1-3. (a) Wetin mek apɔsul Pɔl in at bin pwɛl bad bad wan we i go na Atɛns? (b) Wetin wi go lan we wi stɔdi bɔt Pɔl in ɛgzampul?

 PƆL in at bin pwɛl bad bad wan. I bin de na Atɛns we bin de na Gris, we na bin di men say fɔ lan. Na de dɛn bin tich masta sabi bukman dɛn lɛk Sokretis, Plato, ɛn Aristɔtul. Di pipul dɛn na Atɛns bin rili lɛk Gɔd biznɛs. Pɔl bin si bɔku lay lay gɔd dɛn ɛnisay i tɔn. Dɛn bin de na di tɛmpul dɛn, say usay pipul dɛn kin gɛda, ɛn na strit, bikɔs di pipul dɛn na Atɛns bin de wɔship bɔku lay lay gɔd dɛn. Pɔl no aw Jiova we na di tru Gɔd de tink bɔt fɔ wɔship aydɔl. (Ɛks. 20:​4, 5) Jɔs lɛk Jiova, dis fetful apɔsul bin et aydɔl dɛn!

² Pɔl bin shɔk bikɔs ɔf di tin dɛn we i bin si we i go na di makit. I bin si bɔku statyu dɛn fɔ di gɔd Amis we bin de sho in prayvet pat dɛn. Di statyu dɛn bin de na di nɔt-wɛst kɔna we de na di men rod fɔ go na di makit. Bɔku ples dɛn bin de na di makit usay dɛn bin de wɔship aydɔl dɛn. Aw dis apɔsul we gɛt zil go prich na dis ples we ful-ɔp wit aydɔl wɔship? Fɔ se i go kɔntrol di we aw i de fil ɛn tɔk bɔt tin dɛn we di pipul dɛn ɔlrɛdi gri wit? Fɔ se i go ebul ɛp ɛnibɔdi fɔ kam fɔ no di tru Gɔd?

³ Di tin dɛn we Pɔl bin tɛl di bukman dɛn na Atɛns we dɛn tɔk bɔt na Akt 17:​22-31 na fayn ɛgzampul bɔt aw fɔ bi pɔsin we de tɔk wit sɛns, we de tek tɛm tɔk, ɛn we de ɔndastand. We wi stɔdi Pɔl in ɛgzampul, wi go lan aw fɔ yuz wetin pipul dɛn ɔlrɛdi no fɔ ɛp di wan dɛn we de lisin to wi fɔ ɔndastand.

4, 5. Usay Pɔl bin prich we i bin de na Atɛns? Uskayn pipul dɛn i bin gɛt fɔ prich to?

⁴ Pɔl bin go na Atɛns di tɛm we i bin de du in sɛkɔn mishɔnari wok arawnd di ia 50 afta Krays. a We Pɔl bin de wet fɔ Saylas ɛn Timoti fɔ kam na Beria, “i go na di sinagɔg ɛn bigin fɔ ɛp di Ju dɛn . . . fɔ ɔndastand di Skripchɔ dɛn” lɛk aw i dɔn yus fɔ du. I go bak “na di makit” usay i go ebul fɔ si sitizin dɛn we nɔto bin Ju we bin de na Atɛns. (Akt 17:​17) Di makit  na Atɛns bin de na di nɔt-wɛst pat na di Akropolis, ɛn i bin big lɛk 12 eka land. Di makit nɔto bin jɔs say usay pipul dɛn bin de go bay ɛn sɛl; na bin say usay pipul dɛn de gɛda. Wan buk bin tɔk se “dis ples na bin di men say na di siti usay dɛn bin de du biznɛs, usay pipul dɛn we de pan pɔlitiks bin de mit, ɛn usay dɛn bin de du tin dɛn we gɛt fɔ du wit dɛn kɔlchɔ.” Di pipul dɛn na Atɛns bin lɛk fɔ kam togɛda fɔ tɔk bɔt wetin dɛn tink.

