UDAT bin de gladi we Sɔl de du bad tin dɛn?— Na Setan bin de gladi. Di edman dɛn bak pan Gɔd biznɛs bin de gladi. Bɔt we Sɔl kam bi di Gret Ticha in disaypul ɛn dɛn bigin kɔl am Pɔl, di edman dɛn pan Gɔd biznɛs bin et am. So yu dɔn si naw wetin mek i nɔ kin izi fɔ lɛ pɔsin we na Jizɔs in disaypul du gud tin?—

Pɔl bin sɔfa bɔku tin we i bi Jizɔs in disaypul. Fɔ ɛgzampul, wan tɛm di ay prist we nem Ananayas bin tɛl sɔm man dɛn fɔ bɔks Pɔl na in fes. Ananayas bin ivin tray fɔ put Pɔl na jel. Wan ɔda tɛm sɔm bad pipul dɛn bit Pɔl ɛn dɛn ston am wit big big ston dɛn fɔ mek i day.—Di Apɔsul Dɛn Wok [Akt] 23:1, 2; Sɛkɛn Lɛta Fɔ Kɔrint 11:24, 25.

Bɔku pipul dɛn go tray fɔ mek wi du tin dɛn we nɔ de mek Gɔd gladi. So tink bɔt dɛn kwɛstyɔn dɛn ya, Yu rili lɛk fɔ du wetin  gud? Yu so lɛk am dat yu go rɛdi fɔ du wetin gud ilɛksɛf ɔda pipul dɛn et yu fɔ dat? Yu fɔ rili gɛt maynd fɔ du am, nɔto so?—

Sɔntɛm yu go dɔn de wɔnda, ‘Wetin mek pipul dɛn et wi we wi de du gud tin? Amin dɛn fɔ gladi?’ Ɛn dɛn fɔ rili lɛk dat. Bɔku tɛm, pipul dɛn bin lɛk Jizɔs bikɔs i bin de du gud tin dɛn. Wan tɛm, ɔl di pipul dɛn na wan tɔŋ go gɛda bifo di os usay Jizɔs bin de. Dɛn bin kam de bikɔs Jizɔs bin de mɛn di wan dɛn we sik.—Mak 1:33.

Bɔt sɔntɛnde pipul dɛn nɔ bin lɛk wetin Jizɔs bin de tich. Pan ɔl we i bin de tich di tru tin ɔltɛm, sɔm pipul dɛn bin rili et am  bikɔs i de tɔk di tru. Dis bin apin wan de na Nazarɛt, we na di tɔŋ usay dɛn mɛn Jizɔs. Wan de, i go na di Ju mitin os. Dis na di ples usay di Ju dɛn kin gɛda fɔ wɔship Gɔd.

We Jizɔs de de, i yuz di Skripchɔ dɛn fɔ gi wan fayn tɔk. Fɔs, di pipul dɛn bin lɛk wetin i tɔk. Dɛn bin kɔle Jizɔs we i bin de tɔk fayn fayn wɔd dɛn. I bin at fɔ lɛ dɛn biliv se na dɛn tɔŋ Jizɔs mɛn.

Bɔt tin bin chenj we Jizɔs tɔk wan ɔda tin. I tɛl dɛn bɔt di tɛm we Gɔd bin blɛs pipul dɛn we nɔto Ju. Di pipul dɛn we bin de na di Ju mitin os bin vɛks we Jizɔs tɔk dis. Yu no wetin mek?— Na bikɔs dɛn bin tink se na dɛn nɔmɔ gɛt Gɔd in blɛsin. Dɛn bin fil se dɛn bɛtɛ pas ɔda pipul dɛn. So dɛn et Jizɔs fɔ wetin i tɔk. Yu no wetin dɛn tray fɔ du to am?—

Di Baybul se: ‘Dɛn ol Jizɔs ɛn pul am kɔmɔt na di tɔŋ. Dɛn kɛr am go ɔp wan mawnten ɛn dɛn bin want fɔ push am mek i fɔdɔm go dɔŋ di mawnten ɛn day! Bɔt Jizɔs kɔmɔt na dɛn an.’—Lyuk 4:16-30.

If dat apin to yu, yu go ɛva go bak to dɛn pipul dɛn de fɔ tɔk to dɛn bɔt Gɔd?— Dat min se yu fɔ gɛt maynd, nɔto so?— Wɛl, afta lɛk wan ia so dɔn pas, Jizɔs bin go bak na Nazarɛt. Di Baybul se: “I bigin tich na di Ju mitin os.” Jizɔs nɔ bin fred pipul dɛn we nɔ lɛk Gɔd ɛn lɛf fɔ tɔk di tru.—Matyu 13:54.

