Tink bɔt dis: We Tim bin de ple wit in padi dɛn, i sɛn di bɔl ɛn di bɔl go brok wan neba in motoka glas.

If yu na bin Tim, wetin yu go du?

YU GƐT TRI TIN DƐN WE YU KIN DISAYD FƆ DU:

1. Rɔn.

2. Blem ɔda pɔsin.

3. Tɛl yu neba bɔt wetin dɔn apin, ɛn tɛl am se yu go pe fɔ wetin yu dɔn pwɛl.

Yu go want fɔ pik di fɔs wan. Bɔt i fayn fɔ lɛ yu de tɔk we yu mek mistek, ilɛksɛf na pɔsin in motoka glas yu brok ɔ na ɔda tin yu du.

1. Na di rayt tin fɔ du.

   Di Baybul se: “Wi . . . want du wetin rayt ɔltɛm.”—Di Ibru Pipul Dɛn 13:​18.

2. Pipul dɛn kin fɔgiv di wan dɛn we tɔk we dɛn mek mistek.

   Di Baybul se: “Udat ayd in sin nɔ de mek am na layf; bɔt udat kɔnfɛs in sin ɛn lɛf fɔ du bad, PAPA GƆD go sho am masi.”—Prɔvabs 28:​13.

3. Di tin we impɔtant pas ɔl, na dat i de mek Gɔd gladi.

   Di Baybul se Jiova “et udat de du bad bɔt i lɛk pɔsin we de waka tret na . . . in yay ɛn [i] de mek am in padi.”—Prɔvabs 3:​32.

Dɛn bin gi wan 20 ia ol titi we nem Karina tikɛt bikɔs i rɔn tumɔs we i de drayv. I tray fɔ ayd di tikɛt pan in papa bɔt i nɔ bin ebul ayd am sote go. Karina se: “Afta lɛk wan ia so, mi papa notis se dɛn bin dɔn gi mi tikɛt. Nɔto pikin trɔbul a bin gɛt!”

Wetin na di lɛsin? Karina se: “We pɔsin ayd in mistek dɛn, i kin jɔs mek tin wɔs. Yu kin stil sɔfa fɔ dɛn leta!”

Di Baybul se: “Wi ɔl de du tin we nɔ rayt.” (Jems 3:​2) Ɛn pɔsin go sho se i ɔmbul ɛn machɔ we i tɔk wantɛm wantɛm we i mek mistek.

Di nɛks tin we yu fɔ du na fɔ lan frɔm yu mistek dɛn. Wan titi we nem Vɛra bin tɔk se: “A kin tray fɔ lan lɛsin frɔm ɛni mistek we a mek so dat a go bi gud pɔsin ɛn no wetin fɔ du we di sem tin apin igen.” Lɛ wi si aw yu go du am.

Yu lɛn yu big brɔda in baysikul ɛn yu pwɛl am. Wetin yu go du?

• Nɔ tɔk natin ɛn op se yu big brɔda nɔ go no.

• Tɛl yu big brɔda wetin rili apin.

• Tɛl yu big brɔda wetin apin bɔt blem ɔda pɔsin.

Yu nɔ pas wan tɛst bikɔs yu nɔ stɔdi fɔ am. Wetin yu go du?

• Tɔk se di kwɛstyɔn dɛn bin at tumɔs.

• Gri se na yusɛf sɛf mek yu fel.

• Tɔk se na yu ticha nɔ lɛk yu.

 Naw luk di ɛgzampul dɛn we wi dɔn tɔk bɔt ɛn tray fɔ imajin se yu na (1) yu papa ɛn (2) yu ticha. Aw yu papa ɛn yu ticha go si yu if yu tɔk wantɛm wantɛm we yu mek mistek? Aw dɛn go si yu if yu tray fɔ ayd yu mistek?

Naw tink bɔt wan mistek we yu bin mek las ia ɛn ansa dɛn kwɛstyɔn ya.

Us mistek yu bin mek? Wetin yu bin du we yu mek di mistek?

• A ayd am.

• A blem ɔda pɔsin.

• A tɔk wantɛm wantɛm.

If yu nɔ bin tɔk we yu mek di mistek, aw yu bin fil leta?

• A bin fil fayn. Nɔbɔdi nɔ bin no!

• A bin fil bad. A bin fɔ dɔn tɔk di tru.

Wetin na di bɛst tin we yu bin fɔ dɔn du?

Wetin yu lan frɔm yu mistek?

Wetin mek sɔm pipul dɛn nɔ kin tɔk we dɛn mek mistek?

Aw pipul dɛn go si yu if yu kin tray fɔ ayd yu mistek dɛn ɔltɛm ɛn aw dɛn go si yu if yu kin tɔk we yu mek mistek?—Lyuk 16:​10.