⁵ Di pipul dɛn we Pɔl bin mit na di makit bin at fɔ tɔk to. Sɔm pan dɛn na bin Ɛpikyurian dɛn ɛn Stoik pipul dɛn we bin de go na skul dɛn we dɛn de tich mɔtalman sɛns. b Di Ɛpikyurian pipul dɛn biliv se layf kam bay chans. Na dis we dɛn bin de tink bɔt layf: “Nid nɔ de fɔ fred Gɔd; Day nɔ at; Yu ebul fɔ du gud ɛn bia we bad tin apin.” Di Stoik pipul dɛn bin biliv se na we pɔsin alaw in maynd fɔ gayd am pan ɔl wetin i de du nain nɔmɔ go mek in layf bɛtɛ. Dɛn nɔ bin biliv se Gɔd na Pɔsin. Di Ɛpikyurian ɛn Stoik pipul dɛn nɔ bin biliv se we pɔsin day, i go gɛt layf bak lɛk aw Krays in disaypul dɛn bin de tich. Wan dawt nɔ de se di aydia we dɛn tu grup dɛn ya bin gɛt nɔ bin gri wit di tru tin dɛn we tru Kristian dɛn fɔ biliv we Pɔl bin de prich bɔt.

6, 7. Wetin sɔm pan di Grik man dɛn we lan buk bin du we dɛn yɛri di tin dɛn we Pɔl de tich? Wetin pipul dɛn de du tide we fiba wetin dɛn man dɛn ya bin du?

⁶ Wetin di Grik pipul dɛn we lan buk bin du we dɛn yɛri di tin dɛn we Pɔl bin de tich? Sɔm pan dɛn bin yuz wɔd dɛn we min fɔ “tɔk bɔku,” ɔ “pik sid.” (Luk di stɔdi not fɔ Akt 17:​18, nwtsty.) We wan masta sabi bukman bin de tɔk bɔt dis Grik wɔd, i bin tɔk se: “Dɛn bin de yuz dis wɔd fɔ tɔk bɔt wan smɔl bɔd we bin de go ɛn pik pik tin fɔ it, ɛn leta dɛn bin de yuz dis wɔd fɔ pipul dɛn we bin de go ɛn pik af-af it ɛn ɔda tin dɛn we pipul dɛn dɔn trowe na di makit. Leta, dɛn bin de yuz da wɔd de bak fɔ tɔk bɔt pipul dɛn we bin de go ɛn gɛda infɔmeshɔn, ɛn dɛn bin de yuz am mɔ fɔ di wan we nɔ bin ebul ɔndastand di infɔmeshɔn we i bin de gɛda.” I tan lɛk dɛn man ya we lan buk bin de se Pɔl nɔ gɛt sɛns, ɛn i bin jɔs de ripit wetin ɔda pipul dɛn dɔn tɔk. Bɔt as wi go si, Pɔl nɔ bin fred bikɔs dɛn bin de kɔl am dɛn kayn nem dɛn de.

⁷ Na di sem tin de apin bak tide. Bɔku tɛm as Jiova Witnɛs dɛn, dɛn kin kɔl wi bad bad nem dɛn bikɔs ɔf di tin dɛn we wi biliv we kɔmɔt na di Baybul. Fɔ ɛgzampul, sɔm ticha dɛn kin tich se nɔto Gɔd mek ɔltin. Layf jɔs kam bay chans ɛn if yu gɛt sɛns yu rili nid fɔ biliv dat. So i tan lɛk se dɛn de si di wan dɛn we nɔ biliv se layf kam bay chans as pipul dɛn we nɔ gɛt sɛns. Dɛn kayn man dɛn ya we lan buk go want fɔ mek pipul dɛn tink se we wi de tɔk bɔt wetin di Baybul se ɛn sho pruf dɛn we de sho se na Gɔd mek ɔltin, dɛn se wi jɔs kin gɛda infɔmeshɔn we wi nɔ ɔndastand. Bɔt dat nɔ kin mek wi fred, bifo dat, wi kin tɔk wit kɔnfidɛns we wi de tɔk bɔt wetin wi biliv fɔ se Pɔsin de we gɛt sɛns we mek ɔltin we gɛt layf na dis wɔl, ɛn da pɔsin de na Jiova Gɔd.​—Rɛv. 4:​11.

