1-3. Us vishɔn Pita bin gɛt? Wetin mek wi nid fɔ no wetin mek da vishɔn de impɔtant?

 DI IA na 36 afta Krays. Di san bin de wam Pita we i bin de pre pantap wan os in ruf nia di si na Jɔpa usay bot dɛn kin slam. I dɔn bi strenja na dis os fɔ sɔm tɛm naw. Di tap we i tap na dis os sho se i nɔ de tek wan pɔsin bɛtɛ pas ɔda pɔsin. Di pɔsin we bin gɛt di os na in nem Saymɔn, ɛn na pɔsin we bin de wok wit animal kanda; nɔto ɔl Ju go lɛk fɔ tap wit dɛn kayn man ya. a Bɔt Pita gɛt fɔ kam lan wan impɔtant lɛsin bɔt di pik-ɛn-chuz we Jiova nɔ de pik-ɛn-chuz.

² We Pita bin de pre, i si wan vishɔn. Wetin i si na di vishɔn go mek ɛni Ju nɔ fil fayn. I si wan flat kɔntena de kɔmɔt ɔp ɛvin ɛn i bin gɛt animal dɛn we nɔ klin akɔdin to di Lɔ. We dɛn tɛl Pita fɔ kil ɛn it di animal dɛn, i tɔk se: “A nɔ wande it ɛnitin we nɔ klin ɛn we pɔsin nɔ fit fɔ it.” Nɔto wan tɛm, bɔt na tri tɛm dɛn tɛl am se: “Lɛf fɔ se di tin dɛn we Gɔd dɔn klin dɔti.” (Akt 10:​14-16) Di vishɔn bin mek Pita kɔnfyuz bɔt nɔto fɔ lɔng tɛm.

³ Wetin Pita in vishɔn min? We wi kam fɔ no aw dis vishɔn impɔtant, dat go ɛp wi fɔ rili no aw Jiova de si pipul dɛn. As tru Kristian dɛn, wi nɔ go ebul fɔ prich gud gud wan bɔt Gɔd in Kiŋdɔm pas wi lan fɔ si pipul dɛn di we aw Gɔd de si dɛn. Fɔ mek wi no wetin Pita in vishɔn min, lɛ wi tɔk bɔt di tin dɛn we bin apin da tɛm de.

4, 5. Udat na bin Kɔnilyɔs? Wetin bin apin we i bin de pre?

⁴ Pita nɔ bin no se afta da de de na Sizeria, wan man we nem Kɔnilyɔs we bin de lɛk 30 mayl nɔt, bin gɛt wan vishɔn. Kɔnilyɔs na man we  bin de oba di Roman ami, ɛn i bin “ol Gɔd biznɛs wit tu an.” b Dɔn bak, in na man we bin de mek shɔ se in famili gɛt wetin dɛn nid ɛn in ɛn ɔlman na in os “bin de fred Gɔd.” Kɔnilyɔs nɔ bin jɔyn di Ju rilijɔn, ɛn in na bin Jɛntayl we nɔ sakɔmsayz. Pan ɔl dat, i bin de sho sɔri-at to Ju dɛn we nɔ gɛt ɛn i bin de gi dɛn wetin dɛn nid. Dis ɔnɛs man ya bin de “rili beg Gɔd ɔltɛm.”​—Akt 10:​2.

⁵ Arawnd tri oklɔk santɛm, Kɔnilyɔs bin de pre we i si wan vishɔn usay wan enjɛl tɛl am se: “Gɔd dɔn notis di prea we yu de pre ɛn di gift dɛn we yu de gi to po pipul dɛn, ɛn i de mɛmba dat.” (Akt 10:​4) Jɔs lɛk aw di enjɛl bin dayrɛkt Kɔnilyɔs, Kɔnilyɔs bin sɛn man dɛn fɔ go kɔl apɔsul Pita. Kɔnilyɔs na bin Jɛntayl we nɔ sakɔmsayz ɛn sɔntin bin gɛt fɔ apin to am we nɔ ɛva apin to am yet. I bin gɛt fɔ kam yɛri gud nyuz we go mek i sev.

