1-3. (a) Wetin bin apin to Stivin? Wetin i bin du? (b) Us kwɛstyɔn dɛn wi go tɔk bɔt?

 STIVIN tinap na kɔt. Na wan big ɔl, ɛn i go mɔs bi se na nia di tɛmpul na Jerusɛlɛm. Na 71 man dɛn bin de na di kɔt. Dis kɔt, we dɛn kɔl di Sanɛndrin, gɛda tide fɔ jɔj Stivin. Di jɔj dɛn na pawaful ɛn impɔtant man dɛn, ɛn bɔku pan dɛn nɔ gɛt wan rɛspɛkt fɔ Jizɔs dis in disaypul. Infakt, na Ay Prist Keyafas mek pipul dɛn gɛda na kɔt. Sɔm mɔnt bifo dis tɛm, na dis sem man bin de oba di Sanɛndrin we se Jizɔs Krays fɔ day. Yu tink se Stivin de fred?

² Sɔntin bin rili difrɛn bɔt Stivin in fes dis patikyula tɛm. Di jɔj dɛn wach am ɛn si se in fes “tan lɛk enjɛl fes.” (Akt 6:​15) Enjɛl dɛn kin kɛr go Jiova Gɔd in mɛsej, so dɛn kin pisful ɛn nɔ gɛt rizin fɔ fred. Na so Stivin bin de, ivin di jɔj dɛn we bin rili et am kin si dat pan am. Wetin mek Stivin in at bin kol?

³ Kristian dɛn tide kin lan bɔku tin frɔm di ansa to da kwɛstyɔn de. Wi nid fɔ no bak wetin mek dis de apin to Stivin. Bifo dis tɛm, aw i bin tinap tranga wan fɔ tɔk bɔt wetin i biliv? Ɛn us we dɛn wi kin falamakata am?

4, 5. (a) Wetin mek Stivin bin rili impɔtant to di kɔngrigeshɔn? (b) Us we dɛn Stivin bin sho se i rili gɛt “Gɔd in gudnɛs ɛn pawa”?

⁴ Wi bin dɔn lan se Stivin bin rili impɔtant to di nyu Kristian kɔngrigeshɔn we dɛn bin jɔs dɔn mek. Insay di chapta bifo dis wan, wi bin lan se Stivin na wan pan di sɛvin ɔmbul man dɛn we bin rɛdi fɔ ɛp di apɔsul dɛn di tɛm we dɛn bin aks am fɔ ɛp. Wi go kɔle di we aw dis man ɔmbul mɔ we wi tink bɔt di bɔku bɔku tin dɛn we Gɔd bin mek i ebul fɔ du. Na Akt 6:​8, wi lan se Gɔd bin mek i ebul fɔ pafɔm “sayn dɛn ɛn du wɔndaful tin dɛn” jɔs lɛk sɔm pan di apɔsul dɛn. Wi lan bak se “Gɔd in gudnɛs ɛn pawa” bin rili de pan am. Wetin dat min?

⁵ I go mɔs bi se Stivin bin gud, ɛn i bin de tek tɛm du tin, ɛn dat bin  de mek am izi fɔ lɛ pipul dɛn de wit am. I bin de tɔk di kayn we we bin de mek di wan dɛn we de lisin to am biliv se na frɔm in at i de tɔk, ɛn di tin dɛn we i bin de tich dɛn go bɛnifit dɛn. I bin rili gɛt pawa bikɔs Jiova in spirit bin de wok pan am, ɛn i bin de put insɛf dɔŋ ɛn alaw Jiova in spirit fɔ lid am. I nɔ bin de mek prawd bikɔs ɔf di tin dɛn we i ebul du. Bifo dat, i bin de gi ɔl di prez to Jiova ɛn sho se i rili bisin bɔt di pipul dɛn we i bin de tɔk to. No wɔnda we di wan dɛn we bin de agens am bin si am as pɔsin we go kɔz prɔblɛm fɔ dɛn.

6-8. (a) Us tu tin dɛn di wan dɛn we bin de agens Stivin bin tɔk se i du? Wetin mek? (b) Wetin mek Stivin in ɛgzampul impɔtant fɔ Kristian dɛn tide?

