1, 2. Us mirekul Pita ɛn Jɔn bin pafɔm nia di tɛmpul in get?

 DI SAN de shayn pan di krawd. Di Ju dɛn we bin ol Gɔd biznɛs wit tu an ɛn Krays in disaypul dɛn kam na di tɛmpul kɔmpawnd. I nɔ go te igen, “di tɛm fɔ pre” a go rich. (Akt 2:​46; 3:​1) Pita ɛn Jɔn bin de waka midul di krawd fɔ go na di tɛmpul get we dɛn kɔl Fayn. As di pipul dɛn bin de tɔk lawd wan ɛn de waka waka, wan begaman we kripul frɔm we dɛn bɔn am bin de beg fɔ mɔni.​—Akt 3:​2; 4:​22.

² As Pita ɛn Jɔn de kam nia, di begaman bigin fɔ tɔk wetin i kin tɔk we i de beg fɔ mɔni. Di apɔsul dɛn stɔp, ɛn di man bigin fɔ pe atɛnshɔn to dɛn. Pita tɔk se, “A nɔ gɛt silva ɛn gold, bɔt wetin a gɛt na in a go gi yu. Insay Jizɔs Krays di Nazarin in nem, waka!” Imajin di we aw di krawd bin sɔprayz we Pita ol di kripul man in an, ɛn fɔ di fɔs tɛm na in layf di man tinap tret. (Akt 3:​6, 7) Yu ebul imajin we di man de luk in fut dɛn we dɔn wɛl as i bigin waka fɔ di fɔs tɛm? No wɔnda i bigin fɔ jomp jomp ɛn prez Gɔd lawd wan!

3. Us wɔndaful gift di man we na bin kripul ɛn di krawd go ebul gɛt?

³ Di krawd we bin sɔprayz bin rɔn go to Pita ɛn Jɔn na Sɔlɔmɔn in viranda. Na dis sem ples usay Jizɔs bin tinap ɛn tich, na de Pita tɛl dɛn di rial minin ɔf wetin jɔs apin. (Jɔn 10:​23) I gi di krawd ɛn di man we na bin kripul wan gift we valyu pas silva ɔ gold fa fawe. Dis gift nɔ jɔs de mek pɔsin gɛt wɛlbɔdi bak. Na di chans we pipul dɛn gɛt fɔ ripɛnt, fɔ mek Gɔd wep dɛn sin dɛn, ɛn fɔ mek dɛn bi disaypul fɔ di “Chif Lida fɔ layf” we Jiova dɔn pik, we na Jizɔs Krays.​—Akt 3:​15.

4. (a)  Us prɔblɛm di mirekul we Pita ɛn Jɔn bin pafɔm bin kam wit? (b) Us tu kwɛstyɔn dɛn wi go ansa?

⁴ Dis na bin rili wɔndaful de! Dɛn mɛn wan pɔsin ɛn i bin ebul fɔ waka. Bɔku bɔku pipul dɛn bin gɛt di chans fɔ rili no di kɔrɛkt tin we Gɔd want ɛn fɔ ɔndastand di tin dɛn we gɛt fɔ du wit Gɔd biznɛs so dat  dɛn go waka di we aw Gɔd want. (Kol. 1:​9, 10) Dɔn bak, di tin dɛn we bin apin da de de bin mek prɔblɛm de bitwin Krays in fetful disaypul dɛn ɛn pipul dɛn we bin de na pawa, we bin de tray fɔ mek pipul dɛn nɔ du wetin Jizɔs bin kɔmand, we na fɔ prich di Kiŋdɔm mɛsej. (Akt 1:​8) Wetin wi kin lan frɔm di we aw Pita ɛn Jɔn bin prich to di krawd ɛn di we aw dɛn biev pan ɔl we dɛn na man dɛn we “nɔ lan buk ɛn na ɔdinari man dɛn?” b (Akt 4:​13) Ɛn aw wi go falamakata di we aw dɛn ɛn di ɔda disaypul dɛn bin biev we ɔda pipul dɛn bin de agens dɛn?