6, 7. (a) Tɔk bɔt wan ɛkspiriɛns we sho se Gɔd kin ansa pipul dɛn we ɔnɛs dɛn prea ɛn we want fɔ no di tru tin bɔt am. (b) Wetin wi go se bɔt dɛn kayn ɛkspiriɛns dɛn de?

⁶ Gɔd kin ansa di prea we ɔnɛs pipul dɛn kin pre tide we want fɔ no di tru tin bɔt am? Lɛ wi tɔk bɔt wan ɛkspiriɛns: Wan uman we de na Albenia bin gri fɔ tek wan Wachtawa we tɔk bɔt aw fɔ mɛn pikin dɛn. c I bin tɛl di sista we go fɛn am se: “Yu biliv se a dɔn de pre to Gɔd fɔ mek i ɛp mi fɔ mɛn mi galpikin dɛn? Na in sɛn yu! Na jɔs wetin a bin want fɔ yɛri yu tɛl mi!” Di uman ɛn in galpikin dɛn bigin fɔ stɔdi ɛn leta in man sɛf jɔyn di stɔdi.

⁷ Fɔ se na dis wan ɛgzampul nɔmɔ wi gɛt? Nɔ! Dis sem kayn ɛkspiriɛns dɔn apin bɔku tɛm ɔlsay na di wɔl, so wi nɔ go se i jɔs apin bay chans. Wetin wi go se naw? Fɔs, Jiova kin ansa di prea we pipul dɛn we ɔnɛs kin pre to am ɛn we want fɔ  lan bɔt am. (1 Kiŋ 8:​41-43; Sam 65:​2) Sɛkɔn, di enjɛl dɛn de sɔpɔt wi prichin wok.​—Rɛv. 14:​6, 7.

8, 9. Wetin di oli spirit bin mek Pita no? Wetin Pita bin du?

⁸ Pita bin stil de pantap di ruf ɛn i “bin kɔnfyuz” bɔt wetin di vishɔn min we di mɛsenja dɛn we Kɔnilyɔs bin sɛn kam na di os. (Akt 10:​17) Fɔ se Pita we bin dɔn tɔk tri tɛm se i nɔ go it fud we dɔti akɔdin to di Lɔ, go gri fɔ go wit dɛn man dɛn ya ɛn ɛnta na os usay Jɛntayl de? Gɔd bin yuz in oli spirit fɔ mek Pita no wetin I want am fɔ du. I tɛl Pita se: “Luk! Tri man dɛn de aks fɔ yu. So grap, go dɔŋ ɛn go wit dɛn, nɔ dawt atɔl, bikɔs na mi sɛn dɛn.” (Akt 10:​19, 20) Di vishɔn we Pita bin si bɔt di flat kɔntena mek i rɛdi fɔ obe di oli spirit in dayrɛkshɔn.

⁹ We Pita bin kam fɔ no se na di oli spirit mek Kɔnilyɔs sɛn di Jɛntayl mɛsenja dɛn fɔ kɔl am, i bin mek dɛn kam insay in os “ɛn de wit am as strenja dɛn.” (Akt 10:​23a) Dis apɔsul we bin de obe bin ajɔst di we aw i de tink we i kam fɔ lan bɔt wetin Gɔd want.

10. Aw Jiova de dayrɛkt wi? Us kwɛstyɔn dɛn wi nid fɔ aks wisɛf?

¹⁰ Te to dis wi yon tɛm, Jiova de dayrɛkt in pipul dɛn smɔl smɔl. (Prɔv. 4:​18) I de yuz in oli spirit fɔ gayd di “slev we fetful ɛn gɛt sɛns.” (Mat. 24:​45) Sɔntɛnde, dɛn kin chenj di we aw wi ɔndastand Gɔd in Wɔd ɔ chenj di we aw di ɔganayzeshɔn de du patikyula tin dɛn. So wi fɔ aks wisɛf: ‘Wetin a kin du we dɛn mek dɛn chenj dɛn ya? A kin obe di dayrɛkshɔn we Gɔd in spirit de gi wi pan dɛn tin ya?’

11, 12. Wetin Pita bin du we i kam na Sizeria? Wetin i bin lan?

