Y U NO wetin i min bost?— Luk wan ɛgzampul. Yu dɔn ɛva tray fɔ du sɔntin we yu nɔ sabi du am fayn? Sɔntɛm yu tray fɔ kik bɔl. Ɔ yu tray fɔ jomp skipinrop. Ɛnibɔdi dɔn provok ɛn laf yu se, “A sabi du am pas yu”?— Da pɔsin de, de bost.

Aw yu fil we ɔda pɔsin de du dat? Yu lɛk am?— So, aw yu tink se ɔda pɔsin go fil if yu bost bɔt yusɛf?— Yu tink se i fayn fɔ tɛl sɔmbɔdi se yu bɛtɛ pas am?— Yu tink se Jiova lɛk pɔsin we de bost?—

Di Gret Ticha bin no pipul dɛn we fil se dɛn bɛtɛ pas ɔda pipul dɛn. Dɛn kin bost bɔt dɛnsɛf ɛn fil se ɔda pipul dɛn nɔ bɛtɛ. Wan de Jizɔs pul wan stori fɔ dɛn we de sho wetin mek i bad fɔ bost bɔt yusɛf. Lɛ wi lisin to am.

Di stori na bɔt wan Faresi ɛn wan man we de gɛda taks. Di Faresi dɛn bin de tich pipul dɛn bɔt Gɔd biznɛs. Dɛn kin fil se dɛn nɔ de du bad lɛk ɔda pipul dɛn. Di Faresi insay Jizɔs in stori bin go na Gɔd in tɛmpul we de na Jerusɛlɛm fɔ pre.

Jizɔs tɔk bak se wan man we de gɛda taks insɛf bin go fɔ go pre. Bɔku pipul dɛn nɔ lɛk di man dɛn we de gɛda taks. Dɛn fil se dɛn kin rog. Ɛn na tru se bɔku pan dɛn nɔ kin du tin di rayt we.

 We dɛn de na di tɛmpul, di Faresi bigin fɔ pre to Gɔd se: ‘Gɔd a tɛl yu tɛnki bikɔs a nɔ de du bad tin lɛk ɔda pipul dɛn. A nɔ de rog ɛn du ɔda bad tin dɛn. A nɔ tan lɛk dis man ya sɛf we de gɛda taks. Mi na man we de du wetin rayt. A kin fast tu tɛm pan di wik so dat a go gɛt mɔ tɛm fɔ tink bɔt yu. Ɛn a de sheb ɔltin we a gɛt to tɛn pat ɛn gi yu wan pat.’ Di Faresi rili fil se i bɛtɛ pas ɔda pipul dɛn, nɔto so?— I tɛl Gɔd bɔt dat bak.

Bɔt di man we de gɛda taks nɔ tan lɛk am. We i de pre, i nɔ ivin es in yay ɔp ɛvin. I tinap fa, i butu in ed. Di man we de gɛda taks bin rili sɔri fɔ di bad tin dɛn we i de du, i jɔs de nak in chɛst. I nɔ bin tray fɔ tɛl Gɔd se in na gud pɔsin. Bɔt i bin de pre se: ‘Gɔd, sɔri fɔ mi, mi na pɔsin we de sin.’

Pan dɛn tu man dɛn ya, uswan yu tink se de du wetin Gɔd want? Na di Faresi, we fil se in na gud pɔsin? Ɔ na da man we de gɛda taks, we fil sɔri fɔ in sin dɛn?—

Jizɔs bin se na di man we de gɛda taks bin de du wetin Gɔd want. Wetin mek? Jizɔs se: “Ɛnibɔdi we put insɛf ɔp, Gɔd go put am dɔŋ, bɔt pɔsin we put insɛf dɔŋ, Gɔd go es am ɔp.”—Lyuk 18:9-14.

 Wetin na di lɛsin we Jizɔs bin de tɔk bɔt insay dis stori?— I bin de tich se i bad fɔ mek wi tink se wi bɛtɛ pas ɔda pipul dɛn. Sɔntɛm wi nɔ go tɔk se wi bɛtɛ pas ɔda pipul dɛn, bɔt di we we wi de biev go sho se wi de fil da we de. Yu dɔn ɛva fil da we de?— Tink bɔt di apɔsul Pita.

