1-3. (a) Wetin bin apin we bin mek i lɛf smɔl fɔ mek di Kristian kɔngrigeshɔn trade nɔ gɛt wanwɔd? (b) Aw wi go bɛnifit we wi stɔdi dis akawnt we de na di Baybul buk we nem Akt?

 PƆL ɛn Banabas bin rili gladi. Dɛn bin jɔs dɔn kɔmɔt du dɛn fɔs mishɔnari wok ɛn kam bak na di Sirian siti we nem Antiɔk. Dɛn bin gladi bikɔs Jiova bin dɔn “opin di we fɔ mek pipul dɛn na ɔda neshɔn dɛn gɛt fet.” (Akt 14:​26, 27) Antiɔk na siti usay dɛn de rili prich di gud nyuz ɛn “bɔku” pipul dɛn we na Jɛntayl de jɔyn di kɔngrigeshɔn we de de.​—Akt 11:​20-26.

² I nɔ te, di Kristian dɛn na Judia kam fɔ no bɔt dis wɔndaful tin we de apin. Bɔt nɔto ɔlman bin gladi. Dis tin we de apin bin mek dɛn si klia wan se dɛn nid fɔ disayd if pɔsin fɔ sakɔmsayz ɔ i nɔ fɔ sakɔmsayz. Aw di Ju Kristian dɛn fɔ de wit di Kristian dɛn we nɔto Ju? Ɛn aw di Kristian dɛn we nɔto Ju fɔ si di Lɔ we Gɔd Bin Gi Mozis? Dis prɔblɛm bin mek dɛn mek siriɔs plaba we bin mek i lɛf smɔl fɔ lɛ di kɔngrigeshɔn nɔ gɛt wanwɔd. Aw dɛn go sɔlv dis prɔblɛm?

³ As wi de tɔk bɔt dis akawnt we de na di Baybul buk we nem Akt, wi go lan bɔku impɔtant lɛsin dɛn. Dɛn lɛsin dɛn ya go ɛp wi fɔ no aw fɔ du tin di rayt we we sɔntin apin we go want fɔ mek wanwɔd nɔ de na wi kɔngrigeshɔn tide.

4. Us rɔng we sɔm Kristian dɛn bin de tink? Us kwɛstyɔn dis de mek wi aks?

⁴ Di disaypul Lyuk bin rayt se: “Sɔm man dɛn kɔmɔt ɔp Judia ɛn kam [na Antiɔk ɛn] bigin fɔ tich di brɔda dɛn se: ‘If una nɔ sakɔmsayz jɔs lɛk aw Mozis bin se, una nɔ go sev.’” (Akt 15:​1) Di Baybul nɔ tɛl wi if dɛn “man dɛn” ya we “kɔmɔt ɔp Judia” na bin Faresi dɛn bifo dɛn bi Kristian. Bɔt i tan lɛk se dɛn bin de alaw di we aw di Faresi dɛn bin de tink fɔ afɛkt dɛn. Dɔn bak, i go bi se dɛn bin fil se dɛn de tɔk fɔ di apɔsul ɛn ɛlda dɛn na Jerusɛlɛm. (Akt 15:​23, 24) Bɔt wetin mek sɔm Ju Kristian dɛn bin stil de tink se pɔsin fɔ sakɔmsayz pan ɔl we i bin dɔn pas 13 ia we Gɔd  bin dayrɛkt apɔsul Pita fɔ wɛlkɔm Jɛntayl dɛn we nɔ sakɔmsayz na di Kristian kɔngrigeshɔn? a​—Akt 10:​24-29, 44-48.

5, 6. (a) Wetin mek sɔm Ju Kristian dɛn go dɔn tink se paopa pɔsin fɔ sakɔmsayz? (b) Fɔ se di agrimɛnt fɔ sakɔmsayz bin de pat pan di agrimɛnt we Gɔd bin mek wit Ebraam? Ɛksplen. (Luk di futnot.)

