1-6. Tɔk bɔt wan ɛkspiriɛns bɔt aw Jiova Witnɛs dɛn kin prich difrɛn difrɛn we dɛn.

 WAN yɔŋ Jiova Witnɛs we de na Gana we nem Ribɛka bin si in skul as in tɛritri fɔ prich. I bin gɛt pɔblikeshɔn dɛn na in skulbag ɔltɛm. We dɛn kin gɛt lɔnch, i bin de luk fɔ we dɛn fɔ prich to in kɔmpin studɛnt dɛn. Ribɛka bin ebul fɔ stat Baybul stɔdi wit bɔku pan in klasmet dɛn.

² Na Madagaska ayland we de jɔs afta di ist kost na Afrika, wan maredman ɛn in wɛf we na payɔnia bin de waka lɛk 15 mayl we di ples kin rili wam, fɔ go na wan vilej we de fa fa say. Na de dɛn bin de kɔndɔkt Baybul stɔdi dɛn wit pipul dɛn we want fɔ no di trut.

³ Witnɛs dɛn we de na Paregway ɛn sɔm vɔlɔntia dɛn we kɔmɔt na 15 difrɛn kɔntri dɛn bin wok tranga wan fɔ bil wan bot so dat dɛn go ebul fɔ prich to pipul dɛn we de nia di Paregway ɛn Parana riva dɛn. Di bot ebul tek lɛk 12 pipul dɛn. Na frɔm dis bot ya pɔblisha dɛn ebul fɔ prich di gud nyuz na eria dɛn we at fɔ go.

⁴ Witnɛs dɛn na Alaska bin yuz di fayn chans we dɛn gɛt fɔ prich to pipul dɛn we kɔmɔt na ɔda kɔntri dɛn we kin kam waka di tɛm we di wɛda kin fayn. Insay dray sizin, kruz ship dɛn (na big ship dɛn we kin go wit pipul dɛn we want fɔ go ɛnjɔy dɛnsɛf) bin de kam wit pipul dɛn frɔm difrɛn kɔntri dɛn we kin kam waka. Witnɛs dɛn we de na da say de bin de tinap na di eria usay di ship dɛn kin slam fɔ grit dɛn wit dɛn fayn fayn buk ɛn magazin dɛn we kin de insay difrɛn langwej dɛn. Na da sem eria de, dɛn bin yuz plen fɔ go na vilej dɛn we de fa fa say. Dis bin mek dɛn bin ebul fɔ prich di gud nyuz na say dɛn lɛk Alut, Atabaskan, Simshian, ɛn Klinkat.

⁵ Lari we de na Tɛksas insay Amɛrika bin gɛt wan spɛshal tɛritri, we na di say usay dɛn kin kia fɔ ol pipul dɛn, ɛn na dis ples insɛf bin de. Pan ɔl we Lari de na wilchia bikɔs i bin gɛt aksidɛnt, i bin stil bizi. I bin de prich di gud nyuz bɔt Gɔd in Kiŋdɔm, ɛn i bin de tɔk bɔt di op we i gɛt fɔ se ɔnda Gɔd in Kiŋdɔm, wande i go waka bak.​—Ayz. 35:​5, 6.

⁶ Sɔm Witnɛs dɛn bin travul wit bot fɔ tri dez frɔm Mandale fɔ go na di nɔt pat na Miyanma fɔ atɛnd wan asɛmbli. Bikɔs dɛn bin rili want fɔ prich di gud nyuz, dɛn bin go wit sɔm pɔblikeshɔn dɛn we dɛn bin gi to dɛn kɔmpin pasenja dɛn. Ɛnitɛm we di bot kin stɔp na wan tɔŋ  ɔ vilej, bikɔs dɛn gɛt zil fɔ prich, dat kin mek dɛn kam dɔŋ kwik kwik wan fɔ gi di pɔblikeshɔn dɛn. We di bot kin stɔp, nyu pasenja dɛn kin kam insay, ɛn dis kin mek dɛn kin gɛt “nyu tɛritri,” dat na fɔ prich to di nyu pasenja dɛn.