5. Wetin wi lan frɔm di we aw Pita bin tɔk to di krawd?

⁵ Pita ɛn Jɔn tinap bifo di krawd, ɛn dɛn bin no se sɔm pan di pipul dɛn we de de, na dɛn bin de ala fɔ lɛ dɛn kil Jizɔs. (Mak 15:​8-15; Akt 3:​13-15) Tink bɔt aw Pita sho se i gɛt maynd bay we i nɔ fred fɔ tɔk se na insay Jizɔs in nem i mɛn di kripul man. Pita nɔ fred fɔ tɔk di tru jɔs fɔ mek di pipul dɛn gladi. Pita bin tɛl di krawd bifo dɛn fes se dɛnsɛf sɛf bin du sɔntin fɔ mek Krays day. Bɔt Pita nɔ bin kip grɔj fɔ dɛn pipul dɛn ya bikɔs dɛn “nɔ bin no wetin [dɛn] de du.” (Akt 3:​17) I tɔk fayn to dɛn as in brɔda dɛn ɛn pe atɛnshɔn to di gud pat pan di Kiŋdɔm mɛsej. If dɛn ripɛnt ɛn put fet pan Krays, Jiova go “mek [dɛn] fil fayn.” (Akt 3:​19) Wisɛf nid fɔ gɛt maynd ɛn nɔ fred we wi de tɔk bɔt Gɔd in jɔjmɛnt we de kam. Bɔt stil, wi nɔ fɔ ɛva tɔk ash wan ɔ jɔj di pipul dɛn we wi de tɔk to. Bifo dat, wi fɔ si di pipul dɛn we wi de prich to as pipul dɛn we go bi wi brɔda dɛn. Ɛn lɛk Pita, wi want fɔ pe atɛnshɔn mɔ to di gud pat pan di Kiŋdɔm mɛsej.

6. Aw Pita ɛn Jɔn sho se dɛn ɔmbul ɛn nɔto ɔltin dɛn ebul fɔ du?

⁶ Di apɔsul dɛn bin ɔmbul. Dɛn nɔ bin tek di prez fɔ di mirekul we dɛn bin dɔn pafɔm. Pita tɛl di krawd se: “Wetin mek una de luk wi lɛk se na bikɔs wi fetful to Gɔd ɔ na bay wi yon pawa wi dɔn mek dis man waka?” (Akt 3:​12) Pita ɛn di ɔda apɔsul dɛn bin no se ɛni gud we dɛn ebul fɔ du na dɛn prichin wok, na bikɔs ɔf Gɔd in pawa, nɔto bay dɛn yon pawa. So dat bin mek dɛn gi ɔl di prez to Jiova ɛn Jizɔs fɔ ɔl di tin dɛn we dɛn ebul fɔ du.

7, 8. (a) Us gift wi kin gi pipul dɛn? (b) Aw di prɔmis fɔ se “ɔltin go kam bak lɛk aw dɛn bin de,” de apin tide?

⁷ Wisɛf nid fɔ ɔmbul we wi de prich bɔt di Kiŋdɔm. Na tru se Gɔd in spirit nɔ de mek Kristian dɛn tide ebul fɔ pafɔm mirekul fɔ mɛn pipul dɛn. Bɔt pan ɔl dat, wi stil ebul fɔ ɛp pipul dɛn fɔ gɛt fet pan Gɔd ɛn Krays ɛn fɔ gɛt di sem gift we Pita bin gi, dat na di chans fɔ mek Jiova  fɔgiv dɛn sin dɛn ɛn fɔ mek dɛn fil fayn. Ɛvri ia, bɔku bɔku pipul dɛn kin gri fɔ tek dis gift ɛn baptayz fɔ bi Krays in disaypul dɛn.