⁵ I go bi se dɛn bin gɛt bɔku rizin dɛn. Wan rizin na dat, na Jiova insɛf sɛf bin se man dɛn fɔ sakɔmsayz, ɛn we man sakɔmsayz, dat de sho se i gɛt spɛshal padi biznɛs wit Jiova. Bifo Gɔd bin mek di Lɔ agrimɛnt, Ebraam ɛn di wan dɛn we de na in os bin dɔn bigin fɔ sakɔmsayz, ɛn dis bin leta de pat pan di Lɔ agrimɛnt. b (Lɛv. 12:​2, 3) Di Lɔ we Gɔd Bin Gi Mozis bin se ivin fɔrina dɛn fɔ sakɔmsayz bifo dɛn go ebul fɔ tek pat pan sɔm sɛlibreshɔn dɛn, lɛk fɔ it di Pasova it. (Ɛks. 12:​43, 44, 48, 49) Fɔ tru, pɔsin we na Ju bin de si am se man we nɔ saskɔmsayz na man we nɔ klin, ɛn i de briŋ disgres pan insɛf.​—Ayz. 52:​1.

⁶ So fɔ lɛ Kristian we na Ju ajɔst di we aw i de tink ɛn gri fɔ tek dis nyu tichin, i bin nid fɔ gɛt fet ɛn put insɛf dɔŋ. Di nyu agrimɛnt bin dɔn tek di Lɔ agrimɛnt in ples. So pɔsin nɔ go bi wan pan Gɔd in pipul dɛn jɔs bikɔs i bɔn as Ju. Dɔn bak, Ju Kristian dɛn we bin de na say dɛn usay Ju pipul dɛn de, lɛk di wan dɛn we bin de na Judia, bin nid fɔ gɛt maynd, sho se dɛn gɛt fet pan Krays, ɛn gladi fɔ dɛn kɔmpin Kristian dɛn we na bin Jɛntayl dɛn we nɔ sakɔmsayz.​—Jɛr. 31:​31-33; Lyuk 22:​20.

7. Us tru tin dɛn di “man dɛn [we] kɔmɔt ɔp Judia ” nɔ bin ɔndastand?

⁷ As wi no, di we aw Gɔd de si tin nɔ bin dɔn chenj yet. Wan tin we pruv dis na we i bi se di nyu agrimɛnt de sho di prinsipul dɛn we de biɛn di Lɔ we Gɔd Bin Gi Mozis. (Mat. 22:​36-40) Fɔ ɛgzampul, we i kam to fɔ sakɔmsayz, Pɔl bin leta rayt se: “Na aw pɔsin tan insay, na in de mek i bi Ju, ɛn na in at sakɔmsayz; na di spirit du dat, nɔto lɔ we dɛn rayt.” (Rom. 2:​29; Dit. 10:​16) Di “man dɛn [we] kɔmɔt . . . Judia ” nɔ bin ɔndastand dɛn tru tin dɛn ya, bifo dat, dɛn bin de se Gɔd nɔ ɛva pul di lɔ we se dɛn fɔ sakɔmsayz. Fɔ se dɛn go chenj di we aw dɛn de tink?

8. Wetin mek di prɔblɛm bɔt fɔ sakɔmsayz bin rich di gɔvnin bɔdi na Jerusɛlɛm?

⁸ Lyuk kɔntinyu fɔ rayt se: “Afta Pɔl ɛn Banabas mek plaba wit dɛn ɛn rili agyu wit dɛn [di man dɛn we “kɔmɔt ɔp Judia”], di brɔda dɛn arenj mek Pɔl ɛn Banabas ɛn sɔm ɔda wan dɛn go ɔp to di apɔsul dɛn ɛn ɛlda  dɛn na Jerusɛlɛm fɔ tɔk bɔt dis.” c (Akt 15:​2) Bikɔs di tu grup dɛn bin “mek plaba . . . ɛn rili agyu,” i sho se dɛn ɔl bin de tink se na wetin dɛn biliv kɔrɛkt ɛn di kɔngrigeshɔn na Antiɔk nɔ bin ebul fɔ sɔlv di prɔblɛm. So fɔ lɛ dɛn go gɛt pis ɛn wanwɔd, di kɔngrigeshɔn bin disayd se dɛn go go wit di prɔblɛm to “di apɔsul dɛn ɛn ɛlda dɛn na Jerusɛlɛm,” we na bin di gɔvnin bɔdi. Wetin wi kin lan frɔm di ɛlda dɛn na Antiɔk?

9, 10. Aw di brɔda dɛn na Antiɔk wit Pɔl ɛn Banabas sɛt fayn ɛgzampul fɔ wi tide?

