IMAJIN se yu de insay wan bot we de sink. Yu go want mek pɔsin sev yu, nɔto so?— Wetin yu go du if di pɔsin day we i de sev yu?— Wɛl, na dat Jizɔs Krays du. As wi bin lan insay Chapta 37, i gi in layf so dat wi go sev.

Na tru se nɔto drawn wi bin de drawn we Jizɔs sev wi. Yu mɛmba wetin i sev wi frɔm?— Na frɔm di sin ɛn day we wi gɛt frɔm Adam. Jizɔs ivin day fɔ pipul dɛn we de du bad bad tin dɛn. Yu go gɛt maynd fɔ gi yu layf fɔ pipul dɛn lɛk dat?—

Di Baybul se: “I at fɔ mek ɛnibɔdi day fɔ pɔsin we de du ɔl wetin di Lɔ se nɔmɔ. I kin bi se pɔsin gri fɔ day fɔ sɔmbɔdi we gɛt sɔri at.” Bɔt di Baybul ɛksplen se Jizɔs ‘day fɔ pipul dɛn we nɔ de du wetin Gɔd want.’ Dis min se Jizɔs day fɔ pipul dɛn bak we nɔ de wɔship Gɔd! Di Baybul se: “Pan ɔl we sin bin plɛnti na wi layf, Krays day fɔ wi.”—Lɛta Fɔ Rom 5:6-8.

Yu mɛmba ɛni apɔsul we bin dɔn du bad bad tin dɛn?— Da apɔsul de se: “Jizɔs Krays kam na di wɔl fɔ sev dɛn pipul we de pan sin, ɛn na mi na di wan we dɔn sin pas ɔlman.” Di apɔsul we tɔk dis na Pɔl. I se i bin de “pan fulish layf” ɛn i “nɔ bin de du wetin rayt.”—Na wi mek am italiks; Fɔs Lɛta To Timoti 1:15; Taytɔs 3:3.

Jɔs mɛmba di lɛk we Gɔd lɛk wi we i gi in Pikin fɔ day fɔ wi. Tek yu Baybul ɛn rid bɔt dis na Jɔn chapta 3, vas 16. I se: “Gɔd so lɛk mɔtalman dat i gi in wangren Pikin we i lɛk so dat  ɛnibɔdi we biliv pan am nɔ go day, bɔt i go gɛt layf we go de sote go.”

So Jizɔs pruv to wi se i lɛk wi lɛk aw in Papa lɛk wi. Yu go mɛmba se insay Chapta 30 na dis buk, wi rid bɔt sɔm tin dɛn we Jizɔs sɔfa di nɛt we dɛn arɛst am. Dɛn bin kɛr Jizɔs go na di os usay di Ay Prist we nem Kayefas bin de ɛn tray am. Sɔm pipul dɛn kam tɔk lay lay tin dɛn bɔt Jizɔs ɛn ivin bɔks am. Ɛn Pita sɛf tɔk se i nɔ sabi Jizɔs. Naw lɛ wi mek lɛk se wi de de ɛn de si wetin de apin.

Mɔnintɛm kam. Jizɔs nɔ slip ol nɛt. Di prist dɛn nɔ bin tray Jizɔs di rayt we na nɛt, so dɛn kɔl di pipul dɛn na di Ju Ay kɔt kwik kwik wan, ɛn dɛn tray Jizɔs bak. Ya so bak dɛn lay pan Jizɔs se i dɔn tɔk bad tin dɛn bɔt Gɔd.

Di prist dɛn tay Jizɔs ɛn kɛr am go to Paylet, we na di Roman gɔvnɔ. Dɛn tɛl Paylet se: ‘Jizɔs de agens di gɔvmɛnt. So dɛn fɔ kil am.’ Bɔt Paylet si se na lay di prist dɛn de lay. So Paylet tɛl dɛn se: ‘A nɔ si ɛni bad tin we dis man du. A go fri am.’ Bɔt di prist dɛn ɛn ɔda pipul dɛn ala se: ‘Nɔ-o! Kil am!’

Leta, Paylet tray bak fɔ tɛl di pipul dɛn se i go fri Jizɔs. Bɔt di prist dɛn mek di pipul dɛn ala se: ‘If yu fri dis man ya, yu de agens di gɔvmɛnt! Kil am!’ Di pipul dɛn mek bɔku nɔys. Yu no wetin Paylet du?—

I du wetin dɛn want. Fɔs, i mek dɛn bit Jizɔs. Dɔn, i gi Jizɔs to di sojaman dɛn fɔ mek dɛn go kil am. Dɛn put krawn we gɛt chuk chuk na in ed ɛn laf am bay we dɛn butu bifo am. Dɛn gi am wan big stik fɔ mek i pul am na di siti ɛn kɛr am go na  wan ples we dɛn kɔl Gɔlgɔta, we min ples we tan lɛk mɔtalman ed. Dɛn nel Jizɔs in an ɛn in fut dɛn pan di stik. Dɔn dɛn es di stik ɔp, so Jizɔs bin jɔs ɛng pan am. Bɔku blɔd bin de kɔmɔt na in bɔdi. Di pen bin pasmak.

