YU TINK se i izi fɔ wɔship Jiova?— Di Gret Ticha bin se i nɔ go izi. Di nɛt bifo Jizɔs day, i bin tɛl in apɔsul dɛn se: ‘If di pipul dɛn na di wɔl nɔ lɛk una, una fɔ jɔs mɛmba se na mi fɔs dɛn nɔ bin lɛk.’—Jɔn 15:18.

Pita bost se i nɔ go ɛva kɔmɔt biɛn Jizɔs, bɔt Jizɔs bin se da sem nɛt de Pita go dinay tri tɛm se i nɔ sabi am. Ɛn na dat Pita bin du! (Matyu 26:31-35, 69-75) Wetin mek dis kayn tin apin?— Na bikɔs Pita ɛn ɔl di ɔda apɔsul dɛn bin de fred.

Yu no wetin mek di apɔsul dɛn bin de fred?— Dɛn nɔ bin du sɔntin we rili impɔtant. We wi lan bɔt dis, dat go ɛp wi fɔ wɔship Jiova, ilɛk wetin ɔda pipul dɛn go se ɔ du. Fɔs, lɛ wi tɔk smɔl bɔt wetin bin apin di las nɛt we Jizɔs spɛn wit in apɔsul dɛn.

Fɔs, dɛn sɛlibret di Pasova togɛda. Di Pasova na bin spɛshal it we dɛn bin de it ɛni ia fɔ mɛmba Gɔd in pipul dɛn bɔt aw Jiova sev dɛn na Ijipt. Dɔn Jizɔs sho dɛn wan spɛshal it we dɛn fɔ de it. Wi go tɔk leta bɔt aw da it de go ɛp wi fɔ mɛmba Jizɔs in day. Afta dɛn dɔn it dɔn ɛn afta Jizɔs dɔn ɛnkɔrej dɛn, i kɛr dɛn go na wan gadin we nem Gɛtsimani. Dis na ples we dɛn bin dɔn go bɔku bɔku tɛm.

 Jizɔs go fa smɔl insay di gadin fɔ mek i go pre. I tɛl Pita, Jems, ɛn Jɔn fɔ lɛ dɛnsɛf pre. Bɔt dɛn bigin slip. Jizɔs go pre tri tɛm ɛn ɛnitɛm we i kam bak, i de mit Pita ɛn di ɔda apɔsul dɛn de slip! (Matyu 26:36-47) Yu no wetin mek dɛn nɔ bin fɔ dɔn slip so dat dɛn go ebul fɔ pre?— Lɛ wi tɔk bɔt dat.

Judas Iskariɔt bin de na di Pasova da ivintɛm de wit Jizɔs ɛn di ɔda apɔsul dɛn. Mɛmba se Judas bin dɔn tɔn tifman. Naw i  dɔn bi pɔsin we de kɔmɔt biɛn in padi. I bin no bɔt di gadin na Gɛtsimani usay Jizɔs kin mit wit in apɔsul dɛn. So Judas kɛr sojaman dɛn de fɔ go ol Jizɔs. We dɛn rich de, Jizɔs aks dɛn se: “Udat una de luk fɔ?”

Di sojaman dɛn ansa se: “Wi de luk fɔ Jizɔs.” Jizɔs nɔ de fred, so i tɛl dɛn se: “Na mi dis.” Di sojaman dɛn bin sɔprayz bikɔs Jizɔs bin gɛt maynd, so dɛn go biɛn ɛn fɔdɔm na grɔn. Jizɔs tɛl dɛn se: ‘If na mi una de luk fɔ, una mek mi disaypul dɛn go.’—Jɔn 18:1-9.

We di sojaman dɛn ol Jizɔs ɛn tay am, di apɔsul dɛn fred ɛn dɛn rɔnawe. Bɔt Pita ɛn Jɔn bin want fɔ no wetin go apin, so dɛn fala dɛn bɔt dɛn bin de fa smɔl. Leta dɛn kɛr Jizɔs go na di ay prist we na Kayefas, in os. Jɔn bin sabi di ay prist, so di uman we bin de na di get bin alaw Jɔn ɛn Pita fɔ go insay.

Di prist dɛn bin dɔn gɛda na Kayefas in os fɔ mek dɛn tray Jizɔs. Dɛn want fɔ rili kil Jizɔs. So dɛn briŋ pipul dɛn we go kam lay pan Jizɔs. Di pipul dɛn bɔks ɛn slap Jizɔs. Pita bin de de we ɔl dis de apin.

