IMAJIN se sɔmbɔdi gi yu wan spɛshal gift. Aw yu go fil bɔt am?— Yu go jɔs tɛl tɛnki ɛn fɔgɛt bɔt di pɔsin we gi yu? Ɔ yu go de mɛmba am ɛn wetin i dɔn du fɔ yu?—

Jiova Gɔd dɔn gi wi wan spɛshal gift. I mek in Pikin kam na dis wɔl fɔ day fɔ wi. Yu no wetin mek Jizɔs bin nid fɔ day fɔ wi?— Dis na sɔntin we rili impɔtant we wi fɔ ɔndastand.

As wi bin dɔn lan na Chapta 23, Adam sin we i nɔ du wetin Gɔd tɛl am. Ɛn wisɛf dɔn gɛt dis sin frɔm Adam, we na ɔlman in papa. So, wetin yu tink se wi nid?— Wi nid nyu papa, we dɔn liv pafɛkt layf na dis wɔl. Udat yu tink se go ebul bi da papa de?— Na Jizɔs.

Jiova sɛn Jizɔs na dis wɔl so dat i go tan lɛk papa to wi, datɛnde Adam nɔ go bi wi papa igen. Di Baybul se: ‘“We Gɔd mek di fɔs man, Adam, i gi am layf;” bɔt di las Adam na di spirit we de gi layf.’ Udat na bin di fɔs Adam?— Yɛs, na di wan we Gɔd bin mek wit dɔti na dis wɔl. Udat na di sɛkɔn Adam?— Na Jizɔs. Di Baybul ɛp wi fɔ no dis, we i se: ‘Na dɔti, Gɔd tek mek di fɔs Adam; di sɛkɔn Adam [we na Jizɔs] kɔmɔt na ɛvin.’— Fɔs Lɛta Fɔ Kɔrint 15:45, 47; Jɛnɛsis 2:7.

Bikɔs Gɔd tek Jizɔs in layf na ɛvin ɛn put am insay Meri in bɛlɛ, na dat mek Jizɔs nɔ bin gɛt ɛni sin frɔm Adam. Na dis mek  Jizɔs na bin pafɛkt mɔtalman. (Lyuk 1:30-35) Ɛn na dat mek we dɛn bɔn Jizɔs, wan enjɛl bin tɛl di shɛpad dɛn se: ‘Tide dɛn dɔn bɔn Wan Pikin we go sev una.’ (Lyuk 2:11) Bɔt fɔ mek i go sev wi, wetin Jizɔs we na bin bebi bin nid fɔ du?— I bin nid fɔ gro ɛn bi bigman jɔs lɛk Adam. Dɔn Jizɔs go bi ‘di sɛkɔn Adam.’

Jizɔs, we go sev wi, go bi bak wi “Ɛvalastin Papa.” Na so di Baybul kɔl am. (Ayzaya 9:6, 7) So Jizɔs we na pafɛkt man go bi wi papa ɛn Adam we nɔ pafɛkt igen we i sin nɔ go bi wi papa igen. So wi gɛt di chans fɔ pik ‘di sɛkɔn Adam’ as wi papa. Ɛn Jizɔs insɛf na Gɔd in Pikin.

We wi lan bɔt Jizɔs, wi go mek i bi di wan we go sev wi. Yu mɛmba wetin Jizɔs de sev wi frɔm?— Yɛs, i de sev wi frɔm di sin ɛn day we Adam lɛf gi wi. Jizɔs gi in pafɛkt layf di tɛm we in na bigman. Jiova mek Jizɔs day fɔ wi so dat i go fɔgiv wi fɔ wi sin dɛn.—Matyu 20:28; Lɛta Fɔ Rom 5:8; 6:23.

Fɔ tru, wi nɔ want fɔ fɔgɛt wetin Gɔd ɛn in Pikin du fɔ wi, nɔto so?— Jizɔs bin sho in disaypul dɛn wan spɛshal we we go ɛp wi fɔ mɛmba wetin i du fɔ wi. Mek wi tɔk bɔt am.

 Imajin se yu de na wan rum we de na wan ɔpgarɛt na Jerusɛlɛm. Na bin nɛt. Jizɔs ɛn in apɔsul dɛn bin sidɔm rawnd wan tebul. Na di tebul, dɛn bin gɛt ship we dɛn dɔn ros, flat bred, ɛn rɛd wayn. Dɛn bin de it wan spɛshal it. Yu no wetin mek?—

Dis it na fɔ mɛmba dɛn bɔt wetin Jiova bin dɔn du trade trade we di Izrɛlayt dɛn na bin slev dɛn na Ijipt. Datɛnde, Jiova bin tɛl in pipul dɛn se: ‘Ɛvri famili fɔ kil wan yɔŋ ship ɛn put in blɔd na di domɔt in frem na dɛn os.’ Dɔn i se: ‘Una go insay una os ɛn it di ship.’