⁸ Fɔ tru, wi de liv na di tɛm we Pita bin kɔl di tɛm we “ɔltin kam bak lɛk aw dɛn bin de.” Fɔ lɛ di tin dɛn we “Gɔd bin dɔn yuz in oli prɔfɛt dɛn we bin de trade fɔ tɔk” bi, di Kiŋdɔm bigin fɔ rul na ɛvin insay di ia 1914. (Akt 3:​21; Sam 110:​1-3; Dan. 4:​16, 17) Shɔt tɛm afta dat, Krays bigin fɔ ɔganayz di wok fɔ mek tru wɔship de bak na di wɔl. Dat dɔn mek bɔku bɔku pipul dɛn dɔn kam na di spirichwal paradays fɔ lɛ Gɔd in Kiŋdɔm go rul dɛn. Dɛn dɔn lɛf dɛn ol abit dɛn we kɔrɔpt ɛn dɛn dɔn “gɛt di nyu abit dɛn we Gɔd mek akɔdin to wetin i want.” (Ɛfi. 4:​22-24) Jɔs lɛk aw i bin bi wit di begaman we bin kripul, na Gɔd in spirit dɔn mek dis wɔndaful wok go bifo, nɔto mɔtalman pawa. Jɔs lɛk Pita, wisɛf fɔ gɛt maynd ɛn yuz Gɔd in Wɔd fayn fayn wan fɔ tich ɔda pipul dɛn. Na Gɔd in pawa de mek wi ebul fɔ ɛp pipul dɛn fɔ bi Krays in disaypul, nɔto wi yon pawa.

9-11. (a) Wetin di Ju bigman dɛn bin du we dɛn yɛri wetin Pita ɛn Jɔn tɔk? (b) Wetin di apɔsul dɛn bin mekɔp dɛn maynd fɔ du?

⁹ Kɔnfyushɔn bin kam bikɔs ɔf di tin dɛn we Pita tɔk ɛn di man we bin kripul, bɔt we dɔn wɛl ɛn we de ala ɛn jomp. So dat bin mek di kaptin na di tɛmpul, we na di pɔsin we dɛn pik fɔ mek shɔ se tin apin sef wan na di tɛmpul eria, ɛn di prist dɛn rɔsh go de fɔ no wetin de apin. I go bi se dɛn man ya na bin Sadyusi dɛn. Di Sadyusi dɛn na man dɛn we bin gɛt mɔni ɛn we bin gɛt pawa na pɔlitiks we bin de tray fɔ mek di pipul dɛn gɛt pis wit di Roman dɛn. Dɛn bin de agens di lɔ dɛn we di Faresi dɛn bin lɛk ɛn dɛn nɔ bin biliv se di wan dɛn we dɔn day go gɛt layf bak. c Dɛn bin rili vɛks fɔ si Pita ɛn Jɔn na di tɛmpul de prich wit maynd se Jizɔs dɔn gɛt layf bak.

¹⁰ Di man dɛn we bin vɛks bin put Pita ɛn Jɔn na jel ɛn kɛr dɛn go bifo di Ju ay kɔt di nɛks de. Di wan dɛn we bin de rul we tink se dɛn bɛtɛ pas ɔda pipul dɛn, nɔ bin tink se Pita ɛn Jɔn gɛt rayt fɔ tich na di tɛmpul bikɔs dɛn bin de si dɛn as man dɛn we ‘nɔ lan buk ɛn ɔdinari.’ Dɛn nɔ bin go na ɛniwan pan di big skul dɛn usay dɛn bin de tich bɔt Gɔd biznɛs. Bɔt di we aw dɛn sabi tɔk ɛn aw dɛn rili biliv wetin dɛn de tɔk bin mek di kɔt sɔprayz. Wetin bin mek Pita ɛn Jɔn sabi tɔk dis kayn we? Wan rizin na bikɔs “dɛn bin de wit Jizɔs.” (Akt 4:​13) Di tin dɛn we dɛn Masta bin de tich dɛn kɔmɔt frɔm Gɔd, nɔto lɛk dɛn Lɔ ticha dɛn.​—Mat. 7:​28, 29.

