ƆLMAN kin gɛt sɔntin we kin mek i wɔri; ivin Gɔd in pipul dɛnsɛf. Wan pan di man dɛn we rayt di Sam buk bin rayt se: “Wɛn a kin ɛŋ-at na yu nɔmɔ ebul kɔrej mi dɔn a gladi.” (Sam 94:​19) Jizɔs bin tɔk se we di wɔl want dɔn, tin dɛn we kin mek wi wɔri go mek i nɔ rili izi fɔ sav Jiova. (Lyuk 21:​34) We yu? Yu kin wɔri pasmak we yu gɛt mɔni prɔblɛm, famili prɔblɛm, ɔ wɛlbɔdi prɔblɛm? Aw Jiova go ɛp yu fɔ bia wit dɛn prɔblɛm dɛn ya?

Wi nɔ gɛt di pawa fɔ ebul sɔlv ɔl di prɔblɛm dɛn we de mek wi wɔri. Di apɔsul Pɔl bin rayt se: “Plɛnti tɛm wi kin dawt . . . ; tɛm kin kam we pipul kin ib wi dɔŋ.” Bɔt i tɔk bak se: “I nɔ de sink wi go dɔŋ,” “wi at nɔ kin pwɛl,” “dɛn nɔba ebul kil wi.” Wetin de ɛp wi fɔ bia? Na di “pawa we di Spirit de gi,” dat na di pawa we de kɔmɔt frɔm Jiova we na di ɔlmayti Gɔd.—Sɛkɛn Lɛta Fɔ Kɔrint 4:​7-9.

Tink bɔt aw yu bin gɛt “pawa we di Spirit de gi.” Yu mɛmba aw wan fayn tɔk bin rili ɛnkɔrej yu fɔ lɛk Jiova mɔ? Yu kin gɛt mɔ fet pan Jiova we yu kin tich pipul dɛn bɔt di op fɔ de na Paradays? We wi de go mitin ɛn tɛl ɔda pipul dɛn bɔt wetin wi biliv, dat kin ɛp wi fɔ bia wit tin dɛn we de mek wi wɔri ɛn wi go ebul fɔ gɛt kolat so dat wi go ebul fɔ sav Jiova wit gladi at.

Fɔ tru, yu kin fil lɛk se yu gɛt bɔku tin dɛn fɔ du di sem tɛm. Fɔ ɛgzampul, Jiova se wi fɔ put in Kiŋdɔm fɔs ɛn kɔntinyu fɔ go mitin, fil savis, ɛn du pasɔnal stɔdi. (Matyu 6:​33; Lyuk 13:​24) Wetin yu go du if pipul dɛn de tray fɔ stɔp yu fɔ sav Jiova, yu nɔ gɛt bɛtɛ wɛlbɔdi, ɔ yu de gɛt prɔblɛm dɛn na yu famili we de mek yu nɔ ebul fɔ du ɔl di tin dɛn we yu want fɔ du? Ɔ wetin yu go du if yu de spɛn mɔ tɛm na yu wokples pas di tɛm we yu de spɛn wit di kɔngrigeshɔn? We yu gɛt bɔku tin dɛn fɔ du, ɛn yu nɔ gɛt bɛtɛ tɛm fɔ du dɛn, yu go de wɔri ɛn nɔ no wetin fɔ du. Sɔntɛnde, yu go ivin wɔnda if Jiova want yu fɔ du pas wetin yu ebul fɔ du.

Jiova de ɔndastand. I nɔ want wi fɔ du pas wetin wi ebul fɔ du. Ɛn i no se i kin tek sɔm tɛm fɔ mek pɔsin fil bɛtɛ if i gɛt sɔntin we de mɔna am.—Sam 103:​13, 14.

Fɔ ɛgzampul, tink bɔt aw Jiova bin kia fɔ di prɔfɛt Ilayja. We Ilayja bin fred ɛn rɔnawe go na di ɛmti land usay pɔsin nɔ go ebul fɔ liv, yu tink se Jiova bin vɛks pan am ɛn ala pan am fɔ go bak ɛn du in wok? Nɔ. Jiova bin sɛn in enjɛl tu tɛm fɔ wek Ilayja saful fɔ gi am tin fɔ it. Pan ɔl dat, afta 40 dez Ilayja bin stil de wɔri ɛn fred. Wetin Jiova bin du bak fɔ ɛp Ilayja? Fɔs, Jiova bin sho se i ebul  fɔ protɛkt am. Sɛkɔn, Jiova bin ɛnkɔrej Ilayja wit “smɔl fayn vɔys.” Dɔn, Jiova bin sho se bɔku ɔda fetful pipul dɛn de we de wɔship am. I nɔ te, Ilayja bigin fɔ sav Jiova bak wit zil. (Fɔs Kiŋ 19:​1-19) Wetin wi kin lan frɔm dat? We Ilayja bin gɛt tin dɛn we de mɔna am, Jiova bin peshɛnt wit am ɛn i bin sɔri fɔ am. Jiova nɔ de chenj. I stil bisin bɔt wi.

We yu de tink bɔt sɔntin fɔ du fɔ Jiova, tink bɔt wetin yu no se yu go ebul fɔ du. Nɔ kɔmpia wetin yu de du naw wit wetin yu bin ebul fɔ du trade. Fɔ ɛgzampul, if pɔsin we de rɔn lɛf fɔ tren fɔ lɔng tɛm, i nɔ go jɔs bigin fɔ rɔn wantɛm wantɛm lɛk aw i bin de rɔn trade. Bifo dat, i go bigin fɔ tren smɔl smɔl te i gɛt trɛnk ɛn ebul fɔ rɔn go fa. Kristian dɛn tan lɛk pipul dɛn we de rɔn. Dɛn de tren fɔ du wetin dɛn dɔn plan na dɛn maynd. (Fɔs Lɛta Fɔ Kɔrint 9:​24-27) Yu nɔ tink se i go fayn fɔ plan fɔ du wan patikyula tin we go ɛp yu fɔ sav Jiova rayt naw? Fɔ ɛgzampul, yu kin plan fɔ atɛnd mitin. Pre to Jiova fɔ mek i ɛp yu fɔ du wetin yu dɔn plan. As yu bigin fɔ sav Jiova bak, yu go “si fɔ yusɛf se PAPA GƆD na gud PAPA GƆD.” (Sam 34:​8) Mɛmba se ɛnitin we yu du fɔ sho se yu lɛk Jiova, ilɛk na smɔl tin, Jiova go valyu am.—Lyuk 21:​1-4.

Aw Jiova bin ɛp Jun fɔ kam bak to am? Jun se: “A bin de pre to Jiova fɔ mek i ɛp mi. Dɔn mi dɔtɛnlɔ tɛl mi bɔt wan asɛmbli we gɛt fɔ bi na di tɔŋ we a de. A bin disayd fɔ atɛnd wan de pan di asɛmbli. A bin rili fil fayn fɔ de wit Jiova in pipul dɛn! Da asɛmbli de na bin di ɛp we a bin de wet fɔ. Naw, a de sav Jiova bak wit gladi at. A rili gladi naw. A rili dɔn kam fɔ no se, a nid fɔ de wit mi brɔda ɛn sista dɛn ɛn a fɔ gri fɔ mek dɛn ɛp mi. A gladi bikɔs tɛm bin stil de fɔ mek a kam bak.”