⁹ Wan fayn lɛsin we wi lan na dat wi nid fɔ biliv Gɔd in ɔganayzeshɔn. Tink bɔt dis: Di brɔda dɛn na Antiɔk bin no se di gɔvnin bɔdi mɛmba dɛn na Kristian dɛn we na Ju. Bɔt dɛn bin biliv se dɛn brɔda dɛn de go sɔlv di prɔblɛm bɔt fɔ sakɔmsayz di kayn we we gri wit wetin di Skripchɔ dɛn se. Wetin mek dɛn bin biliv dat? Na bikɔs di kɔngrigeshɔn bin gɛt kɔnfidɛns se Jiova go yuz in oli spirit ɛn Jizɔs Krays we de oba di kɔngrigeshɔn fɔ sho di brɔda dɛn wetin dɛn fɔ du. (Mat. 28:​18, 20; Ɛfi. 1:​22, 23) We wi gɛt siriɔs prɔblɛm dɛn tide, lɛ wi falamakata di fayn ɛgzampul we di Kristian dɛn na Antiɔk sɛt bay we wi go sho se wi biliv Gɔd in ɔganayzeshɔn ɛn di anɔyntɛd Kristian dɛn we na di Gɔvnin Bɔdi.

¹⁰ Wi lan bak se i rili impɔtant fɔ lɛ wi peshɛnt ɛn put wisɛf dɔŋ. Na oli spirit bin pik Pɔl ɛn Banabas fɔ go to di neshɔn dɛn, bɔt dɛn nɔ bin yuz di pawa we dɛn gɛt fɔ sɔlv di prɔblɛm da tɛm de. (Akt 13:​2, 3) Dɔn bak, Pɔl bin leta rayt se: “A go ɔp [na Jerusɛlɛm] bikɔs ɔf wetin Jizɔs mek a no,” we sho se na oli spirit bin de dayrɛkt am. (Gal. 2:​2) Ɛlda dɛn tide de tray fɔ sho se dɛnsɛf de put dɛnsɛf dɔŋ ɛn dɛn de peshɛnt we sɔntin apin we go mek wanwɔd nɔ de na di kɔngrigeshɔn. Bifo dɛn mek plaba, dɛn de abop pan Jiova bay we dɛn de chɛk di Skripchɔ dɛn ɛn di tin dɛn we di slev we fetful kin tɛl dɛn fɔ du.​—Fil. 2:​2, 3.

11, 12. Wetin mek i impɔtant fɔ lɛ wi wet fɔ Jiova?

 ¹¹ Sɔntɛnde, wi kin nid fɔ mek Jiova ɛp wi fɔ ɔndastand sɔntin fayn fayn wan. Mɛmba se di brɔda dɛn insay Pɔl in tɛm bin gɛt fɔ wet te arawnd di ia 49 afta Krays bifo Jiova ɛp dɛn fɔ no if Jɛntayl dɛn fɔ sakɔmsayz. Dis bin apin lɛk 13 ia afta Gɔd bin anɔynt Kɔnilyɔs insay di ia 36 afta Krays. Wetin mek Jiova bin mek lɔng tɛm pas fɔs? Sɔntɛm, i bin want fɔ gi di Ju dɛn ɔl di tɛm we dɛn nid fɔ ajɔst di we aw dɛn de tink bɔt dis impɔtant tin. Mɛmba se, fɔ lɛ di Ju dɛn gri se di agrimɛnt fɔ sakɔmsayz nɔ de igen na bin siriɔs tin. Na bikɔs dis na agrimɛnt we Gɔd bin dɔn mek wit dɛn gret gret granpa we dɛn lɛk we na Ebraam, ɛn di agrimɛnt bin dɔn de fɔ lɛk 1,900 ia!​—Jɔn 16:​12.

¹² Na big big ɔnɔ wi gɛt fɔ mek wi Papa we de na ɛvin we peshɛnt ɛn gud, tich wi ɛn shep wi! We i de du dat, na gud tin dɛn kin apin ɔltɛm ɛn dɛn kin bi fɔ wi yon bɛtɛ wan. (Ayz. 48:​17, 18; 64:​8) So lɛ wi nɔ ɛva mek prawd ɛn bigin pin pan wetin wi tink ɔ de agens di chenj dɛn we di ɔganayzeshɔn kin mek ɔ we dɛn ajɔst aw wi ɔndastand sɔm Skripchɔ dɛn. (Ɛkli. 7:​8) If yu notis se yu dɔn bigin mek prawd we i kam to dɛn tin dɛn ya, yu nɔ tink se i go fayn fɔ lɛ yu pre ɛn tink gud wan bɔt di fayn prinsipul dɛn we de na Akt chapta 15? d

