs 33:​21-23; 34:​5-7, 29, 30) So dis dɔn sho klia wan se no mɔtalman nɔ go ebul  fɔ luk di Masta we De Rul Ɔlman, fes-to-fes wit ɔl in glori! Fɔ se dis min se Jiova nɔ rial lɛk di tin dɛn we wi de si ɛn tɔch? Nɔ, wi kin biliv se bɔku tin dɛn de pan ɔl we wi nɔ de si dɛn, lɛk briz, kɔrɛnt, ɛn di tin dɛn we pɔsin kin tink bɔt. Pantap dat, Jiova de sote go, natin nɔ de apin to am ilɛk aw tɛm de go, ivin if bilyɔn bilyɔn ia dɛn pas! So i rial pas ɛnitin we wi de tɔch ɔ si, bikɔs dɛn tin dɛn de kin ol ɛn pwɛl. (Matyu 6:​19) Bɔt yu tink se wi fɔ tink bɔt am as sɔntin we wi nɔ de si ɔ ɔndastand, ɛn we jɔs mek tin dɛn? Lɛ wi si.

18. Us vishɔn Izikɛl bin si? Wetin di 4 fes dɛn we di “chɛrɔb dɛn” we de nia Jiova tinap fɔ?

¹⁸ Pan ɔl we wi nɔ de si Gɔd, sɔm fayn vas dɛn de na di Baybul we de mek wi si smɔl tin na ɛvin. Wan ɛgzampul de na di fɔs chapta na Izikɛl. Izikɛl bin si di pat pan Jiova in ɔganayzeshɔn we de na ɛvin insay wan vishɔn, usay i si big big chariɔt. Di tin we mek wi kɔle mɔ na wetin Izikɛl tɔk bɔt di pawaful chɛrɔb dɛn we de arawnd Jiova. (Izikɛl 1:​4-10) Dɛn “chɛrɔb dɛn” ya de wok an-in-an wit Jiova, ɛn di we aw dɛn luk lɛk de tɛl wi impɔtant tin bɔt di Gɔd we dɛn de sav. Ɛniwan pan dɛn gɛt 4 fes dɛn, dat na kaw fes, layɔn fes, igul fes, ɛn mɔtalman fes. Dɛn tinap fɔ di 4 men kwaliti dɛn we Jiova gɛt.—Rɛvɛleshɔn 4:​6-8, 10.

19. Us kwaliti (a) di kaw fes tinap fɔ? (b) di layɔn fes tinap fɔ? (c) di igul fes tinap fɔ? (d) mɔtalman fes tinap fɔ?

¹⁹ Bɔku tɛm insay di Baybul, kaw kin tinap fɔ pawa, ɛn i fit bikɔs kaw na animal we rili strɔng. Plɛnti tɛm, layɔn kin tinap fɔ jɔstis we na fɔ du tin tret, ɛn fɔ lɛ pɔsin du tin tret, i nid fɔ gɛt maynd we na kwaliti we pipul dɛn no se layɔn dɛn gɛt. Bɔku pipul dɛn no se igul dɛn de  si fa, dɛn kin si ivin smɔl smɔl tin dɛn we de fa fa say. So di igul in fes rili fit fɔ tinap fɔ Gɔd in sɛns. Bɔt we mɔtalman fes? Bikɔs Gɔd mek mɔtalman lɛk aw i tan, na dat mek na dɛn nɔmɔ ebul fɔ gɛt Gɔd in men kwaliti we na lɔv. (Jɛnɛsis 1:​26) So pawa, jɔstis, sɛns, ɛn lɔv de sho udat Jiova bi, ɛn dɛn tɔk bɔt dɛn bɔku tɛm insay di Skripchɔ dɛn, na dat mek dɛn kɔl dɛn Gɔd in men kwaliti dɛn.

20. Yu tink se wi nid fɔ wɔri se Jiova dɔn chenj? Wetin mek yu se so?

²⁰ Wi fɔ wɔri se sɔntɛm Gɔd go dɔn chenj frɔm we dɛn rayt di Baybul te to dis tɛm? Nɔ, Gɔd nɔ de chenj udat i bi. I tɛl wi se: “In we na PAPA GƆD [“Jiova,” NWT] nɔ de chenj.” (Malakay 3:​6) Jiova nɔ kin jɔs chenj in maynd wantɛm wantɛm, bifo dat, i de sho se in na gud Papa bay di we aw i de du tin we sɔntin apin. I kin sho ɛni kwaliti we fit wetin de apin. Pan in 4 kwaliti dɛn, di wan we pas ɔl na lɔv. Wi kin si dis kwaliti pan ɛnitin we i de du. I de yuz lɔv fɔ sho in pawa, in sɛns, ɛn in jɔstis. Infakt, di Baybul tɔk wɔndaful tin bɔt Gɔd ɛn dis  kwaliti. I tɔk se: “Gɔd na lɔv.” (1 Jɔn 4:​8) Notis se di Baybul nɔ tɔk se Gɔd gɛt lɔv ɔ de sho lɔv. Bifo dat, i se Gɔd na lɔv. Ɔltin bɔt Gɔd na lɔv, ɛn na lɔv de mek i de du ɛnitin.

21. Aw wi go fil we wi kam fɔ no Jiova in kwaliti dɛn gud gud wan?

²¹ Yu dɔn ɛva si smɔl pikin de pɔynt to in papa fɔ sho in padi dɛn, dɔn i tɔk gladi wan se “Na mi dadi dande”? Semweso, di wan dɛn we de wɔship Gɔd gɛt bɔku rizin fɔ fil da sem kayn we de bɔt Jiova. Di Baybul tɔk bɔt tɛm we fetful pipul dɛn go tɔk se: “Yɛs, na wi Gɔd dis.” (Ayzaya 25:​8, 9) Di mɔ yu ɔndastand Jiova in kwaliti dɛn, na di mɔ yu go no se yu gɛt di bɛst Papa we yu go ɛva tink bɔt.

22, 23. Wetin di Baybul tɔk bɔt wi Papa we de na ɛvin? Aw wi no se i want wi fɔ go nia am?

²² Dis Papa nɔ kol, ɛn i nɔ de kip to insɛf lɛk aw sɔm pipul dɛn we gɛt pasmak zil fɔ Gɔd biznɛs ɛn pipul dɛn we lɛk mɔtalman sɛns, de tich. I nɔ go izi fɔ lɛ wi go nia Gɔd we de kip to insɛf, ɛn di Baybul nɔ tɛl wi se na so wi Papa we de na ɛvin tan. Bifo dat, i kɔl am “di Gɔd we gladi.” (1 Timoti 1:​11) In at kin pwɛl ɛn i kin gladi. Di Baybul se “in at pwɛl” we mɔtalman pwɛl di lɔ dɛn we i gi dɛn fɔ dɛn yon bɛnifit. (Jɛnɛsis 6:​6; Sam 78:​41) Bɔt we wi du tin wit sɛns akɔdin to wetin de na in Wɔd, wi de mek ‘i gladi.’—Prɔvabs 27:​11.

²³ Wi Papa want wi fɔ go nia am. In Wɔd ɛnkɔrej wi fɔ “rili tray tranga wan fɔ fɛn am.” Ɛn i kɔntinyu fɔ se wi “go si am. Infakt, i nɔ de fa frɔm ɛniwan pan wi.” (Akt 17:​27) Bɔt aw i go pɔsibul fɔ lɛ mɔtalman go nia di Masta we De Rul Ɔlman?