⁶ Difrɛn difrɛn man dɛn kam fɔ agyu wit Stivin, bɔt “dɛn nɔ bin ebul fɔ win am pan di agyumɛnt, bikɔs i bin de tɔk wit sɛns, ɛn i bin gɛt oli spirit.” a Dɛn at bin pwɛl, so “dɛn go tɔk to sɔm man dɛn na kɔna” fɔ tɔk lay lay tin dɛn agens dis inosɛnt man we de fala Krays. Dɔn bak “dɛn mek di pipul dɛn,” di lida dɛn, ɛn di Lɔ ticha dɛn vɛks, so dɛn tek Stivin bay fos ɛn kɛr am go bifo di Sanɛndrin. (Akt 6:​9-12) Di wan dɛn we bin de agens am bin se i du tu bad tin dɛn. Dɛn se: I tɔk bad bɔt Gɔd ɛn Mozis. Us we dɛn, dɛn bin se i du dat?

⁷ Dɛn layman dɛn ya bin se Stivin bin tɔk bad bɔt Gɔd we i tɔk agens “dis oli ples,” dat na di tɛmpul na Jerusɛlɛm. (Akt 6:​13) Dɛn bin tɔk bak se i tɔk bad bɔt Mozis we i tɔk agens di Lɔ we Gɔd Bin Gi Mozis ɛn tray fɔ chenj di tradishɔn dɛn we Mozis bin dɔn gi dɛn. Dis na bin siriɔs kes bikɔs di Ju dɛn, dɛn tɛm dɛn de bin de rili rɛspɛkt di tɛmpul, di tin dɛn we de insay di Lɔ we Gɔd Bin Gi Mozis, ɛn di bɔku ɔda tradishɔn dɛn we dɛn bin dɔn ad to di Lɔ. Dis tin we dɛn tɔk agens Stivin min se in na bad man we fit fɔ day!

⁸ I sɔri fɔ no se na kɔmɔn tin fɔ lɛ pipul dɛn na rilijɔn yuz dis kayn trik fɔ briŋ trɔbul pan Gɔd in savant dɛn. Tide, pipul dɛn we de na ɔda rilijɔn dɛn we de agens Jiova Witnɛs dɛn kin put wɔd na di bigman dɛn na gɔvmɛnt dɛn yes fɔ mek wi sɔfa. Wetin wi go du we pipul dɛn tɔk lay lay tin dɛn bɔt wi? Wi kin lan bɔku tin frɔm Stivin.

9, 10. Wetin pipul dɛn we de tɔk agens di Baybul bin tɔk bɔt di tin dɛn we Stivin tɔk we i tinap bifo di Sanɛndrin? Wetin wi nid fɔ mɛmba?

⁹ As wi bin dɔn tɔk na di biginin, Stivin nɔ bin wɔri. Bifo dat, in fes bin fiba lɛk enjɛl in fes as i bin de lisin to di bad tin we dɛn bin se i du.  Na de Keyafas tɔn to am ɛn aks am se: “Na so i bi?” (Akt 7:​1) Na bin Stivin in tɔn fɔ tɔk. Ɛn na dat i bin du!

¹⁰ Sɔm pipul dɛn we de tɔk agens di Baybul bin se Stivin nɔ bin ivin ansa di kes we dɛn bin chaj agens am, pan ɔl we di tin we i tɔk bin lɔng. Fɔ tru, Stivin bin sɛt fayn ɛgzampul fɔ wi we i kam to aw fɔ “rɛdi ɔltɛm fɔ ansa” pipul dɛn we de tɔk agens di gud nyuz. (1 Pit. 3:​15) Mɛmba se dɛn bin tɔk se Stivin bin de tɔk bad bɔt Gɔd bay we i de tɔk bad bɔt di tɛmpul, ɛn i bin de tɔk bad bɔt Mozis bay we i de tɔk agens di Lɔ. Stivin bin ansa dɛn bay we i tɔk bɔt tri tin dɛn na di Izrɛlayt dɛn istri. Ɛn i tek in tɛm fɔ tɔk bɔt sɔm pɔynt dɛn. Lɛ wi tɔk bɔt dɛn tri tɛm dɛn ya insay di Izrɛlayt dɛn istri wan bay wan.

