CHAPTA 24
“Tek Kɔrej!”
Di Ju dɛn bin plan fɔ kil Pɔl ɛn i bin tinap bifo Fɛliks fɔ ɛksplen
Dis chapta kɔmɔt na Akt 23:11–24:27
1, 2. Wetin mek Pɔl nɔ bin sɔprayz we dɛn bin de mek i sɔfa na Jerusɛlɛm?
DƐN bin sev Pɔl di rayt tɛm, bikɔs sɔm pipul dɛn na Jerusɛlɛm we bin vɛks bin want fɔ du am bad; ɛn Pɔl bin de na prizin bak. Di apɔsul we bin gɛt zil nɔ bin sɔprayz we i bin de sɔfa na Jerusɛlɛm. Di oli spirit bin dɔn tɛl am se dɛn go “put [am] na prizin ɛn prɔblɛm dɛn go kam [in] we” na dis siti. (Akt 20:22, 23) Pan ɔl we Pɔl nɔ bin no di patikyula tin dɛn we go apin to am, i bin no se i go kɔntinyu fɔ sɔfa fɔ Jizɔs in nem.—Akt 9:16.
2 Ivin prɔfɛt dɛn lɛk Agabɔs we na bin Kristian na di kɔngrigeshɔn bin wɔn Pɔl se dɛn go tay am ɛn an ova am to “pipul dɛn we kɔmɔt na ɔda neshɔn dɛn.” (Akt 21:4, 10, 11) Bifo dis tɛm, bɔku Ju pipul dɛn bin tray fɔ kil am, ɛn i nɔ tu te i bin tan lɛk se dɛn “go kil Pɔl” we sɔm pipul dɛn na di Sanɛndrin bin de agyu bɔt am. Naw dis apɔsul de na prizin to sɔm Roman sojaman dɛn, ɛn i gɛt bɔku bad tin dɛn we dɛn tɔk agens am. (Akt 21:31; 23:10) Wan dawt nɔ de se apɔsul Pɔl bin rili nid ɛnkɔrejmɛnt!
3. Usay wi kin gɛt ɛnkɔrejmɛnt fɔ kɔntinyu fɔ du wi prichin wok?
3 Insay dis tɛm we di wɔl want fɔ dɔn, wi no se “ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” (2 Tim. 3:12) So wan wan tɛm, wi ɔl nid ɛnkɔrejmɛnt fɔ kɔntinyu fɔ du wi prichin wok. Wi rili gladi fɔ di fayn ɛnkɔrejmɛnt we wi kin gɛt frɔm “di slev we fetful ɛn gɛt sɛns” insay wi pɔblikeshɔn dɛn ɛn wi mitin dɛn. (Mat. 24:45) Jiova dɔn mek wi no klia wan se di wan dɛn we de agens di gud nyuz nɔ go ebul stɔp di gud nyuz fɔ mek i nɔ go bifo. Dɛn nɔ go ebul dɔnawe wit Gɔd in pipul dɛn as grup, ɛn dɛn nɔ go ebul stɔp di prichin wok. (Ayz. 54:17; Jɛr. 1:19) Bɔt we Pɔl? Fɔ se i bin gɛt di ɛnkɔrejmɛnt we i bin nid fɔ kɔntinyu fɔ prich gud gud wan pan ɔl we dɛn bin de agens am? If na so i bi, aw Pɔl bin gɛt di ɛnkɔrejmɛnt ɛn wetin i bin du?
Dɛn “Swɛ” Nɔ Bin Wok (Akt 23:11-34)
4, 5. Us ɛnkɔrejmɛnt Pɔl bin gɛt? Wetin mek di tɛm we i gɛt am na bin di rayt tɛm?
4 Apɔsul Pɔl bin gɛt di ɛnkɔrejmɛnt we i bin nid di nɛt afta dɛn pul am na di Sanɛndrin. Di Baybul tɛl wi se: “Di Masta tinap nia am ɛn tɛl am se: ‘Tek kɔrej! Jɔs lɛk aw yu dɔn de prich bɔt mi gud gud wan na Jerusɛlɛm, na so yu gɛt fɔ prich bɔt mi na Rom.’” (Akt 23:11) Dɛn wɔd dɛn de we Jizɔs tɔk bin mek Pɔl biliv se i go sev. I bin no se i gɛt fɔ go na Rom ɛn gɛt chans fɔ prich de bɔt Jizɔs.