 Di uman we bin alaw Pita ɛn Jɔn fɔ go insay, notis Pita. I tɔk se: “Yusɛf bin de wit Jizɔs we kɔmɔt Galili.” Bɔt Pita dinay se i nɔ ivin no Jizɔs. Afta sɔm tɛm, wan ɔda titi wach Pita ɛn tɛl di wan dɛn we bin tinap de se: ‘Dis man ya bin de wit Jizɔs.’ Pita bin dinay bak se i nɔ sabi Jizɔs. Afta sɔm tɛm, ɔda pipul dɛn si Pita ɛn tɛl am se: ‘Fɔ tru, yu na wan pan di man dɛn we bin de wit Jizɔs.’ Dis mek tri tɛm we Pita dinay Jizɔs. I se: “A nɔ no da man de sɛf!” Pita ivin swɛ se na tru i de tɔk. Afta dat, Jizɔs tɔn luk am.—Matyu 26:57-75; Lyuk 22:54-62; Jɔn 18:15-27.

Yu no wetin mek Pita lay?— Yɛs, na bikɔs i bin de fred. Bɔt wetin mek i bin de fred? Wetin i bin fɔ dɔn du fɔ mek i gɛt maynd? Tink bɔt am. Wetin Jizɔs bin du fɔ mek i gɛt maynd?— I bin pre to Gɔd, ɛn Gɔd bin ɛp am fɔ gɛt maynd. Ɛn mɛmba se tri tɛm Jizɔs bin dɔn tɛl Pita fɔ pre ɛn nɔ fɔ slip. Bɔt wetin bin apin?—

 Wɛl, ɔl tri di tɛm dɛn Pita bin de slip. I nɔ bin pre. So i bin sɔprayz we dɛn arɛst Jizɔs. Leta we dɛn bin de tray Jizɔs, slap am, ɛn arenj fɔ kil am, Pita bin fred. Bɔt jɔs bifo dɛn tin ya apin, wetin Jizɔs bin tɛl in apɔsul dɛn se go apin?— Jizɔs bin tɛl dɛn se jɔs lɛk aw di wɔl et am, na so dɛn go et dɛnsɛf.

Naw lɛ wi tɔk bɔt sɔntin we go apin to wi we fiba wetin bin apin to Pita. Lɛ wi se yu de na klas ɛn yu kɔmpin dɛn de tɔk bad bɔt pipul dɛn we nɔ de gri fɔ salut di flag ɔ we nɔ de  sɛlibret Krismas. Dɔn wan pan dɛn tɔn to yu ɛn aks yu se: “Na tru se yu nɔ de salut di flag?” Ɔ ɔda wan dɛn go se: “Wi yɛri se yu nɔ de ivin sɛlibret Krismas!” Yu go fred fɔ tɔk di tru?— Yu go want fɔ lay, jɔs lɛk aw Pita du?—

Pita bin rili fil sɔri fɔ we i dinay Jizɔs. We i tink bɔt wetin i du, i go na do ɛn bɔs kray. Bɔt i bin fala Jizɔs bak. (Lyuk 22:32) Naw tink bɔt dis. Wetin go ɛp wi nɔ fɔ fred ɛn du wetin Pita du?— Mɛmba se Pita nɔ bin pre ɛn i bin de slip. So, wetin yu tink se wi nid fɔ du fɔ mek wi bi di Gret Ticha in disaypul?—

Wi rili nid fɔ pre to Jiova fɔ mek i ɛp wi. We Jizɔs pre, yu no wetin Gɔd du fɔ ɛp am?— I sɛn wan enjɛl fɔ ɛnkɔrej am. (Lyuk 22:43) Yu tink se Gɔd in enjɛl dɛn go ɛp wi bak?— Di Baybul se: ‘Jiova in enjɛl de rawnd udat rɛspɛkt am ɛn di wan dɛn we de fred am. I de pul dɛn pan trɔbul.’ (Sam 34:7) Bɔt fɔ mek Gɔd ɛp wi, wi nɔ fɔ jɔs de pre nɔmɔ. Yu no wetin bak wi fɔ du?— Jizɔs bin tɛl in disaypul dɛn se dɛn nɔ fɔ de slip, dɛn fɔ de wach. Aw wi go du dat?—

Wi nid fɔ lisin gud wan to wetin dɛn de tɛl wi na mitin ɛn wi fɔ pe atɛnshɔn to wetin wi de rid na di Baybul. Wi nid fɔ de pre to Jiova ɔltɛm ɛn aks am fɔ ɛp wi fɔ wɔship am. If wi du dat, Jiova go ɛp wi nɔ fɔ fred. Dɔn wi go gladi we wi gɛt di chans fɔ tɛl ɔda pipul dɛn bɔt di Gret Ticha ɛn in Papa.