Wi Brɔda ɛn Sista dɛn we De Prich bɔt di Kiŋdɔm:

Imajin se yu na wan pan di apɔsul dɛn we tinap na Mawnt Ɔliv. Dɔn Jizɔs apia bifo yu. Ɛn jɔs bifo i go ɔp na ɛvin, i tɔk se: “Una go gɛt pawa we di oli spirit kam pan una, ɛn una go tɔk bɔt mi na Jerusɛlɛm, ɛn ɔlsay na Judia ɛn Sameria, ɛn na di say we fa pas ɔl na di wɔl.” (Akt 1:​8) Wetin yu go du?

Sɔntɛm yu go fil se da wok de nɔ go izi fɔ du. Yu go de wɔnda se, ‘Aw wi we na disaypul dɛn we nɔ bɔku go ebul fɔ prich “na di say we fa pas ɔl na di wɔl”?’ Sɔntɛm yu go mɛmba di wɔnin we Jizɔs bin gi di nɛt bifo i day we i tɔk se: “Slev nɔ pas in masta. If dɛn bin dɔn mek a sɔfa, dɛn go mek unasɛf sɔfa; if dɛn bin du wetin a tɛl dɛn, dɛn go du wetin unasɛf tɛl dɛn. Bɔt dɛn go du ɔl dɛn tin ya to una bikɔs ɔf mi nem, bikɔs dɛn nɔ no di Wan we sɛn mi.” (Jɔn 15:​20, 21) We yu de tink bɔt dɛn wɔd dɛn de, sɔntɛm yu go aks yusɛf dis kwɛstyɔn, ‘Aw a go ebul fɔ prich gud gud wan we pipul dɛn de agens wi ɛn dɛn de mek wi sɔfa?’

Tide, wi kin aks wisɛf dɛn sem kwɛstyɔn dɛn de. Wi wok as Jiova Witnɛs dɛn na fɔ prich gud gud wan “na di say we fa pas ɔl na di wɔl,” to pipul dɛn “na ɔl di neshɔn dɛn.” (Mat. 28:​19, 20) Aw wi go ebul fɔ du dis wok, mɔ we di Baybul bin dɔn tɔk se pipul dɛn go de agens wi?

Di akawnt we de na di Baybul buk we nem Akt tɛl wi intrɛstin tin dɛn bɔt aw di apɔsul dɛn ɛn dɛn brɔda ɛn sista dɛn we bin de insay di fɔstɛm Kristian dɛn tɛm bin ebul fɔ du dis wok bikɔs Jiova bin ɛp dɛn. Dɛn mek dis buk we yu de rid naw fɔ ɛp yu fɔ tek tɛm stɔdi da intrɛstin akawnt de ɛn gladi as yu de rid bɔt di fayn fayn tin dɛn we bin de apin da tɛm de. Yu go sɔprayz fɔ si aw di tin dɛn we Gɔd in savant dɛn we bin de insay di fɔstɛm Kristian dɛn tɛm bin de du fiba di tin dɛn we Gɔd in pipul dɛn de du tide. Yu go si se dɛn tin dɛn ya we wi fiba pan nɔto jɔs di wok we wi de du, bɔt i gɛt fɔ du bak wit di we aw wi ɔganayz fɔ du da wok de. We yu tink bɔt dɛn we ya aw wi fiba, i go mɔs mek yu biliv mɔ se Jiova Gɔd de kɔntinyu fɔ dayrɛkt di pat pan in ɔganayzeshɔn we de na dis wɔl.

Wi de op ɛn pre se as yu de tek tɛm stɔdi di Baybul buk we nem Akt, yu go gɛt mɔ kɔnfidɛns se Jiova go ɛp yu ɛn di pawa we in oli spirit de gi go mek yu ebul bia. So, lɛ dis buk ɛnkɔrej yu fɔ kɔntinyu fɔ “prich . . . gud gud wan” bɔt Gɔd in Kiŋdɔm ɛn ɛp ɔda pipul dɛn fɔ sev.​—Akt 28:​23; 1 Tim. 4:​16.