8. (a) Wetin sɔm pipul dɛn bin du we dɛn yɛri di tin dɛn we Pɔl de prich bɔt? (b) Wetin mek dɛn kɛr Pɔl go na di Ariopagɔs? (Luk di futnot.)

 ⁸ Sɔm pipul dɛn bin du difrɛn tin we dɛn yɛri di tin dɛn we Pɔl bin de tich na di makit. Dɛn bin tɔk se “i tan lɛk se i de prich bɔt ɔda gɔd dɛn.” (Akt 17:​18) Na tru se Pɔl bin de tɛl di pipul dɛn na Atɛns bɔt nyu gɔd dɛn? Dis na bin siriɔs prɔblɛm. I fiba wan pan di kes dɛn we bin mek dɛn jɔj Sokretis ɛn kil am lɔng tɛm bifo dis tɛm. So wi nɔ sɔprayz fɔ no se dɛn bin kɛr go Pɔl na dɛn Ariopagɔs ɛn tɛl am fɔ ɛksplen di tin dɛn we i bin de tich we bin strenj to di pipul dɛn na Atɛns. c Aw Pɔl go sho se wetin i de prich bɔt na tru to pipul dɛn we nɔ bin sabi di Skripchɔ dɛn?

9-11. (a) Aw Pɔl bin tray fɔ yuz di tin dɛn we di pipul dɛn ɔlrɛdi no fɔ prich to dɛn? (b) Aw wi go falamakata Pɔl in ɛgzampul we wi de du di prichin wok?

⁹ Pɔl in at bin rili pwɛl we i si we ɔlman bin de wɔship aydɔl. Bifo i tray  fɔ atak di wan dɛn we de wɔship aydɔl wit wamat, i bin kɔntrol insɛf. Pɔl bin tek tɛm yuz di tin dɛn we di pipul dɛn ɔlrɛdi no fɔ ɛp dɛn fɔ biliv di tin dɛn we i bin de tich. I bigin bay we i tɔk se: “Man dɛn na Atɛns, a dɔn si se pan ɛnitin we una de du, i luk lɛk se una de fred di gɔd dɛn mɔ pas aw ɔda pipul dɛn de fred dɛn.” (Akt 17:​22) I tan lɛk Pɔl bin de tɔk se, ‘A si se una rili lɛk Gɔd biznɛs.’ Pɔl bin yuz sɛns fɔ tɛl dɛn tɛnki fɔ we dɛn lɛk Gɔd biznɛs. Pɔl bin no se sɔntɛm di wan dɛn we blayn bikɔs ɔf di lay lay tin dɛn we dɛn biliv nɔ go lisin to am. Pɔl insɛf bin no se tɛm bin de we i “bin de du tin dɛn [we i] nɔ bin no ɛn [i] nɔ bin gɛt fet.”​—1 Tim. 1:​13.

