YU SABI ɛnibɔdi we sik?— Sɔntɛnde yusɛf kin sik. Yu kin gɛt kol ɔ yu bɛlɛ kin at. Sɔm pipul dɛn kin sik bad. Dɛn nɔ kin ivin ebul fɔ tinap pas pɔsin ɛp dɛn. Dis kin apin mɔ to pipul dɛn we dɔn ol.

Ɔlman kin sik. Yu no wetin mek ɔlman kin sik, ol, ɛn day?— Wan de dɛn briŋ wan man we nɔ ebul waka, to Jizɔs, ɛn Jizɔs bin sho wetin mek pipul dɛn kin sik ɛn day. Mek a tɛl yu bɔt dat.

Jizɔs bin de na wan os insay wan tɔŋ nia di Si na Galili. Bɔku pipul dɛn bin kam fɔ si am. Di pipul dɛn we kam bin bɔku te spes nɔ bin de fɔ ɔda pipul dɛn fɔ ɛnta. Nɔbɔdi nɔ ebul kam nia di domɔt. Bɔt stil, pipul dɛn bin jɔs de kam! Sɔm pipul dɛn briŋ wan man we nɔ ivin ebul waka. Na 4 man dɛn bin tot am na in smɔl bed.

Yu no wetin mek dɛn want briŋ dis sikman to Jizɔs?— Dɛn gɛt fet se Jizɔs go ɛp di man. Dɛn biliv se Jizɔs go ebul mɛn in sik. Yu no aw dɛn manej briŋ da man we nɔ ebul waka, to Jizɔs, pan ɔl we pipul dɛn bɔku na di os?—

Di pikchɔ we yu de si sho aw dɛn manej du am. Fɔs, dɛn tot di man go ɔp di ruf. Na bin flat ruf. Ɛn dɛn mek big ol na  di ruf. Dɔn dɛn pas di sikman in bed na di ol fɔ put am dɔŋ. Dɛn bin rili gɛt fet.

Ɔl di pipul dɛn na di os bin sɔprayz we dɛn si wetin apin. Di man we nɔ ebul waka, we ledɔm na in bed bin de midul dɛn. Yu tink se Jizɔs bin vɛks we i si wetin dɛn man dɛn ya du?— Nɔ-o! I bin gladi we i si se dɛn rili gɛt fet. So i bin tɛl di man we nɔ ebul waka se: “Yu sin dɛn dɔn kɔmɔt pan yu.”

Sɔm pipul dɛn tink se i nɔ rayt we Jizɔs tɔk dat. Dɛn nɔ tink se Jizɔs go ebul fɔgiv sin. So fɔ sho se i ebul, Jizɔs tɛl di man se: ‘Grap, tek yu bed, go na yu os!’

 As Jizɔs tɔk dat, di man wɛl! Naw i ebul tinap ɛn waka fɔ insɛf. Di pipul dɛn we si dis mirekul bin sɔprayz. Dɛn nɔ ɛva si sɔntin we wɔndaful lɛk dat! Dɛn tɛl Jiova tɛnki we i gi dɛn di Gret Ticha, we ebul mɛn pipul dɛn sik dɛn.—Mak 2:1-12, NW.

Wetin wi lan frɔm dis mirekul?— Wi lan se Jizɔs gɛt pawa fɔ fɔgiv sin dɛn ɛn fɔ mɛn sik pipul dɛn. Bɔt wi lan sɔntin bak we rili impɔtant. Wi lan se na sin de mek pipul dɛn de sik.

Yu tink se wi ɔl de sik bikɔs wi ɔl de sin?— Yɛs, di Baybul se dɛn bɔn wi ɔl wit sin. Yu no wetin i min fɔ bɔn wit sin?— I min se wi nɔ pafɛkt. Sɔntɛnde wi kin du bad tin ivin we wi nɔ want fɔ du am. Yu no aw wi ɔl gɛt sin?—

Wi ɔl bɔn wit sin bikɔs di fɔs man we na Adam nɔ bin lisin to Gɔd. I bin sin we i pwɛl Gɔd in lɔ. Ɛn wi ɔl gɛt sin frɔm Adam. Yu no aw wi manej gɛt sin frɔm am? Mek a tɔk am di we aw yu go ɔndastand.