11, 12. (a) Aw Stivin bin yuz Ebraam in ɛgzampul fayn fayn wan? (b) Wetin mek Stivin bin tɔk bɔt Josɛf?

¹¹ Di Izrɛlayt dɛn gret granpa dɛn tɛm. (Akt 7:​1-16) Stivin bin stat fɔ tɔk bɔt Ebraam, we di Ju dɛn bin rɛspɛkt fɔ di fet we i bin gɛt. We i bin de tɔk bɔt dis impɔtant tin we dɛn gri wit, Stivin bin tɔk se Jiova we na “di Gɔd we gɛt glori” bin sho insɛf to Ebraam na Mɛsopotemia. (Akt 7:​2) Infakt, da man de na bin fɔrina na di Prɔmis Land. Ebraam nɔ bin gɛt tɛmpul ɔ di Lɔ we Gɔd Bin Gi Mozis. Wetin mek ɛnibɔdi go pin se fɔ fetful to Gɔd yu nid fɔ gɛt tɛmpul ɔ lɔ dɛn?

¹² Dɔn bak, Josɛf we bin kɔmɔt na Ebraam in famili layn na bin sɔmbɔdi we di wan dɛn we Stivin bin de tɔk to bin rili rɛspɛkt. Stivin bin mɛmba dɛn se na Josɛf in yon brɔda dɛn, dat na, di papa dɛn fɔ di trayb dɛn na Izrɛl bin mek da man de we de du wetin rayt sɔfa ɛn sɛl am as slev. Pan ɔl dat, in na bin di wan we Gɔd bin yuz fɔ sev Izrɛl di tɛm we tin fɔ it bin shɔtin. Wan dawt nɔ de se Stivin bin si klia wan aw Josɛf ɛn Jizɔs Krays bin fiba, bɔt i nɔ bin tɔk bɔt dat so dat di wan dɛn we i de tɔk to go kɔntinyu fɔ lisin to am fɔ lɔng tɛm.

13. Aw di tin dɛn we Stivin bin tɔk bɔt Mozis sho se wetin dɛn bin tɔk agens am nɔto tru? Us impɔtant pɔynt dis bin ɛp dɛn fɔ si?

¹³ Mozis in tɛm. (Akt 7:​17-43) Stivin bin tɔk bɔku tin bɔt Mozis, ɛn i mek sɛns we i du so, bikɔs bɔku pan di pipul dɛn na di Sanɛndrin na bin Sadyusi dɛn, we nɔ bin  gri fɔ biliv ɔl di ɔda buk dɛn na di Baybul pas di wan dɛn we Mozis bin rayt. Mɛmba se dɛn bin tɔk bak se Stivin bin tɔk bad bɔt Mozis. Di tin dɛn we Stivin tɔk bin sho klia wan se dat nɔto tru. Bikɔs i sho se i rili rɛspɛkt Mozis ɛn di Lɔ. (Akt 7:​38) I mek dɛn no se di wan dɛn we Mozis bin want fɔ sev nɔ bin lɛk am. Dɛn sho se dɛn nɔ bin want am we i bin ol 40 ia. Fɔti ia afta dat, dɛn bin de sho bɔku tɛm se dɛn nɔ want lɛ Mozis lid dɛn. b Smɔl smɔl, Stivin bin de briŋ kam wan impɔtant pɔynt, dat na fɔ sho se: Gɔd in pipul dɛn bin dɔn de sho se dɛn nɔ want di wan dɛn we Jiova bin de pik fɔ lid dɛn.

14. Us pɔynt dɛn Stivin bin mek we i yuz Mozis in ɛgzampul?

¹⁴ Stivin bin mɛmba di wan dɛn we i bin de tɔk to se Mozis bin dɔn tɔk se wan prɔfɛt we tan lɛk Mozis gɛt fɔ kam frɔm Izrɛl. Udat i go bi ɛn aw pipul dɛn go tek am? Stivin ansa dɛn kwɛstyɔn dɛn ya di tɛm we i dɔn fɔ tɔk. I mek wan ɔda impɔtant pɔynt: Mozis bin lan se ɛni grɔn kin bi oli grɔn, lɛk di grɔn usay di tik bin de bɔn, usay Jiova bin tɔk to am. So fɔ se na wan patikyula bildin nɔmɔ pɔsin fɔ wɔship Jiova, lɛk di tɛmpul na Jerusɛlɛm? Lɛ wi si.

