YU KIN tɔk to Jiova Gɔd?— I want mek yu tɔk to am. We yu de tɔk to Gɔd, dɛn kɔl dat prea. Bɔku tɛm, Jizɔs bin de tɔk to in Papa na ɛvin. Sɔm tɛm dɛn de i kin want fɔ de in wangren we i de tɔk to Gɔd. Wan tɛm, di Baybul se, ‘In wan go ɔp di il fɔ pre. I bin de de sote ivintɛm.’—Matyu 14:23.

Usay yu kin go we yu want fɔ pre to Jiova yu wangren?— Sɔntɛm na yu wangren kin de jɔs bifo yu slip na nɛt, ɛn yu kin pre to Jiova. Jizɔs bin se, ‘We una de pre, una fɔ go insay una rum, una lɔk una domɔt, ɛn pre to una Papa we de na ɛvin.’ (Matyu 6:6) Yu kin pre to Jiova ɛni nɛt bifo yu slip?— Yu fɔ de du dat.

Jizɔs bin de pre bak we ɔda pipul dɛn de wit am. We Jizɔs in padi Lazarɔs bin day, i bin pre wit ɔda pipul  dɛn na di ples usay dɛn bɛr Lazarɔs. (Jɔn 11:41, 42) Ɛn Jizɔs kin pre bak we i ol mitin wit in disaypul dɛn. Yu kin go na mitin usay dɛn kin pre, nɔto so?— Na big pɔsin kin pre fɔ ɔlman. So tek tɛm lisin to wetin i de se bikɔs i de tɔk to Gɔd fɔ yu. Dɔn we i dɔn fɔ pre, yu go ebul fɔ se “Emɛn.” Yu no wetin i min fɔ se “Emɛn”?— I min se yu lɛk di prea, yu gri wit wetin dɛn pre fɔ, ɛn yu want dat fɔ bi yu yon prea.

Jizɔs bin de pre bak we i want fɔ it. I bin de tɛl Jiova tɛnki fɔ di it. Yu kin pre ɔltɛm bifo yu it?— I fayn fɔ mek wi de tɛl Jiova tɛnki fɔ di tin we i gi wi fɔ it bifo wi bigin fɔ it am. Ɔda pɔsin kin pre we una de it togɛda. Bɔt wetin yu go du if na yu wangren de it ɔ yu de it wit pipul dɛn we nɔ de tɛl Jiova tɛnki?— Da tɛm de yu go nid fɔ pre fɔ yusɛf.

Yu tink se yu fɔ pre lawd wan ɔltɛm? Ɔ yu tink se Jiova go yɛri yu we yu pre to am insay yu at?— Wi go no di ansa frɔm wetin bin apin to Nɛimaya. Nɛimaya bin de wɔship Jiova, ɛn i bin de wok fɔ wan Pashian kiŋ we nem Atazaksis. Wan de, Nɛimaya in at bin pwɛl bikɔs i bin yɛri se di wɔl na Jerusɛlɛm  dɔn fɔdɔm, ɛn Jerusɛlɛm na di men tɔŋ usay in pipul dɛn de.

We di kiŋ bin aks Nɛimaya wetin mek in at pwɛl, Nɛimaya bin pre fɔs na in at. Dɔn Nɛimaya tɛl di kiŋ wetin mek in at pwɛl ɛn aks di kiŋ if i go alaw am fɔ go na Jerusɛlɛm fɔ bil di wɔl bak. Wetin bin apin?—

Gɔd bin ansa Nɛimaya in prea. Di kiŋ bin tɛl am se i kin go! Di kiŋ bin ivin gi am bɔku bɔku bod dɛn we i go yuz fɔ bil di wɔl. So Gɔd kin rili ansa wi prea dɛn, ilɛksɛf na insay wi at wi pre.—Nɛimaya 1:2, 3; 2:4-8.

Naw tink bɔt dis. Yu fɔ butu yu ed we yu de pre? Yu fɔ nil dɔŋ? Wetin yu tink?— Sɔm tɛm dɛn de Jizɔs bin de nil dɔŋ we i de pre.  Ɔda tɛm dɛn i bin de tinap. Ɛn sɔntɛnde i bin de es in ed fɔ luk ɔp na ɛvin we i de pre. Na dat i bin du we i de pre fɔ Lazarɔs.

