1. Aw di fɔstɛm Kristian dɛn ɛn Jiova Witnɛs dɛn fiba?

 DI FƆSTƐM Kristian dɛn bin de prich wit zil. Dɛn at bin muv dɛn fɔ gri fɔ mek di oli spirit ɛp ɛn gayd dɛn. Pan ɔl we pipul dɛn bin de mek dɛn sɔfa, dat nɔ bin mek dɛn stɔp fɔ prich, ɛn Gɔd bin de rili blɛs dɛn. Ɔl dɛn tin dɛn we di fɔstɛm Kristian dɛn bin de du na tin dɛn we Jiova Witnɛs dɛn bak de du tide.

2, 3. Wetin rili fayn bɔt di Baybul buk we nem Akt?

² Wan dawt nɔ de se di fayn fayn tin dɛn we Akt tɔk bɔt dɔn rili ɛnkɔrej yu ɛn ɛp yu fɔ gɛt mɔ fet. Na dis buk nɔmɔ Gɔd bin dayrɛkt pipul dɛn fɔ rayt we de tɔk bɔt di tin dɛn we di fɔstɛm Kristian dɛn bin du afta Jizɔs go na ɛvin.

³ Di Baybul buk we nem Akt tɔk bɔt 95 pipul dɛn we kɔmɔt na 32 land dɛn, 54 siti dɛn, ɛn 9 ayland dɛn. I gɛt fayn stori bɔt ɔdinari pipul dɛn, prawd pipul dɛn na lay lay rilijɔn, prawd pɔlitishian dɛn, ɛn pipul dɛn we bin de mek ɔda wan dɛn sɔfa bad bad wan. Bɔt di men tin na dat i tɔk bɔt yu brɔda ɛn sista dɛn we bin de trade. Dɛnsɛf bin gɛt di prɔblɛm dɛn we de mit wi tide ɛn dɛn bin de prich di gud nyuz wit zil.

4. Wetin mek wi gɛt spɛshal padi biznɛs wit pipul dɛn lɛk apɔsul Pɔl, Tabita, ɛn ɔda fetful witnɛs dɛn we bin de trade trade?

⁴ Na lɛk 2,000 ia dɔn pas frɔm we dɛn fetful Kristian dɛn ya bin de na di wɔl. Kristian dɛn lɛk apɔsul Pita ɛn Pɔl we bin gɛt zil, Lyuk we na bin dɔktɔ we wi lɛk, Banabas we bin gɛt fri-an, Stivin we bin gɛt maynd, Tabita we bin gɛt gudat, Lidia we bin de wɛlkɔm pipul dɛn na in os, ɛn bɔku ɔda fetful witnɛs dɛn. Pan ɔl we na trade trade dɛn bin de na di wɔl, wi stil gɛt spɛshal padi biznɛs wit dɛn. Wetin mek? Bikɔs wi gɛt di sem wok we dɛn bin gɛt, we na fɔ mek disaypul. (Mat. 28:​19, 20) Na big big ɔnɔ wi gɛt fɔ du dis wok!

5. Usay Jizɔs in disaypul dɛn bin stat fɔ du di prichin wok?

⁵ Tink bɔt di wok we Jizɔs bin gi in disaypul dɛn. I bin se: “Una go gɛt pawa we di oli spirit kam pan una, ɛn una go tɔk bɔt mi na Jerusɛlɛm, ɛn ɔlsay na Judia ɛn Sameria, ɛn na di say we fa pas ɔl na di wɔl.” (Akt 1:​8) Fɔs, di oli spirit bin ɛp di disaypul dɛn fɔ prich “na Jerusɛlɛm.”  (Akt 1:​1–8:​3) Dɔn, di spirit bin dayrɛkt dɛn fɔ prich “ɔlsay na Judia ɛn Sameria.” (Akt 8:​4–13:​3) Afta dat, dɛn stat fɔ prich di gud nyuz “na di say we fa pas ɔl na di wɔl.”​—Akt 13:​4–28:​31.

6, 7. Wetin-ɛn-wetin wi de yuz fɔ prich di gud nyuz we wi kɔmpin Kristian dɛn trade nɔ bin gɛt?

