1-3. (a) Wetin mek dɛn bin briŋ di apɔsul dɛn bifo di Sanɛndrin? Us men kwɛstyɔn dat bin briŋ? (b) Wetin mek wi rili want fɔ no di rizin we mek di apɔsul dɛn bin tinap tranga wan?

 DI JƆJ dɛn na di Sanɛndrin vɛks bad bad wan! Jizɔs in apɔsul dɛn de bifo dis ay kɔt. Wetin mek? Josɛf Keyafas we na di ay prist ɛn prɛsidɛnt fɔ di Sanɛndrin tɛl di apɔsul dɛn vɛks vɛks wan se: “Wi dɔn wɔn una strikt wan mek una nɔ tich pipul dɛn bɔt dis nem.” Keyafas we na bin di prɛsidɛnt bin so vɛks dat i nɔ bin ivin want fɔ kɔl Jizɔs in nem. Bɔt Keyafas kɔntinyu fɔ tɔk se, “una dɔn mek una tichin de ɔlsay na Jerusɛlɛm, ɛn una rili want fɔ mek dis man in blɔd de na wi ed.” (Akt 5:​28) Dɛn bin de tray fɔ tɛl di apɔsul dɛn se if dɛn nɔ stɔp fɔ prich, dɛn go pɔnish dɛn!

² Wetin di apɔsul dɛn go du? Na Jizɔs gi dɛn dis wok fɔ prich, ɛn na Gɔd gi Jizɔs di rayt fɔ du dat. (Mat. 28:​18-20) Fɔ se di apɔsul dɛn go fred mɔtalman ɛn lɛf fɔ prich? Ɔ dɛn go gɛt maynd fɔ tinap tranga wan ɛn kɔntinyu fɔ prich? Dis na di men kwɛstyɔn: Na Gɔd dɛn go obe ɔ mɔtalman? Di apɔsul Pita nɔ ivin westɛm fɔ tɔk fɔ ɔl di apɔsul dɛn. Di wɔd dɛn we i bin tɔk sho se i gɛt maynd, ɛn i nɔ bin gɛt wan dawt.

³ As tru Kristian dɛn, wi rili want fɔ no wetin di apɔsul dɛn bin du we di Sanɛndrin bin trɛtin dɛn. Wisɛf gɛt di wok fɔ prich. We wi de du dis wok we Gɔd gi wi, wisɛf kin gɛt prɔblɛm dɛn. (Mat. 10:​22) Pipul dɛn we de agens wi kin tray fɔ stɔp wi wok ɔ mek wi nɔ prich lɛk aw wi fɔ prich. Wetin wi go du? Wi go bɛnifit we wi stɔdi bɔt wetin di apɔsul dɛn bin du fɔ tinap tranga wan ɛn di tin dɛn we bin apin we mek dɛn kɛr dɛn go na di Sanɛndrin. a

4, 5. Wetin mek Keyafas ɛn di Sadyusi dɛn bin de “jɛlɔs bad bad wan”?

⁴ Mɛmba se di fɔs tɛm we dɛn bin tɛl di apɔsul dɛn fɔ stɔp fɔ prich, Pita ɛn Jɔn bin ansa se: “Wi nɔ go stɔp fɔ tɔk bɔt di tin dɛn we wi dɔn si ɛn yɛri.” (Akt 4:​20) Afta di Sanɛndrin bin tɛl dɛn fɔ lɛf fɔ prich, Pita,  Jɔn, ɛn di ɔda apɔsul dɛn bin kɔntinyu fɔ prich na di tɛmpul. Di apɔsul dɛn bin du pawaful tin dɛn, lɛk fɔ mɛn di wan dɛn we sik ɛn fɔ pul dimɔn dɛn pan pipul dɛn. Dɛn bin de du dat “na Sɔlɔmɔn in Viranda,” we de na di ist pat na di tɛmpul usay bɔku Ju dɛn bin de gɛda. Ivin Pita in shado bin de mɛn pipul dɛn! Bɔku pan di wan dɛn we di apɔsul dɛn bin mɛn bin de lisin to Gɔd in wɔd. Dis bin mek “bɔku bɔku man ɛn uman dɛn bin de ad pan di wan dɛn we bin biliv di Masta.”​—Akt 5:​12-15.