Sɔntɛm yu dɔn si we sɔmbɔdi de bek bred na pan. Wetin go apin to di bred if di pan dɛnt? Yu no?— Di sem dɛnt go de pan ɔl di bred dɛn we dɛn bek na da pan de, nɔto so?—

 Adam tan lɛk da pan de, ɛn wi ɔl tan lɛk di bred. I nɔ bin pafɛkt igen we i pwɛl Gɔd in lɔ. I tan lɛk se i gɛt dɛnt, ɔ wan bad mak. So we i bɔn pikin dɛn, aw yu tink se dɛn go bi?— Ɔl in pikin dɛn go gɛt di sem mak we mek dɛn nɔ pafɛkt.

We dɛn kin bɔn bɔku pikin dɛn, yu nɔ go si se dɛn gɛt siriɔs wɛlbɔdi prɔblɛm. Dɛn go gɛt an ɛn fut. Bɔt di sin we dɛn gɛt kin mek dɛn sik ɛn leta dɛn kin day.

Na tru se sɔm pipul dɛn kin sik pas ɔda wan dɛn. Wetin mek? Yu tink se na bikɔs dɛn bɔn dɛn wit bɔku sin?— Nɔto so i bi, ɔlman bɔn wit di sem sin. Wi ɔl nɔ pafɛkt. So, as tɛm de go, ɔlman kin gɛt difrɛn kayn sik dɛn. Ivin di wan dɛn we de obe ɔl Gɔd in lɔ dɛn ɛn we nɔ kin du bad bad tin dɛn kin sik.

Wetin mek sɔm pipul dɛn kin sik pas ɔda wan dɛn?— Bɔku rizin dɛn de we mek dat kin bi. Sɔntɛm dɛn nɔ gɛt bɛtɛ tin fɔ it. Ɔ dɛn nɔ kin it di rayt it. Dɛn kin it bɔku kek ɛn swit. Wan ɔda rizin bak we mek dɛn kin sik na bikɔs dɛn nɔ kin slip kwik na nɛt, so dɛn nɔ kin slip bɛtɛ. Ɔ sɔntɛm dɛn nɔ kin wɛr bɛtɛ klos we di ples kol. Sɔm pipul dɛn bɔdi wik, so dɛn nɔ kin gɛt bɛtɛ trɛnk fɔ fɛt di sik, ilɛksɛf dɛn tray fɔ kia fɔ dɛn wɛlbɔdi wan.

 Yu tink se tɛm go kam we wi nɔ go sik igen? Yu tink se tɛm go kam we wi nɔ go sin igen?— Wetin Jizɔs bin du fɔ da man we nɔ ebul waka?— Jizɔs bin fɔgiv in sin dɛn ɛn mɛn am. We Jizɔs du dis, dat sho wetin i gɛt fɔ du to ɔl di wan dɛn we de tray fɔ du wetin rayt.

If wi sho se wi nɔ lɛk fɔ sin ɛn wi nɔ lɛk fɔ du wetin bad, Jizɔs go mɛn wi. Tumara bambay, i go pul ɔl wi sin dɛn we wi gɛt naw. I go du dis bikɔs in na Kiŋ na Gɔd in Kiŋdɔm. Sin nɔ go kɔmɔt pan wi wantɛm wantɛm. I go tek tɛm bifo dat apin. Dɔn we wi nɔ gɛt sin igen, wi nɔ go sik igen. Wi ɔl nɔ go gɛt wan prɔblɛm wit wɛlbɔdi biznɛs. Wi go rili gladi!