15, 16. (a) Wetin mek i impɔtant we Stivin tɔk bɔt di tabanakul? (b) Wetin Stivin bin tɔk bɔt Sɔlɔmɔn in tɛmpul?

¹⁵ Di tabanakul ɛn di tɛmpul. (Akt 7:​44-50) Stivin mɛmba di pipul dɛn na di Sanɛndrin se bifo di Izrɛlayt dɛn bil tɛmpul na Jerusɛlɛm, Gɔd bin tɛl Mozis fɔ mek wan tabanakul usay dɛn go wɔship am. Dat na, sɔntin we bin tan lɛk tɛnt we dɛn bin de go wit ɛnisay dɛn go. Udat go gɛt di maynd fɔ tɔk se di tɛmpul bɛtɛ pas di tabanakul, we i bi se Mozis insɛf sɛf bin wɔship de?

¹⁶ Leta, we Sɔlɔmɔn bin bil di tɛmpul na Jerusɛlɛm, Gɔd in spirit bin dayrɛkt am fɔ tɔk bɔt wan impɔtant lɛsin na in prea. Stivin tɔk se: “Di Wan we De Pantap Ɔlman nɔ de liv na os we dɛn mek wit an.” (Akt 7:​48; 2 Kro. 6:​18) Jiova kin yuz di tɛmpul fɔ mek wetin i want bi, bɔt dat nɔ min se na in nɔmɔ i de yuz. So wetin mek di wan dɛn we de wɔship am fɔ fil se di wangren tru we we dɛn go wɔship am na we dɛn du am insay bildin we mɔtalman mek? Stivin bin dɔn in tɔk fayn we bay we i tɔk wetin Ayzaya bin tɔk. I se: “Jiova se ɛvin na mi tron ɛn di wɔl na di say we a de put mi fut. Uskayn os una go bil fɔ mi? Ɔ we di say fɔ lɛ a rɛst? Nɔto mi an a tek mek ɔl dɛn tin ya?”​—Akt 7:​49, 50; Ayz. 66:​1, 2.

17. Aw di tin dɛn we Stivin bin tɔk (a) sho se di wan dɛn we bin de lisin to am nɔ bin de tink di rayt we ɛn (b) sho se di tin dɛn we dɛn bin tɔk agens am nɔto tru?

¹⁷ As yu de tink bɔt wetin Stivin bin se to di Sanɛndrin, yu nɔ gri se i bin tek tɛm tɛl di wan dɛn we de agens am se dɛn nɔ de tink di rayt we? I bin sho se Jiova nɔ strikt, i nɔ de fala tradishɔn, ɛn as tɛm de go,  i kin ajɔst so dat wetin i want go apin. Di wan dɛn we tek di tɛmpul na Jerusɛlɛm ɛn di tradishɔn dɛn we dɛn bin mek fɔ di Lɔ we Gɔd Bin Gi Mozis as sɔntin we rili impɔtant nɔ bin ebul fɔ ɔndastand di rizin we mek Gɔd bin gi dɛn di Lɔ ɛn di tɛmpul. Frɔm wetin Stivin bin tɔk, i bin tan lɛk se i de aks wan impɔtant kwɛstyɔn we na: Una nɔ tink se fɔ obe Jiova na di bɛst we dat fɔ ɔnɔ di Lɔ ɛn di tɛmpul? Fɔ tru, di tin dɛn we Stivin bin tɔk de sho klia wan se na di rayt tin i bin de du bikɔs i bin de obe Jiova di bɛst we we i ebul.