⁶ Yu brɔda ɛn sista dɛn we bin de fɔstɛm nɔ bin gɛt di wan ol Baybul fɔ yuz we dɛn de prich. Matyu in Gɔspɛl nɔ bin de te arawnd di ia 41 afta Krays. Pɔl bin dɔn rayt sɔm pan in lɛta dɛn bifo Lyuk rayt Akt dɔn, ɛn dat na arawnd di ia 61 afta Krays. Bɔt di fɔstɛm Kristian dɛn nɔ bin gɛt di kɔmplit Baybul, ɛn dɛn nɔ bin gɛt difrɛn pɔblikeshɔn dɛn we dɛn go lɛf to pipul dɛn we dɛn de prich to. Bifo di Ju Kristian dɛn bi Jizɔs in disaypul, dɛn bin de yɛri we dɛn de rid di Ibru Skripchɔ dɛn na di sinagɔg. (2 Kɔr. 3:​14-16) Bɔt ivin dɛn Kristian dɛn de bin nid fɔ stɔdi gud gud wan bikɔs i pɔsibul se dɛn bin nid fɔ kot di Skripchɔ dɛn ɔfɛd.

⁷ Tide, bɔku pan wi gɛt Baybul ɛn bɔku pɔblikeshɔn dɛn. Wi de mek disaypul dɛn bay we wi de prich di gud nyuz insay 240 kɔntri dɛn ɛn insay bɔku langwej dɛn.

8, 9. (a) Wetin di oli spirit bin ɛp Jizɔs in disaypul dɛn fɔ du? (b) Wetin Gɔd in spirit de ɛp di slev we fetful fɔ mek?

⁸ We Jizɔs bin gi in disaypul dɛn di wok fɔ prich, i bin tɛl dɛn se: “Una go gɛt pawa we di oli spirit kam pan una.” Bikɔs Gɔd in spirit bin de dayrɛkt Jizɔs in disaypul dɛn, dɛn go ebul fɔ prich ɔlsay na di wɔl. Di oil spirit bin ɛp Pita ɛn Pɔl fɔ mɛn di wan dɛn we sik, pul dimɔn pan pipul dɛn, ɛn ivin gi layf bak to di wan dɛn we bin dɔn day! Bɔt di oli spirit bin gi dɛn pawa fɔ du sɔntin we impɔtant pas dɛn wan dɛn de. I bin ɛp di apɔsul ɛn ɔda disaypul dɛn fɔ tich di tru tin we go ɛp pipul dɛn fɔ gɛt layf we go de sote go.​—Jɔn 17:​3.

⁹ Di de fɔ Pɛntikɔst insay di ia 33, Jizɔs in disaypul dɛn tɔk “difrɛn langwej dɛn, jɔs lɛk aw di spirit mek dɛn ebul fɔ tɔk.” So dɛn bin ebul fɔ tɔk bɔt “di pawaful tin dɛn bɔt Gɔd.” (Akt 2:​1-4, 11) Tide, Gɔd nɔ de yuz mirekul fɔ mek wi tɔk difrɛn langwej dɛn. Bɔt Gɔd in spirit de ɛp di slev we fetful fɔ mek pɔblikeshɔn dɛn insay bɔku langwej dɛn. Fɔ ɛgzampul, ɛni mɔnt dɛn de print bɔku bɔku Wachtawa ɛn Awake! magazin dɛn, ɛn wi wɛbsayt jw.org, gɛt pɔblikeshɔn dɛn we de tɔk bɔt di Baybul ɛn vidio dɛn insay pas 1,000 langwej dɛn. Ɔl dis de ɛp wi fɔ tɔk bɔt “di pawaful tin dɛn bɔt Gɔd” to pipul dɛn we de na ɔl di neshɔn dɛn, trayb dɛn, ɛn pipul dɛn we de tɔk difrɛn langwej dɛn.​—Rɛv. 7:​9.

10. Frɔm 1989, wetin di fetful slev dɔn du we i kam to Baybul transleshɔn?

¹⁰ Frɔm 1989, di fetful slev dɔn tray fɔ mek shɔ se di Nyu Wɔl Transleshɔn fɔ di Oli Skripchɔ Dɛn de insay bɔku langwej dɛn. Dɛn dɔn ɔlrɛdi  translet dis Baybul insay pas 200 langwej dɛn, dɛn dɔn print bɔku, ɛn dɛn gɛt fɔ print mɔ. Na Gɔd ɛn in spirit nɔmɔ ebul fɔ mek dis kayn tin apin.

11. Wetin dɛn dɔn du we i kam to fɔ translet Jiova Witnɛs dɛn pɔblikeshɔn dɛn?

¹¹ Bɔku bɔku Kristian dɛn de du di transleshɔn wok insay pas 150 kɔntri dɛn, ɛn dɛn de du am fɔ fri. Dis nɔ fɔ mek wi sɔprayz bikɔs no ɔda ɔganayzeshɔn nɔ de we di oli spirit de ɛp fɔ “prich . . . gud gud wan” ɔlsay na di wɔl bɔt Jiova Gɔd, in Kiŋ we i dɔn pik, ɛn di Kiŋdɔm we de na ɛvin!​—Akt 28:​23.