¹⁰ Pɔl bin yuz wetin di pipul dɛn ɔlrɛdi no bay we i bin tɔk bɔt di pruf fɔ sho se di pipul dɛn na Atɛns rili lɛk Gɔd biznɛs. I bin si wan ɔlta we dɛn mek “To wan Gɔd we Wi Nɔ Sabi.” Akɔdin to wan buk, “na bin kɔmɔn tin fɔ mek di Grik pipul dɛn ɛn ɔda pipul dɛn mek ɔlta dɛn to ‘gɔd dɛn we dɛn nɔ sabi,’ bikɔs dɛn bin de fred se mek dɛn nɔ lɛf sɔm gɔd dɛn we dɛn nid fɔ wɔship fɔ mek dɛn nɔ vɛks pan dɛn.” Dɛn kayn ɔlta dɛn ya de sho se di pipul dɛn na Atɛns biliv se Gɔd de we dɛn nɔ sabi. Pɔl bin yuz dis ɔlta fɔ mek i stat fɔ prich bɔt di gud nyuz. I bin ɛksplen se: “Na dis Gɔd we una de wɔship pan ɔl we una nɔ sabi am, na in a de tɛl una bɔt.” (Akt 17:​23) Pan ɔl we Pɔl bin tek in tɛm fɔ tɔk to di pipul dɛn, di tin dɛn we i bin tɔk bin tɔch dɛn at. I nɔ bin de prich bɔt nyu gɔd lɛk aw sɔm pipul dɛn bin de se. I bin tɛl dɛn bɔt di Gɔd we dɛn nɔ sabi, dat na, di tru Gɔd.

¹¹ Aw wi go falamakata Pɔl we wi de prich? If wi tek tɛm wach, sɔntɛm, wi go si se di pɔsin we wi de prich to rili lɛk Gɔd biznɛs, ɔ sɔntɛm wi go si di pɔsin wɛr sɔntin we gɛt fɔ du wit rilijɔn ɔ i gɛt sɔntin na in os ɔ na in kɔmpawnd we gɛt fɔ du wit rilijɔn. Sɔntɛm wi go tɔk se: ‘A si se yu na pɔsin we rili lɛk Gɔd biznɛs. A bin de op se a go tɔk to pɔsin we lɛk Gɔd biznɛs.’ We wi tek tɛm sho se wi rɛspɛkt di we aw di pɔsin de fil bɔt rilijɔn, wi go yuz wetin di pɔsin ɔlrɛdi no fɔ prich to am. Mɛmba se, wi gol nɔto fɔ yuz wetin ɔda pipul dɛn biliv we i kam pan rilijɔn fɔ jɔj dɛn. Tɛm bin de we bɔku pan di wan dɛn we wi ɔl de wɔship Jiova naw bin biliv di lay lay tin dɛn we rilijiɔn de tich.

12. Aw Pɔl bin ajɔst di we aw i bin de tich fɔ fit di wan dɛn we de lisin to am?

¹² Pɔl bin dɔn yuz wetin pipul dɛn ɔlrɛdi no, bɔt fɔ se i go ebul fɔ kɔntinyu fɔ du dat we i de prich? Bikɔs Pɔl bin no se di wan dɛn we de lisin to am rili sabi aw di Grik pipul dɛn de tink ɛn dɛn nɔ sabi di Skripchɔ dɛn, dat bin mek i ajɔst di we aw i de tich difrɛn we dɛn. Fɔs, i bin tɔk bɔt tin dɛn we kɔmɔt na di Baybul, bɔt i nɔ bin kot frɔm di Skripchɔ dɛn dayrɛkt wan. Sɛkɔn, i bin mek di wan dɛn we de lisin to am fil se i ɔndastand dɛn, ɛn wan we aw i bin du dat na bay we i bin de yuz wɔd dɛn lɛk “wi.” Tɔd, i bin kot frɔm Grik buk dɛn we sho se sɔm pan di tin dɛn we i bin de tich gri wit di tin dɛn we de insay dɛn yon buk dɛn. Naw, lɛ wi tɔk bɔt  di pawaful tin dɛn we Pɔl bin tɔk. Us impɔtant tru tin dɛn Pɔl bin mek di pipul dɛn na Atɛns no bɔt di Gɔd we dɛn nɔ bin sabi?