7. Us we dɛn Jiova in pipul dɛn de prich bɔt Gɔd in Kiŋdɔm? Wetin na dɛn gol?

⁷ Lɛk di brɔda ɛn sista dɛn we wi dɔn tɔk bɔt na dɛn ɛgzampul dɛn ya, Jiova in pipul dɛn we rili gɛt zil ɔlsay na di wɔl de “prich . . . gud gud wan bɔt Gɔd in Kiŋdɔm.” (Akt 28:​23) Dɛn kin go frɔm os to os, mit pipul dɛn na strit, rayt lɛta to dɛn, ɛn tɔk to dɛn na fon. Ilɛk dɛn de insay bɔs, de waka na pak, ɔ de tek brek na dɛn wokples, dɛn kin rili luk fɔ ɛni chans we dɛn gɛt fɔ prich bɔt Gɔd in Kiŋdɔm. Di we dɛn fɔ prich kin difrɛn, bɔt di gol na di sem, dat na fɔ prich di gud nyuz ɛnisay pipul dɛn de.​—Mat. 10:​11.

8, 9. (a) Wetin mek di go we di prichin wok de go bifo na mirekul? (b) Us intrɛstin kwɛstyɔn dat fɔ mek wi tink bɔt? Wetin wi nid fɔ du fɔ fɛn di ansa?

⁸ Fɔ se yu na wan pan di bɔku bɔku pipul dɛn we de prich bɔt di Kiŋdɔm naw insay pas 235 kɔntri dɛn? If na so i bi, yu de du impɔtant tin fɔ ɛp fɔ mek di prichin wok go bifo! Wetin wi dɔn ebul fɔ du ɔlsay na di wɔl na mirekul. Pan ɔl we i nɔ izi ɛn wi de gɛt prɔblɛm dɛn, lɛk we gɔvmɛnt dɛn de ban wi wok ɛn mek wi sɔfa, Jiova in pipul dɛn de prich gud gud wan bɔt Gɔd in Kiŋdɔm to pipul dɛn na ɔl di neshɔn dɛn.

⁹ Wan intrɛstin kwɛstyɔn we wi fɔ tink bɔt na, Wetin mek pan ɔl we Setan de agens wi ɛn prɔblɛm dɛn de mit wi, dat nɔ ebul fɔ stɔp di prichin wok fɔ go bifo? Fɔ ansa da kwɛstyɔn de, lɛ wi tɔk bɔt wetin bin apin insay di fɔstɛm Kristian dɛn tɛm. Bikɔs wi, Jiova Witnɛs dɛn tide, de kɔntinyu di wok we dɛn bin dɔn stat.

10. Na wetin Jizɔs bin yuz ɔl in tɛm fɔ du? Wetin i bin no bɔt dis wok?

¹⁰ Jizɔs Krays, we na di wan we stat di Kristian kɔngrigeshɔn, bin yuz ɔl in tɛm fɔ prich di gud nyuz bɔt Gɔd in Kiŋdɔm. Wan tɛm i bin tɔk se: “A fɔ prich di gud nyuz bɔt Gɔd in Kiŋdɔm na ɔda siti dɛn bak, bikɔs na dat mek Gɔd sɛn mi.” (Lyuk 4:​43) Jizɔs bin no se i de stat wok we in wangren nɔ go ebul fɔ dɔn. Jɔs bifo i day, i bin tɔk se dɛn fɔ prich di Kiŋdɔm mɛsej “na ɔl di neshɔn dɛn.” (Mak 13:​10) Bɔt aw dɛn go du dis, ɛn udat dɛn go du am?

