1, 2. Uskayn travul Pɔl gɛt fɔ travul? Wetin sɔntɛm i bin dɔn de tink bɔt?

 PƆL bin de tink bɔt di wɔd dɛn we Fɛstɔs bin tɔk, bikɔs dɛn gɛt sɔntin fɔ du wit in tumara bambay. Gɔvnɔ Fɛstɔs bin tɔk se: “Yu de go to Siza.” Pɔl bin dɔn spɛn tu ia na prizin, so di go we i de go na Rom go mek i si difrɛn tin dɛn. (Akt 25:​12) Bɔt di tin dɛn we Pɔl bin de mɛmba di tɛm we i travul difrɛn fawe frɔm di fayn tin dɛn we kin apin to pipul dɛn we dɛn travul. Sɔntɛm dis travul we Pɔl de travul go to Siza go mek i gɛt siriɔs kwɛstyɔn dɛn bɔt wetin go apin to am.

² Bɔku tɛm, Pɔl bin de “pan denja na si,” ɛn i bin sev tri tɛm we i bin de na ship we pwɛl na si, i bin ivin spɛn nɛt ɛn de na si. (2 Kɔr. 11:​25, 26) Dis travul we i gɛt fɔ travul go difrɛn frɔm di travul we i bin dɔn de travul as mishɔnari di tɛm we i bin fri. Pɔl go travul as prizina ɛn na ples we rili fa. I gɛt fɔ travul fɔ lɛk 2,000 mayl frɔm Sizeria to Rom. Fɔ se i go ebul travul dis travul ɛn bad tin nɔ apin to am? Ivin if i go ebul, fɔ se dɛn go jɔj am di rɔng we afta i rich na Rom? Mɛmba se na di gɔvmɛnt we pas ɔl di ɔda gɔvmɛnt dɛn na Setan in wɔl da tɛm de na in go jɔj am.

3. Wetin Pɔl bin dɔn mekɔp in maynd fɔ du? Wetin wi go tɔk bɔt insay dis chapta?

³ Afta ɔl di tin dɛn we yu dɔn rid bɔt Pɔl, yu tink se i bin de fil se i nɔ gɛt op, ɛn i bin wɔri bikɔs ɔf wetin go apin to am? Nɔ! I bin no se prɔblɛm dɛn go mit am, bɔt i nɔ bin no uskayn prɔblɛm go mit am. Wetin mek i go lɔs di gladi-at we i bin gɛt we i de prich bay we i wɔri bɔt tin dɛn we i nɔ ebul fɔ kɔntrol? (Mat. 6:​27, 34) Pɔl bin no se wetin Jiova want na fɔ mek i go yuz ɛni chans we i gɛt fɔ prich di gud nyuz bɔt Gɔd in Kiŋdɔm, ivin to bigman dɛn na gɔvmɛnt. (Akt 9:​15) Pɔl bin dɔn mekɔp in maynd fɔ du in wok ilɛk wetin apin. Nɔto da sem tin de wisɛf dɔn mekɔp wi maynd fɔ du? So lɛ wi fala Pɔl pan dis impɔtant travul as wi de tɔk bɔt aw wi go bɛnifit frɔm in ɛgzampul.

4. Uskayn ship Pɔl bin yuz fɔ bigin in travul? Udat dɛn bin de wit am?

⁴ Pɔl ɛn di ɔda prizina dɛn bin de ɔnda di kia ɔf wan Roman ɔfisa we nem Juliɔs, we bin disayd fɔ tek wan biznɛs ship we dɔn rich na Sizeria. Di ship kɔmɔt na Adremitiɔm, wan si pɔt we de na di wɛst pat na  Eshia Maynɔ, we de bay di siti we nem Mitilina na di ayland we de na Lɛsbɔs. Dis ship go go na di nɔt ɛn di wɛst pat, i gɛt fɔ de stɔp fɔ de ɔflod ɛn tek lod dɛn. Dɛn nɔ mek dɛn kayn ship dɛn de fɔ mek pasenja go rilaks, ɛn dɛn nɔ mek am fɔ prizina dɛn. (Luk di bɔks we gɛt di taytul “ Fɔ Travul na Si ɛn Biznɛs Rod Dɛn.”) Di gud tin na dat, Pɔl nɔ go bi di wangren Kristian we go de wit kriminal dɛn. Tu brɔda dɛn bin de wit am we na Aristakɔs ɛn Lyuk. As wi no, na Lyuk bin rayt di akawnt. Wi nɔ no if Pɔl dɛn in tu padi dɛn ya we nɔ kɔmɔt biɛn am na dɛn bin pe fɔ dɛnsɛf ɔ na dɛn bin de wok fɔ Pɔl.​—Akt 27:​1, 2.