⁵ Keyafas na bin Sadyusi. Dɛn bin de “jɛlɔs bad bad wan,” ɛn dɛn bin put di apɔsul dɛn na jel. (Akt 5:​17, 18) Wetin mek di Sadyusi dɛn bin vɛks pan di apɔsul dɛn? Di apɔsul dɛn bin de tich se Jizɔs dɔn gɛt layf bak, bɔt di Sadyusi dɛn nɔ bin biliv se we pɔsin day i go gɛt layf bak. Di apɔsul dɛn bin de tich se na we pɔsin gɛt fet pan Jizɔs na in nɔmɔ go mek i sev, bɔt di Sadyusi dɛn bin de fred se Rom go pɔnish dɛn if dɛn pipul dɛn si Jizɔs as dɛn Lida. (Jɔn 11:​48) Na dat mek di Sadyusi dɛn bin mekɔp dɛn maynd fɔ mek di apɔsul dɛn lɛf fɔ prich!

6. Udat dɛn na di men pipul dɛn we de agens Jiova in savant dɛn tide? Wetin mek dis nɔ fɔ mek wi sɔprayz?

⁶ Tide sɛf, di men pipul dɛn we de agens Jiova in savant dɛn na di wan dɛn we de na ɔda rilijɔn. Dɛn pipul dɛn ya kin tray fɔ yuz di pawa we dɛn gɛt na gɔvmɛnt, redio, ɛn ɔda tin dɛn fɔ stɔp wi prichin wok. Yu tink se wi fɔ sɔprayz? Nɔ. Bikɔs di mɛsej we wi de prich de sho di lay lay tin dɛn we fɔls rilijɔn de du. We pipul dɛn lan di tru na di Baybul, dat kin mek dɛn fri frɔm lay lay tichin dɛn, ɛn dɛn nɔ de put an pan tin dɛn we di Baybul nɔ gri wit. (Jɔn 8:​32) Na dat mek wi nɔ sɔprayz we di mɛsej we wi de prich kin mek di bigman dɛn pan Gɔd biznɛs jɛlɔs wi bad bad wan ɛn et wi.

7, 8. Aw wetin di enjɛl bin tɛl di apɔsul dɛn fɔ du ɛp dɛn? Us kwɛstyɔn wi fɔ aks wisɛf?

⁷ We di apɔsul dɛn de na jel de wet fɔ dɛn trayal, dɛn go dɔn de tink if dɛn ɛnimi dɛn go kil dɛn. (Mat. 24:​9) Bɔt na nɛt, sɔntin we dɛn nɔ bin de tink bɔt apin. “Jiova in enjɛl opin di prizin domɔt dɛn.” b (Akt 5:​19) Dɔn di enjɛl tɛl dɛn wetin fɔ du. I tɛl dɛn se: “Una go tinap na di tɛmpul ɛn kɔntinyu fɔ tɛl di pipul dɛn ɔl di tin dɛn bɔt dis layf.” (Akt 5:​20) Di tin we di ɛnjɛl tɛl di apɔsul dɛn fɔ du go dɔn mek dɛn no se dɛn bin de du di rayt tin. Di wɔd dɛn we di enjɛl tɔk go dɔn ɛp di apɔsul dɛn fɔ kɔntinyu fɔ tinap tranga wan ilɛk wetin apin. Di fet ɛn maynd we di apɔsul dɛn bin gɛt bin mek “dɛn go na di tɛmpul na mɔnin ɛn bigin fɔ tich.”​—Akt 5:​21.

⁸ Wi ɔl fɔ aks wisɛf dis kwɛstyɔn, ‘A gɛt di fet ɛn maynd we a nid fɔ  kɔntinyu fɔ prich we dɛn sem prɔblɛm dɛn ya mit wi?’ We wi no se di enjɛl dɛn de sɔpɔt wi ɛn dayrɛkt dis impɔtant wok we na fɔ “prich . . . gud gud wan bɔt Gɔd in Kiŋdɔm,” dat de gi wi trɛnk.​—Akt 28:​23; Rɛv. 14:​6, 7.

9-11. Wetin di apɔsul dɛn bin du we di Sanɛndrin bin tɛl dɛn fɔ stɔp fɔ prich? Us ɛgzampul dis lɛf fɔ tru Kristian dɛn?

