Wi Brɔda ɛn Sista dɛn We Wi Lɛk:

Bikɔs wi lɛk Gɔd ɛn pipul dɛn, dat de mek wi “go ɛn mek . . . disaypul na ɔl di neshɔn dɛn . . . [ɛn] baptayz dɛn.” (Mat. 28:​19, 20; Mak 12:​28-31) We wi de sho se wi rili lɛk pipul dɛn, dat na pawaful tin. Wi go ɛp ɔl di wan dɛn we “rili sho se dɛn want fɔ gɛt layf we go de sote go.”—Akt 13:48.

Trade, wi bin de pe atɛnshɔn mɔ fɔ lan wetin wi go se ɛn fɔ gi pipul dɛn pɔblikeshɔn. Naw wi nid fɔ tray fɔ impruv di we aw wi de tɔk to pipul dɛn. Wi want fɔ sho se wi lɛk ɔda pipul dɛn bay we wi de tɔk bɔt tin dɛn we dɛn want fɔ no bɔt. Dat min se wi fɔ rɛdi fɔ chenj wetin wi want fɔ tɔk bɔt ɛn tek tɛm tink bɔt wetin de wɔri pipul dɛn. Aw dis brosho go ɛp wi fɔ du dat?

Dis brosho gɛt 12 lɛsin dɛn we de tɔk bɔt difrɛn kwaliti dɛn we go mek wi sho lɔv ɛn mek disaypul dɛn. Ɛni lɛsin kɔmɔt frɔm wan Baybul stori we de tɔk bɔt wan kwaliti we Jizɔs ɔ wan pan di fɔstɛm Kristian dɛn bin sho we dɛn de prich. Wi gol nɔto fɔ lan wetin fɔ tɔk, bɔt na fɔ luk fɔ we dɛn fɔ sho se wi lɛk pipul dɛn. Pan ɔl we wi nid dɛn kwaliti dɛn ya we wi de prich difrɛn difrɛn we dɛn, wi go tɔk bɔt wetin mek wi nid sɔm patikyula kwaliti dɛn mɔ we wi de prich to pɔsin fɔ di fɔs tɛm, du ritɔn visit, ɔ kɔndɔkt Baybul stɔdi.

As yu de rid ɛniwan pan dɛn lɛsin ya, tek tɛm tink bɔt aw yu go sho di kwaliti we dɛn tɔk bɔt na di lɛsin we yu de prich to pipul dɛn na yu eria. Tray fɔ lɛk Jiova ɛn pipul dɛn mɔ. Na da lɔv de go ɛp yu fɔ rich yu gol fɔ mek disaypul dɛn, nɔto ɛni patikyula tin we yu sabi fɔ du.