13. Wetin Pɔl bin ɛksplen bɔt di Wan we mek di wɔl? Wetin Pɔl in mɛsej bin min?

¹³ Na Gɔd mek di wan ol wɔl. Pɔl bin tɔk se: “Di Gɔd we mek di wɔl ɛn ɔltin we de insay de, we na di Masta fɔ ɛvin ɛn di wɔl, nɔ de liv na tɛmpul dɛn we dɛn mek wit an.” d (Akt 17:​24) Di wɔl nɔ kam bay chans. Na di tru Gɔd mek ɔltin. (Sam 146:​6) Di Masta we de rul ɔlman na ɛvin ɛn na di wɔl nɔ ebul fɔ de na tɛmpul dɛn we mɔtalman dɛn mek wit dɛn yon an lɛk Atina ɔ ɔda gɔd dɛn we de gɛt glori nɔmɔ bikɔs ɔf di tɛmpul, shrayn, ɛn ɔlta dɛn we dɛn de. (1 Kiŋ 8:​27) Pɔl in mɛsej bin sho klia wan se: Di tru Gɔd pawaful pas ɛni aydɔl we mɔtalman mek we de na tɛmpul dɛn we mɔtalman mek wit dɛn yon an.​—Ayz. 40:​18-26.

14. Aw Pɔl bin sho se Gɔd nɔ abop pan mɔtalman dɛn?

¹⁴ Gɔd nɔ abop pan mɔtalman. Di wan dɛn we de wɔship aydɔl bin de kɛr go fayn fayn klos dɛn, dia gift dɛn, ɔ ivin kɛr go it ɛn drink dɛn lɛk se di aydɔl dɛn nid dɛn kayn tin dɛn de! Bɔt i go bi se sɔm pan di Grik pipul dɛn we lan buk we Pɔl bin de prich to bin biliv se Gɔd nɔ nid ɛnitin frɔm mɔtalman. If na so i bi, wan dawt nɔ de se dɛn bin gri wetin Pɔl bin tɔk we i se Gɔd nɔ “nid ɛnibɔdi fɔ ɛp am bikɔs i nɔ nid ɛnitin.” Fɔ tru, natin nɔ de we mɔtalman go ebul fɔ gi di Wan we mek ɔltin. Bifo dat, na in gi mɔtalman wetin dɛn nid, dat na, “layf, briz fɔ blo, ɛn ɔltin.” I gi dɛn bak di ren, di san, ɛn fayn grɔn fɔ plant. (Akt 17:​25; Jɛn. 2:​7) So Gɔd we na di wan we de gi nɔ abop pan mɔtalman dɛn we na dɛn de gɛt di tin dɛn we i de gi.

15. Wetin Pɔl bin se bɔt di biliv we di pipul dɛn na Atɛns biliv se dɛn bɛtɛ pas di wan dɛn we nɔto Grik? Us impɔtant lɛsin wi lan frɔm in ɛgzampul?

¹⁵ Na Gɔd mek mɔtalman. Di pipul dɛn na Atɛns bin biliv se dɛn bɛtɛ pas di wan dɛn we nɔto Grik. Bɔt fɔ mek prawd bikɔs yu tink se yu kɔntri ɔ yu kɔlɔ bɛtɛ pas ɔda pipul dɛn yon de agens di tru tin dɛn na di  Baybul. (Dit. 10:​17) Pɔl bin tek tɛm ɛn yuz sɛns fɔ tɔk bɔt dis impɔtant tɔpik. We Pɔl bin tɔk se “na frɔm wan man [Gɔd] mek ɔl di neshɔn dɛn,” dat go dɔn mek di wan dɛn we de lisin to am tink. (Akt 17:​26) I bin de tɔk bɔt di akawnt we de na Jɛnɛsis we tɔk bɔt Adam, we na frɔm am ɔl mɔtalman kɔmɔt. (Jɛn. 1:​26-28) Bikɔs ɔl mɔtalman dɛn kɔmɔt frɔm wan pɔsin, no kɔntri ɔ kɔlɔ nɔ bɛtɛ pas in kɔmpin. Di wan dɛn we bin de lisin to Pɔl bin ɔndastand wetin i bin de tɔk bɔt. Wi lan wan impɔtant lɛsin frɔm in ɛgzampul. Pan ɔl we wi want fɔ tek tɛm ɛn nɔ pin we wi de du wi prichin wok, wi nɔ fɔ jɔs tɛl pipul dɛn tin dɛn we go mek dɛn gladi ɛn we dɛn gri wit we wi de prich.