⁹ Keyafas ɛn di ɔda jɔj dɛn na di Sanɛndrin bin dɔn rɛdi fɔ pɔnish di apɔsul dɛn. Di kɔt bin sɛn di ɔfisa dɛn fɔ go briŋ di prizina dɛn bikɔs dɛn nɔ bin no wetin dɔn apin. Imajin aw di ɔfisa dɛn go dɔn sɔprayz we dɛn bin si se di prizina dɛn nɔ de de pan ɔl we di jel bin lɔk gud gud wan ɛn “di gaydman dɛn bin tinap na di domɔt dɛn.” (Akt 5:​23) I nɔ tu te, di kaptin na di tɛmpul bin kam fɔ no se di apɔsul dɛn dɔn go bak na di tɛmpul ɛn dɛn de prich bɔt Jizɔs Krays, we na di sem wok we dɛn put dɛn na jel fɔ! So di kaptin ɛn in ɔfisa dɛn go na di tɛmpul kwik kwik wan fɔ go tek di prizina dɛn ɛn go wit dɛn na di Sanɛndrin.

¹⁰ Lɛk aw wi bin dɔn tɔk we dis chapta bigin, di bigman dɛn pan Gɔd biznɛs bin vɛks bad bad wan ɛn dɛn bin want di apɔsul dɛn fɔ stɔp fɔ prich. Wetin di apɔsul dɛn bin du? Pita tɔk wit maynd fɔ ɔl di apɔsul dɛn se: “Na Gɔd wi fɔ obe as rula, nɔto mɔtalman.” (Akt 5:​29) We di apɔsul dɛn bin du dis, dɛn lɛf fayn ɛgzampul fɔ ɔl tru Kristian dɛn fɔ fala. Pan ɔl we Gɔd tɛl wi fɔ obe mɔtalman rula dɛn, wi nɔ go obe dɛn if dɛn stɔp wi fɔ du wetin Gɔd want ɔ dɛn tɛl wi fɔ du wetin Gɔd nɔ want. Tide, if “di wan dɛn we gɛt pawa” ban wi prichin wok, wi nɔ go lɛf fɔ du di wok we Gɔd dɔn gi wi, we na fɔ prich di gud nyuz. (Rom. 13:​1) Bifo dat, wi go tray fɔ fɛn ɔda we dɛn fɔ kɔntinyu fɔ prich gud gud wan bɔt Gɔd in Kiŋdɔm.

¹¹ Wi nɔ sɔprayz fɔ no se di maynd we di apɔsul dɛn bin gɛt fɔ ansa di jɔj dɛn bin mek dɛn vɛks bad bad wan. Dɛn bin rɛdi fɔ “kil” di apɔsul dɛn. (Akt 5:​33) Wi nɔ gɛt wan dawt se dɛn bin dɔn rɛdi fɔ kil dɛn bikɔs dɛn de prich wit maynd ɛn zil. Bɔt dɛn go gɛt ɛp di kayn we we dɛn nɔ bin de tink bɔt!

12, 13. (a) Us advays Gameliɛl bin gi in kɔmpin dɛn? Wetin dɛn bin du? (b) Aw Jiova go du sɔntin fɔ ɛp in pipul dɛn tide? If Jiova alaw wi fɔ “sɔfa bikɔs [wi] de du wetin rayt,” wetin wi shɔ bɔt?

¹² Gameliɛl we na bin “Lɔ ticha we ɔl di pipul dɛn rili rɛspɛkt,” bin tinap ɛn tɔk. c I go bi se ɔl in kɔmpin dɛn bin rili rɛspɛkt am, na dat mek i bin de bifo fɔ tɔk, ɛn i se “mek dɛn pul di [apɔsul dɛn] na do fɔ smɔl tɛm.” (Akt 5:​34) Gameliɛl tɛl dɛn bɔt sɔm grup dɛn we bin de trade, bɔt we dɛn lida dɛn day, dɛn nɔ yɛri bɔt dɛn igen. So i beg di kɔt fɔ peshɛnt ɛn tek tɛm du tin wit di apɔsul dɛn we dɛn Lida na Jizɔs we jɔs dɔn day. Gameliɛl bin tɔk di kayn we we go mek dɛn biliv am. I bin se: “Una nɔ put an pan dɛn man ya dɛn biznɛs, una lɛf dɛn. If dis plan ɔ wok na frɔm mɔtalman, i go stɔp, bɔt if na frɔm Gɔd, una nɔ go ebul fɔ stɔp dɛn. Ɛn i go bi se na Gɔd insɛf sɛf una go de fɛt.” (Akt 5:​38, 39) Di jɔj dɛn bin lisin to in advays. Bɔt stil, dɛn bin bit di apɔsul dɛn ɛn tɛl dɛn fɔ “lɛf fɔ tɔk bɔt Jizɔs in nem.”​—Akt 5:​40.

