1-4. Wetin mek Pɔl de go na Jerusɛlɛm? Wetin go apin to am we i rich de?

 WE PƆL bin de kɔmɔt Maylitɔs, di brɔda dɛn at bin pwɛl. I nɔ bin izi fɔ Pɔl ɛn Lyuk fɔ lɛf di ɛlda dɛn na Ɛfisɔs we dɛn bin dɔn lɛk. Di tu mishɔnari dɛn tinap na di say usay bot kin slam. Dɛn pak dɛn bag dɛn wit tin dɛn we dɛn go nid fɔ di patrol. Dɔn bak, dɛn de kɛr go mɔni we dɛn bin dɔn kɔntribyut fɔ di Kristian dɛn na Judia we bin nid ɛp, ɛn dɛn want fɔ mek shɔ se dɛn rich wit dis gift.

² Briz bigin fɔ blo, ɛn di ship lɛf di say we bot dɛn kin slam we gɛt nɔys. Di tu man dɛn wit sɛvin pan dɛn kɔmpin dɛn we dɛn ɔl de travul, de wach di brɔda ɛn sista dɛn we dɛn at pwɛl. (Akt 20:​4, 14, 15) Dɛn kɔntinyu fɔ wev te dɛn lɛf fɔ si dɛn.

³ Fɔ lɛk tri ia, Pɔl bin dɔn wok wit di ɛlda dɛn na Ɛfisɔs. Bɔt naw, i de go na Jerusɛlɛm bikɔs di oli spirit dayrɛkt am fɔ go de. Pɔl bin gɛt aydia bɔt wetin go apin to am. Bifo dis tɛm, i bin tɛl di ɛlda dɛn se: “Di oli spirit de dayrɛkt mi fɔ go na Jerusɛlɛm, pan ɔl we a nɔ no wetin go apin to mi de. Bɔt ɛni siti we a go, di oli spirit de tɛl mi se dɛn gɛt fɔ put mi na prizin ɛn prɔblɛm dɛn go kam mi we.” (Akt 20:​22, 23) Pan ɔl di denja, Pɔl bin rɛdi fɔ ‘fala di dayrɛkshɔn we di spirit bin gi am’ fɔ go na Jerusɛlɛm. I valyu in layf, bɔt fɔ du wetin Gɔd want impɔtant to am pas ɛni ɔda tin.

⁴ Na da sem we de yu de fil? We wi gi wi layf to Jiova, wi prɔmis am wit ɔl wi at se na wetin i want go bi di tin we impɔtant pas ɔl ɔda tin na wi layf. Wi go bɛnifit we wi tɔk bɔt di ɛgzampul we Pɔl bin sɛt we sho se i gɛt fet.

5. Usay Pɔl ɛn in kɔmpin dɛn pas we dɛn bin de travul go na Taya?

⁵ Di bot usay Pɔl ɛn in kɔmpin dɛn lod bin “go stret.” Dat min se, di briz bin de blo biɛn dɛn te dɛn rich leta na Kɔs da sem de de. (Akt 21:​1) I tan lɛk se di bot bin stɔp de fɔ di nɛt bifo dɛn go na Rods ɛn Patara. Di  brɔda dɛn bin tek big ship na Patara na di sawt pat insay Eshia Maynɔ we bin kɛr dɛn go dayrɛkt na Taya, insay Fonishia. We dɛn bin de go, dɛn pas na “Sayprɔs Ayland . . . bay di lɛft say [na di si pɔt].” (Akt 21:​3) Wetin mek Lyuk, we rayt Akt, tɔk se dɛn pas Sayprɔs?

6. (a) Wetin mek di si we Pɔl bin si Sayprɔs go dɔn ɛnkɔrej am? (b) As yu de tink bɔt aw Jiova dɔn blɛs ɛn ɛp yu, aw dat de mek yu fil?

⁶ Sɔntɛm Pɔl bin pɔynt to di ayland ɛn tɔk bɔt di ɛkspiriɛns dɛn we i bin gɛt de. Insay Pɔl in fɔs mishɔnari patrol, we na lɛk nayn ia bifo dis tɛm, in, Banabas, ɛn Jɔn Mak, bin mit wan lukin-grɔn man we nem Ɛlimas, we bin de agens dɛn prichin wok. (Akt 13:​4-12) We Pɔl si di ayland ɛn tink bɔt wetin bin apin to am de, sɔntɛm dat go dɔn ɛnkɔrej am ɛn gi am trɛnk fɔ wetin gɛt fɔ apin to am. Wisɛf go ebul bɛnifit we wi tink bɔt aw Gɔd dɔn blɛs wi ɛn ɛp wi fɔ bia prɔblɛm dɛn. We wi tek tɛm tink da kayn we de, i go ɛp wi fɔ fil di sem we lɛk Devid we rayt se: “Bɔku prɔblɛm kin mit pɔsin we de du wetin rayt, bɔt Jiova kin pul am pan ɔl dɛn prɔblɛm dɛn ya.”​—Sam. 34:​19, NWT.