12. Aw Pɔl ɛn ɔda Kristian dɛn bin ebul fɔ du di prichin wok?

¹² We Pɔl bin prich to di Ju dɛn ɛn di wan dɛn we nɔto Ju na Antiɔk insay Pisidia, “di wan dɛn we rili sho se dɛn want fɔ gɛt layf we go de sote go, biliv di Masta.” (Akt 13:​48) We Lyuk bin de rayt di las pat na di Baybul buk we nem Akt, i rayt se Pɔl “bin de prich to dɛn bɔt Gɔd in Kiŋdɔm . . . Ɛn i bin de rili fil fri fɔ tɔk to dɛn ɛn natin nɔ bin de stɔp am.” (Akt 28:​31) Usay di apɔsul bin de prich? Na insay Rom we na di kapital siti fɔ wan wɔl pawa. Ilɛk Jizɔs in fɔstɛm disaypul dɛn bin de gi tɔk dɛn ɔ dɛn bin de yuz ɔda we dɛn fɔ prich, wi no se ɔl dis bin pɔsibul bikɔs di oli spirit bin de ɛp ɛn gayd dɛn.

13. Wetin mek wi fɔ pre we pipul dɛn de mek wi sɔfa?

¹³ We pipul dɛn bin de mek Jizɔs in fɔstɛm disaypul dɛn sɔfa, dɛn bin beg Jiova fɔ gɛt maynd. Wetin bin apin we dɛn du dat? Oli spirit bin kam pan dɛn ɛn ɛp dɛn fɔ tɔk Gɔd in wɔd wit maynd. (Akt 4:​18-31) Wisɛf kin pre fɔ gɛt sɛns ɛn trɛnk fɔ kɔntinyu fɔ prich pan ɔl we pipul dɛn de mek wi sɔfa. (Jems 1:​2-8) Bikɔs Gɔd de blɛs wi ɛn di oli spirit de ɛp wi, wi de kɔntinyu fɔ prich. Natin nɔ de mek wi stɔp fɔ du di prichin wok, ilɛksɛf pipul dɛn rili de agens wi ɔ dɛn de mek wi sɔfa bad bad wan. We dɛn de mek wi sɔfa, wi nid fɔ pre fɔ oli spirit ɛn fɔ gɛt sɛns ɛn maynd fɔ tɔk bɔt di gud nyuz.​—Lyuk 11:​13.

14, 15. (a) Wetin bin apin bikɔs ɔf “di trɔbul we bin de we dɛn kil Stivin”? (b) Insay wi tɛm, aw bɔku pipul dɛn na Sayberia bin kam fɔ lan di trut?

¹⁴ Stivin bin gɛt maynd fɔ prich bifo in ɛnimi dɛn kil am. (Akt 6:​5; 7:​54-60) Insay da tɛm de we dɛn bin de mek di Kristian dɛn “sɔfa bad bad wan,” ɔl di disaypul dɛn skata na difrɛn say dɛn na Judia ɛn Sameria; na di apɔsul dɛn nɔmɔ bin lɛf. Bɔt dat nɔ bin mek dɛn stɔp fɔ du di prichin wok. Filip bin go na Sameria “fɔ prich bɔt Krays,” ɛn fayn tin dɛn bin apin we i du dat. (Akt 8:​1-8, 14, 15, 25) Dɔn bak, di akawnt tɛl wi se: “Di wan dɛn we bin skata bikɔs ɔf di trɔbul we bin de we dɛn kil Stivin go te rich na Fonishia, Sayprɔs, ɛn Antiɔk, bɔt na to Ju dɛn nɔmɔ dɛn  bin de prich Gɔd in wɔd. Bɔt sɔm pan di man dɛn we de wit dɛn we kɔmɔt Sayprɔs ɛn Sayrini kam na Antiɔk ɛn bigin fɔ tɔk to di pipul dɛn we de tɔk Grik ɛn tɛl dɛn di gud nyuz bɔt Masta Jizɔs.” (Akt 11:​19, 20) Da tɛm de, di sɔfa we dɛn bin de mek di Kristian dɛn sɔfa bin mek dɛn ebul fɔ prich di Kiŋdɔm mɛsej difrɛn say dɛn.