16. Wetin di Wan we mek ɔltin want fɔ mɔtalman?

¹⁶ Gɔd bin mek mɔtalman fɔ kam nia am. Ivin if di wan dɛn we Pɔl bin de tɔk to we bin lan buk bin dɔn de agyu bɔt di rizin we mek mɔtalman de alayv, dɛn nɔ fɔ ɛva ebul fɔ ɛksplen di rizin fayn fayn wan. Bɔt Pɔl bin sho klia wan di rizin we mek di wan we mek ɔltin mek mɔtalman, dat na, fɔ mek “dɛn go luk fɔ Gɔd. If dɛn rili tray tranga wan fɔ fɛn am, dɛn go si am. Infakt, i nɔ de fa frɔm ɛniwan pan wi.” (Akt 17:​27) I pɔsibul fɔ sabi di Gɔd we di pipul dɛn na Atɛns nɔ bin sabi. I nɔ de fa frɔm di wan dɛn we rili want fɔ fɛn am ɛn lan bɔt am. (Sam 145:​18) Notis se Pɔl bin yuz di wɔd “wi,” we sho se insɛf de pat pan di pipul dɛn we nid fɔ “luk” ɛn “rili tray tranga wan fɔ fɛn” Gɔd.

17, 18. Wetin mek mɔtalman fɔ want fɔ kam nia Gɔd? Wetin wi kin lan frɔm di we aw Pɔl bin tray fɔ rich di wan dɛn we bin de lisin to am dɛn at?

¹⁷ Mɔtalman fɔ want fɔ kam nia Gɔd. Pɔl bin tɔk se na Gɔd “gi wi layf, na in mek wi de muv, ɛn na in mek wi de na ya.” Sɔm masta sabi  bukman dɛn tɔk se di wɔd dɛn we Pɔl tɔk gri wit di wɔd dɛn we wan man we nem Ɛpimɛnaydis we kɔmɔt na Krit ɛn we bin de rayt pɔɛm dɛn insay di ia 600 bifo Krays tɔk. Ɛn dis man “na bin impɔtant pɔsin na Atɛns we i kam to di tradishɔn dɛn we gɛt fɔ du wit rilijɔn na Atɛns.” Pɔl bin gi wan ɔda rizin we mek mɔtalman fɔ want fɔ kam nia Gɔd. I bin se: “Sɔm pan una pipul dɛn we de rayt pɔɛm bin dɔn se, ‘Wi na in pikin dɛn.’” (Akt 17:​28) Mɔtalman nid fɔ gɛt tayt padi biznɛs wit Gɔd bikɔs na in mek di fɔs man we ɔl mɔtalman kɔmɔt frɔm. Pɔl bin yuz sɛns fɔ kot dayrɛkt wan frɔm Grik raytin dɛn we di wan dɛn we de lisin to am rili rɛspɛkt so dat i go tɔch dɛn at. e Fɔ falamakata Pɔl in ɛgzampul, sɔntɛnde, wi kin kot frɔm buk dɛn we de tɔk bɔt istri, ɛnsayklopidia dɛn, ɔ ɔda buk dɛn we gri wit wetin wi de se. Fɔ ɛgzampul, if wi kot sɔntin we pɔsin we dɛn rili rɛspɛkt tɔk na buk ɔ ɔdasay, dat go ɛp pɔsin we nɔto Jiova Witnɛs fɔ biliv wi we wi de tɔk bɔt usay sɔm patikyula tin dɛn we lay lay rilijɔn dɛn de du kɔmɔt.