5. Us padi biznɛs Pɔl bin ebul fɔ ɛnjɔy na Saydɔn? Wetin wi lan frɔm dis?

⁵ Afta dɛn dɔn spɛn wan de na si ɛn dɔn travul fɔ lɛk 70 mayl na di nɔt pat, di ship bin stɔp na Saydɔn na di Sirian kost. I tan lɛk se Juliɔs nɔ bin trit Pɔl lɛk ɔdinari kriminal, sɔntɛm na bikɔs Pɔl na bin Roman sitizin we dɛn nɔ gɛt pruf yet se i gilti. (Akt 22:​27, 28; 26:​31, 32) Juliɔs bin mek Pɔl go si in Kristian brɔda ɛn sista dɛn. Dɛn brɔda ɛn sista dɛn ya go dɔn rili gladi fɔ kia fɔ di apɔsul afta i dɔn de na prizin fɔ lɔng tɛm! Yu ebul tink bɔt tɛm dɛn we sɔntɛm yu go ɛp da sem kayn we de ɛn bɛnifit?​—Akt 27:​3.

6-8. Aw Pɔl in travul bin chenj frɔm Saydɔn to Kanaydɔs? Us chans Pɔl bin gɛt fɔ du di prichin wok?

⁶ Di ship kɔmɔt na Saydɔn ɛn kɔntinyu fɔ travul nia di land ɛn pas Silishia nia di siti usay Pɔl bin mɛn, we na Tasɔs. Lyuk nɔ bin tɔk bɔt ɔdasay dɛn we dɛn stɔp pan ɔl we i bin tɔk se leta dɛn bin de pan denja we i se “di briz bin de kɔmɔt usay wi de go.” (Akt 27:​4, 5) Bɔt stil, wi go ebul imajin we Pɔl de yuz ɛni chans we i gɛt fɔ prich di gud nyuz. Wan dawt nɔ de se i bin prich to in kɔmpin prizina dɛn ɛn ɔda pipul dɛn we bin de na di ship, ivin di wan dɛn we de wok na di ship, ɛn di sojaman dɛn, ɛn pipul dɛn we i bin de mit na di say dɛn usay dɛn bin de stɔp. Fɔ se wisɛf tide de yuz ɛni chans we wi gɛt fɔ prich?

 ⁷ Di ship bin rich di rayt tɛm na Mayra, we na wan pɔt we de na di sawt pat na Eshia Maynɔ. Na de Pɔl ɛn di ɔda wan dɛn bin lod na ɔda ship we bin kɛr dɛn go na Rom usay dɛn fɔ go. (Akt 27:​6) Insay dɛn tɛm dɛn de, na Ijipt bin de sɔplay Rom, ɛn di Ijipshian dɛn ship bin de stɔp na Mayra. Juliɔs bin si da ship de, ɛn i bin tɛl di sojaman dɛn ɛn prizina dɛn fɔ lod pan am. I go bi se dis ship bin big pas di fɔs ship. I bin de kɛr go lod we valyu, we na wan fud we nem wit, ɛn i bin lod 276 pipul dɛn, we na di wan dɛn we de wok na di ship, sojaman dɛn, prizina dɛn, ɛn ɔda pipul dɛn we de travul go na Rom. I klia se insay dis ɔda ship we dɛn bin lod, Pɔl bin gɛt bɔku pipul dɛn fɔ prich to, ɛn wi nɔ gɛt wan dawt se i bin yuz da chans de.

⁸ Di nɛks say we dɛn stɔp na bin Kanaydɔs we de na di sawt-wɛst kɔna na Eshia Maynɔ. We di briz de blo fayn, ship go tek lɛk wan de fɔ travul go na da say de. Bɔt Lyuk bin rayt se we dɛn dɔn “go saful saful fɔ sɔm dez, [dɛn] kam na Kanaydɔs, bɔt i nɔ bin izi.” (Akt 27:​7a) I nɔ bin izi fɔ travul na da say de. (Luk di bɔks we gɛt di taytul “ Di Briz we De Kɔmɔt Usay di Ship dɛn De Go na di Mɛditarenian.”) Tink bɔt di pipul dɛn we bin lod na di ship we di ship bin de tray fɔ go na di say we di strɔng briz bin de blo ɛn di wata we bin rɔf.