7. Wetin di wan dɛn we bin de travul du we dɛn rich na Taya?

⁷ Pɔl bin ɔndastand se i impɔtant fɔ mek Kristian dɛn spɛn tɛm togɛda, ɛn i bin rili want fɔ de wit in kɔmpin Kristian dɛn. We dɛn rich na Taya, Lyuk rayt se, “Wi luk fɔ di disaypul dɛn ɛn si dɛn.” (Akt 21:​4) We di wan dɛn we bin de travul no se dɛn kɔmpin Kristian dɛn de na Taya, dɛn bin luk fɔ dɛn ɛn sɔntɛm dɛn bin lɔj to dɛn. Wan pan di wɔndaful blɛsin dɛn fɔ wɔship Jiova di rayt we na dat, ilɛk usay wi go, wi gɛt brɔda ɛn sista dɛn we biliv di sem tin we wi biliv ɛn we go wɛlkɔm wi. Di wan dɛn we lɛk Gɔd ɛn we de wɔship am di rayt we gɛt padi dɛn ɔlsay na di wɔl.

8. Aw wi fɔ ɔndastand Akt 21:​4?

⁸ We Lyuk bin de tɔk bɔt di sɛvin dez we dɛn bin de na Taya, i bin tɔk sɔntin we sɔntɛm go kɔnfyus wi, i bin se: “Di spirit mek dɛn [di brɔda dɛn na Taya] tɛl Pɔl bɔku tɛm se mek i nɔ mas fut na Jerusɛlɛm.” (Akt 21:​4) Fɔ se Jiova bin dɔn chenj in maynd? Fɔ se na in bin de dayrɛkt Pɔl fɔ mek i nɔ go na Jerusɛlɛm igen? Nɔ. Di spirit bin dɔn mek Pɔl no se dɛn go mek i sɔfa we i go na Jerusɛlɛm, bɔt i nɔ bin tɛl am mek i nɔ go de. I tan lɛk se di oli spirit bin mek di brɔda dɛn na Taya no se Pɔl go sɔfa if i go na Jerusɛlɛm. So bikɔs dɛn bisin bɔt Pɔl, dɛn bin tɛl am se mek i nɔ go na di siti. Wi kin ɔndastand se dɛn nɔ bin want mek ɛnitin bad apin to Pɔl. Bɔt pan ɔl dat, bikɔs Pɔl bin dɔn mekɔp in maynd fɔ du wetin Jiova want, i bin kɔntinyu fɔ travul go na Jerusɛlɛm.​—Akt 21:​12.

9, 10. (a) Wetin go dɔn kam na Pɔl in maynd we i yɛri wetin di brɔda dɛn na Taya bin tɛl am? (b) Na uskayn we bɔku pipul dɛn na di wɔl tide de tink? Aw dat difrɛn frɔm wetin Jizɔs bin se?

⁹ We Pɔl yɛri wetin di brɔda dɛn bin tɛl am, sɔntɛm i go dɔn mɛmba se sɔntin lɛk dis bin dɔn apin to Jizɔs di tɛm we i bin tɛl in disaypul dɛn se i de go na Jerusɛlɛm, dɛn go mek i sɔfa bad bad wan, ɛn dɛn go ivin kil am. Bikɔs Pita bin de sɔri fɔ Jizɔs, i bin tɛl am se: “Masta, sɔri fɔ yusɛf; dis nɔ go apin to yu.” Jizɔs ansa am se: “Lɛf mi, Setan! Yu de blɔk mi we, bikɔs yu nɔ de tink lɛk aw Gɔd de tink, yu de tink lɛk mɔtalman.” (Mat. 16:​21-23) Jizɔs bin dɔn mekɔp in maynd fɔ du di wok we Jiova dɔn gi am ɛn fɔ sho se i nɔ jɔs bisin bɔt insɛf. Na di sem we Pɔl insɛf bin fil. Jɔs lɛk apɔsul Pita, di brɔda dɛn na Taya nɔ bin min bad fɔ Pɔl, bɔt dɛn nɔ bin ɔndastand wetin Gɔd bin want fɔ apin.

¹⁰ Bɔku pipul dɛn tide kin lɛk we tin izi fɔ dɛn, dɛn nɔ kin want fɔ du ɛnitin we at fɔ du. Bɔku pipul dɛn de pik rilijɔn we izi fɔ fala, usay dɛn kin lɛf dɛn fɔ du tin di we aw dɛn want. Nɔto da kayn we de Jizɔs bin want in disaypul dɛn fɔ tink. I bin tɛl in disaypul dɛn se: “If ɛnibɔdi want fɔ fala mi, i nɔ fɔ du wetin in want, i fɔ es in tik we i go sɔfa pan, ɛn  kɔntinyu fɔ fala mi.” (Mat. 16:​24) I mek sɛns fɔ fala Jizɔs, ɛn na di rayt tin dat fɔ du, bɔt nɔto izi tin fɔ du.

