PAT WAN
“A Go Luk fɔ di Wan dɛn We Lɔs”
Di ship nɔ no wetin fɔ du. I tan lɛk se i bin de it gras smɔl smɔl te i lɔs pan in kɔmpin dɛn. Naw, i nɔ de si in kɔmpin dɛn ɔ in shɛpad. Di ples dɔn bigin dak. I lɔs na say usay animal ɔ pipul dɛn we go du bad to am de, ɛn di ship nɔ gɛt pɔsin fɔ ɛp am. Dɔn, i yɛri in shɛpad in vɔys. Di shɛpad rɔn go mit am, i tot am, rap am na in klos, ɛn kɛr am go na os.
BƆKU tɛm Jiova de kɔmpia insɛf to shɛpad. Insay in Wɔd, i gi wi op fɔ se: “Misɛf, sɛf, go sach fɔ mi ship dɛn. Ɛn a go luk ɔl say fɔ dɛm.”—Izikɛl 34:11, 12.
‘Di Ship we A Bisin Bɔt’
Udat na Jiova in ship dɛn? Jiova in ship dɛn na pipul dɛn we lɛk am ɛn de wɔship am. Di Baybul se: “Una kam, lɛ wi wɔship, lɛ wi nildɔŋ bifo PAPA GƆD bikɔs nain mek wi; in na wi PAPA GƆD ɛn wi na lɛk ship dɛn we i de mɛn.” (Sam 95:6, 7) Lɛk rial ship dɛn we de fala shɛpad, di wan dɛn we de wɔship Jiova rili gladi fɔ fala dɛn Shɛpad. Fɔ se dɛn nɔ gɛt wan prɔblɛm? Nɔ, dɛn gɛt prɔblɛm dɛn. Wan wantɛm, Gɔd in savant dɛn kin tan lɛk “ship dɛn we sɔm kin dɔn skata ɔlsay,” “ship we lɔs,” ɛn “ship we dɔn lɛf fɔ fala di man we de mɛn dɛn.” (Izikɛl 34:12; Matyu 15:24; Pita In Fɔs Lɛta 2:25) Pan ɔl we pɔsin kin kɔmɔt biɛn Jiova, stil Jiova nɔ de lɛf am lɛk pɔsin we nɔ gɛt op.
Yu stil tink se Jiova na yu Shɛpad? Aw Jiova de sho se in na Shɛpad insay wi yon tɛm? Lɛ wi tɔk bɔt tri we dɛn:
I de ɛp wi fɔ sav am. Jiova se: “A go fid dɛn wit rich gras, ɛn dɛn rich gras ya go de pantap Izrɛl ay mawnten dɛm; na de dɛn go lidɔm na di ples we gɛt gud gud gras fɔ it.” (Izikɛl 34:14) Jiova nɔ ɛva lɛf fɔ gi wi di rayt tin we go ɛp wi fɔ sav am. Yu mɛmba ɛni atikul, tɔk, ɔ fim we dɔn ansa yu prea fɔ mek Jiova ɛp yu? Dat bin ɛp yu fɔ rili biliv fɔ se Jiova bisin bɔt yu?
I de protɛkt ɛn sɔpɔt wi. Jiova prɔmis se: “A go briŋ kam bak di wan we stre, ɛn a go mɛn dɛn wan we kripul, ɛn a go mek di wik dɛn gɛt trɛnk.” (Izikɛl 34:16) Jiova de gi trɛnk to di wan dɛn we wik ɔ di wan dɛn we gɛt bɔku tin dɛn we de mek dɛn wɔri. I de bandej in ship dɛn ɛn ɛp dɛn if dɛn gɛt wund. Sɔntɛnde, i kin yuz dɛn kɔmpin Kristian dɛn fɔ du dat. I kin mek di wan dɛn we dɔn lɛf di kɔngrigeshɔn ɛn di wan dɛn we de fil bad bɔt dɛnsɛf kam bak.
I de sho se i bisin bɔt wi. Jiova se: “A go sev dɛm pan ɔl di ples dɛm we dɛn bin dɔn skata go. A go luk fɔ di wan dɛn we lɔs.” (Izikɛl 34:12, 16) To Jiova, we ship lɔs dat nɔ min se i nɔ go kam bak. I kin no we ship lɔs, i kin fɛn am, ɛn i kin gladi we i si am. (Matyu 18:12-14) I kin ivin kɔl di wan dɛn we de wɔship am ‘mi ship, di ship we a bisin bɔt.’ (Izikɛl 34:31) Yu na wan pan dɛn ship dɛn de.
To Jiova, we ship lɔs dat nɔ min se i nɔ go kam bak. I kin gladi we i si am
“Mek Wi De lɛk aw Wi Bin De Fɔstɛm”
Wetin mek Jiova de fɛn yu ɛn kɔl yu fɔ kam bak to am? Bikɔs i want fɔ mek yu gladi. I prɔmis se i go mek “blɛsin” we fiba “ren” kam pan in ship. (Izikɛl 34:26) Dat nɔto lay lay prɔmis. Yusɛf bin dɔn ɛnjɔy dɛn blɛsin dɛn de.
Mɛmba aw yu bin fil di tɛm we yu lan bɔt Jiova. Fɔ ɛgzampul, aw yu bin fil di fɔs tɛm we yu lan di tru tin bɔt Gɔd in nem ɛn di tin dɛn we i want fɔ mɔtalman? Yu mɛmba aw yu bin fil fayn we yu ɛn ɔda Kristian dɛn bin de mitɔp na asɛmbli ɛn kɔnvɛnshɔn dɛn? Di tɛm we yu bin prich to pɔsin we sho se i rili want fɔ no mɔ, yu nɔ bin fil fayn we yu go bak na os?
Yu go ebul gladi bak lɛk aw yu bin de. Wan pan Gɔd in savant dɛn we bin de trade trade bin pre se “Briŋ wi kam bak to yu PAPA GƆD, so dat wi go de bak to yu! Mek wi de lɛk aw wi bin de fɔstɛm.” (Lamɛnteshɔn 5:21) Jiova bin ansa da prea de ɛn in pipul dɛn bin kam bak ɛn sav am wit gladi at. (Nɛimaya 8:17) Jiova go du di sem tin fɔ yu.
I izi fɔ tɔk se yu de kam bak to Jiova, bɔt i nɔ kin izi fɔ du am. Lɛ wi tɔk bɔt sɔm tin dɛn we go mek i nɔ izi fɔ mek yu kam bak ɛn wetin go ɛp yu fɔ mek dɛn tin dɛn de nɔ stɔp yu.