¹¹ Di de afta Pita si in vishɔn, in ɛn nayn ɔda pipul dɛn, dat na, di tri mɛsenja dɛn we Kɔnilyɔs bin sɛn ɛn “siks [Ju] brɔda dɛn” we kɔmɔt Jɔpa bin go na Sizeria. (Akt 11:​12) Bikɔs Kɔnilyɔs bin de wet fɔ Pita, i gɛda “in fambul dɛn ɛn tayt padi dɛn.” (Akt 10:​24) We Pita rich, i du sɔntin we i nɔ bin tink se i go ɛva du. I ɛnta wan Jɛntayl we nɔ sakɔmsayz in os. Pita bin tɛl dɛn se: “Una no gud gud wan se di Ju Lɔ se Ju nɔ fɔ miks wit ɔda pipul dɛn ɔ kam to dɛn, bɔt Gɔd dɔn sho mi se a nɔ fɔ tɔk se pɔsin nɔ oli ɔ i nɔ klin.” (Akt 10:​28) Na naw Pita dɔn ɔndastand di lɛsin we di vishɔn we i gɛt de tich. Di vishɔn nɔ jɔs gɛt fɔ du wit di difrɛn kayn tin dɛn we pɔsin fɔ it. I nɔ fɔ tɔk se “pɔsin [ilɛk na Jɛntayl] nɔ oli ɔ i nɔ klin.”

¹² Ɔlman we bin gɛda bin want fɔ no wetin Pita gɛt fɔ se. Kɔnilyɔs bin tɔk se: “Wi ɔl dɔn gɛda bifo Gɔd fɔ yɛri ɔl di tin dɛn we Jiova dɔn tɛl yu fɔ tɔk.” (Akt 10:​33) Imajin aw yu go fil if yu yɛri dɛn kayn wɔd ya frɔm  pɔsin we want fɔ lan bɔt Jiova! Pita bigin fɔ tɔk wit dɛn pawaful wɔd ya: “Na naw a rili ɔndastand se Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.” (Akt 10:​34, 35) Pita bin lan se di we aw Gɔd de si pipul dɛn nɔ gɛt natin fɔ du wit dɛn kɔlɔ, usay dɛn kɔmɔt, ɔ ɛni ɔda tin. Pita bin kɔntinyu fɔ tɔk bɔt Jizɔs in prichin wok, di day we i day, ɛn we i gɛt layf bak.

13, 14. (a) Wetin impɔtant bɔt di chenj we Kɔnilyɔs ɛn ɔda Jɛntayl dɛn chenj insay di ia 36 afta Krays? (b) Wetin mek wi nɔ fɔ jɔj pipul dɛn bikɔs ɔf aw dɛn tan?

¹³ Naw sɔntin we nɔbɔdi nɔ si yet bin apin: “We Pita bin stil de tɔk,” na de di oli spirit kam pan pipul dɛn we de “na ɔda neshɔn” dɛn. (Akt 10:​44, 45) Na dis wangren say di Skripchɔ tɔk se Gɔd in spirit kam pan pipul dɛn bifo dɛn baptayz. Dis tin we bin apin sho se Gɔd gladi fɔ dɛn, na dat mek Pita “tɛl dɛn [dat na di Jɛntayl dɛn] fɔ mek dɛn baptayz.” (Akt 10:​48) Di chenj we di Jɛntayl dɛn chenj insay di ia 36 afta Krays sho se di tɛm we di Ju dɛn na bin spɛshal pipul dɛn dɔn dɔn. (Dan. 9:​24-27) Dis tɛm we Pita bin de bifo fɔ prich, i bin yuz di tɔd ɛn las “ki dɛn fɔ di Kiŋdɔm.” (Mat. 16:​19) Dis ki bin gi chans to Jɛntayl dɛn we nɔ sakɔmsayz fɔ bi spirit anɔyntɛd Kristian dɛn.

¹⁴ As pipul dɛn we de prich bɔt di Kiŋdɔm tide, wi no se “Gɔd nɔ de tek wan pɔsin bɛtɛ pas ɔda pɔsin.” (Rom. 2:​11) I want mek “ɔlkayn pipul dɛn sev.” (1 Tim. 2:​4) So wi nɔ fɔ ɛva jɔj pɔsin bikɔs ɔf aw i luk ɔ aw i tan. Wi wok na fɔ prich gud gud wan bɔt Gɔd in Kiŋdɔm, ɛn dat gɛt fɔ du wit fɔ prich to ɔlman ilɛk us kɔlɔ dɛn gɛt, usay dɛn kɔmɔt, aw dɛn tan, ɔ di rilijɔn we dɛn de.

