WETIN mɔ yu lɛk fɔ du, fɔ wok ɔ fɔ ple?— Fɔ tru, i nɔ bad fɔ ple. Di Baybul tɔk se Jɛrusɛlɛm bin ‘ful-ɔp wit bɔbɔ ɛn titi dɛn we bin de ple de.’—Zɛkaraya 8:5.

Di Gret Ticha kin ɛnjɔy fɔ wach pikin dɛn we dɛn de ple. Bifo i kam na di wɔl, i se: “A bin de nia [Gɔd] as man we sabi wok. . . . A bin de gladi ɔltɛm we a de wit am.” As wi dɔn si, Jizɔs bin de wok wit Jiova na ɛvin. Ɛn we i bin de de, i se: “A bin lɛk di wɔl, bɔt na mɔtalman a bin lɛk mɔ.” As wi bin dɔn lan, di Gret Ticha lɛk ɔlman ivin pikin dɛn.—Prɔvabs 8:30, 31, NW.

 Yu tink se Jizɔs bin de ple we in na bin pikin?— Sɔntɛm. Bɔt we in na bin man we “sabi wok” na ɛvin, yu tink se i bin de wok bak na dis wɔl?— Wɛl, dɛn bin de kɔl Jizɔs ‘di kapɛnta in pikin.’ Bɔt dɛn bin de kɔl am bak “di kapɛnta.” Wetin dis sho wi?— Josɛf we mɛn Jizɔs as in pikin go mɔs dɔn tich am. So na dis mek Jizɔs bi kapɛnta.—Matyu 13:55; Mak 6:3, NW.

Uskayn kapɛnta Jizɔs bin bi?— Ɛnti Jizɔs na bin man we sabi wok na ɛvin, yu nɔ tink se i go sabi fɔ du kapɛnta wok gud gud wan na dis wɔl?— Mɛmba se i bin  at fɔ du kapɛnta wok insay Jizɔs in tɛm. Sɔntɛm Jizɔs go dɔn go na bush, kɔt stik, kɔt am smɔl smɔl, kam wit am na os, shep di stik fɔ mek tebul, bɛnch, ɛn ɔda tin dɛn.

Yu tink se Jizɔs bin lɛk dis wok?— Yu go gladi if yu ebul mek chia ɛn tebul fɔ ɔda pipul dɛn, nɔto so?— Di Baybul se i fayn fɔ mek mɔtalman ‘ɛnjɔy wetin i de du.’ Di kayn we aw pɔsin kin ɛnjɔy we i de wok, i nɔ go ebul ɛnjɔy so if na ple nɔmɔ i de ple.—Ɛkliziastis 3:22.

Fɔ tru, wok gud fɔ wi maynd ɛn wi bɔdi. Bɔku pikin dɛn kin jɔs lɛk fɔ sidɔm wach tɛlivishɔn ɛn ple wit dɛn padi dɛn. Dis kin mek dɛn bɔmp pasmak ɛn lezi, ɛn dɛn nɔ kin rili gladi. Ɛn dɛn nɔ kin mek ɔda pipul dɛn gladi. Wetin wi nid fɔ du so dat wi go gladi?—

lnsay Chapta 17 na dis buk, wi lan se fɔ gi ɛn fɔ du tin we de ɛp ɔda pipul dɛn na tin we de mek yu gladi. (Di Apɔsul Dɛn Wok [Akt] 20:35) Di Baybul kɔl Jiova “di Gɔd we gladi ɔltɛm.” (Fɔs Lɛta To Timoti 1:11, NW) As wi rid insay Prɔvabs, Jizɔs bin “gladi ɛvride.” Wetin mek Jizɔs bin gladi?— Wɛl, i gi wan rizin, we i se: “Mi Papa de wok ɔltɛm, ɛn misɛf fɔ wok.”—Jɔn 5:17.

We Jizɔs bin de na di wɔl, nɔto kapɛnta wok i bin du te i day. Jiova bin gɛt spɛshal wok we i want lɛ i du na dis wɔl. Yu no wetin na da wok de?— Jizɔs se: ‘A fɔ go na ɔda tɔŋ dɛn fɔ tɛl ɔda pipul dɛn di gud nyus bɔt Gɔd in rul bikɔs na dat Gɔd sɛn mi fɔ kam du na di wɔl.’ (Lyuk 4:43) Sɔntɛnde we Jizɔs bin de prich to pipul dɛn, dɛn bin de biliv am ɛn tɛl ɔda pipul dɛn wetin Jizɔs se, jɔs lɛk di Samɛritan uman we yu de si na di pikchɔ.—Jɔn 4:7-15, 27-30.