¹¹ Di kɔt bin tɛl di apɔsul dɛn fɔ lɛf fɔ prich. To di pipul dɛn da tɛm de, di kɔt bin rili gɛt pawa. I nɔ bin tu te yet we Jizɔs bin tinap bifo da sem  kɔt de, we dɛn se: “I fit fɔ day.” (Mat. 26:​59-66) Bɔt pan ɔl dat, Pita ɛn Jɔn nɔ bin fred. We Pita ɛn Jɔn bin tinap bifo dɛn man ya we jɛntri, we lan bɔku buk, ɛn we gɛt pawa, dɛn nɔ bin fred fɔ tɛl dɛn wit rɛspɛkt se: “If i rayt na Gɔd in yay fɔ lisin to una pas fɔ lisin to Gɔd, una jɔj fɔ unasɛf. Bɔt wi nɔ go stɔp fɔ tɔk bɔt di tin dɛn we wi dɔn si ɛn yɛri.”​—Akt 4:​19, 20.

12. Wetin go ɛp wi fɔ gɛt maynd ɛn biliv di tin dɛn we wi de lan?

¹² Yu ebul fɔ sho di kayn maynd we Pita ɛn Jɔn bin gɛt? Aw yu kin fil we yu gɛt di chans fɔ prich to pipul dɛn na yu eria we jɛntri, we lan bɔku buk, ɛn we gɛt pawa? Wetin yu go du if yu fambul dɛn, yu skulmet dɛn, ɔ yu wokmet dɛn de provok yu fɔ wetin yu biliv? Yu kin fred? If na so i bi, yu go ebul lɛf fɔ fil da we de. We Jizɔs bin de na di wɔl, i bin tich di apɔsul dɛn aw fɔ tɔk bɔt wetin dɛn biliv wit kɔnfidɛns ɛn rɛspɛkt. (Mat. 10:​11-18) Afta Jizɔs bin gɛt layf bak, i prɔmis in disaypul dɛn se i go kɔntinyu fɔ de wit dɛn “ɔltɛm te di tɛm want fɔ dɔn.” (Mat. 28:​20) Tide, Jizɔs de dayrɛkt “di slev we fetful ɛn gɛt sɛns” fɔ tich wi aw fɔ tɔk bɔt wetin wi biliv. (Mat. 24:​45-47; 1 Pit. 3:​15) Dɛn de du dis bay di tin dɛn we dɛn de tich wi na mitin dɛn, lɛk Wi Kristian Layf ɛn Prichin Wok mitin, ɛn di buk ɛn magazin dɛn we de tɔk bɔt di Baybul, lɛk di atikul dɛn na di jw.org wɛbsayt we nem “Di Baybul in Ansa to Sɔm Kwɛstyɔn Dɛn.” Yu de rili bɛnifit frɔm di tin dɛn we wi de lan na di mitin dɛn ɛn wi buk ɛn magazin dɛn? If yu du dat, yu go gɛt maynd mɔ ɛn mɔ, ɛn na di mɔ yu go biliv di tin dɛn we yu de lan. Ɛn yusɛf nɔ go alaw natin fɔ stɔp yu fɔ tɔk bɔt di wɔndaful tin dɛn we yu dɔn si ɛn yɛri bɔt Jiova, jɔs lɛk di apɔsul dɛn.

13, 14. If pipul dɛn de agens wi, wetin wi fɔ du? Wetin mek?

¹³ Jɔs afta dɛn fri Pita ɛn Jɔn na prizin, dɛn go mit di ɔda pipul dɛn na di kɔngrigeshɔn. Dɛn jɔyn dɛn fɔ “tɔk lawd wan to Gɔd” ɛn pre fɔ lɛ dɛn kɔntinyu fɔ gɛt maynd fɔ prich. (Akt 4:​24) Pita bin no se i nɔ mek  sɛns fɔ lɛ pɔsin abop pan in yon trɛnk we i want fɔ du wetin Gɔd want. Sɔm wik bifo dis tɛm, i bin tɔk wit kɔnfidɛns we i de tɛl Jizɔs se: “Pan ɔl we ɔl di ɔda wan dɛn go lɛf yu, a nɔ go ɛva lɛf yu!” Bɔt jɔs lɛk aw Jizɔs bin dɔn tɔk, i nɔ te Pita fred mɔtalman ɛn dinay in padi ɛn ticha. Bɔt Pita bin lan frɔm in mistek.​—Mat. 26:​33, 34, 69-75.