Jizɔs nɔ bin day wantɛm wantɛm. I bin jɔs ɛng pan di stik. Di edman dɛn fɔ di prist dɛn bin de provok am. Ɛn di wan dɛn we bin de pas bin de se: ‘If yu na Gɔd in Pikin, kam dɔŋ di stik.’ Bɔt Jizɔs no wetin in Papa sɛn am fɔ du. I no se i fɔ gi in pafɛkt layf so dat mɔtalman go gɛt di chans  fɔ gɛt layf sote go. Leta, bay dɛn tri oklɔk aftanun, Jizɔs kray to in Papa ɛn day.—Matyu 26:36–27:50, NW; Mak 15:1; Lyuk 22:39–23:46, NW; Jɔn 18:1–19:30, NW.

Jizɔs bin rili difrɛn frɔm Adam. Adam nɔ bin sho se i lɛk Gɔd. I nɔ bin obe Gɔd. Ɛn i nɔ sho se i lɛk wisɛf. Bikɔs i sin, wi ɔl bɔn wit sin. Bɔt Jizɔs sho se i lɛk Gɔd ɛn i lɛk wi. I obe Gɔd ɔltɛm. Ɛn i gi in layf fɔ pul wi pan di trɔbul we Adam put pan wi.

Yu gladi fɔ dis fayn tin we Jizɔs du?— We yu de pre to Gɔd, yu kin tɛl am tɛnki fɔ we i gi wi in Pikin?— Di apɔsul Pɔl bin gladi fɔ wetin Krays du fɔ am. Pɔl bin rayt se Gɔd in Pikin “so lɛk mi dat i sakrifays in layf fɔseka mi.” (Na wi mek am italiks; Lɛta Fɔ Galeshya 2:20) Jizɔs day fɔ yu ɛn mi. I gi in pafɛkt layf so dat wi go gɛt layf we go de sote go! Fɔ tru, dat na gud rizin fɔ mek wi lɛk Jizɔs.

Di apɔsul Pɔl rayt to Kristian dɛn na wan siti we nem Kɔrint. I tɛl dɛn se: “Di lɔv we Krays gɛt de mek wi du sɔntin.” Wetin yu tink se dis lɔv fɔ mek wi du?— Luk Pɔl in ansa: “Krays day fɔ ɔlman so dat dɛn go liv dɛn layf fɔ Am. Dɛn nɔ fɔ de du wetin dɛn want.”—Na wi mek am italiks; Sɛkɛn Lɛta Fɔ Kɔrint 5:14, 15, New Life Version.

 Yu go ebul tink bɔt we dɛn we yu go sho se yu de du wetin Krays lɛk?— Wɛl, wan we na we yu de tɛl ɔda pipul dɛn bɔt wetin yu dɔn lan bɔt am. Ɔ tink bɔt dis: Sɔntɛm na yu wangren de, so yu mama ɔ papa ɔ ɛni ɔda pɔsin nɔ de si wetin yu de du. Yu tink se i go fayn fɔ de wach tɛlivishɔn program dɛn ɔ du ɔda tin dɛn we yu no se Jizɔs nɔ lɛk?— Mɛmba se Jizɔs bin dɔn gɛt layf bak, ɛn i de si ɔl wetin wi de du!

Wan ɔda rizin we mek wi fɔ sho se wi lɛk Jizɔs na bikɔs wi want fɔ falamakata Jiova. Jizɔs se: “Mi Papa lɛk mi.” Yu no wetin mek Jiova lɛk Jizɔs ɛn wetin mek wisɛf fɔ lɛk am?— Na bikɔs Jizɔs bin gri fɔ day so dat wetin Gɔd want go bi. (Jɔn 10:17) So lɛ wi du wetin di Baybul tɛl wi, we i se: ‘We una na Gɔd in pikin dɛn we i lɛk, una fɔ tray fɔ tan lɛk am. Una fɔ gɛt lɔv na una at, jɔs lɛk aw Krays lɛk wi, dɔn i gi in layf lɛk sakrifays.’—Lɛta Fɔ Ɛfisɔs 5:1, 2.