Wan Satide, Jizɔs go na wan Ju mitin os. Insay di lɔ we Jiova bin gi di Izrɛlayt dɛn, i bin tɛl dɛn se dɛn nɔ fɔ du ɛni wok we dis de rich; dɛn fɔ yuz am fɔ wɔship am. Dɛn kɔl dis de, Sabat. We Jizɔs de na di Ju mitin os, i si wan man we in an day. Gɔd bin gi Jizɔs pawa fɔ mɛn dis man. Bɔt sɔm pipul dɛn we bin de de bin want fɔ gi Jizɔs trɔbul. Wetin yu tink se Jizɔs go du?—  Wɛl, fɔs, i aks dɛn se: ‘If una ship fɔdɔm insay ol di Sabat de, una nɔ go pul am kɔmɔt de?’

Yɛs, dɛn go pul dɛn ship insay ol, ilɛksɛf na di Sabat de, we na di de we dɛn fɔ rɛst. So Jizɔs tɛl dɛn se: ‘Mɔtalman valyu pas ship fawe, so i bɛtɛ fɔ ɛp mɔtalman di Sabat de pas fɔ ɛp ship!’ Dis sho di pipul dɛn klia wan se Jizɔs gɛt rayt fɔ mɛn dis man.

Jizɔs tɛl di man fɔ stret in an. As di man stret am so, in an wɛl wantɛm wantɛm. Di man bin rili gladi! Bɔt yu tink se di ɔda man dɛn bin gladi?— Nɔ-o. Dɛn et Jizɔs mɔ ɛn mɔ. Dɛn ivin bigin tink bɔt aw dɛn fɔ kil am!—Matyu 12:9-14.

Na di sem tin de bi tide. Ilɛk wetin wi du, wi nɔ go ɛva ebul fɔ mek ɔlman gladi. So wi gɛt fɔ disayd udat wi rili want fɔ mek i gladi. If wi want fɔ mek Jiova Gɔd ɛn in Pikin, Jizɔs Krays, gladi, wi fɔ du wetin dɛn de tich ɔltɛm. If wi du dat, udat go et wi? Udat go mek i nɔ izi fɔ lɛ wi du gud tin?—

Na Setan. Bɔt udat bak nɔ go gladi fɔ wi?— Na di wan dɛn we Setan dɔn ful bay we i dɔn mek dɛn biliv tin dɛn we nɔto tru. Jizɔs bin tɛl di edman dɛn pan Gɔd biznɛs se: “Na Setan na una papa, so una lɛk fɔ du di tin dɛn we una papa lɛk fɔ du.”—Jɔn 8:44.

Bɔku pipul dɛn de we Setan lɛk. Lɛ wi luk Jɔn chapta 15, vas 19. Jizɔs se: ‘If una bin gɛt wanwɔd wit di pipul dɛn na di wɔl, dɛn bin fɔ lɛk una lɛk aw dɛn lɛk dɛn yon pikin dɛn. Bɔt a dɔn pik una kɔmɔt pan dɛn, una ɛn dɛn nɔ de si wan we, na dat mek dɛn nɔ lɛk una.’

So ɔl di pipul dɛn we et Jizɔs in disaypul dɛn na di wan dɛn we nɔ de fala Jizɔs. Wetin mek pipul dɛn et Jizɔs in disaypul  dɛn?— Tink bɔt dis. Udat de rul di wɔl?— Di Baybul se na “Setan de rul di ol wɔl.”—Jɔn In Fɔs Lɛta 5:19.

So yu dɔn si naw wetin mek i nɔ kin izi fɔ du gud tin?— Na bikɔs Setan ɛn di wan dɛn we de biɛn am kin mek i nɔ izi fɔ du gud. Bɔt ɔda rizin de bak. Yu mɛmba am?— Wi bin dɔn lan na Chapta 23 se wi ɔl bɔn wit sin. Yu nɔ tink se i go fayn we sin, Setan, ɛn di wan dɛn we de biɛn am nɔ go de igen?—

Di Baybul se: ‘Di wɔl go dɔn wan de.’ Dis min se ɔl di wan dɛn we nɔ de fala di Gret Ticha nɔ go de igen. Jiova nɔ go gri mek dɛn liv sote go. Yu no udat go de sote go?— Di Baybul se na “di pɔsin we de du wetin Gɔd want.” (Jɔn In Fɔs Lɛta 2:17) Na di wan dɛn nɔmɔ we de “du wetin Gɔd want” go de sote go na di nyu wɔl we Gɔd go mek. So wi want fɔ du wetin gud, ilɛksɛf i nɔ izi, nɔto so?—