9, 10. Us prɔblɛm di wan dɛn we bin de na di ship bin gɛt we dɛn kam na di eria na Krit?

⁹ Di kaptin na di ship bin plan fɔ kɔntinyu fɔ travul na di wɛst pat frɔm Kanaydɔs, bɔt Lyuk we bin de de tɔk se di “briz nɔ alaw wi fɔ go bifo.” (Akt 27:​7b) As di ship muv frɔm di menland, big big briz we kɔmɔt na di nɔtwɛst pat bin de push am fɔ go na di sawt pat, ɛn sɔntɛm i bin de go wit spid. Jɔs lɛk aw di ayland na Sayprɔs bin ebul protɛkt di ship frɔm ebi briz, na so bak di ayland na Krit bin protɛkt dɛn. Afta di ship bin dɔn pas di smɔl ayland na Salmoni na di ist pat na Krit, tin bin bɛtɛ smɔl. Wetin mek? Di ship bin go na di sawt pat na di ayland usay di briz nɔ bin de blo ebi ebi wan. Imajin aw dis go dɔn mek di wan dɛn we de na di ship fil fayn! Bɔt wans di ship stil de na si, di wan dɛn we de kɔntrol di ship nɔ go fɔgɛt se kol sizin de kam. Dɛn bin gɛt rizin fɔ wɔri.

¹⁰ Lyuk tɔk kɔrɛkt wan se: Wi “travul nia di land [na Krit], bɔt i nɔ bin izi. Dɔn wi kam na wan ples we dɛn kɔl Sef Pɔt.” Ivin na di say we dɛn bin go fɔ protɛkt dɛnsɛf, i nɔ bin izi fɔ kɔntrol di ship. Bɔt faynali, dɛn bin ebul fɔ fɛn say usay dɛn go sɛn dɛn ankɔ na wan smɔl be we de na di eria jɔs bifo dɛn go na di nɔt pat. Aw lɔng dɛn bin de de? Lyuk tɔk se na fɔ “sɔm tɛm,” bɔt dɛn nɔ bin gɛt bɔku tɛm. Insay Sɛptɛmba ɔ Ɔktoba, i nɔ kin izi fɔ travul na si.​—Akt 27:​8, 9.

11. Us advays Pɔl bin gi di wan dɛn we i bin de travul wit na di ship? Bɔt wetin dɛn bin disayd fɔ du leta?

 ¹¹ Sɔntɛm, sɔm pan di pasenja dɛn bin aks Pɔl fɔ advays bikɔs i dɔn de travul na di Mɛditarenian Si. I bin advays dɛn fɔ mek di ship nɔ kɔntinyu fɔ go bifo. Bikɔs dis go we di ship de kɔntinyu fɔ go so go mek dɛn “lɔs di ship, [ɛn] di tin dɛn we de insay di ship,” ɛn sɔntɛm dɛn go ivin lɔs dɛn layf sɛf. Bɔt pan ɔl dat, di ship kaptin ɛn di wan we bin gɛt di ship bin want mek di ship kɔntinyu fɔ go bifo, bikɔs dɛn bin want fɔ fɛn say we sef kwik kwik wan. Dɛn mek Juliɔs biliv ɛn bɔku pan dɛn bin fil se dɛn fɔ tray fɔ rich na Finiks, we na wan say usay ship dɛn kin slam we de nia di si. I go bi se dis ples bin gɛt big ɛn bɛtɛ say fɔ mek ship slam di tɛm we di wɛda kin rili kol. So we di briz frɔm di sawt bigin fɔ blo saful wan, dɛn bigin fɔ travul bak.​—Akt 27:​10-13.

12. Afta dɛn lɛf Krit, us prɔblɛm dɛn di ship kam ɛn gɛt? Aw di wan dɛn we bin de na di ship bin tray fɔ avɔyd dis prɔblɛm?