“I pas 40 man dɛn we dɔn le ambush fɔ am.”—Akt 23:21
5 Di ɛnkɔrejmɛnt we Pɔl bin gɛt bin kam di rayt tɛm. Di de afta dat, i pas 40 Ju dɛn we bin “plan ɛn swɛ se lɛ bad tin apin to dɛn if dɛn it ɔ drink bifo dɛn kil Pɔl.” Dis “swɛ” ya bin sho se dɛn Ju dɛn de bin dɔn rili mekɔp dɛn maynd fɔ kil Pɔl. Dɛn bin de si am se na swɛ fɔ dɛn if dɛn nɔ ebul du wetin dɛn bin dɔn plan. (Akt 23:12-15) Di chif prist ɛn di bigman dɛn bin gri fɔ lɛ dɛn du wetin dɛn want, ɛn dat na bin fɔ mek dɛn kam wit Pɔl na di Sanɛndrin fɔ mek dɛn aks am kwɛstyɔn dɛn fɔ mek shɔ se wetin dɛn tɔk agens am na tru. Bɔt we dɛn de go na di Sanɛndrin, dɛn wikɛd pipul dɛn de go le ambush fɔ kil Pɔl.
6. Aw dɛn kam fɔ no bɔt di plan fɔ kil Pɔl? Us lɛsin yɔŋ wan dɛn kin lan frɔm dis akawnt?
6 Bɔt Pɔl in sista in bɔypikin bin yɛri bɔt dis plan, ɛn i tɛl Pɔl. Pɔl insɛf bin tɛl di yɔŋman fɔ go tɛl di Roman kɔmanda we na Klɔdiɔs Lisias bɔt am. (Akt 23:16-22) Wan dawt nɔ de se Jiova lɛk yɔŋ wan dɛn lɛk Pɔl in sista in bɔypikin we gɛt maynd fɔ put wetin Gɔd want bifo wetin dɛn want ɛn du ɔl wetin dɛn ebul fɔ mek di Kiŋdɔm wok go bifo.
7, 8. Wetin Klɔdiɔs Lisias bin du fɔ mek shɔ se natin bad nɔ apin to Pɔl?
7 We Klɔdiɔs Lisias we na bin kɔmanda fɔ 1,000 sojaman dɛn yɛri bɔt di bad plan we dɛn gɛt agens Pɔl, wantɛm wantɛm, i mek 470 sojaman dɛn, man dɛn we de yuz spia, ɛn man dɛn we de rayd ɔs kɔmɔt na Jerusɛlɛm da nɛt de ɛn go wit Pɔl sef wan na Sizeria. We dɛn rich na Sizeria, dɛn bin an ova Pɔl to Gɔvnɔ Fɛliks. a Pan ɔl we Sizeria we na bin di Roman kapital fɔ Judia bin gɛt Ju pipul dɛn we bin de de, bɔku pan di pipul dɛn we bin de de na Jɛntayl dɛn. Di ɔganayz we aw dɛn bin de du tin de bin difrɛn frɔm di we aw dɛn bin de du tin na Jerusɛlɛm, usay bɔku pan dɛn bin de fil se dɛn yon rilijɔn bɛtɛ pas ɔda pipul dɛn yon. Sizeria na bin di men ɛdkwata fɔ di Roman sojaman dɛn bak we bin de na Judia.
8 Lisias bin sɛn lɛta to Fɛliks akɔdin to di Roman lɔ fɔ ɛksplen to am wetin dɔn apin. Insay da lɛta de, Lisias bin tɔk se we i kam fɔ no se Pɔl na bin Roman sitizin, i bin fri am frɔm di Ju dɛn fɔ mek dɛn nɔ “kil am.” Lisias bin tɔk bak se Pɔl nɔ du ɛnitin “we fɔ mek i day ɔ de na prizin,” bɔt na bikɔs dɛn bin plan fɔ kil Pɔl na dat mek i sɛn am to Fɛliks so dat di gɔvnɔ sɛf go lisin to wetin di wan dɛn we de agens Pɔl gɛt fɔ se ɛn jɔj di kes.—Akt 23:25-30.