15, 16. Wetin mek sɔm Ju Kristian dɛn tɔk bad bɔt Pita? Aw i bin ɛksplen wetin i du?

¹⁵ Sɔntɛm Pita bin rili want fɔ go na Jerusɛlɛm fɔ go tɔk bɔt wetin bin apin. I tan lɛk se di nyuz fɔ se di Jɛntayl dɛn we nɔ sakɔmsayz dɔn “biliv Gɔd in wɔd” rich Jerusɛlɛm bifo am. Afta shɔt tɛm we Pita rich, “di wan dɛn we se pipul dɛn fɔ sakɔmsayz bigin fɔ tɔk bad bɔt am.” Dɛn nɔ bin gladi bikɔs Pita go na “pipul dɛn os we nɔ sakɔmsayz ɛn it wit dɛn.” (Akt 11:​1-3) Di prɔblɛm nɔto bikɔs Jɛntayl dɛn go kam fɔ bi Krays in disaypul dɛn. Bifo dat, dɛn Ju disaypul dɛn ya bin de pin se Jɛntayl dɛn nid fɔ du wetin di Lɔ se we gɛt fɔ du wit fɔ sakɔmsayz fɔ mek dɛn wɔship Jiova fayn fayn wan. Dis sho klia wan se i nɔ bin izi fɔ sɔm pan di Ju disaypul dɛn fɔ gri se di Lɔ we Gɔd Bin Gi Mozis dɔn dɔn.

¹⁶ Aw Pita bin ɛksplen di tin dɛn we i du? Frɔm wetin de na Akt 11:​4-16, Pita tɔk bɔt 4 tin dɛn we sho se na Gɔd dayrɛkt am: (1) di vishɔn we i bin gɛt frɔm Gɔd (Vas 4 to 10); (2) wetin di spirit bin tɛl am fɔ du;  (Vas 11 ɛn 12); (3) di fɛn we di enjɛl go fɛn Kɔnilyɔs (Vas 13 ɛn 14); ɛn (4) we di oli spirit kam pan di Jɛntayl dɛn. (Vas 15 ɛn 16) Pita bin dɔn fɔ tɔk to dɛn bay we i aks dɛn wan kwɛstyɔn we de mek pɔsin biliv. I aks dɛn se: “So if Gɔd gi dɛn [di Jɛntayl dɛn we biliv] di sem fri gift [we na di oli spirit] we i gi to wi [di Ju dɛn] we biliv di Masta Jizɔs Krays, udat na mi we go ebul fɔ stɔp Gɔd?”​—Akt 11:​17.

17, 18. (a) Aw wetin bin apin to Pita bin tɛst di Ju Kristian dɛn? (b) Wetin kin mek i nɔ izi fɔ mek wanwɔd kɔntinyu fɔ de na di kɔngrigeshɔn? Us kwɛstyɔn dɛn wi nid fɔ aks wisɛf?

¹⁷ Di tin we bin apin to Pita bin fos di Ju Kristian dɛn fɔ disayd. Fɔ se dɛn go lɛf di abit fɔ tek wan pɔsin bɛtɛ pas ɔda pɔsin ɛn si di Jɛntayl dɛn we jɔs baptayz as dɛn kɔmpin Kristian dɛn? Di akawnt tɛl wi se: “We dɛn [di apɔsul dɛn ɛn ɔda Ju Kristian dɛn] yɛri dɛn tin ya, dɛn lɛf fɔ agyu, ɛn dɛn prez Gɔd se: ‘So Gɔd dɔn opin di we fɔ mek pipul dɛn na ɔda neshɔn dɛn ripɛnt so dat dɛn go gɛt layf.’” (Akt 11:​18) Di fayn we aw dɛn bin de tink bin mek wanwɔd de na di kɔngrigeshɔn.