11. Us impɔtant wok Jizɔs bin gi in disaypul dɛn? Us sɔpɔt dɛn go gɛt fɔ du da wok de?

¹¹ We Jizɔs bin day ɛn gɛt layf bak, i bin apia to in disaypul dɛn ɛn gi dɛn dis impɔtant wok. I tɛl dɛn se: “Una go ɛn mek pipul dɛn bi  mi disaypul na ɔl di neshɔn dɛn. Una baptayz dɛn insay di Papa in nem, di Pikin in nem, ɛn di oli spirit in nem. Una tich dɛn fɔ du ɔl di tin dɛn we a dɔn tɛl una. A de wit una ɔltɛm te di tɛm want fɔ dɔn.” (Mat. 28:​19, 20) Di wɔd dɛn “a de wit una” bin sho se i go de wit in disaypul dɛn we dɛn de du di prichin wok ɛn ɛp pipul dɛn fɔ bi in disaypul. Dɛn go nid da sɔpɔt de bikɔs Jizɔs bin dɔn tɔk se dɛn go “et [dɛn] na ɔl di neshɔn dɛn.” (Mat. 24:​9) Ɔda tin de bak we go ɛp di disaypul dɛn. Jɔs bifo Jizɔs go na ɛvin, i bin tɛl dɛn se di oli spirit go gi dɛn pawa fɔ tɔk bɔt am “na di say we fa pas ɔl na di wɔl.”​—Akt 1:​8.

12. Us impɔtant kwɛstyɔn dɛn go kam na wi maynd? Wetin mek i impɔtant fɔ mek wi no di ansa dɛn?

¹² Naw, sɔm impɔtant kwɛstyɔn dɛn go kam na wi maynd: Fɔ se Jizɔs in apɔsul dɛn ɛn di fɔstɛm Kristian dɛn we bin de trade bin tek dis wok siriɔs wan? Fɔ se dɛn Kristian dɛn ya we nɔ bin bɔku bin ebul fɔ prich bɔt Gɔd in Kiŋdɔm gud gud wan pan ɔl we dɛn bin de mek dɛn sɔfa bad bad wan? Fɔ se Jiova, Jizɔs, di enjɛl dɛn, ɛn di oli spirit bin de sɔpɔt dɛn we dɛn bin de du di prichin wok? Na dis ɛn ɔda kwɛstyɔn dɛn, dɛn ansa na di Baybul buk we nem Akt. I impɔtant fɔ mek wi no di ansa dɛn. Wetin mek? Jizɔs bin prɔmis se di wok we i gi wi fɔ du go kɔntinyu “te di tɛm want fɔ dɔn.” So dis wok gɛt fɔ du wit ɔl tru Kristian dɛn ɛn ivin wi we de insay di tɛm we di wɔl want fɔ dɔn. Na dat mek wi rili nid fɔ no di tin dɛn we dɛn bin dɔn rayt insay di Baybul buk we nem Akt.

13, 14. (a) Udat rayt di Baybul buk we nem Akt? Usay di wan we rayt am gɛt in infɔmeshɔn? (b) Wetin di Baybul buk we nem Akt tɔk bɔt?

¹³ Udat rayt di Baybul buk we nem Akt? Di buk insɛf sɛf nɔ ɛva sho udat rayt am, bɔt di fɔs wɔd dɛn we de insay de sho klia wan se na di sem pɔsin we rayt Lyuk rayt am. (Lyuk 1:​1-4; Akt 1:​1, 2) So frɔm trade trade, pipul dɛn bin biliv se na Lyuk we na “di dɔktɔ we [dɛn] rili lɛk” ɛn we bin de tek in tɛm rayt istri rayt Akt. (Kol. 4:​14) Di buk tɔk bɔt tin dɛn we bin apin insay 28 ia, dat na frɔm di tɛm we Jizɔs go na ɛvin insay di ia 33 afta Krays te to di tɛm we di apɔsul Pɔl bin de na prizin na Rom arawnd di ia 61 afta Krays. We Lyuk bin de rayt ɛn i chenj frɔm “dɛn” to “wi,” dat ɛp wi fɔ no se i bin de de we bɔku pan di tin dɛn we i bin tɔk bɔt apin. (Akt 16:​8-10; 20:​5; 27:​1) Lyuk na man we bin de rili tek in tɛm fɔ du risach, so wan dawt nɔ de se i go dɔn gɛt in infɔmeshɔn frɔm Pɔl, Banabas, Filip, ɛn di ɔda pipul dɛn we i rayt bɔt.