 Di Izrɛlayt dɛn du am. Ɛn da sem nɛt de, Gɔd in enjɛl pas na Ijipt. Na bɔku os dɛn, di enjɛl kil di fɔs pikin. Bɔt ɛni os we di enjɛl si di ship in blɔd na di domɔt in frem, i de pas oba di os. No pikin nɔ day na dɛn os dɛn de. Fɛro, we na di kiŋ na Ijipt, bin fred we i si wetin Jiova in enjɛl dɔn du. So Fɛro tɛl di Izrɛlayt dɛn se: ‘Una fri fɔ go. Una kɔmɔt na Ijipt!’ So dɛn pak dɛn tin dɛn pantap dɛn kamɛl ɛn dɔnki dɛn ɛn dɛn go.

Jiova nɔ bin want in pipul dɛn fɔ fɔgɛt aw i fri dɛn. So i tɛl dɛn se: ‘Wan tɛm insay di ia, una fɔ de it wan it we tan lɛk di wan we una dɔn it dis nɛt.’ Dɛn kɔl dis spɛshal it ya so di Pasova. Yu no wetin mek dɛn kɔl am so?— Na bikɔs da nɛt de, Gɔd in enjɛl “pas oba” di os dɛn we mak wit blɔd.—Ɛksodɔs 12:1-13, 24-27, 31.

Jizɔs ɛn in apɔsul dɛn de tink bɔt dis we dɛn de it di Pasova. Afta dat, Jizɔs bin du sɔntin we rili impɔtant. Bifo i du am, i drɛb Judas. Dɔn Jizɔs tek wan pan di bred dɛn we bin dɔn lɛf, i pre pan am, brok brok am, ɛn pas am to in disaypul dɛn. I tɛl dɛn se: “Una tek am ɛn it.” Dɔn i tɛl dɛn se: ‘Dis min mi bɔdi, we a gɛt fɔ gi fɔ una di tɛm we a go day fɔ una.’

Afta dat, Jizɔs tek wan kɔp we gɛt rɛd wayn. Afta i pre bak, i pas am rawnd to in disaypul dɛn, ɛn tɔk se: “Una ɔl drink wetin de insay de.” Ɛn i tɛl dɛn bak se: ‘Dis wayn min mi blɔd. I nɔ go te igen, a go gi mi blɔd fɔ pul una pan sin. Una go de du dis fɔ mɛmba mi.’—Matyu 26:26-28, NW; Fɔs Lɛta Fɔ Kɔrint 11:23-26, NW.

Yu notis se Jizɔs bin tɛl in disaypul dɛn fɔ kɔntinyu fɔ mɛmba am, nɔto so?— Dɛn nɔ go nid fɔ de it di Pasova. Bifo dat,  wantɛm ɛni ia, dɛn fɔ it dis spɛshal it fɔ mɛmba Jizɔs ɛn di day we i day. Dɛn kɔl dis it di Ivintɛm It fɔ Mɛmba di Masta. Tide wi de kɔl am di Mɛmorial. Wetin mek?— Na bikɔs i de ɛp wi fɔ mɛmba wetin Jizɔs ɛn in Papa, Jiova Gɔd, du fɔ wi.

Di bred fɔ mek wi tink bɔt Jizɔs in bɔdi. I bin gri fɔ sakrifays in bɔdi so dat wi go gɛt layf we go de sote go. Wetin di rɛd wayn fɔ mek wi mɛmba?— Dat fɔ mek wi mɛmba aw Jizɔs in blɔd rili impɔtant. I valyu fawe pas di ship in blɔd we dɛn bin yuz fɔ di Pasova na Ijipt. Yu no wetin mek?— Di Baybul se na Jizɔs in blɔd de mek Jiova fɔgiv wi sin dɛn. Ɛn we i go dɔn pul ɔl wi sin dɛn kɔmɔt pan wi, wi nɔ go de sik, ol, ɛn day igen. Na dat wi fɔ de tink bɔt we wi go di Mɛmorial.

Yu tink se na ɔlman fɔ it di bred ɛn drink di wayn na di Mɛmorial?— Wɛl, Jizɔs tɛl di wan dɛn we fɔ it di bred ɛn drink di wayn se: ‘Una go de wit mi na ɛvin na mi Kiŋdɔm ɛn sidɔm na di say we kiŋ de sidɔm fɔ rul.’ (Lyuk 22:19, 20, 30, NW) Dis min se dɛn go go na ɛvin ɛn bi kiŋ dɛn we go rul wit Jizɔs. So na di wan dɛn nɔmɔ we gɛt di op fɔ rul wit Jizɔs na ɛvin fɔ it di bred ɛn drink di wayn.

Bɔt ivin di wan dɛnsɛf we nɔ de it di bred ɛn drink di wayn fɔ go di Mɛmorial. Yu no wetin mek?— Na bikɔs Jizɔs day fɔ wi ɔl. We wi go di Mɛmorial, wi de sho se wi nɔ fɔgɛt wetin Jizɔs du fɔ wi. Wi mɛmba Gɔd in wɔndaful gift.