18. Us we dɛn wi fɔ tray fɔ falamakata Stivin?

¹⁸ Wetin wi kin lan frɔm di tin dɛn we Stivin bin tɔk bɔt? I bin no di Skripchɔ dɛn gud gud wan. Semweso, wi nid fɔ stɔdi Gɔd in Wɔd gud gud wan so dat wi go ebul yuz “Gɔd in wɔd we na trut di rayt we.” (2 Tim. 2:​15) Wisɛf kin lan bɔt gudnɛs ɛn aw fɔ tek tɛm tɔk frɔm Stivin in ɛgzampul. Di wan dɛn we i bin de tɔk to bin rili vɛks, bɔt i bin ebul fɔ tɔk to dɛn fɔ sɔm tɛm. I bin tɔk to dɛn bɔt tin dɛn we dɛn ɔl gri wit, dat na tin dɛn we dɛn man dɛn ya bin rili biliv. Dɔn, i bin tɔk to di bigman dɛn wit rɛspɛkt bay we i kɔl dɛn “papa dɛn.” (Akt 7:​2) We wisɛf de tɔk bɔt di tru tin dɛn na Gɔd in Wɔd, wi “fɔ tek tɛm du am ɛn sho se [wi] gɛt dip rɛspɛkt.”​—1 Pit. 3:​15.

19. Aw Stivin bin sho se i gɛt maynd we i tɔk bɔt Jiova in jɔjmɛnt mɛsej to di Sanɛndrin?

¹⁹ Bɔt, wi nɔ de fred fɔ tɛl pipul dɛn di tru tin dɛn we de na Gɔd in Wɔd ɔ fred se wetin wi go tɔk go ɔfɛn dɛn, ɛn wi nɔ de twis Jiova in jɔjmɛnt mɛsej. Stivin na gud ɛgzampul we i kam to dis. Wan dawt nɔ de se ɔl di tru tin dɛn we Stivin bin ɛksplen klia wan to di Sanɛndrin nɔ bin mek dɛn wikɛd jɔj dɛn ya chenj. So di oli spirit bin muv am fɔ tɔk wit maynd ɛn sho dɛn klia wan se dɛn jɔs tan lɛk dɛn fɔstɛm papa dɛn we nɔ bin gri fɔ waka di we aw Josɛf, Mozis, ɛn ɔl di ɔda prɔfɛt dɛn waka. (Akt 7:​51-53) Infakt, na dɛn sem jɔj dɛn ya na di Sanɛndrin bin kil di Mɛsaya we Mozis ɛn ɔl di ɔda prɔfɛt dɛn bin dɔn tɔk bɔt in kam wan. Fɔ tru, dɛn bin pwɛl di Lɔ we Gɔd Bin gi Mozis bad bad wan!

20, 21. Wetin di Sanɛndrin bin du we dɛn yɛri wetin Stivin tɔk? Aw Jiova bin kɔrej am?

²⁰ Di tru tin dɛn we Stivin bin tɔk bin mek di jɔj dɛn rili vɛks. Dis bin mek dɛn nɔ bin biev fayn ɛn dɛn bigin gren dɛn tit pan Stivin. Dis fetful man kin si se dɛn nɔ go sɔri fɔ am, jɔs lɛk aw dɛn nɔ bin sɔri fɔ in Masta we na Jizɔs.

²¹ Stivin bin nid maynd fɔ bia di tin dɛn we gɛt fɔ apin to am, ɛn wan dawt nɔ de se di vishɔn we Jiova bin mek i si bin rili ɛnkɔrej am. Stivin bin si Gɔd in glori, ɛn i si Jizɔs tinap na Jiova in rayt an. We Stivin bin de tɔk bɔt di vishɔn, in jɔj dɛn bin kɔba dɛn yes wit dɛn an. Wetin mek?  Bikɔs bifo dis tɛm, Jizɔs bin dɔn tɛl dis sem kɔt se in na di Mɛsaya, ɛn i nɔ go te igen, i go sidɔm na in Papa in rayt an. (Mak 14:​62) Di vishɔn we Stivin bin si pruv se wetin Jizɔs bin tɔk na tru. Infakt, di Sanɛndrin bin tɔn agens di Mɛsaya ɛn kil am. Dɛn ɔl grap di sem tɛm ɛn du sɔntin kwik kwik wan fɔ mek dɛn ston Stivin te i day. c

22, 23. Aw di day we Stivin bin day tan lɛk di we aw in Masta bin day? Aw Kristian dɛn tide kin gɛt di sem kɔnfidɛns we Stivin bin gɛt?