¹⁴ Wetin di Baybul buk we nem Akt tɔk bɔt? Insay Lyuk in Gɔspɛl, i rayt bɔt di tin dɛn we Jizɔs tɔk ɛn du. Bɔt insay di Baybul buk we  nem Akt, Lyuk tɔk bɔt di tin dɛn we Jizɔs in disaypul dɛn bin tɔk ɛn du. So di Baybul buk we nem Akt tɔk bɔt pipul dɛn we bin du pawaful wok dɛn pan ɔl we dɛn bin de si bɔku pan dɛn as pipul dɛn we “nɔ lan buk ɛn na ɔdinari man dɛn.” (Akt 4:​13) Di buk tɛl wi smɔl bak bɔt aw di Kristian kɔngrigeshɔn bin bigin ɛn aw i kɔntinyu fɔ gro. Akt sho aw di fɔstɛm Kristian dɛn bin de prich, us we dɛn bin de yuz, ɛn aw dɛn bin de du tin. (Akt 4:​31; 5:​42) I sho aw di oli spirit bin ɛp fɔ mek di prichin wok go bifo. (Akt 8:​29, 39, 40; 13:​1-3; 16:​6; 18:​24, 25) Di Baybul buk we nem Akt tɔk bɔt di men tin na di Baybul we gɛt fɔ du wit fɔ mek Gɔd yuz in Kiŋdɔm ɔnda Krays fɔ mek In nem oli, ɛn i sho wi aw di Kiŋdɔm mɛsej dɔn de go bifo pan ɔl we dɛn rili de agens wi.​—Akt 8:​12; 19:​8; 28:​30, 31.

15. Us we dɛn wi go bɛnifit we wi tek tɛm stɔdi di Baybul buk we nem Akt?

¹⁵ I rili fayn fɔ stɔdi di Baybul buk we nem Akt, ɛn wi de gɛt mɔ fet we wi de stɔdi am. If wi tink bɔt di ɛgzampul we Krays in disaypul dɛn we bin de insay di fɔstɛm Kristian dɛn tɛm bin sɛt we i kam pan fɔ gɛt maynd ɛn zil, dat go rili tɔch wi at. I go muv wi fɔ falamakata di fet we wi brɔda ɛn sista dɛn we bin de insay di fɔstɛm Kristian dɛn tɛm bin gɛt. Dis go ɛp wi fɔ rɛdi gud gud wan fɔ du wi wok we na fɔ “go ɛn mek . . . disaypul.” Dɛn mek dis buk we yu de rid so fɔ mek yu tek tɛm stɔdi di Baybul buk we nem Akt.

16. Wetin na di tri men rizin dɛn we mek dɛn mek dis buk?

¹⁶ Wetin na di men rizin we mek dɛn mek dis buk? Di tri men rizin dɛn we mek dɛn mek dis buk na (1) fɔ mek wi biliv mɔ ɛn mɔ se Jiova de yuz in oli spirit fɔ sɔpɔt di prichin wok ɛn fɔ mek disaypul, (2) fɔ lɛ wi gɛt zil fɔ prich bay we wi de stɔdi di ɛgzampul bɔt Krays in disaypul dɛn we bin de insay di fɔstɛm Kristian dɛn tɛm, ɛn (3) fɔ lɛ wi gɛt mɔ rɛspɛkt fɔ Jiova in ɔganayzeshɔn ɛn fɔ di wan dɛn we de bifo pan di prichin wok ɛn na di kɔngrigeshɔn dɛn.

17, 18. Aw dɛn ɔganayz dis buk? Wetin-ɛn-wetin i gɛt we go ɛp wi we wi de stɔdi di Baybul?