¹⁸ I nɔ kin izi fɔ tru Kristian dɛn fɔ kɔntinyu fɔ gɛt wanwɔd tide bikɔs dɛn “kɔmɔt na ɔl di neshɔn dɛn, trayb dɛn, pipul dɛn, ɛn dɛn de tɔk difrɛn langwej dɛn.” (Rɛv. 7:​9) So na bɔku kɔngrigeshɔn dɛn, wi gɛt pipul dɛn we kɔmɔt difrɛn say dɛn, we gɛt difrɛn kɔlɔ ɛn kɔlchɔ. I go fayn fɔ mek wi aks wisɛf: ‘A dɔn pul kɔmɔt ɛni abit we de sho se a de tek wan pɔsin bɛtɛ pas ɔda pɔsin na mi at? A dɔn mekɔp mi maynd nɔ fɔ ɛva alaw di bad abit dɛn na dis wɔl lɛk fɔ fil se mi kɔntri, trayb, kɔlchɔ, ɛn kɔlɔ bɛtɛ pas ɔda pipul dɛn yon ɛn alaw dat fɔ ambɔg di we aw a de trit mi Kristian brɔda ɛn sista dɛn?’ Mɛmba wetin bin apin to Pita (Sifas) sɔm tɛm afta di fɔs Jɛntayl dɛn bi Kristian. I bin alaw di tek we ɔda pipul dɛn de tek wan pɔsin bɛtɛ pas ɔda pɔsin fɔ ambɔg am, na dat mek “i . . . kɔmɔt nia” di Jɛntayl Kristian dɛn, ɛn Pɔl bin kɔrɛkt am fɔ we i du dat. (Gal. 2:​11-14) Lɛ wi tek tɛm ɔltɛm so dat wi nɔ go alaw di abit fɔ tek wan pɔsin bɛtɛ pas ɔda pɔsin fɔ ambɔg wi.

19. Udat dɛn di Ju Kristian dɛn na Antiɔk bigin fɔ prich to? Wetin bin apin bikɔs ɔf dat?

¹⁹ Fɔ se Jizɔs in disaypul dɛn bin stat fɔ prich to Jɛntayl dɛn we nɔ sakɔmsayz? Lɛ wi si wetin apin na Antiɔk we de na Siria. d Dis siti bin gɛt bɔku Ju pipul dɛn, bɔt bɛtɛ prɔblɛm nɔ bin de bitwin di Ju dɛn ɛn di Jɛntayl dɛn. So Antiɔk na bin fayn ples fɔ prich to Jɛntayl dɛn. Na ya so sɔm Ju disaypul dɛn bigin fɔ prich di gud nyuz “to di pipul dɛn we de tɔk Grik.” (Akt 11:​20) Dɛn nɔ bin de prich nɔmɔ to Ju dɛn we de tɔk Grik, bɔt dɛn bin de prich bak to Jɛntayl dɛn we nɔ sakɔmsayz. Jiova bin blɛs di wok we dɛn bin de du, ɛn “bɔku pan dɛn bin biliv.”​—Akt 11:​21.

20, 21. Aw Banabas bin sho se nɔto ɔltin i ebul fɔ du? Aw wisɛf go du di sem tin we wi de prich?

²⁰ Fɔ mek dɛn prich to pipul dɛn we bin tan lɛk se dɛn rɛdi fɔ lisin, di kɔngrigeshɔn na Jerusɛlɛm bin sɛn Banabas na Antiɔk. Bɔku pipul dɛn bin gri fɔ lisin to di gud nyuz, ɛn dat bin mek di wok bɔku fɔ wan pɔsin. Sɔl we go kam bi apɔsul fɔ di neshɔn dɛn na bin di bɛst pɔsin fɔ ɛp dɛn pipul dɛn ya. (Akt 9:​15; Rom. 1:​5) Fɔ se Banabas go si Sɔl as pɔsin we de agens am? Nɔ. Bifo dat, Banabas bin sho se nɔto ɔltin i ebul fɔ du. Na in fɔs go Tasɔs fɔ go fɛn Sɔl ɛn kam wit am bak na Antiɔk fɔ ɛp am. Dɛn tu bin spɛn wan ia fɔ ɛnkɔrej di disaypul dɛn na da kɔngrigeshɔn de.​—Akt 11:​22-26a.