²² Stivin bin day di sem we aw in Masta bin day. In at bin kol, i bin rili abop pan Jiova, ɛn i fɔgiv di wan dɛn we kil am. I se, “Masta Jizɔs, tek mi spirit.” Sɔntɛm i bin tɔk dis bikɔs i bin stil de si mɔtalman Pikin wit Jiova na di vishɔn. Wan dawt nɔ de se Stivin bin no di wɔd dɛn we Jizɔs bin tɔk we i se: “Na mi de gi layf bak ɛn na mi na di layf.” (Jɔn 11:​25) Dɔn Stivin bin pre lawd wan to Gɔd insɛf sɛf, ɛn i tɔk se: “Jiova nɔ pɔnish dɛn fɔ dis sin.” Afta i tɔk dɛn wɔd dɛn ya, i day.​—Akt 7:​59, 60.

²³ Stivin na di fɔs pɔsin pan di wan dɛn we de fala Krays we dɛn kil bikɔs ɔf wetin i bin biliv. (Luk di bɔks we gɛt di taytul “ Stivin Bin Day Bikɔs I Bin De Tɔk bɔt Jizɔs”) I sɔri fɔ no se nɔto in go bi di las wan. Te to wi yon tɛm, pipul dɛn we rili gɛt zil fɔ dɛn rilijɔn, pipul dɛn we gɛt zil fɔ pɔlitiks, ɛn ɔda wikɛd wan dɛn we de agens wi dɔn kil sɔm pan Jiova in fetful savant dɛn. Pan ɔl dat, wisɛf gɛt rizin fɔ gɛt di sem kɔnfidɛns we Stivin bin gɛt. Jizɔs de rul as Kiŋ rayt naw ɛn in Papa dɔn gi am bɔku bɔku pawa. Natin nɔ go ebul fɔ stɔp am fɔ mek i nɔ gi layf bak to di wan dɛn we de fala am fetful wan.​—Jɔn 5:​28, 29.

24. Aw Sɔl bin ɛp fɔ kil Stivin fɔ wetin i biliv? Wetin-ɛn-wetin bin apin leta bikɔs ɔf di day we dis fetful man bin day?

²⁴ Wan yɔŋman we nem Sɔl bin si we ɔl dis bin apin. I bin gri fɔ lɛ dɛn kil Stivin, ɛn i bin ivin wach di wan dɛn we ston am dɛn klos dɛn. Shɔt tɛm afta dis, i bin de bifo fɔ mek di wan dɛn we de fala Krays rili sɔfa. Bɔt di day we Stivin day bin mek sɔntin gud apin fɔ lɔng tɛm. In ɛgzampul bin ɛp ɔda Kristian dɛn fɔ kɔntinyu fɔ fetful ɛn du di sem tin we pipul dɛn mek dɛn sɔfa. Sɔl we bin leta kam fɔ bi Pɔl go dɔn rili rigrɛt bikɔs i bin jɔyn fɔ kil Stivin. (Akt 22:​20) I bin ɛp fɔ kil Stivin, bɔt i bin leta kam fɔ tɔk se: “A bin de tɔk bad bɔt Gɔd, a bin de mek pipul dɛn sɔfa, ɛn a bin de mek lɛk se a bɛtɛ pas ɔda pipul dɛn.” (1 Tim. 1:​13) Fɔ tru, Pɔl nɔ bin ɛva fɔgɛt Stivin ɛn di pawaful tin dɛn we i bin tɔk da de de. Infakt, sɔm pan di tin dɛn we Pɔl bin tɔk ɛn rayt kɔmɔt frɔm wetin Stivin bin tɔk. (Akt 7:​48; 17:​24; Ibru. 9:​24) Leta, Pɔl bin rili kam fɔ lan aw fɔ fala di kayn fet ɛn maynd we Stivin, we na man we bin rili gɛt “Gɔd in gudnɛs ɛn pawa” bin gɛt. Di kwɛstyɔn naw na, Wisɛf go ebul fala in ɛgzampul?