To wi kɔmpin Kristian dɛn:

Di Baybul na buk we tɔk mɔ bɔt pipul dɛn. Bɔku pan dɛn na fetful man ɛn uman dɛn we bin gɛt prɔblɛm dɛn we fiba di wan dɛn we wi de gɛt tide. Dɛn na bin “mɔtalman lɛkɛ wisɛf.” (Jems 5:​17) Sɔm pan dɛn bin gɛt prɔblɛm dɛn ɛn tin dɛn we de mek dɛn wɔri. Sɔm ɔda wan dɛn bin de gɛt prɔblɛm frɔm dɛn fambul dɛn ɔ di wan dɛn we dɛn ɔl biliv di sem tin. Ɛn bɔku ɔda wan dɛn bin de fil bad bɔt dɛnsɛf fɔ sɔm bad tin dɛn we dɛn bin dɔn du.

Fɔ se dɛn pipul dɛn ya bin dɔn kɔmɔt biɛn Jiova? Nɔ. Bɔku pan dɛn bin tan lɛk wan pan di man dɛn we rayt di Sam buk we bin pre se: “A fiba ship we dɔn rɔnawe, ɛn dɔn lɔs pan in masta; briŋ mi bak bikɔs a nɔ go fɔgɛt wetin yu lɔ se.” (Sam 119:​176) Na di sem we yusɛf de fil?

Jiova nɔ de fɔgɛt di wan dɛn we bin de wɔship am bɔt we dɔn lɛf di ɔganayzeshɔn. Bifo dat, i de tray fɔ ɛp dɛn bay we i de yuz dɛn kɔmpin Kristian dɛn. Fɔ ɛgzampul, tink bɔt aw Jiova bin ɛp in savant Job we bin gɛt bɔku prɔblɛm dɛn. I bin lɔs ɔl in prɔpati dɛn, di pipul dɛn we i bin lɛk, ɛn i bin gɛt bad bad sik we bin de mɔna am. Job bin de bia pan ɔl we pipul dɛn we bin fɔ ɛp am bin de tɛl am wɔd dɛn we de mek i fil bad. Bɔt i nɔ bin kɔmɔt biɛn Jiova, pan ɔl we fɔ sɔm tɛm i nɔ bin de tink di rayt we. (Job 1:​22; 2:​10) Aw Jiova bin ɛp Job fɔ bigin tink di rayt we?

Jiova bin yuz wan man we nem Ilayu fɔ ɛp Job. We Job bin de tɔk bɔt wetin bin de mɔna am, Ilayu bin lisin ɛn dis bin ɛp am fɔ tɔk to Job. Wetin i go se? I go tray fɔ fɛn fɔlt pan Job ɔ mek i shem ɔ fil bad bɔt insɛf? Ilayu bin tink se i bɛtɛ pas Job? Nɔ, nɔto so i bi! Gɔd in spirit bin mek Ilayu tɔk se: “Mi ɛn yu na mɔtalman bifo PAPA GƆD; na di sem kle i tek mek wi.” I ɛnkɔrej Job bak fɔ se: “Yu nɔ sɔpoz fɔ fred mi; nɔ fil se a go du yu bad.” (Job 33:​6,7) Bifo Ilayu ad pan Job in prɔblɛm dɛn, i bin ɛnkɔrej Job ɛn gi am di advays we i bin nid.

Duya, mɛmba se na di sem we aw Ilayu bin ɛnkɔrej Job na in wi mɛmba we mek wi rayt dis buk. Fɔs, wi lisin to di wan dɛn we dɔn lɛf di ɔganayzeshɔn, wi tink gud wan bɔt wetin bin apin to dɛn ɛn wetin dɛnsɛf tɔk. (Prɔvabs 18:​13) Dɔn, wi stɔdi di Baybul, ɛn pre we wi de rid ɛgzampul dɛn bɔt aw Jiova bin ɛp in savant dɛn we bin gɛt dɛn kayn prɔblɛm dɛn ya. We wi dɔn, wi jɔyn di ɛgzampul dɛn we de na di Baybul wit sɔm ɛkspiriɛns dɛn we dɔn apin na wi yon tɛm fɔ rayt dis buk. Wi de rili ɛnkɔrej yu fɔ rid dis buk. Duya, mɛmba se, wi rili lɛk yu wit ɔl wi at.

Gɔvnin Bɔdi fɔ Jiova Witnɛs Dɛn