9. (a) Aw Lisias bin sho se i nɔ rɛspɛkt di rayt we Pɔl bin gɛt as Roman sitizin? (b) Wetin mek wi fɔ yuz di rayt we wi gɛt as sitizin dɛn na di kɔntri we wi de?
9 Fɔ se ɔl wetin Lisias bin rayt na tru? Nɔto ɔltin bin kɔrɛkt. I tan lɛk se i bin de tray fɔ gɛt gudnem to di gɔvnɔ. I nɔ bin sev Pɔl jɔs bikɔs i kam fɔ no se in na Roman sitizin. Dɔn bak, Lisias nɔ bin tɔk se i bin mek dɛn “tay [Pɔl] wit tu chen dɛn” ɛn leta i bin se dɛn fɔ “bit am gud gud wan we dɛn de aks am kwɛstyɔn.” (Akt 21:30-34; 22:24-29) Dis tin we Lisias bin du sho se i nɔ bin rɛspɛkt di rayt we Pɔl bin gɛt as Roman sitizin. Tide bak, Setan de yuz pipul dɛn we de na lay lay rilijɔn fɔ mek pipul dɛn mek wi sɔfa, ɛn sɔntɛm dɛn go tray fɔ tek di rayt we wi gɛt fɔ wɔship Gɔd. Bɔt lɛk Pɔl, Gɔd in pipul dɛn fɔ yuz di rayt we dɛn gɛt as sitizin dɛn na dɛn kɔntri ɛn tray fɔ gɛt protɛkshɔn bay we dɛn tɔk to pipul dɛn we de mek lɔ fɔ ɛp dɛn.
“A Gladi fɔ Ɛksplen to Yu” (Akt 23:35–24:21)
10. Us siriɔs kraym dɛn dɛn bin se Pɔl kɔmit?
10 We dɛn bin de na Sizeria, dɛn bin “gayd Pɔl na Ɛrɔd in os” we i bin de wet fɔ di wan dɛn we bin tɔk agens am fɔ kɔmɔt na Jerusɛlɛm. (Akt 23:35) Afta lɛk fayv dez, Ay Prist Ananayas, Tatyulɔs, we na pɔsin we bin de tɔk fɔ pipul dɛn, ɛn sɔm bigman dɛn bin kam. We Tatyulɔs bigin fɔ tɔk, i prez Fɛliks fɔ wetin i de du fɔ di Ju dɛn, ɛn wan dawt nɔ de se i bin du dis fɔ mek Fɛliks gladi fɔ am. b Dɔn we Tatyulɔs stat fɔ tɔk bɔt wetin apin, i bin se Pɔl na “pɔsin we de kɔz trɔbul, i de mek ɔl di Ju dɛn we de ɔlsay na di wɔl tɔn agens di gɔvmɛnt, ɛn na in de bifo di grup we dɛn de kɔl di Nazarin. I tray bak fɔ dɔti di tɛmpul, so wi ol am.” Di ɔda Ju dɛn “jɔyn pan di tɔk ɛn se dɛn tin ya na tru.” (Akt 24:5, 6, 9) Fɔ mek di Ju dɛn we de ɔlsay na di wɔl tɔn agens di gɔvmɛnt, fɔ de bifo bad grup we de kɔz prɔblɛm, ɛn fɔ du tin dɛn we de sho se pɔsin nɔ rɛspɛkt di tɛmpul na bin siriɔs kraym dɛn we go ivin mek pɔsin lɔs in layf.
11, 12. Aw Pɔl bin sho se di tin dɛn we dɛn tɔk agens am na lay?
11 Pɔl in tɛm bin dɔn rich fɔ tɔk. I bigin bay we i tɔk se “a gladi fɔ ɛksplen to yu.” Pɔl bin tɔk klia wan se ɔl wetin dɛn tɔk agens am na lay. Pɔl nɔ bin du ɛnitin fɔ sho se i nɔ rɛspɛkt di tɛmpul, ɛn i nɔ bin tray fɔ mek di Ju dɛn tɔn agens di gɔvmɛnt. I bin tɔk se “sɔm ia dɔn pas” we i nɔ bin de na Jerusɛlɛm, ɛn i bin jɔs kam wit ’gift dɛn’ fɔ di Kristian dɛn we bin po bikɔs it bin shɔtin ɛn dɛn bin de mek dɛn sɔfa. Pɔl bin pin se bifo i ɛnta na di tɛmpul, i bin “klin lɛk aw di Lɔ se” ɛn i bin du ɔl wetin i ebul fɔ mek i gɛt “klin kɔnshɛns bifo Gɔd ɛn mɔtalman.”—Akt 24:10-13, 16-18.