¹⁴ Nɔto we yu mekɔp yu maynd nɔmɔ go mek yu ebul fɔ du dis wok we na fɔ tɔk bɔt Krays. We di wan dɛn we de agens wi tray fɔ mek yu nɔ gɛt bɛtɛ fet ɔ stɔp yu fɔ prich, na fɔ fala Pita ɛn Jɔn dɛn ɛgzampul. Pre to Jiova fɔ gi yu trɛnk. Mek lɛ di kɔngrigeshɔn sɔpɔt yu. Tɛl di ɛlda dɛn ɛn machɔ brɔda ɛn sista dɛn bɔt di prɔblɛm dɛn we yu de gɛt. Di pre we ɔda pipul dɛn kin pre fɔ wi kin mek wi gɛt pawa fɔ bia.​​—Ɛfi. 6:​18; Jems 5:​16.

15. Wetin mek di wan dɛn we bin dɔn stɔp fɔ prich fɔ sɔm tɛm nɔ fɔ pwɛlat?

¹⁵ If yu dɔn stɔp fɔ prich fɔ sɔm tɛm bikɔs yu de fred, nɔ pwɛlat. Mɛmba se ɔl di apɔsul dɛn bin stɔp fɔ prich fɔ sɔm tɛm afta Jizɔs day. Bɔt i nɔ tu te, dɛn bin stat fɔ prich bak. (Mat. 26:​56; 28:​10, 16-20) So nɔ alaw di mistek dɛn we yu bin dɔn mek trade fɔ mek yu at pwɛl. Bifo dat, lan frɔm yu mistek dɛn ɛn yuz di lɛsin dɛn we yu dɔn lan fɔ ɛp ɔda pipul dɛn.

16, 17. Wetin wi kin lan frɔm di prea we Krays in disaypul dɛn na Jerusɛlɛm bin pre?

¹⁶ Wetin wi fɔ pre fɔ we di wan dɛn we de na pawa de agens wi? Mɛmba se di disaypul dɛn nɔ bin pre fɔ lɛ prɔblɛm dɛn nɔ mit dɛn. Dɛn mɛmba wetin Jizɔs tɔk we i se: “If dɛn bin dɔn mek a sɔfa, dɛn go mek unasɛf sɔfa.” (Jɔn 15:​20) Bifo dat, dɛn fetful disaypul dɛn de bin pre to Jiova fɔ mek i “lisin to” di trɛtin we di wan dɛn we de agens dɛn de trɛtin dɛn. (Akt 4:​29) Di disaypul dɛn bin si klia wan se di sɔfa we dɛn de sɔfa bin ɛp dɛn fɔ no se na Baybul prɔfɛsi de kam tru. Dɛn bin no se jɔs lɛk aw Jizɔs bin dɔn tich dɛn fɔ pre, wetin Gɔd want go ‘bi na di wɔl,’ ilɛk wetin mɔtalman rula dɛn go se.​—Mat. 6:​9, 10.

¹⁷ Fɔ mek di disaypul dɛn go du wetin Gɔd want, dɛn bin pre to Jiova se: “Mek yu slev dɛn kɔntinyu fɔ gɛt maynd fɔ tɔk bɔt yu wɔd.” Wetin Jiova bin du fɔ ansa dɛn prea wantɛm wantɛm? “Di ples we dɛn bin gɛda shek, ɛn oli spirit kam  insay dɛn ɔl, ɛn dɛn bin de tɔk bɔt Gɔd in wɔd wit maynd.” (Akt 4:​29-31) Natin nɔ de we go stɔp wetin Gɔd want fɔ apin. (Ayz. 55:​11) Ilɛk i tan lɛk se i nɔ pɔsibul fɔ lɛ wetin Gɔd want bi, ɔ ilɛk di wan dɛn we de agens wi rili pawaful, wi shɔ se if wi pre to Gɔd, i go gi wi di trɛnk we wi nid fɔ kɔntinyu fɔ tɔk bɔt in wɔd wit maynd.