¹⁸ Te to dis tɛm we Pɔl bin de tɔk, i bin yuz sɛns fɔ ajɔst we i bin de tɔk bɔt di men tin dɛn we na di tru bɔt Gɔd fɔ fit di wan dɛn we bin de lisin to am. Wetin di apɔsul bin want fɔ mek di wan dɛn we bin de lisin to am na Atɛns du wit dis impɔtant infɔmeshɔn? I nɔ bin westɛm fɔ tɛl dɛn wetin dɛn fɔ du we i bin kɔntinyu fɔ tɔk.

19, 20. (a) Aw Pɔl bin tek tɛm sho se i nɔ mek sɛns fɔ wɔship aydɔl dɛn we mɔtalman mek? (b) Wetin di wan dɛn we bin de lisin to Pɔl bin nid fɔ du?

¹⁹ Pɔl bin de ɛnkɔrej di wan dɛn we bin de lisin to am fɔ du sɔntin. We Pɔl bin de kot bak frɔm di Grik raytin dɛn, i bin tɔk se: “Bikɔs wi na Gɔd in pikin dɛn, wi nɔ fɔ tink se Gɔd tan lɛk gold, silva, ston, ɔ lɛk sɔntin we mɔtalman kav ɛn dizayn.” (Akt 17:​29) Wetin mek Gɔd we mek mɔtalman go bi aydɔl, we na mɔtalman insɛf sɛf mek? Di tin dɛn we Pɔl tek tɛm fɔ tich sho se i nɔ mek sɛns fɔ wɔship aydɔl dɛn we mɔtalman mek. (Sam 115:​4-8; Ayz. 44:​9-20) We Pɔl tɔk se “wi nɔ fɔ . . . ,” dat bin mek di wan dɛn we i bin de prich to nɔ fil bad tumɔs bikɔs ɔf di strɔng wɔnin we i bin de gi dɛn.

²⁰ Di apɔsul bin mek dɛn no klia wan se dɛn nid fɔ du sɔntin bay we i tɔk se: “Tɛm bin de we pipul dɛn bin de du dɛn tin ya bikɔs dɛn nɔ no [dɛn imajin se Gɔd go gladi we mɔtalman dɛn bin de wɔship aydɔl dɛn] ɛn Gɔd nɔ du dɛn ɛnitin, bɔt naw i de tɛl ɔlman we de ɔlsay se dɛn fɔ ripɛnt.” (Akt 17:​30) Sɔm pan di wan dɛn we bin de lisin to Pɔl go dɔn shɔk we dɛn yɛri se dɛn fɔ ripɛnt. Tru di pawaful tin dɛn we Pɔl bin tɔk, i bin mek dɛn no klia wan se na Gɔd mek dɛn gɛt layf ɛn na in dɛn go ansa to. Dɛn bin nid fɔ fɛn Gɔd, lan di tru tin bɔt am, ɛn liv dɛn layf di kayn we we gri wit di tru tin dɛn we dɛn dɔn lan. Fɔ di pipul dɛn na Atɛns, dis bin  min se dɛn nid fɔ no se fɔ wɔship aydɔl dɛn na sin, ɛn dɛn nid fɔ lɛf fɔ wɔship dɛn.

21, 22. Us pawaful wɔd dɛn Pɔl bin yuz fɔ dɔn fɔ tɔk? Wetin in wɔd dɛn min fɔ wi tide?

²¹ Pɔl bin dɔn fɔ tɔk wit dɛn pawaful wɔd dɛn ya: “[Gɔd] dɔn pik wan de we i go jɔj di wan ol wɔl di rayt we. I go yuz wan man we i dɔn pik fɔ du dat, ɛn i dɔn pruv se dat go apin bay we i gi di man layf bak.” (Akt 17:​31) Jɔjmɛnt De de kam, ɛn dat na siriɔs rizin we fɔ mek wi luk fɔ ɛn fɛn di tru Gɔd! Pɔl nɔ tɛl wi di Pɔsin in nem we dɛn dɔn pik fɔ jɔj. Bifo dat, Pɔl bin tɔk wan fayn tin bɔt dis Jɔj. I bin se: I bin liv as mɔtalman, i day, ɛn Gɔd gi am layf bak!