¹³ Tide bak, Jiova kin mek bigman dɛn lɛk Gameliɛl du sɔntin fɔ ɛp In pipul dɛn. (Prɔv. 21:​1) Jiova kin yuz in oli spirit fɔ mek pawaful rula dɛn, jɔj dɛn, ɔ pipul dɛn we de mek lɔ du sɔntin we gri wit wetin I want. (Nɛi. 2:​4-8) Bɔt if i alaw wi fɔ “sɔfa bikɔs [wi] de du wetin rayt,” wi shɔ bɔt tu tin dɛn. (1 Pit. 3:​14) Fɔs, Gɔd go gi wi di trɛnk we wi nid fɔ bia. (1 Kɔr. 10:​13) Sɛkɔn, di wan dɛn we de agens wi “nɔ go ebul fɔ stɔp” Gɔd in wok.​—Ayz. 54:​17.

14, 15. (a) Wetin di apɔsul dɛn bin du we dɛn bit dɛn? Wetin mek? (b) Tɔk bɔt wan ɛgzampul we de sho se Jiova in pipul dɛn de bia wit gladi-at.

¹⁴ Fɔ se di bit we dɛn bit di apɔsul dɛn bin mek dɛn at pwɛl ɔ mek dɛn nɔ gɛt zil igen? Nɔ, nɔto so i bi! Dɛn “kɔmɔt bifo di Sanɛndrin; dɛn bin de go ɛn gladi.” (Akt 5:​41) Dɛn bin de “gladi?” Wetin mek? Dɛn nɔ bin de gladi bikɔs ɔf di pen we dɛn bin de fil bikɔs dɛn bit dɛn. Dɛn bin de gladi bikɔs dɛn no se dɛn dɔn mek dɛn sɔfa bikɔs dɛn kɔntinyu fɔ de biɛn Jiova ɛn dɛn de fala Jizɔs in ɛgzampul.​—Mat. 5:​11, 12.

¹⁵ Lɛk wi brɔda dɛn we bin de insay di fɔstɛm Kristian dɛn tɛm, wi de bia wit gladi-at we wi de sɔfa bikɔs ɔf di gud nyuz. (1 Pit. 4:​12-14) Wi nɔ kin gladi we dɛn kin trɛtin wi, we dɛn kin mek wi sɔfa, ɔ we dɛn put wi na prizin. Bɔt wi kin rili gladi we wi kɔntinyu fɔ de biɛn Jiova. Fɔ ɛgzampul, lɛ wi tɔk bɔt Ɛnrik Dɔnik we bin bia we di gɔvmɛnt dɛn bin trit am bad fɔ lɔng tɛm. I bin tɔk se insay Ɔgɔst 1944, di wan dɛn we de na pawa bin disayd fɔ sɛn in ɛn in brɔda na wan kamp usay di gɔvmɛnt bin de kɛr dɛn prizina dɛn go. Di pipul dɛn we bin de mek dɛn sɔfa tɔk se: “Wi nɔ go ebul fɔ mek dɛn du ɛnitin. Di day we dɛn de day fɔ wetin dɛn biliv de mek dɛn gladi.” Brɔda Dɔnik bin ɛksplen se: “Pan ɔl we a nɔ  bin want fɔ day fɔ wetin a biliv, fɔ sɔfa wit kɔrej ɛn ɔnɔ bikɔs a de biɛn Jiova de mek a gladi.”​—Jems 1:​2-4.

16. Aw di apɔsul dɛn bin sho se dɛn dɔn mekɔp dɛn maynd fɔ prich gud gud wan? Aw wi go falamakata di we aw di apɔsul dɛn bin de prich?