So, wetin dis de tɛl wi bɔt prea?— Dis de tɛl wi se di we aw wi mek nɔ impɔtant we wi de pre. Sɔntɛnde i go fayn fɔ mek yu butu yu ed ɛn sɛt yu yay. Ɔda tɛm dɛn yu kin ivin nil dɔŋ we yu de pre, lɛk aw Jizɔs bin du. Bɔt mɛmba se wi kin pre to Gɔd ɛnitɛm, ilɛksɛf na santɛm ɔ na nɛt, ɛn i go yɛri wi prea. Di tin we impɔtant bɔt prea na dat wi rili biliv se Jiova de lisin to wi. Yu biliv se Jiova de yɛri yu prea dɛn?—

Wetin wi fɔ se we wi de pre to Jiova?— Tɛl mi: Wetin yu kin pre fɔ we yu de tɔk to Gɔd?— Jiova dɔn gi wi bɔku bɔku fayn tin dɛn, ɛn i fayn fɔ mek wi tɛl am tɛnki fɔ dɛn tin ya, nɔto so?— Wi kin tɛl am tɛnki fɔ di tin we i dɔn gi wi fɔ it. Bɔt yu dɔn ɛva tɛl am tɛnki fɔ di mun, di tik dɛn, ɛn di fayn fayn flawa dɛn?— Na in mek ɔl dɛn tin ya.

Wan tɛm Jizɔs in disaypul dɛn bin aks am fɔ tich dɛn aw fɔ pre. Di Gret Ticha bin du am, ɛn i sho dɛn di tin dɛn we rili impɔtant fɔ lɛ wi pre fɔ. Yu no wetin na dɛn tin ya?— Tek yu Baybul, ɛn opin to Matyu chapta 6. Insay vas 9 to 13, wi go  si di prea we bɔku pipul dɛn de kɔl di Awa Fada ɔ di Lɔds Prea. Lɛ wi rid am togɛda.

Wi dɔn lan se Jizɔs bin tɛl wi fɔ pre bɔt Gɔd in nem. I se wi fɔ pre mek pipul dɛn tek Gɔd in nem as sɔntin we oli. Wetin na Gɔd in nem?— Yɛs, na Jiova, ɛn wi fɔ lɛk da nem de.

Sɛkɔn, Jizɔs bin tich wi fɔ pre fɔ mek Gɔd in Kiŋdɔm kam. Dis Kiŋdɔm impɔtant bikɔs i go mek pis de na di wɔl ɛn mek di wɔl bi Paradays.

Tɔd, di Gret Ticha se wi fɔ pre fɔ mek wetin Gɔd want bi na dis wɔl jɔs lɛk aw i de bi na ɛvin. If wi de pre fɔ dis, wi fɔ du wetin Gɔd want.

Dɔn Jizɔs bin tɛl wi fɔ pre fɔ di it we wi nid fɔ tide. I tɔk bak se wi fɔ tɛl Gɔd se wi sɔri we wi du bad tin. Ɛn wi fɔ beg Gɔd fɔ mek i fɔgiv wi. Bɔt bifo Gɔd du dat, wi fɔ dɔn fɔgiv ɔda pipul dɛn we bin dɔn du wi bad. Yu tink se i izi fɔ mek yu du dat?—

Jizɔs se wi fɔ pre bak fɔ mek Jiova Gɔd nɔ alaw Setan fɔ mek bad tin dɛn apin to wi. Ɔl dɛn tin ya na gud gud tin dɛn we wi kin pre to Gɔd bɔt.

Wi fɔ biliv se Jiova de yɛri wi prea dɛn. Wi nɔ fɔ jɔs de aks am fɔ mek i ɛp wi, wi fɔ de tɛl am tɛnki. I kin gladi we wi min wetin wi de pre fɔ ɛn we wi de aks am fɔ di rayt tin. Ɛn i go gi wi dɛn tin ya. Yu biliv dat?—