¹² Dɔn dɛn kam gɛt mɔ trɔbul, we na “big big briz” we kɔmɔt na di nɔt-ist pat. Fɔ sɔm tɛm, dɛn tek kɔva na wan “smɔl ayland we dɛn kɔl Kɔda” we de lɛk 40 mayl frɔm wan sef pɔt, bɔt stil di ship bin de pan denja fɔ mek i rɔndɔŋ go na di sawt te i fɔdɔm na di say dɛn usay di sansan dɛn de na di si na Afrika. Bikɔs di wan dɛn we de wok na di ship bin de fred fɔ mek dat nɔ apin to dɛn, dɛn bin pul di smɔl bot we di ship bin de pul biɛn. I nɔ bin izi fɔ dɛn fɔ du dis wok bikɔs di smɔl bot bin dɔn ful-ɔp wit wata. Dɔn dɛn bin de wok tranga wan fɔ tay di ship, ɛn dɛn bin de pas rop ɔ chen dɛn ɔnda di ship fɔ ol in bod dɛn togɛda. Ɛn na de dɛn put in gia dɔŋ, pul di pisis ɔ rop we bin de mek di ship gɛt spid so dat dɛn go ebul fɔ kɔntrol di ship fɔ pas insay da big big briz de we de mek di wata rɔf. Imajin aw di bad ɛkspiriɛns go dɔn mek dɛn fred! Dɛn tin ya we dɛn bin de du nɔ ivin du, bikɔs di ship bin kɔntinyu fɔ de na say usay di “big big briz bin de mek di ship nɔ stɛdi.” Di tɔd de, dɛnsɛf tek sɔm tin dɛn we dɛn de yuz na di ship ɛn trowe dɛn, sɔntɛm dis go mek di ship layt ɛn kɔntinyu fɔ flot.​—Akt 27:​14-19.

13. Aw layf bin tan lɛk insay di ship we Pɔl bin de travul di tɛm we ebi ebi briz bin de blo?

¹³ I go mɔs bi se pipul dɛn bin de fred. Bɔt Pɔl ɛn in kɔmpin dɛn bin gɛt kɔnfindɛns se dɛn go sev. Di Masta we na Jizɔs bin dɔn tɛl Pɔl bifo dis tɛm se di apɔsul gɛt fɔ go prich na Rom, ɛn leta wan enjɛl bin mek i no se dis prɔmis ya go mɔs kam tru. (Akt 19:​21; 23:​11) Bɔt pan ɔl dat, fɔ tu wiks, de ɛn nɛt, di big big briz bin kɔntinyu fɔ blo. Bikɔs di bɔku ren we bin de kam ɛn di tik klawd bin kɔva di san ɛn di sta dɛn, dis bin mek di ship in kaptin nɔ ebul fɔ si bɛtɛ fɔ mek i no usay di ship de ɔ usay dɛn de go. I nɔ bin ivin pɔsibul fɔ it sɛf. Aw ɛnibɔdi go it we yu tink bɔt di kol, di ren, di fred we pipul dɛn bin de fred, ɛn di vɔmit we dɛn bin de vɔmit?

14, 15. (a) We Pɔl bin de tɔk to in kɔmpin dɛn na di ship, wetin mek i bin tɔk bɔt di wɔnin we i bin dɔn gi dɛn fɔs? (b) Wetin wi lan frɔm di mɛsej we Pɔl bin prich we gi di pipul dɛn op?

 ¹⁴ Pɔl tinap. I tɔk bɔt di wɔnin we i bin dɔn gi dɛn, bɔt i nɔ tɛl dɛn se ‘a bin dɔn tɛl una.’ Di tin we apin pruv se i impɔtant fɔ mek dɛn lisin to wetin i de tɛl dɛn. Dɔn i tɔk se: “A de beg una fɔ tek kɔrej, bikɔs nɔbɔdi nɔ go day, na di ship nɔmɔ go pwɛl.” (Akt 27:​21, 22) Dɛn wɔd dɛn de go mɔs dɔn kɔrej di wan dɛn we bin de lisin to Pɔl! I go bi se Pɔl insɛf bin gladi we Jiova bin gi mɛsej we i go prich to di pipul dɛn fɔ mek dɛn gɛt op. I impɔtant fɔ mek wi mɛmba se Jiova bisin bɔt ɔl mɔtalman in layf. I valyu ɔlman. Apɔsul Pita bin rayt se: “Jiova . . . nɔ want fɔ dɔnawe wit ɛnibɔdi, i want mek ɔlman ripɛnt.” (2 Pit. 3:​9) So i rili ɔjɛnt fɔ mek wi prich Jiova in mɛsej to bɔku bɔku pipul dɛn we go gi dɛn op. Pipul dɛn layf we valyu de pan denja.