²¹ Aw wi go sho se nɔto ɔltin wi ebul fɔ du we wi de prich? Dis kwaliti gɛt fɔ du wit fɔ gri se nɔto ɔltin wi ebul fɔ du. Wi ɔl nɔ gɛt di sem trɛnk ɛn wi nɔ ebul du di sem tin dɛn. Fɔ ɛgzampul, sɔm pɔblisha dɛn go sabi gi buk ɛn magazin dɛn we dɛn de du infɔmal witnɛsin ɔ we dɛn de prich frɔm os to os, bɔt i nɔ izi fɔ dɛn fɔ du ritɔn visit ɔ fɔ stat Baybul stɔdi dɛn. If yu go want fɔ sabi prich gud gud wan, yu nɔ tink se i go fayn fɔ aks pɔsin fɔ ɛp yu? We yu du dat, yu go sabi prich gud gud wan ɛn yu go gɛt mɔ gladi-at we yu de prich.​—1 Kɔr. 9:​26.

22, 23. Aw di brɔda dɛn na Antiɔk bin sho se dɛn lɛk dɛn brɔda dɛn? Aw Gɔd in pipul dɛn tide de du di sem tin?

²² Na Antiɔk fɔs “Gɔd mek dɛn bigin fɔ kɔl di disaypul dɛn Kristian.” (Akt 11:​26b) Da nem de rili fit di wan dɛn we de falamakata Krays. We pipul dɛn na ɔda neshɔn dɛn kam fɔ bi Kristian, fɔ se di Ju ɛn Jɛntayl dɛn we bin kam fɔ biliv Gɔd in wɔd bin si dɛnsɛf as wan grup? Lɛ wi si  wetin bin apin we tin fɔ it bin rili shɔtin insay di ia 46 afta Krays. e Trade trade, na di wan dɛn we po mɔ bin de sɔfa we tin fɔ it shɔtin, bikɔs dɛn nɔ bin gɛt mɔni fɔ bay tin fɔ it ɛn dɛn nɔ bin gɛt it na os. Insay di tɛm we tin fɔ it bin shɔtin, bɔku pan di Ju Kristian dɛn we bin de na Judia bin po ɛn dɛn bin nid tin fɔ it. We di brɔda dɛn na Antiɔk ɛn di Jɛntayl Kristian dɛn kam fɔ no se di brɔda dɛn na Judia nid tin fɔ it, dɛn sɛn “sɔm tin dɛn to di brɔda dɛn na Judia.” (Akt 11:​29) Dɛn bin sho se dɛn gɛt tru tru lɔv fɔ dɛn brɔda dɛn.

²³ Na di sem tin Gɔd in pipul dɛn de du tide. We wi kam fɔ no se wi brɔda dɛn na ɔda kɔntri ɔ na wi yon eria nid ɛp, wi kin rɛdi fɔ fɛn we dɛn fɔ ɛp dɛn. Kwik kwik wan, di Branch Kɔmiti kin ɔganayz rilif kɔmiti dɛn fɔ go kia fɔ wi brɔda dɛn we de sɔfa bikɔs ɔf nachɔral dizasta, lɛk big big briz, atkwek, ɛn ebi ren. We wi de tray tranga wan fɔ du ɔl wetin wi ebul fɔ ɛp wi brɔda dɛn, dat de sho se wi lɛk wisɛf ɛn gɛt wanwɔd.​—Jɔn 13:​34, 35; 1 Jɔn 3:​17.

24. Aw wi kin sho se wi ɔndastand wetin di vishɔn we Pita bin gɛt min?

²⁴ As tru Kristian dɛn, wi no se i rili impɔtant fɔ lɛ wi lan frɔm wetin Pita bin si na wan vishɔn we i bin de pantap wan os in ruf na Jɔpa. Wi de wɔship Gɔd we nɔ de tek wan pɔsin bɛtɛ pas ɔda pɔsin. I want mek wi prich gud gud wan bɔt in Kiŋdɔm, ɛn dis min se wi fɔ prich to ɔlkayn pipul dɛn ilɛk us kɔlɔ dɛn gɛt, usay dɛn kɔmɔt, ɔ if dɛn po ɔ jɛntri. So lɛ wi mekɔp wi maynd fɔ gi ɔl di wan dɛn we go lisin to wi chans fɔ yɛri di gud nyuz.​—Rom. 10:​11-13.