13. Aw wi go sho se wi de falamakata Jiova fɔ peshɛnt we wi de du di prichin wok?

¹³ Wi kin nid fɔ peshɛnt we wi de stɔdi di Baybul wit pipul dɛn we i nɔ izi fɔ lɛ dɛn lɛf fɔ biliv di lay lay tichin dɛn ɔ kɔstɔm dɛn we di Baybul nɔ gri wit. If wi de stɔdi di Baybul wit dɛn kayn pipul dɛn ya, wi go nid fɔ alaw tɛm fɔ pas fɔ lɛ Gɔd in spirit go tɔch di studɛnt in at. (1 Kɔr. 3:​6, 7) Dɔn bak, wi go nid fɔ pre bɔt am. We di rayt tɛm rich, Gɔd go mek we fɔ lɛ wi no wetin na di rayt tin fɔ du.​—1 Jɔn 5:​14.

14, 15. Aw di kɔngrigeshɔn na Antiɔk bin ɔnɔ Pɔl, Banabas, ɛn di ɔda pipul dɛn we bin de travul wit dɛn? Aw dɛn bin ebul fɔ ɛnkɔrej dɛn kɔmpin Kristian dɛn?

¹⁴ Lyuk kɔntinyu fɔ rayt se: “Di kɔngrigeshɔn go lɛf dɛn na rod. Afta dat, dɛn man ya kɔntinyu fɔ go ɛn dɛn pas na Fonishia ɛn Sameria ɛn ɛksplen gud wan bɔt aw di pipul dɛn na ɔda neshɔn dɛn dɔn tɔn to Gɔd ɛn dis mek ɔl di brɔda dɛn rili gladi.” (Akt 15:​3) We di kɔngrigeshɔn bin go lɛf Pɔl, Banabas, ɛn di ɔda pipul dɛn na rod, i sho se dɛn lɛk dɛn ɛn dɛn de ɔnɔ dɛn, ɛn dis sho bak se di kɔngrigeshɔn bin want mek Gɔd blɛs dɛn. Dis na ɔda fayn ɛgzampul we di brɔda dɛn na Antiɔk sɛt fɔ wi! Yu de sho se yu de ɔnɔ yu brɔda ɛn sista dɛn “mɔ di wan dɛn [we na ɛlda dɛn] we de wok tranga wan we i kam pan di we aw dɛn de tɔk ɛn tich”?​—1 Tim. 5:​17.

 ¹⁵ We di brɔda dɛn bin de go, dɛn bin rili ɛnkɔrej dɛn kɔmpin Kristian dɛn na Fonishia ɛn Sameria bay we dɛn “ɛksplen gud wan” di ɛkspiriɛns dɛn we dɛn gɛt na di say dɛn usay di Jɛntayl dɛn de. I go bi se sɔm pan di wan dɛn we de lisin to dɛn na Ju Kristian dɛn we bin dɔn rɔnawe kam na dɛn tɔŋ dɛn ya afta dɛn bin kil Stivin. Semweso tide, ripɔt dɛn bɔt aw Jiova de blɛs di wok fɔ mek disaypul kin rili ɛnkɔrej wi brɔda dɛn, mɔ di wan dɛn we gɛt prɔblɛm. So du yu bɛst fɔ mek yu go rili bɛnifit frɔm dɛn ripɔt dɛn ya bay we yu de atɛnd di mitin dɛn, asɛmbli dɛn, kɔnvɛnshɔn dɛn, ɛn bay we yu de rid di ɛkspiriɛns dɛn ɛn stori dɛn bɔt pipul dɛn layf we de na wi pɔblikeshɔn dɛn we dɛn print ɔ we de na jw.org!

16. Wetin sho se fɔ sakɔmsayz bin dɔn bi siriɔs prɔblɛm?

¹⁶ Afta di brɔda dɛn frɔm Antiɔk travul fɔ lɛk 350 mayl, dɛn rich na Jerusɛlɛm. Lyuk bin rayt se: “We dɛn rich na Jerusɛlɛm, di kɔngrigeshɔn, di apɔsul dɛn, ɛn di ɛlda dɛn wɛlkɔm dɛn fayn wan, ɛn dɛn tɛl dɛn aw Gɔd dɔn yuz dɛn fɔ du bɔku tin.” (Akt 15:​4) Bɔt “sɔm pan di wan dɛn we bin de na di Faresi grup we dɔn biliv di Masta grap na dɛn sit ɛn se: ‘I impɔtant fɔ sakɔmsayz dɛn ɛn tɛl dɛn fɔ obe Mozis in Lɔ.’” (Akt 15:​5) I klia se di tray we dɛn bin de tray fɔ no if Kristian dɛn we nɔto Ju fɔ sakɔmsayz bin dɔn bi siriɔs prɔblɛm, ɛn dɛn bin nid fɔ sɛtul am.