¹⁵ Insay wi tɛm, dis sem kayn tin bin apin na di Sɔviɛt Yuniɔn. Mɔ insay dɛn 1950, dɛn bin sɛn bɔku Jiova Witnɛs dɛn na Sayberia. Bikɔs dɛn bin sɛn dɛn na difrɛn difrɛn say dɛn, dɛn bin kɔntinyu fɔ prich di gud nyuz na da big kɔntri de. I nɔ bin pɔsibul fɔ lɛ ɔl dɛn Jiova Witnɛs dɛn de gɛt di mɔni we dɛn nid fɔ travul go lɛk 6,000 mayl fɔ go prich di gud nyuz. Bɔt na di gɔvmɛnt sɛf sɛf bin sɛn dɛn na di kɔntri. Wan brɔda se: “Na di gɔvmɛnt bin ɛp bɔku pipul dɛn we bin want fɔ lan bɔt Gɔd na Sayberia fɔ lan di trut.”

16, 17. Aw di Baybul buk we nem Akt sho wi se Jiova bin de blɛs di prichin wok?

¹⁶ Wan dawt nɔ de se Jiova bin de blɛs di fɔstɛm Kristian dɛn. Pɔl ɛn ɔda wan dɛn bin de plant ɛn wata, “bɔt na Gɔd [bin] de mek i gro.” (1 Kɔr. 3:​5, 6) Di tin dɛn we di Baybul buk we nem Akt tɔk de ɛp wi fɔ no se di prichin wok bin rili de go bifo bikɔs Jiova bin de blɛs am. Fɔ ɛgzampul, “Gɔd in wɔd kɔntinyu fɔ rich bɔku say dɛn ɛn di disaypul dɛn kɔntinyu fɔ bɔku na Jerusɛlɛm.” (Akt 6:​7) As di prichin wok de go bifo, “ɔl di kɔngrigeshɔn dɛn na Judia, Galili, ɛn Sameria gɛt pis fɔ sɔm tɛm, ɛn dɛn kam gɛt strɔng fet; ɛn bikɔs di kɔngrigeshɔn dɛn bin de fred Jiova ɛn di oli spirit bin de kɔrej dɛn, dɛn kɔntinyu fɔ bɔku.”​—Akt 9:​31.

¹⁷ Di Ju pipul dɛn ɛn di pipul dɛn we bin de tɔk Grik na Siria Antiɔk bin yɛri di trut frɔm witnɛs dɛn we bin gɛt maynd. Di akawnt se: “Apat frɔm dat, Jiova in an bin de wit dɛn, ɛn bɔku pan dɛn biliv ɛn fala di Masta.” (Akt 11:​21) We di akawnt bin de tɔk bɔt aw di wok bin de kɔntinyu fɔ go bifo na da siti de, wi rid bak se: “Jiova in wɔd kɔntinyu fɔ rich na bɔku say dɛn ɛn plɛnti pipul dɛn biliv.” (Akt 12:​24) “Bikɔs ɔf Jiova in pawa, in wɔd kɔntinyu fɔ skata ɛn i bin pawaful” we Pɔl ɛn ɔda pipul dɛn bin de prich gud gud wan to di wan dɛn we nɔto Ju.​—Akt 19:​20.

18, 19. (a) Wetin mek wi no se “Jiova in an” de wit wi? (b) Gi wan ɛgzampul we de sho se Jiova de sɔpɔt in pipul dɛn.

¹⁸ Wan dawt nɔ de se “Jiova in an” de wit wi bak tide. Na dat mek bɔku pipul dɛn de kam fɔ biliv di Masta ɛn sho se dɛn dɔn gi dɛn layf to Gɔd bay we dɛn de baptayz. Dɔn bak, bikɔs Gɔd de ɛp ɛn blɛs wi, na in mek wi ebul fɔ du di prichin wok fayn fayn wan lɛk Pɔl ɛn di ɔda fɔstɛm Kristian dɛn. Wi de prich pan ɔl we pipul dɛn rili de agens wi ɛn sɔntɛnde dɛn kin mek wi sɔfa bad bad wan. (Akt 14:​19-21) Jiova Gɔd de wit wi ɔltɛm. In “an dɛn we de sote go” kin de wit wi fɔ sɔpɔt wi we wi gɛt ɛni  prɔblɛm. (Dyu. 33:​27, NWT) Lɛ wi mɛmba bak se bikɔs ɔf Jiova in gret nem, i nɔ go ɛva lɛf in pipul dɛn.​—1 Sam. 12:​22; Sam 94:​14.