12 Bɔt Pɔl bin gri se i de wɔship in gret gret granpa dɛn Gɔd “lɛk aw di pipul dɛn we dɛn se dɔn mek wan grup de wɔship.” Bɔt i bin pin se i biliv “ɔl di tin dɛn we de na di Lɔ ɛn di Prɔfɛt dɛn.” Jɔs lɛk di man dɛn we bin tɔk agens am, insɛf bin abop se “di wan dɛn we du wetin rayt ɛn di wan dɛn we nɔ du wetin rayt go gɛt layf bak.” Dɔn Pɔl tɛl di wan dɛn we tɔk agens am se: “Lɛ di man dɛn we de ya tɔk fɔ dɛnsɛf di bad tin we dɛn si se a du we a bin de bifo di Sanɛndrin, pas we a bin tɔk lawd wan midul dɛn se: ‘Na bikɔs a biliv se pɔsin we dɔn day go gɛt layf bak, na in mek dɛn de jɔj mi bifo una tide!’”—Akt 24:14, 15, 20, 21.
13-15. Wetin mek wi fɔ si Pɔl as pɔsin we bin sɛt fayn ɛgzampul fɔ prich wit maynd we dɛn kɛr wi go bifo pipul dɛn we de na pawa?
13 Pɔl sɛt fayn ɛgzampul fɔ wi we wi fɔ fala if dɛn kɛr wi go bifo pipul dɛn we de na pawa bikɔs wi de wɔship Gɔd, ɛn dɛn lay se wi de mek fɛt-fɛt de, wi de mek pipul dɛn tɔn agens di gɔvmɛnt, ɔ dɛn tɔk se wi na “bad bad grup.” Pɔl nɔ bin tɔk tin dɛn fɔ mek i gɛt gudnem to di gɔvnɔ lɛk aw Tatyulɔs bin du. Pɔl nɔ bin wɔri ɛn i bin tɔk to di wan dɛn we bin de lisin to am wit rɛspɛkt. I bin tek tɛm pik di wɔd dɛn we i de tɔk ɛn tɔk di tru. Pɔl bin tɔk se i fɔ fayn mek di “Ju dɛn . . . we kɔmɔt na Eshia distrikt” de wit dɛn fɔ tɔk bɔt di bad tin dɛn we dɛn se i du, if dɛn rili gɛt ɛnitin agens am.—Akt 24:18, 19.
14 Di tin we bin impɔtant pas ɔl na we Pɔl nɔ bin fred fɔ tɔk bɔt wetin i biliv. Pɔl bin gɛt maynd bak fɔ tɔk bɔt di biliv we i biliv se di wan dɛn we dɔn day go gɛt layf bak. Ɛn na dis sem tɔk bin kam wit prɔblɛm we i bin de bifo di Sanɛndrin. (Akt 23:6-10) Pɔl bin tɔk siriɔs wan bɔt di op we i gɛt se di wan dɛn we dɔn day go gɛt layf bak we i bin de tɔk fɔ insɛf. Wetin mek? Na bikɔs Pɔl bin de prich bɔt Jizɔs ɛn we i bin gɛt layf bak, ɛn dis na sɔntin we di wan dɛn we bin de agens am nɔ bin gri wit. (Akt 26:6-8, 22, 23) Fɔ tru, di men tin we kɔz di prɔblɛm na di biliv we Pɔl bin biliv pan Jizɔs ɛn fɔ se di wan dɛn we dɔn day go gɛt layf bak.
15 Lɛk Pɔl, wisɛf go ebul fɔ prich wit maynd ɛn gɛt kɔrej frɔm wetin Jizɔs bin tɛl in disaypul dɛn we i se: “Ɔlman go et una bikɔs ɔf mi nem, bɔt di wan we dɔn bia te di ɛnd na in go sev.” Bɔt fɔ se wi fɔ wɔri bɔt wetin fɔ tɔk? Nɔ, Jizɔs bin tɔk sɔntin we rili gi wi kɔnfidɛns. I bin se: “We dɛn de kɛr una go na kɔt, una nɔ wɔri bɔt wetin una go se; una tɔk wetin Gɔd tɛl una fɔ tɔk da tɛm de, bikɔs nɔto una go tɔk, na di oli spirit go tɔk.”—Mak 13:9-13.