17. Udat dɛn bin de na di gɔvnin bɔdi na Jerusɛlɛm? Wetin go dɔn mek “di ɛlda dɛn” de pat pan di gɔvnin bɔdi?

¹⁷ Prɔvabs 13:​10 (NWT) tɔk se: “Di wan dɛn we de aks fɔ advays gɛt sɛns.” Wit dis fayn prinsipul, “di apɔsul dɛn ɛn di ɛlda dɛn kam togɛda fɔ tɔk bɔt [di kwɛstyɔn bɔt fɔ sakɔmsayz].” (Akt 15:​6) “Di apɔsul dɛn ɛn di ɛlda dɛn” bin tinap fɔ di wan ol kɔngrigeshɔn, jɔs lɛk aw di Gɔvnin Bɔdi de du tide. Wetin mek “di ɛlda dɛn” bin de wok wit di apɔsul dɛn? Mɛmba se dɛn bin dɔn kil apɔsul Jems, ɛn apɔsul Pita bin dɔn de na prizin fɔ sɔm tɛm. Fɔ se dɛn kayn tin dɛn ya go apin to di ɔda apɔsul dɛn? Bikɔs ɔda anɔyntɛd man dɛn we bin kwalifay bin de wok wit di apɔsul dɛn, dat bin ɛp dɛn fɔ mek shɔ se dɛn gɛt man dɛn we go de oba di kɔngrigeshɔn.

18, 19. Us pawaful wɔd dɛn Pita bin tɔk? Wetin dis go dɔn mek di wan dɛn we de lisin to am tink bɔt?

 ¹⁸ Lyuk kɔntinyu fɔ rayt se: “We dɛn dɔn tɔk bɔt dis gud gud wan, Pita grap ɛn tɛl dɛn se: ‘Man dɛn, mi brɔda dɛn, unasɛf sɛf no se frɔm trade Gɔd bin dɔn pik mi pan una fɔ tɛl pipul dɛn na ɔda neshɔn dɛn di gud nyuz fɔ mek dɛn biliv. Ɛn Gɔd, we no wetin de na pɔsin in at, dɔn sho se i tek dɛn as in yon bay we i gi dɛn oli spirit, jɔs lɛk aw i dɔn gi wisɛf. Ɛn i nɔ trit wi ɛn dɛn difrɛn we, bɔt i dɔn klin dɛn at bikɔs dɛn gɛt fet.’” (Akt 15:​7-9) Wan buk we de tɔk bɔt di Baybul bin se, di Grik wɔd we dɛn translet as “tɔk gud gud wan” na vas 7 kin min bak se di ɛlda dɛn bin aks kwɛstyɔn dɛn ɛn tray fɔ no di prɔblɛm. So pan ɔl we dɛn nɔ bin ɔndastand tin di sem we, dɛn bin rɛdi fɔ tɔk bɔt di prɔblɛm, ɛn dɛn ɔl bin fil fri fɔ tɔk bɔt wetin dɛn tink.

¹⁹ Di pawaful wɔd dɛn we Pita tɔk bin mɛmba ɔlman se insɛf sɛf bin de we Gɔd bin yuz oli spirit fɔ anɔynt di fɔs Jɛntayl dɛn we nɔ bin sakɔmsayz insay di ia 36 afta Krays, dat na Kɔnilyɔs ɛn di wan dɛn we bin de na in os. So if Jiova nɔ bin de trit di Ju dɛn ɛn di wan dɛn we nɔto Ju difrɛn we, yu tink se mɔtalman fɔ du dat? Dɔn bak, fet pan Krays de mek Kristian in at klin, nɔto we i de fala di Lɔ we Gɔd Bin Gi Mozis.​—Gal. 2:​16.