¹⁷ Aw dɛn ɔganayz dis buk? Yu go notis se i gɛt et sɛkshɔn dɛn, ɛn ɛniwan pan dɛn tɔk smɔl tin bɔt di Baybul buk we nem Akt. Di chapta dɛn nɔ tɔk bɔt Akt vas bay vas. Bifo dat, dɛn sho wi lɛsin dɛn frɔm di tin dɛn we apin insay da Baybul buk de ɛn fɔ ɛp wi fɔ si aw wi go aplay di pɔynt dɛn we wi dɔn lan. We ɛni chapta bigin, dɛn go tɔk bɔt di men pɔynt dɛn na da chapta de ɛn di Skripchɔ dɛn we dɛn kot go sho us pat pan Akt dɛn de tɔk bɔt.

¹⁸ Dis buk gɛt ɔda tin dɛn we go ɛp wi we wi de du wi pasɔnal Baybul  stɔdi. Di buk gɛt fayn fayn pikchɔ dɛn we go ɛp wi fɔ si di intrɛstin tin dɛn we bin de apin as wi de tink bɔt di Baybul in stori. Bɔku chapta dɛn we de insay dis buk gɛt bɔks dɛn we gɛt mɔ tin dɛn we go ɛp wi fɔ no mɔ bɔt di tɔpik we wi de stɔdi. Sɔm pan di bɔks dɛn tɔk smɔl bɔt pipul dɛn na di Baybul we fit fɔ mek wi falamakata dɛn fet. Sɔm ɔda bɔks dɛn tɔk mɔ bɔt ples dɛn, tin dɛn we bin apin, kɔstɔm dɛn, ɛn ɔda pipul dɛn we di Baybul buk we nem Akt tɔk bɔt.

19. Us kwɛstyɔn dɛn wi fɔ yuz fɔ chɛk wisɛf wan wan tɛm?

¹⁹ Dis buk go ɛp yu fɔ rili chɛk yusɛf. Ilɛk ɔmɔs ia yu dɔn de prich bɔt di Kiŋdɔm, i go fayn wan wan tɛm fɔ lɛ yu stɔp ɛn tink bɔt di tin dɛn we yu de put fɔs na yu layf ɛn aw yu de si di prichin wok. (2 Kɔr. 13:​5) Aks yusɛf: ‘A de du di prichin wok lɛk se bɛtɛ tɛm nɔ lɛf igen? (1 Kɔr. 7:​29-31) A kin prich di gud nyuz lɛk se a biliv wetin a de prich ɛn a de du am wit zil? (1 Tɛs. 1:​5, 6) A de yuz bɔku pan mi tɛm fɔ prich ɛn fɔ mek disaypul?’​—Kol. 3:​23.

20, 21. Wetin mek wi wok rili ɔjɛnt? Wetin wi fɔ mekɔp wi maynd fɔ du?

²⁰ Lɛ wi mɛmba ɔltɛm se wi gɛt impɔtant wok we na fɔ prich ɛn mek disaypul dɛn. Ɛnide we wi slip ɛn wek, na so dis wok de ɔjɛnt mɔ ɛn mɔ. Di tɛm fɔ lɛ dis wɔl dɔn de kam nia kwik kwik wan. Pipul dɛn layf de pan denja naw pas ɛni ɔda tɛm. Wi nɔ no ɔmɔs pipul dɛn dɔn lɛf we want fɔ no di tru we go lisin to wi mɛsej. (Akt 13:​48) Bɔt na wi gɛt di wok fɔ ɛp dɛn pipul dɛn ya bifo di tɛm dɔn.​—1 Tim. 4:​16.

²¹ So i rili impɔtant fɔ lɛ wi falamakata di zil we di fɔstɛm Kristian dɛn we bin de prich bɔt di Kiŋdɔm trade bin gɛt. As yu de tek yu tɛm fɔ stɔdi dis buk, lɛ dat muv yu fɔ prich wit mɔ zil ɛn maynd. Ɛn mek dis ɛp yu fɔ mekɔp yu maynd mɔ fɔ kɔntinyu fɔ “prich . . . gud gud wan bɔt Gɔd in Kiŋdɔm.”​—Akt 28:​23.