We Jizɔs bin tɛl in apɔsul dɛn se dɛn ɔl go lɛf am we dɛn kam kech am, Pita bin bost se: ‘If ɔlman lɛf yu sɛf, mi nɔ go ɛva lɛf yu!’ Bɔt Pita bin rɔng. I bin biliv insɛf tumɔs. We di tɛm rich, i bin lɛf Jizɔs. Bɔt i bin kam bak, as wi go lan insay Chapta 30 na dis buk.—Matyu 26:31-33.

Lɛ wi tek ɛgzampul frɔm wi yon tɛm tide. Sɔntɛm dɛn aks yu ɛn yu klasmet kwɛstyɔn na skul. If yu ebul fɔ gi di rayt ansa wantɛm wantɛm, bɔt yu kɔmpin nɔ ebul, wetin yu go du? Na tru se yu go fil fayn we yu no di ansa. Bɔt yu tink se i fayn fɔ mek yu kɔmpia yusɛf wit da pɔsin we nɔ gi di ansa kwik?— Yu tink se i fayn fɔ mek lɛk se yu bɛtɛ pas di ɔda pɔsin?—

Na dat di Faresi bin du. I bin de bost se i bɛtɛ pas da man we de gɛda taks. Bɔt di Gret Ticha se di Faresi nɔ bin rayt. Na tru se sɔmbɔdi kin ebul du sɔntin fayn pas ɔda pɔsin. Bɔt dat nɔ min se i bɛtɛ pas da pɔsin de.

So if wi sabi sɔntin pas ɔda pɔsin, yu tink se i fayn fɔ lɛ wi bost?— Tink bɔt dat. Na wi mek wi yon bren?— Nɔ-o, na Gɔd gi wi ɔl bren. Ɛn na sɔmbɔdi tich wi bɔku pan di tin dɛn we wi no. Sɔntɛm wi rid sɔntin na buk. Ɔ sɔmbɔdi tɛl wi bɔt sɔntin. Ilɛksɛf wi no sɔntin fɔ wisɛf, aw wi manej no?— Yɛs, na we wi yuz di bren we Gɔd gi wi.

We sɔmbɔdi tray fɔ du sɔntin, yu fɔ tray fɔ se sɔntin we go mek i fil fayn. Tɛl am se yu lɛk wetin i du. Ɔ yu tray fɔ ɛp am  so dat i go du am fayn. Na dat yusɛf want mek pipul dɛn du fɔ yu, nɔto so?—

Sɔm pipul dɛn gɛt trɛnk pas ɔda pipul dɛn. Wetin yu go du if yu gɛt trɛnk pas yu brɔda ɔ sista? Yu tink se dat fɔ mek yu bost?— Nɔ-o. Di tin dɛn we wi de it na in de mek wi strɔng. Ɛn na Gɔd de gi wi di san ɛn di ren ɛn ɔltin we wi nid fɔ mek dɛn gro, nɔto in?— So, fɔ dat, wi fɔ tɛl am tɛnki if wi gɛt trɛnk.—Di Apɔsul Dɛn Wok [Akt] 14:16, 17.

Wi nɔ kin lɛk we sɔmbɔdi de bost bɔt insɛf, nɔto so?— Lɛ wi mɛmba wetin Jizɔs bin tɔk, we i se: ‘Di tin dɛn we una want mek ɔda pipul dɛn du to una na in una fɔ du to dɛn.’ If wi du dat, wi nɔ go bi lɛk da Faresi we bin de bost bɔt insɛf na di stori we di Gret Ticha bin pul.—Lyuk 6:31.

Wan tɛm sɔmbɔdi bin se Jizɔs gud. Yu tink se di Gret Ticha bin se, ‘Yɛs, mi a gud’?— Nɔ, i nɔ bin du dat. I bin se: “Nɔbɔdi nɔ de we gud,  na Gɔd in wangren gud.” (Mak 10:18) Pan ɔl we di Gret Ticha bin pafɛkt, i nɔ bin de bost bɔt insɛf. I bin gi ɔl di prez to in Papa, we na Jiova.

So yu tink se sɔmbɔdi de we yu fɔ bost bɔt?— Yɛs, i de. Wi fɔ bost bɔt di wan we mek ɔltin we na Jiova Gɔd. We wi kin si aw di san de go dɔŋ ɔ wi si sɔm ɔda wɔndaful tin dɛn we Jiova mek, wi fɔ tɛl sɔmbɔdi se, ‘Na wi wɔndaful Gɔd, Jiova, na in mek ɔl dis!’ Wi fɔ rɛdi ɔltɛm fɔ tɔk bɔt di fayn fayn tin dɛn we Jiova dɔn du ɛn we i go du tumara bambay.