¹⁵ I pɔsibul se Pɔl bin dɔn de prich to bɔku pipul dɛn na di ship bɔt “di prɔmis we Gɔd bin mek.” (Akt 26:​6; Kol. 1:​5) Naw we di ship dɔn pwɛl, Pɔl go ebul fɔ gi pawaful rizin we fɔ mek di pipul dɛn gɛt op se dɛn nɔ go day. I tɔk se: “Dis nɛt di Gɔd we gɛt mi . . . in enjɛl kam tinap nia mi ɛn tɔk se: ‘Pɔl, nɔ fred. Yu go mɔs tinap bifo Siza, ɛn Gɔd dɔn gi yu ɔl di wan dɛn we de wit yu insay dis ship.’” Pɔl tɛl dɛn se: “So, man dɛn,  una tek kɔrej, a biliv se Gɔd go du wetin i tɛl in enjɛl fɔ tɛl mi. Bɔt wi ship go pwɛl nia wan ayland.”​—Akt 27:​23-26.

16, 17. (a) Ustɛm Pɔl bin pre? Wetin bin apin? (b) Aw di wɔnin we Pɔl bin gi kam tru?

¹⁶ Afta tu wiks we tin bin rili bad-ɔf, di tɛm we di briz bin de push di ship fɔ lɛk 540 mayl, di selɔ dɛn bin notis chenj. Sɔntɛm dɛn bin de yɛri di nɔys we di swɛlin bin de mek nia di land. Dɛn bin sɛn di ankɔ insay di wata frɔm biɛn fɔ mek di wata nɔ go kɛr go di ship ɛn fɔ dayrɛkt us pat pan di ship fɔ go na dray land. Da tɛm de, dɛn tray fɔ kɔmɔt na di ship, bɔt di sojaman dɛn bin stɔp dɛn. Pɔl bin tɛl di ami ɔfisa ɛn di sojaman dɛn se: “If dɛn man ya nɔ lɛf na di ship, una nɔ go sev.” We di ship bin dɔn stɛdi smɔl, i tɛl ɔlman fɔ it, i mek dɛn gɛt op bak se dɛn go sev. Pɔl “tɛl Gɔd tɛnki bifo dɛn ɔl.” (Akt 27:​31, 35) Pɔl sɛt fayn ɛgzampul fɔ Lyuk, Aristakɔs, ɛn Kristian dɛn tide we i bin pre fɔ tɛl Gɔd tɛnki bifo bɔku pipul dɛn. Fɔ se di pre we yu de pre na pɔblik de ɛnkɔrej ɔda pipul dɛn ɛn mek dɛn fil fayn?

¹⁷ Afta Pɔl dɔn fɔ pre, “dɛn ɔl tek kɔrej ɛn dɛnsɛf bigin fɔ it.” (Akt 27:​36) Dɔn dɛn trowe sɔm pan di wit dɛn insay di si so dat di ship go layt na di wata bikɔs i dɔn de rich na di dray land, dɔn dɛn lus di rop dɛn we bin tay di padul dɛn, afta dat, dɛn opin di klos we de bifo di ship fɔ mek briz kam insay ɛn mek di ship muv, ɛn dɛn mek di ship rayd na grɔn. Dɔn di frɔnt pat na di ship fasin, sɔntɛm na pan sansan ɔ pɔtɔpɔtɔ. Swɛlin bin de bang di biɛn pat na di ship ɛn pwɛl am bad bad wan. Sɔm sojaman dɛn bin want fɔ kil di prizina dɛn so dat nɔbɔdi nɔ go rɔnawe, bɔt Juliɔs bin stɔp dat. I bin ɛnkɔrej ɔlman fɔ swim ɔ flot te go na di land. Wetin Pɔl bin dɔn tɔk bin apin; ɔl di 276 pipul dɛn we bin de na di ship bin sev. Fɔ tru, “dɛn ɔl rich na land sef wan.” Bɔt usay dɛn bin de?​—Akt 27:​44.

18-20. Aw di pipul dɛn na Mɔlta bin rili trit Pɔl ɛn in kɔmpin dɛn we bin sev fayn? Us mirekul Gɔd bin mek Pɔl pafɔm?