²² Da pawaful we aw Pɔl bin dɔn fɔ tɔk min bɔku tin fɔ wi. Wi no se di jɔj we Gɔd dɔn pik na Jizɔs Krays we bin gɛt layf bak. (Jɔn 5:​22) Wi no se Jɔjmɛnt De go bi wan tawzin ia, ɛn i go kam jisnɔ. (Rɛv. 20:​4, 6) Wi nɔ de fred Jɔjmɛnt De bikɔs wi no se i go kam wit bɔku bɔku blɛsin dɛn fɔ di wan dɛn we dɛn go jɔj se dɛn fetful. Wi shɔ se di op we wi gɛt fɔ tumara bambay go mɔs kam tru bikɔs ɔf di big big mirekul we bin apin, dat na, we Jizɔs Krays gɛt layf bak!

23. Us difrɛn difrɛn tin dɛn pipul dɛn bin du we dɛn yɛri di tin dɛn we Pɔl bin tɔk?

²³ Pipul dɛn bin du difrɛn tin dɛn we dɛn yɛri wetin Pɔl bin de tɔk. “Sɔm pan dɛn bigin fɔ laf” we dɛn yɛri se we pɔsin day, i go gɛt layf bak. Ɔda wan dɛn bin tɔk wit rɛspɛkt bɔt dɛn nɔ bin disayd fɔ ripɛnt ɛn biliv di Masta. Dɛn bin tɔk se: “Wi go lisin to yu bak ɔda tɛm fɔ no mɔ bɔt dis.” (Akt 17:​32) Bɔt sɔm pipul dɛn we nɔ bin bɔku bin lisin to wetin i se. Di akawnt se: “Sɔm pipul dɛn jɔyn am ɛn dɛn biliv di Masta. Sɔm pan dɛn na Dayonisiɔs we na bin jɔj na di kɔt na Ariopagɔs, ɛn wan uman we nem Damaris ɛn ɔda wan dɛn.” (Akt 17:​34) Na di sem we pipul dɛn kin biev we wi de du di prichin wok. Sɔm pipul dɛn go provok wi ɛn ɔda wan dɛn go tɔk fayn to wi, bɔt dɛn nɔ kin want fɔ lisin. Bɔt wi kin rili gladi we sɔm pipul dɛn kin lisin to di Kiŋdɔm mɛsej ɛn bi Kristian.

24. Wetin wi kin lan frɔm di tin dɛn we Pɔl bin tɔk we i bin de na di Ariopagɔs?

²⁴ We wi tek tɛm tink bɔt di tin dɛn we Pɔl bin tɔk, wi go lan bɔku tin dɛn bɔt aw wi go tek tɛm tɔk bɔt wi pɔynt dɛn di kayn we we go mek di wan dɛn we de lisin to wi biliv wi, ɛn aw wi kin ajɔst wetin wi de se fɔ fit di wan dɛn we de lisin to wi. Pantap dat, wi kin lan bɔt wetin mek wi nid fɔ tek tɛm tɔk ɛn peshɛnt wit di wan dɛn we blayn bikɔs ɔf di tin dɛn we lay lay rilijɔn dɛn de tich. Wi kin lan bak impɔtant lɛsin fɔ se wi nɔ fɔ ɛva fred fɔ tɔk di tru tin dɛn na di Baybul jɔs bikɔs wi nɔ want di wan dɛn we de lisin to wi fɔ vɛks. We wi de falamakata apɔsul Pɔl in ɛgzampul, i go mek wi rili sabi tich we wi de du di prichin wok. Pantap dat, ovasia dɛn go bi gud ticha dɛn we kwalifay fɔ tich na di kɔngrigeshɔn. Dat go mek wi rili rɛdi fɔ ɛp ɔda pipul dɛn fɔ “luk fɔ Gɔd . . . ɛn fɛn am.”​—Akt 17:​27.