¹⁶ Di apɔsul dɛn nɔ bin westɛm fɔ bigin fɔ prich bak. Dɛn kɔntinyu fɔ tich ɛn tɔk bɔt di gud nyuz bɔt Krays Jizɔs “ɛvride na di tɛmpul ɛn frɔm os to os” wit maynd. d (Akt 5:​42) Dɛn man dɛn ya we bin de prich wit zil bin mekɔp dɛn maynd fɔ prich gud gud wan. Dɛn bin de go prich to pipul dɛn na dɛn os dɛn, jɔs lɛk aw Jizɔs tɛl dɛn fɔ du. (Mat. 10:​7, 11-14) Wi nɔ gɛt wan dawt se na da we de dɛn bin yuz fɔ mek dɛn tichin de ɔlsay na Jerusɛlɛm. Tide, na da we de pipul dɛn no se Jiova Witnɛs dɛn de prich. We wi kin prich na ɔl di os dɛn na wi tɛritri, wi de sho klia wan se wisɛf want fɔ prich gud gud wan ɛn gi ɔlman di chans fɔ yɛri di gud nyuz. Yu tink se Jiova dɔn blɛs di prich we wi kin prich frɔm os to os? Yɛs, i dɔn du dat! Insay dis tɛm we di wɔl want fɔ dɔn, bɔku bɔku pipul dɛn dɔn lisin to di mɛsej we wi kin prich bɔt Gɔd in Kiŋdɔm, ɛn di fɔs tɛm we bɔku pan dɛn yɛri di gud nyuz na we Witnɛs dɛn go nak na dɛn domɔt.

17-19. Us prɔblɛm bin de na di kɔngrigeshɔn? Wetin di apɔsul dɛn bin du fɔ sɔlv am?

¹⁷ Di nyu kɔngrigeshɔn bin gɛt wan ɔda prɔblɛm we bin de ambɔg am. Na us prɔblɛm? Bɔku pan di disaypul dɛn we bin baptayz na pipul dɛn we bin kam na Jerusɛlɛm ɛn we bin want fɔ lan mɔ bifo dɛn go bak usay dɛn kɔmɔt. Di disaypul dɛn we bin de liv na Jerusɛlɛm bin gladi fɔ gi mɔni we dɛn go yuz fɔ bay it ɛn ɔda tin dɛn we di pipul dɛn go nid. (Akt 2:​44-46; 4:​34-37) Insay dis tɛm, sɔntin bin apin we di brɔda dɛn go nid fɔ tek tɛm wit. Di uman dɛn we dɛn man dɛn dɔn day we de tɔk Grik “nɔ bin de gɛt” pan “wetin dɛn bin de sheb ɛvride.” (Akt 6:​1) Bɔt, di uman dɛn we dɛn man dɛn dɔn day we de tɔk Ibru bin de gɛt pan wetin  dɛn bin de sheb. So di prɔblɛm na dat, dɛn bin de tek wan pɔsin bɛtɛ pas di ɔda pɔsin. Fɔ tek wan pɔsin bɛtɛ pas ɔda pɔsin kin izi fɔ mek wanwɔd nɔ de na di kɔngrigeshɔn.

¹⁸ Di apɔsul dɛn we na bin gɔvnin bɔdi fɔ di kɔngrigeshɔn dɛn bin kam fɔ si se i nɔ go mek sɛns fɔ lɛ dɛn “lɛf Gɔd in wɔd fɔ sheb it.” (Akt 6:​2) Fɔ sɔlv dis prɔblɛm, dɛn bin tɛl di disaypul dɛn fɔ fɛn sɛvin man dɛn “we rili gɛt oli spirit ɛn sɛns” we di apɔsul dɛn go pik fɔ du dis “impɔtant wok.” (Akt 6:​3) Dɛn bin nid man dɛn we kwalifay fɔ du dis wok bikɔs di wok nɔto fɔ jɔs sheb it nɔmɔ, bɔt i gɛt fɔ du bak wit fɔ ol mɔni, fɔ bay tin dɛn we dɛn nid, ɛn fɔ tek tɛm rayt ɔl wetin dɛn du. Ɔl di man dɛn we dɛn pik bin gɛt Grik nem dɛn, we sɔntɛm go dɔn mek di Grik uman dɛn we dɛn man dɛn dɔn day gladi. Afta di apɔsul dɛn bin dɔn pre ɛn tink gud wan bɔt di prɔblɛm, dɛn bin pik di sɛvin man dɛn fɔ kia fɔ dis “impɔtant wok.” e

¹⁹ Fɔ se di sheb we dɛn bin de sheb it min se dɛn sɛvin man dɛn ya we dɛn pik nɔ gɛt di wok igen fɔ prich di gud nyuz? Nɔ, nɔto so i bi! Wan pan di man dɛn we dɛn bin pik na Stivin, we go gɛt fɔ sho se i gɛt maynd ɛn du wɔndaful wok dɛn fɔ pipul dɛn. (Akt 6:​8-10) Filip insɛf na bin wan pan di sɛvin man dɛn, ɛn dɛn bin kɔl am “pɔsin we de prich di gud nyuz.” (Akt 21:​8) Fɔ tru, dɛn sɛvin man ya bin kɔntinyu fɔ prich di Kiŋdɔm mɛsej wit zil.