“Fɛliks Fred” (Akt 24:22-27)
16, 17. (a) Wetin Fɛliks bin du ɛn tɔk di tɛm we dɛn bin de jɔj Pɔl? (b) Wetin go dɔn mek Fɛliks fred? Wetin bin mek i kɔntinyu fɔ tɔk to Pɔl?
16 Dis nɔto di fɔs tɛm we Gɔvnɔ Fɛliks dɔn yɛri bɔt di tin dɛn we di Kristian dɛn biliv. Di Baybul tɛl wi se: “Bikɔs Fɛliks bin no di tru tin dɛn bɔt dis We, [na so dɛn bin de kɔl Krays in disaypul dɛn bifo dɛn stat fɔ kɔl dɛn Kristian dɛn] i bigin fɛn we mek dɛn go, ɛn tɔk se: ‘Ɛnitɛm we Lisias we na di ami kɔmanda kam, a go disayd una kes.’ Ɛn i tɛl di ami ɔfisa se di man fɔ kɔntinyu fɔ de ɔnda arɛst bɔt mek dɛn gi am sɔm fridɔm, ɛn mek dɛn alaw in pipul dɛn fɔ ɛp am wit di tin dɛn we i nid.”—Akt 24:22, 23.
17 Afta sɔm dez, Fɛliks ɛn in wɛf Drusila we na Ju bin mek Pɔl kam to dɛn, ɛn dɛn bin “lisin to am we i de ɛksplen wetin i min fɔ biliv pan Krays Jizɔs.” (Akt 24:24) Bɔt we Pɔl bigin fɔ tɔk bɔt “aw pɔsin fɔ du wetin rayt, aw pɔsin fɔ kɔntrol insɛf, ɛn di jɔjmɛnt we fɔ kam, Fɛliks fred.” Sɔntɛm na bikɔs in kɔnshɛns bin de mɔna am bikɔs ɔf di wikɛd tin dɛn we i bin dɔn du. So i tɛl Pɔl se: “Go fɔs, we a gɛt chans a go sɛn kɔl yu bak.” Fɛliks bin si Pɔl bɔku tɛm afta dat, bɔt nɔto bikɔs i bin want fɔ no bɔt di trut, bɔt na bikɔs i bin op se Pɔl go brayb am.—Akt 24:25, 26.
18. Wetin mek Pɔl bin tɔk to Fɛliks ɛn in wɛf bɔt “aw pɔsin fɔ du wetin rayt, aw pɔsin fɔ kɔntrol insɛf, ɛn di jɔjmɛnt we fɔ kam”?
18 Wetin mek Pɔl bin tɔk to Fɛliks ɛn in wɛf bɔt “aw pɔsin fɔ du wetin rayt, aw pɔsin fɔ kɔntrol insɛf, ɛn di jɔjmɛnt we fɔ kam”? Mɛmba se dɛn bin want fɔ no wetin i min fɔ “biliv pan Krays Jizɔs.” Bikɔs Pɔl bin no se dɛn na pipul dɛn we de du mami ɛn dadi biznɛs di we aw Gɔd nɔ want, we wikɛd, ɛn we nɔ de trit pipul dɛn fia wan, i bin want fɔ mek dɛn no wetin di wan dɛn we want fɔ bi Jizɔs in disaypul dɛn fɔ du. Di tin dɛn we Pɔl tɔk bin sho di difrɛns bitwin di rayt we aw Gɔd de du tin ɛn in prinsipul dɛn, ɛn di we aw Fɛliks ɛn in wɛf bin de liv dɛn layf. Dis fɔ dɔn ɛp dɛn fɔ si se ɔlman gɛt fɔ ansa to Gɔd fɔ wetin i de tink bɔt, wetin i de tɔk, ɛn di tin dɛn we i de du, bɔt di tin we bin impɔtant pas aw Fɛliks go jɔj Pɔl na aw Gɔd gɛt fɔ jɔj dɛn. I go bi se na dat mek Fɛliks bin “fred”!