 Aw Jizɔs bin fil we i de du dis wok? Yu tink se i bin want fɔ du am?— Jizɔs se: “Mi yon it na fɔ dɔn di wok we di wan we sɛn mi gi mi fɔ du, ɛn fɔ du ɔl wetin i want.” (Jɔn 4:34) Yu kin lɛk fɔ it di it we yu lɛk pas ɔl, nɔto so?— Dis de mek yu ebul imajin di we aw Jizɔs bin lɛk fɔ du di wok we Gɔd gi am.

Gɔd mek wi fɔ gladi we wi de lan fɔ wok. I tɔk se di gift we i gi mɔtalman na fɔ mek dɛn ‘ɛnjɔy dɛn wok.’ So if yu lan fɔ wok we yu smɔl, yu go ɛnjɔy yu layf mɔ.—Ɛkliziastis 5:19.

Dis nɔ min se smɔl pikin fɔ du wok we na fɔ big pɔsin, bɔt wi ɔl gɛt wok we wi ebul fɔ du. Yu mama ɛn papa kin go wok ɛnide so dat yu famili go gɛt tin fɔ it ɛn say fɔ slip. As yusɛf no, plɛnti wok de na os fɔ du, lɛk fɔ klin ɛn pak di os.

Uskayn wok yu go du we go bɛnifit ɔlman na di famili?— Sɔntɛm yu go ebul ɛp yu mama we i de kuk, was pan, trowe dɔti, klin di say we yu de slip, ɛn pak yu tɔys dɛn. Sɔntɛm yu de du dɛn wok dɛn ya. Dis de rili mek ɔlman na di famili bɛnifit.

Mek wi si aw dɛn kayn wok ya de bɛnifit ɔlman. Yu no se yu fɔ pak yu tɔys dɛn we yu dɔn ple dɔn. Wetin mek dis impɔtant?— I go ɛp fɔ mek di os pak fayn ɛn mek pɔsin nɔ fɔdɔm. If yu nɔ pak yu tɔys dɛn, sɔntɛm wande yu mama go kam, ɛn i ol lod na in an ɛn mas wan pan dɛn. Dis go mek i fɔdɔm ɛn bad tin go apin to am. Ɛn sɔntɛm dɛn go ivin kɛr am go na ɔspitul. Yu nɔ tink se dat go rili bad?— So we yu pak yu tɔys dɛn afta yu dɔn ple, dat go bɛnifit ɔlman.

Wan ɔda wok de bak we pikin dɛn fɔ du. Fɔ ɛgzampul, dɛn skul wok. We yu go na skul, yu de lan aw fɔ rid. Sɔm pikin  dɛn kin lɛk fɔ rid, bɔt ɔda wan dɛn kin se i at. Ivin if i tan lɛk se i at fɔs, yu go gladi if yu lan fɔ rid fayn. We yu lan fɔ rid, bɔku fayn tin dɛn de we yu go lan. Yu go ivin ebul fɔ rid Gɔd in buk, we na di Baybul. So we yu siriɔs pan yu skul wok, yu go bɛnifit, nɔto so?—

Sɔm pipul dɛn de we kin tray fɔ avɔyd wok. Sɔntɛm yu sabi sɔmbɔdi lɛk dat. Gɔd mek wi fɔ wok, so wi nid fɔ lan aw wi go ɛnjɔy fɔ wok. Yu tink se di Gret Ticha bin rili lɛk fɔ wok?— Wok bin jɔs tan lɛk we i de it sɔntin we i rili lɛk. Ɛn uskayn wok i bin de tɔk bɔt?— Na fɔ tɛl ɔda pipul dɛn bɔt Jiova Gɔd ɛn aw dɛn go gɛt layf sote go.

Sɔntin de we go ɛp wi fɔ ɛnjɔy wi wok. Aks yusɛf, ‘Wetin mek a nid fɔ du dis wok?’ We yu no wetin mek sɔntin impɔtant, dat go mek i izi fɔ du am. Ivin if di wok big ɔ smɔl, na fɔ du am fayn. If yu du dat, yu go gladi fɔ di wok we yu de du, jɔs lɛk di Gret Ticha.