20. Aw di wan dɛn we bin de se pɔsin fɔ sakɔmsayz bin “de tɛst Gɔd”?

²⁰ Bikɔs Gɔd in wɔd ɛn di oli spirit bin dɔn sho di pipul dɛn wetin dɛn fɔ no, Pita bin dɔn fɔ tɔk bay we i se: “So wetin mek una de tɛst Gɔd bay we una de put ɛvi lod pan di disaypul dɛn, we i bi se wi ɛn wi gret gret granpa dɛn nɔ bin ebul fɔ tot am? Bɔt wi gɛt fet se Masta Jizɔs in spɛshal gudnɛs sev wi di sem we aw i sev dɛn.” (Akt 15:​10, 11) Di wan dɛn we bin de se pɔsin fɔ sakɔmsayz bin de “tɛst Gɔd,” ɔ lɛk aw wan ɔda transleshɔn se, ‘dɛn bin de tɛst di peshɛnt we Gɔd peshɛnt.’ Dɛn bin de tray fɔ put lɔ pan di Jɛntayl dɛn we di Ju dɛnsɛf sɛf nɔ bin ebul fɔ fala gud gud wan, ɛn dɛn bin de se pɔsin fɔ day if i nɔ fala da lɔ de. (Gal. 3:​10) So bifo di Ju dɛn we bin de lisin to Pita tawa se pɔsin fɔ sakɔmsayz, dɛn fɔ sho se dɛn gɛt tɛnki fɔ Gɔd in spɛshal gudnɛs tru Jizɔs.

21. Wetin Banabas ɛn Pɔl bin tɔk we bin ɛp di apɔsul ɛn ɛlda dɛn fɔ no wetin fɔ disayd?

²¹ Wi si klia wan se di wɔd dɛn we Pita tɔk bin rili tɔch di pipul dɛn at bikɔs “ɔlman na di grup sɛt dɛn mɔt.” Afta dat, Banabas ɛn Pɔl tɔk bɔt “di bɔku sayn ɛn wɔndaful tin dɛn we Gɔd yuz dɛn fɔ du na di neshɔn dɛn.” (Akt 15:​12) Bay dis tɛm, di apɔsul ɛn di ɛlda dɛn bin ebul fɔ chɛk ɔl di pruf dɛn we dɛn gɛt ɛn fɔ disayd sɔntin we gri wit wetin Gɔd want we i kam to fɔ sakɔmsayz.

22-24. (a) Aw di Gɔvnin Bɔdi tide de fala di ɛgzampul we di gɔvnin bɔdi trade bin sɛt? (b) Aw ɔl di ɛlda dɛn go sho se dɛn rɛspɛkt di we aw Jiova se fɔ du tin?

²² Tide bak, we di Gɔvnin Bɔdi mɛmba dɛn kin gɛt mitin, dɛn kin chɛk  na Gɔd in Wɔd fɔ no wetin dɛn fɔ du, ɛn dɛn kin pre wit ɔl dɛn at fɔ oli spirit. (Sam 119:​105; Mat. 7:​7-11) Bifo di Gɔvnin Bɔdi mɛmba dɛn gɛt dɛn mitin, dɛn ɔl kin dɔn no wetin dɛn gɛt fɔ go tɔk na di mitin so dat dɛn go pre bɔt am. Na dis kin mek dɛn ebul fɔ disayd tin dɛn we gri wit wetin Gɔd want. (Prɔv. 15:​28) We dɛn de na di mitin, dɛn anɔyntɛd brɔda dɛn ya kin fil fri fɔ tɔk wetin dɛn tink, ɛn dɛn kin du am wit rɛspɛkt. Dɛn kin yuz di Baybul ɔltɛm we dɛn de tɔk.

²³ Kɔngrigeshɔn ɛlda dɛn fɔ falamakata da ɛgzampul de. If dɛn dɔn tɔk bɔt wan siriɔs prɔblɛm na dɛn mitin, ɛn dɛn stil nɔ ebul fɔ sɔlv am, dɛn kin disayd fɔ tɔk to di branch ɔfis ɔ di wan dɛn we dɛn dɔn pik, lɛk di sakit ovasia dɛn. Dɔn bak, sɔntɛm, di branch ɔfis go rayt to di Gɔvnin Bɔdi if nid de.

²⁴ Fɔ tru, Jiova de blɛs di wan dɛn we de rɛspɛkt di we aw i se fɔ du tin ɛn we de sho se dɛn de put dɛnsɛf dɔŋ, dɛn de biɛn am, ɛn peshɛnt. Lɛk aw wi go si na di nɛks chapta, di blɛsin dɛn we Gɔd go gi na we i go mek wi gɛt tru tru pis, tayt padi biznɛs wit am, ɛn wanwɔd wit wi brɔda ɛn sista dɛn.