20. Aw Gɔd in pipul dɛn tide de sho se dɛn de fala di ɛgzampul we di apɔsul dɛn bin sɛt trade?

²⁰ Jiova in pipul dɛn tide de fala di sem ɛgzampul we di apɔsul dɛn bin sɛt. Man dɛn we dɛn go pik fɔ kia fɔ di kɔngrigeshɔn fɔ sho se dɛn  gɛt di sɛns we Gɔd de gi, ɛn dɛn fɔ sho klia wan se di spirit de wok pan dɛn. Di Gɔvnin Bɔdi de gi dayrɛkshɔn fɔ di man dɛn we dɛn de pik fɔ kia fɔ di kɔngrigeshɔn. So di wan dɛn we de du wetin di Baybul se fɔ pɔsin we want fɔ bi ovasia, dɛn go pik dɛn fɔ bi ɛlda ɔ ministerial savant na di kɔngrigeshɔn. f (1 Tim. 3:​1-9, 12, 13) Di wan dɛn we dɛn go pik bikɔs dɛn de du wetin di Skripchɔ se fɔ pɔsin we want fɔ bi ovasia, wi go se na di oil spirit dɔn pik dɛn. Dɛn man dɛn ya we de wok tranga wan de du “bɔku impɔtant” wok dɛn. Fɔ ɛgzampul, ɛlda dɛn kin ɔganayz sɔm wok dɛn we go ɛp di wan dɛn we dɔn ol fɔ gɛt di tin dɛn we dɛn nid. (Jems 1:​27) Sɔm ɛlda dɛn kin wok tranga wan fɔ bil Kiŋdɔm Ɔl dɛn, fɔ ɔganayz kɔnvɛnshɔn, ɛn fɔ wok na di Hospital Liaison Committee. Ministerial savant dɛn kin kia fɔ bɔku wok dɛn, bɔt nɔto dɛn de bifo fɔ shɛpad ɔ fɔ tich. Pan ɔl we dɛn man dɛn we dɛn pik gɛt bɔku wok fɔ du na di kɔngrigeshɔn ɛn di ɔganayzeshɔn, dɛn fɔ mek shɔ se dɛn stil gɛt tɛm fɔ prich di gud nyuz bɔt di Kiŋdɔm.​—1 Kɔr. 9:​16.

21, 22. Wetin sho se Jiova bin de blɛs di nyu kɔngrigeshɔn?

²¹ Wit Jiova in ɛp, di nyu kɔngrigeshɔn bin ebul fɔ bia we pipul dɛn bin de mek dɛn sɔfa, ɛn dɛn bin ebul fɔ sɔlv di prɔblɛm dɛn we dɛn bin de gɛt insay di kɔngrigeshɔn. Jiova bin rili de blɛs di kɔngrigeshɔn, na dat mek wi rid se: “Gɔd in wɔd kɔntinyu fɔ rich bɔku say dɛn ɛn di disaypul dɛn kɔntinyu fɔ bɔku na Jerusɛlɛm; ɛn bɔku bɔku prist dɛn bigin fɔ biliv.” (Akt 6:​7) Dis na jɔs wan pan di ripɔt dɛn we de sho se di wok de go bifo we di Baybul buk we nem Akt tɔk bɔt. (Akt 9:​31; 12:​24; 16:​5; 19:​20; 28:​31) Tide, wi kin gladi we wi yɛri fayn fayn ripɔt bɔt aw di prichin wok de go bifo na ɔda pat dɛn na di wɔl, nɔto so?

²² Insay di fɔstɛm Kristian dɛn tɛm, di bigman dɛn pan Gɔd biznɛs nɔ bin stɔp fɔ mek Gɔd in pipul dɛn sɔfa. Ɛn dɛn bin mek Gɔd in pipul dɛn sɔfa mɔ ɛn mɔ. I nɔ go te, Stivin go gɛt fɔ bi di tagɛt, as wi go si insay di nɛks chapta.