¹⁸ I bin kam bi se di wan dɛn we bin sev bin de na di ayland we nem  Mɔlta na di sawt pat na Sisili. (Luk di bɔks we gɛt di taytul “ Usay Mɔlta Bin De?”) Di pipul dɛn we bin de tɔk difrɛn langwej na di ayland bin “rili trit [dɛn] fayn.” (Akt 28:​2) Dɛn bin mek faya fɔ dɛn strenja dɛn ya we bin ebul fɔ rich na land sok sok wan ɛn bin de trimbul. Di faya bin ɛp dɛn fɔ mek dɛn go ebul wam dɛn bɔdi pan ɔl we di ples bin kol ɛn ren bin de kam. Bikɔs dɛn bin layt di faya, dat bin mek mirekul apin.

¹⁹ Pɔl bin want fɔ ɛp. So i bin tek sɔm stik dɛn we i put na di faya. We i du dat, wan vaypa snek we gɛt pɔyzin bin grap ɛn bɛt am, i fasin na in an. Di pipul dɛn na Mɔlta bin tink se na di gɔd dɛn de pɔnish Pɔl. a

²⁰ Di pipul dɛn na Mɔlta we bin si se di snek dɔn bɛt Pɔl bin tink se i go “swɛl.” Wan rɛfrɛns se di orijinal wɔd we dɛn yuz na ya na “mɛdikal wɔd.” Wi nɔ sɔprayz fɔ no se sɔntɛm “Lyuk, we na di dɔktɔ we wi rili lɛk,” bin mɛmba da wɔd de. (Akt 28:​6; Kol. 4:​14) Ɛni aw i bi, Pɔl bin shek in an ɛn di snek we gɛt pɔyzin bin fɔdɔm. Natin nɔ bin apin to Pɔl.

21. (a) Wetin na sɔm ɛgzampul dɛn bɔt kɔrɛkt tin we wi fɛn insay Lyuk in akawnt? (b) Us mirekul dɛn Pɔl bin pafɔm? Aw dat bin afɛkt  di pipul dɛn na Mɔlta?

²¹ Pɔbliɔs, we na lanlɔd we gɛt mɔni, bin de na di eria. Sɔntɛm na in na bin di Roman ɔfisa we bin de bifo na Mɔlta. Lyuk bin tɔk bɔt am se in na “di impɔtant man na di ayland,” ɛn dis na di ɛgzakt taytul we dɛn bin yuz pan tu pan di Mɔltiz pipul dɛn raytin. Dɛn bin du gud to Pɔl ɛn in kɔmpin dɛn fɔ tri dez, bɔt Pɔbliɔs in papa bin sik. Lyuk bin tɔk bak dayrɛkt wan bɔt di kayn sik we i bin gɛt. I rayt se di man bin gɛt “fiva ɛn disɛntri,” we na di kɔrɛkt mɛdikal nem fɔ di sik. Pɔl bin pre ɛn le in an dɛn pan di man, ɛn di man bin wɛl. Bikɔs di pipul dɛn bin rili gladi fɔ dis mirekul, dɛn kam wit ɔda pipul dɛn we sik so dat i go mɛn dɛn, ɛn dɛn bin kam wit gift dɛn so dat Pɔl ɛn in kɔmpin dɛn go gɛt di tin dɛn we dɛn nid.​—Akt 28:​7-10.

22. (a) Aw wan masta sabi bukman bin prez Lyuk in akawnt bɔt di travul we dɛn travul fɔ go na Rom? (b) Wetin wi go tɔk bɔt insay di nɛks chapta?

²² Wetin wi dɔn lan bɔt Pɔl in travul na tin we rili kɔrɛkt. Wan masta sabi bukman bin tɔk se: “Lyuk in akawnt . . . na wan pan di bɛst tin dɛn we dɛn rayt bɔt na di wan ol Baybul. Ɔl wetin dɛn tɔk bɔt aw dɛn bin de travul na si insay di fɔstɛm Kristian dɛn tɛm rili kɔrɛkt, ɛn i tɔk bɔt aw tin bin tan lɛk na di ist pat na di Mɛditarenian,” ɛn dɛn rayt am lɛk se na frɔm wan jɔnal dɛn bin rayt am. Sɔntɛm Lyuk bin rayt da pat de as i bin de travul wit di apɔsul. If na so i bi, di nɛks pat pan di travul bin gi am bɔku tin fɔ rayt bɔt bak. Wetin go apin to Pɔl we dɛn faynali rich na Rom? Lɛ wi si.