18. Wetin di wan dɛn we bin de na di kɔngrigeshɔn na Jerusɛlɛm bin du fɔ ɛp dɛn kɔmpin dɛn?

¹⁸ I nɔ tu te, dis nyu kɔngrigeshɔn na Jerusɛlɛm bin gɛt pas 5,000 pipul dɛn. d Pan ɔl we di disaypul dɛn bin kɔmɔt difrɛn difrɛn say dɛn, “dɛn ɔl bin de tink ɛn fil di sem we.” Dɛn bin gɛt wanwɔd we i kam pan wetin de na dɛn maynd ɛn dɛn bin de tink di sem we. (Akt 4:​32; 1 Kɔr. 1:​10) Di disaypul dɛn nɔ bin jɔs pre fɔ mek Jiova blɛs dɛn ɛfɔt, bɔt dɛn bin du mɔ. Dɛn bin de ɛp dɛn kɔmpin dɛn fɔ gɛt mɔ fet, ɛn we nid de, dɛn bin de ɛp dɛn wit tin fɔ it ɛn ɔda tin dɛn. (1 Jɔn 3:​16-18) Fɔ ɛgzampul, di disaypul we nem Josɛf we dɛn bin de kɔl Banabas, bin sɛl in land ɛn gi ɔl di mɔni to di wan dɛn we bin de fa ples dɛn fɔ de na Jerusɛlɛm fɔ lɔng tɛm so dat dɛn go ebul fɔ lan mɔ bɔt dɛn nyu fet.

19. Wetin bin mek Jiova kil Ananayas ɛn Safayra?

¹⁹ Wan maredman ɛn in wɛf we nem Ananayas ɛn Safayra dɛn bak bin sɛl dɛn prɔpati ɛn gi kɔntribyushɔn. Dɛn bin mek lɛk se na ɔl di mɔni dɛn gi, bɔt dɛn “ayd sɔm pan di mɔni we dɛn pe” dɛn. (Akt 5:​2) Jiova bin kil dis maredman ɛn in wɛf, nɔto bikɔs di mɔni we dɛn gi bin smɔl, bɔt na bikɔs dɛn nɔ bin gi am fɔ di rayt rizin ɛn dɛn bin lay. Na Gɔd dɛn “lay to, nɔto to mɔtalman.” (Akt 5:​4) Jɔs lɛk di ipokrit pipul dɛn we Jizɔs bin kɔndɛm, Ananayas ɛn Safayra bin bisin mɔ bɔt fɔ mek mɔtalman prez dɛn pas fɔ mek Gɔd gladi fɔ dɛn.​—Mat. 6:​1-3.

20. Us lɛsin dɛn wi lan bɔt fɔ gi Jiova?

²⁰ Jɔs lɛk aw di fetful disaypul dɛn we bin de na Jerusɛlɛm insay di fɔstɛm Kristian dɛn tɛm bin lɛk fɔ gi, na so bɔku bɔku Jiova Witnɛs dɛn tide de sɔpɔt di prichin wok we de apin ɔlsay na di wɔl bay we dɛn de gi kɔntribyushɔn. Dɛn nɔ de fos ɛnibɔdi fɔ yuz in tɛm ɔ fɔ gi in mɔni fɔ sɔpɔt dis wok. Fɔ tru, Jiova nɔ want wi fɔ sav am biɛn wi at ɔ bikɔs dɛn de fos wi. (2 Kɔr. 9:​7) Jiova bisin mɔ bɔt di rizin we mek wi de gi, nɔto ɔmɔs wi gi. (Mak 12:​41-44) Wi nɔ ɛva want fɔ bi lɛk Ananayas ɛn Safayra ɛn bisin bɔt wisɛf nɔmɔ we wi de sav Gɔd ɛn fɔ mek pipul dɛn prez wi. Bifo dat, lɛk Pita, Jɔn, ɛn Banabas, wi fɔ sav Jiova bikɔs wi rili lɛk am ɛn wi kɔmpin mɔtalman.​—Mat. 22:​37-40.