MAMA ɛn papa dɛn ɔl kin du sɔntin we mɔtalman nɔ ebul fɔ ɔndastand. Dɛn kin gi pat pan dɛn bɔdi dɛn. Dis kin mek pikin bigin gro insay in mama in bɛlɛ. So wi nɔ kin sɔprayz we pipul dɛn kin tɔk se na “mirekul” we dɛn bɔn pikin.

Fɔ bɔn pikin, na jɔs di fɔs pat pan di wok we mama ɛn papa dɛn gɛt. Fɔs, we dɛn kin bɔn pikin dɛn, di pikin dɛn kin abop pan dɛn mama ɛn papa ɔ ɔda big pɔsin fɔ du ɔltin fɔ dɛn. Bɔt as dɛn de gro ɔp, dɛn nɔ kin jɔs nid tin fɔ it, ples fɔ slip, klos fɔ wɛr, ɔ pɔsin we de du af-af tin fɔ dɛn. Dɛn kin nid pɔsin fɔ ɛp dɛn fɔ no aw fɔ tink, aw fɔ kɔntrol di we aw dɛn de fil, aw fɔ liv dɛn layf, ɛn aw fɔ wɔship Gɔd.

Fɔ mek pikin dɛn go ebul fɔ gro fayn, dɛn mama ɛn papa dɛn fɔ sho se dɛn lɛk dɛn. Pan ɔl we i fayn fɔ tɛl yu pikin se yu lɛk am, yu fɔ stil tray fɔ du wetin yu de se. Pikin dɛn nid mama ɛn papa dɛn we de sɛt fayn ɛgzampul fɔ dɛn. Dɛn nid mama ɛn papa dɛn we go ɛp dɛn fɔ du di rayt tin ɛn gi dɛn advays bɔt aw dɛn go liv dɛn layf. Ɛn dɛn nid dɛn tin ya frɔm di tɛm we dɛn smɔl te dɛn big. If mama ɛn papa dɛn nɔ ɛp dɛn pikin dɛn di rayt tɛm, dɛn pikin dɛn kin disayd fɔ du sɔntin we go mek dɛn ɛn dɛn mama ɛn papa dɛn at pwɛl ɛn dɛn go fil siriɔs pen na dɛn at. Dis dɔn apin to bɔku famili dɛn.

Na insay di Baybul yu go gɛt di bɛst advays. So di bɛst buk we mama ɛn papa dɛn go yuz fɔ tich dɛn pikin dɛn, na di Baybul ɛn yu nɔ go kɔmpia am to ɛni ɔda tin. We dɛn yuz di Baybul fɔ tich dɛn pikin dɛn, dɛn pikin dɛn go no se wetin dɛn de tich dɛn, nɔto wetin mɔtalman tɔk, bɔt na wetin di Pɔsin we mek dɛn, we na dɛn Papa we de na ɛvin, tɔk. Dis go mek dɛn tek di advays as sɔntin we impɔtant.

 Di Baybul ɛnkɔrej mama ɛn papa dɛn fɔ tray tranga wan fɔ ɛp dɛn pikin dɛn fɔ no wetin mek Gɔd in advays dɛn impɔtant ɛn fɔ mɛmba fɔ fala dɛn. Bɔt as pikin dɛn de big, mama ɛn papa dɛn kin si se i nɔ izi fɔ tɔk to dɛn bɔt tin dɛn we rili impɔtant. Na dat mek dɛn mek dis buk we nem Lan Frɔm di Gret Ticha, fɔ ɛp fɔ lɛ dɛn kayn tin ya nɔ apin. I go mek yu ɛn yu pikin dɛn rid bɔt Gɔd togɛda. Bɔt apat frɔm dat, i fɔ mek di wan dɛn we de rid dis buk wit pikin dɛn ebul fɔ tɔk to di pikin dɛn ɛn di pikin dɛnsɛf ebul fɔ tɔk dɛn.

Yu go notis se dis buk de ɛnkɔrej pikin dɛn fɔ tɔk. I gɛt bɔku kwɛstyɔn dɛn we dɛn put na di rayt ples. We yu mit dɛn kwɛstyɔn ya, yu go si wan dash nia de (—). Dis na fɔ mɛmba yu se yu fɔ wet ɛn ɛnkɔrej di pikin fɔ tɔk wetin i tink. Pikin dɛn lɛk fɔ tɔk wetin dɛn tink. So if yu nɔ alaw dɛn fɔ tɔk wetin dɛn tink, i nɔ go tu te, dɛn maynd nɔ go de pan wetin una de du.

Bɔt di tin we impɔtant pas ɔl, na dat dɛn kwɛstyɔn ya go ɛp yu fɔ no wetin de na yu pikin in maynd. Sɔntɛnde, di pikin go gi ansa we nɔ kɔrɛkt. Bɔt di tin we dɛn rayt afta di kwɛstyɔn go ɛp di pikin fɔ no aw fɔ tink di rayt we.

Wan spɛshal tin bɔt dis buk na dat i gɛt pas 230 pikchɔ dɛn. Dɛn rayt sɔntin nia bɔku pan dɛn pikchɔ ya, so dat di pikin go ebul fɔ tɔk bɔt wetin i dɔn si ɛn rid. So i go fayn fɔ mek yu ɛn di pikin luk dɛn pikchɔ ya ɛn tɔk bɔt dɛn. Dis na fayn we fɔ ɛp di pikin fɔ mɛmba di impɔtant tin dɛn we i dɔn lan.

We di pikin lan fɔ rid, ɛnkɔrej am fɔ rid di buk to insɛf ɛn to yu. Di mɔ we i de rid am, na di mɔ di fayn advays dɛn we de insay di buk go lɛf na in maynd ɛn at. Bɔt fɔ mek yu ɛn di pikin lɛk ɛn rɛspɛkt unasɛf mɔ ɛn mɔ, i go fayn mek yu tray tranga wan fɔ lɛ una rid di buk togɛda, ɛn una fɔ du am ɔltɛm.

Trade, yu nɔ go imajin se pikin dɛn go no bɔt ɔ put an pan mami ɛn dadi biznɛs, juju biznɛs, ɛn ɔda tin dɛn we nɔ fayn. Bɔt tide, pikin dɛn kin gɛt dɛn kayn prɔblɛm dɛn ya. So dɛn nid dɛn mama ɛn papa dɛn fɔ protɛkt dɛn, ɛn na dat dis buk de ɛp mama ɛn papa dɛn fɔ du. Dis buk de ɛksplen sɔntin simpul wan ɛn wit rɛspɛkt. Pikin dɛn rili nid pɔsin fɔ ɛp dɛn fɔ no wi Papa, Jiova Gɔd, we gɛt sɛns pas ɔlman. Na dat Jizɔs we na di Gret Ticha, bin de du ɔltɛm. Wi rili op se dis buk go ɛp yu ɛn yu famili fɔ liv una layf di we aw Jiova want, so dat una go gɛt di blɛsin we go de sote go.