19, 20. (a) We wi de du wi prichin wok, wetin wi go du we wi mit pipul dɛn we de mek lɛk se dɛn rili want fɔ no di trut bɔt dɛn nɔ rɛdi fɔ chenj di we aw dɛn de liv dɛn layf? (b) Aw wi no se Fɛliks nɔto bin Pɔl in padi?
19 We wi de du wi prichin wok, sɔntɛm wi go mit pipul dɛn lɛk Fɛliks. Fɔs, i go tan lɛk se dɛn want fɔ no mɔ bɔt di trut, bɔt dɛn nɔ rɛdi fɔ chenj di we aw dɛn de liv dɛn layf fɔ gri wit wetin di Baybul de tich. Wi fɔ rili tek tɛm we wi de tray fɔ ɛp dɛn kayn pipul dɛn de. Ɛn lɛk Pɔl, wi fɔ tek tɛm tɛl dɛn wetin dɛn nid fɔ du fɔ mek Gɔd gladi fɔ dɛn. Sɔntɛm di trut go tɔch dɛn at. Bɔt if dɛn sho klia wan se dɛn nɔ rɛdi fɔ chenj di we aw dɛn de liv dɛn layf, wi fɔ lɛf dɛn ɛn go fɛn pipul dɛn we de rili fɛn di trut.
20 Wi si klia wan aw Fɛliks bin de fil insay dɛn wɔd dɛn ya: “We tu ia pas, Pɔshɔs Fɛstɔs tek Fɛliks in ples; ɛn bikɔs Fɛliks bin want fɔ gɛt gud nem wit di Ju dɛn, i nɔ fri Pɔl.” (Akt 24:27) Dis sho klia wan se Fɛliks nɔto bin Pɔl in padi. Fɛliks bin no se di wan dɛn we bin de na “Di We” nɔto pipul dɛn we de tɔn ɔda pipul dɛn agens di gɔvmɛnt ɛn nɔto bin rebɛl dɛn. (Akt 19:23) I bin no bak se Pɔl nɔ bin pwɛl di Roman lɔ. Bɔt pan ɔl dat, i mek Pɔl kɔntinyu fɔ de na prizin fɔ mek i go “gɛt gud nem wit di Ju dɛn.”
21. Wetin bin apin to Pɔl we Pɔshɔs Fɛstɔs bi gɔvnɔ? Wetin bin kɔntinyu fɔ ɛnkɔrej Pɔl?
21 Lɛk aw wi si na di las vas na Akt chapta 24, Pɔl bin stil de na prizin we Pɔshɔs Fɛstɔs tek Fɛliks in ples as gɔvnɔ. Dis bin mek dɛn jɔj Pɔl in kes bɔku tɛm, ɛn i bin go bifo bɔku jɔj dɛn. Fɔ tru, dɛn bin “kɛr [Pɔl] go bifo kiŋ ɛn gɔvnɔ dɛn.” (Lyuk 21:12) As wi go lan, Pɔl bin prich leta to di pɔsin we bin pawaful pas ɔl insay in tɛm. Pan ɔl we dɛn tin dɛn bin mit Pɔl, i nɔ bin ɛva stɔp fɔ gɛt fet. Wan dawt nɔ de se i bin kɔntinyu fɔ gɛt ɛnkɔrejmɛnt frɔm di wɔd dɛn we Jizɔs bin tɔk we i se: “Tek kɔrej.”
a Luk di bɔks we gɛt di taytul “ Fɛliks, di Gɔvnɔ na Judia.”
b Tatyulɔs bin tɛl Fɛliks tɛnki fɔ di “pis” we i mek di neshɔn gɛt. Bɔt di tru na dat we Gɔvnɔ Fɛliks bin de rul, pis nɔ bin rili de, ɛn in yon tɛm bin wɔs pas di wan dɛn we rul bifo am ɛn afta am na Judia. Dɔn bak, ɔda lay we i lay na we i se di Ju dɛn de tɛl Fɛliks “plɛnti plɛnti tɛnki,” fɔ di chenj dɛn we i dɔn mek. Di tru na dat di Ju dɛn nɔ bin lɛk Fɛliks bikɔs i bin de mek tin tranga fɔ dɛn ɛn i bin de mek dɛn sɔfa.—Akt 24:2, 3.