¹⁹ Fɔ ɛgzampul, bikɔs Brɔda Arald Abt bin kɔntinyu fɔ prich, di Nazi dɛn bin sɛn am na di Saksɛnawzin kɔnsɛntreshɔn kamp insay Wɔl Wɔ II. Insay Me 1942, di Gɛstapo dɛn bin go na os to in wɛf we nem Ɛlsa, dɛn tek dɛn galpikin we bin smɔl, ɛn arɛst Ɛlsa. Sista Abt bin go na difrɛn kamp dɛn. I se: “Di ia dɛn we a bin spɛn na di Jaman kɔnsɛntreshɔn kamp dɛn bin tich mi wan fayn lɛsin. Di lɛsin na dat, Jiova in spirit kin rili ɛp wi fɔ gɛt trɛnk we wi gɛt siriɔs prɔblɛm. Bifo dɛn arɛst mi, a bin rid wan sista in lɛta usay i tɔk se we wi gɛt siriɔs prɔblɛm, Jiova in spirit go ɛp wi fɔ lɛ wi nɔ wɔri. A bin fil se wetin i tɔk nɔto tru. Bɔt we misɛf bin gɛt mi yon prɔblɛm dɛn, a bin kam fɔ no se wetin i tɔk na tru. Na dat kin rili apin. I at fɔ imajin if i nɔ apin to yu yet. Bɔt i bin rili apin to mi.”

20. Wetin Pɔl bin du we in na bin prizina na Rom na in os? Aw dis go ɛnkɔrej sɔm pan wi brɔda ɛn sista dɛn?

²⁰ Di las tin we di Baybul buk we nem Akt tɔk bɔt na dat Pɔl bin de “prich . . . bɔt Gɔd in Kiŋdɔm” wit zil. (Akt 28:​31) Bikɔs in na bin prizina na in os, i nɔ bin fri fɔ go prich frɔm os to os na Rom. Bɔt stil, i kɔntinyu fɔ prich to ɔl di wan dɛn we bin de kam to am. Tide, sɔm pan wi brɔda ɛn sista dɛn nɔ ebul lɛf dɛn os, sɔntɛm bikɔs dɛn nɔ ebul fɔ kɔmɔt na dɛn bed, ɔ dɛn de na nɔsin om bikɔs dɛn dɔn ol ɔ dɛn sik. Bɔt dɛn stil lɛk Gɔd ɛn dɛn rili want fɔ du di prichin wok. Wi de pre fɔ dɛn ɛn aks wi Papa we de na ɛvin fɔ ɛp dɛn fɔ mit pipul dɛn we want fɔ lan bɔt in ɛn di wɔndaful tin dɛn we i want fɔ du.

21. Wetin mek wi nɔ fɔ westɛm fɔ du di prichin wok?

²¹ Bɔku pan wi ebul fɔ prich frɔm os to os ɛn fɔ yuz ɔda we dɛn fɔ mek disaypul. So lɛ wi ɔl du ɔl wetin wi ebul fɔ du wi wok as pipul dɛn we de prich bɔt di Kiŋdɔm, ɛn lɛ wi prich “na di say we fa pas ɔl na di wɔl.” Wi nɔ fɔ westɛm fɔ du dis wok bikɔs wi de si di “sayn” we de sho se Krays de wit wi klia wan. (Mat. 24:​3-14) Wi nid fɔ yuz wi tɛm naw bikɔs wi gɛt fɔ “du plɛnti wok fɔ di Masta.”​—1 Kɔr. 15:​58.

22. Wetin wi fɔ mekɔp wi maynd fɔ du as wi de wet fɔ Jiova in de?

²² As wi de wet fɔ “Jiova in de we gret ɛn we fiaful,” lɛ wi mekɔp wi maynd fɔ kɔntinyu fɔ prich fetful wan ɛn nɔ fred. (Joɛl 2:​31, NWT) Wi go stil fɛn bɔku pipul dɛn we tan lɛk di Berian dɛn we bin “rili want fɔ lisin to Gɔd in wɔd.” (Akt 17:​10, 11) So lɛ wi kɔntinyu fɔ prich te i tan lɛk se wi de yɛri di wɔd dɛn we se: “Yu dɔn du wɛl, yu na slev we gud ɛn fetful!” (Mat. 25:​23) If wi du di wok fɔ mek disaypul dɛn wit zil rayt naw ɛn kɔntinyu fɔ fetful to Jiova, wan dawt nɔ de se wi go kɔntinyu fɔ gladi sote go bikɔs wi bin gɛt di big big ɔnɔ fɔ “prich . . . gud gud wan” bɔt Gɔd in Kiŋdɔm!