11. Aw di disaypul dɛn na Taya sho se dɛn lɛk Pɔl? Aw dɛn bin sɔpɔt am?

¹¹ Di tɛm bin de kam nia fɔ lɛ Pɔl, Lyuk, ɛn di ɔda wan dɛn we bin de wit dɛn kɔntinyu dɛn patrol. Di we aw di Baybul tɔk bɔt di tin we apin we dɛn bin de kɔmɔt na Taya de rili tɔch wi at. I sho di lɔv we di brɔda dɛn na Taya bin gɛt fɔ Pɔl ɛn di sɔpɔt we dɛn bin sɔpɔt am na in prichin wok. Di man dɛn, uman dɛn, ɛn pikin dɛn go wit Pɔl ɛn di wan dɛn we bin de wit am na bich. Dɛn ɔl nil dɔŋ ɛn pre togɛda, dɔn dɛn tɛl dɛn baybay. Afta dat, Pɔl, Lyuk, ɛn in kɔmpin dɛn lod na ɔda bot ɛn kɔntinyu fɔ go te dɛn kam na Tolemeis, usay dɛn mit di brɔda dɛn ɛn de wit dɛn fɔ wan de.​—Akt 21:​5-7.

12, 13. (a) Aw Filip bin sho se i bin de wok fetful wan? (b) Aw Filip bi gud ɛgzampul fɔ Kristian papa dɛn tide?

¹² Lyuk tɔk se, leta Pɔl ɛn di wan dɛn we bin de travul wit am go na Sizeria. We dɛn rich de, dɛn “go na Filip in os ɛn de wit am. Filip na pɔsin we de prich di gud nyuz.” a (Akt 21:​8) Dɛn go dɔn gladi fɔ si Filip. Arawnd 20 ia bifo dis tɛm we dɛn bin de na Jerusɛlɛm, in na bin wan pan di man dɛn we di apɔsul dɛn bin pik fɔ ɛp dɛn fɔ sheb sheb it na di kɔngrigeshɔn we dɛn bin jɔs dɔn gɛt. I bin dɔn te we Filip bin dɔn de prich di gud nyuz wit zil. Mɛmba se di tɛm we di disaypul dɛn bin skata bikɔs pipul dɛn bin de mek dɛn sɔfa, Filip bin go na Sameria ɛn bigin fɔ prich de. Leta, i bin prich to wan bigman we kɔmɔt na Itiopia ɛn baptayz am. (Akt 6:​2-6; 8:​4-13, 26-38) Dis sho se Filip bin dɔn de du in wok fetful wan!

¹³ Filip bin stil gɛt zil fɔ prich. Bɔt na Sizeria i bin de naw ɛn i stil bizi de du di prichin wok, na dat mek Lyuk kɔl am “pɔsin we de prich di gud nyuz.” Wi si bak se i bin dɔn gɛt 4 galpikin dɛn we bin de prɔfɛsay, we sho se dɛn bin de falamakata dɛn papa in ɛgzampul. b (Akt 21:​9) Dis sho  se Filip bin de du ɔl wetin i ebul fɔ mek in famili kɔntinyu fɔ go bifo pan Gɔd biznɛs. Kristian papa dɛn tide kin fala in fayn ɛgzampul bay we dɛn de de bifo fɔ du di prichin wok ɛn ɛp dɛn pikin dɛn fɔ lɛk fɔ prich.

14. Na us bɛnifit wi shɔ se di brɔda dɛn bin gɛt we Pɔl go fɛn dɛn? Us chans wisɛf gɛt tide?

¹⁴ Ɛnisay Pɔl bin de go, i bin de luk fɔ in kɔmpin Kristian dɛn ɛn spɛn tɛm wit dɛn. Fɔ tru, di brɔda dɛn na dɛn tɔŋ dɛn de bin de gladi fɔ du gud to Pɔl ɛn di wan dɛn we bin de travul wit am. Wan dawt nɔ de se dis bin de gi dɛn chans fɔ “ɛnkɔrej [dɛnsɛf].” (Rom. 1:​11, 12) Wisɛf gɛt chans fɔ du di sem tin dɛn tide. Wi kin rili bɛnifit we wi mek sakit ovasia ɛn in wɛf kam de to wi, ilɛksɛf wi tink se wi os nɔ fayn bɛtɛ.​—Rom. 12:​13.

15, 16. Us mɛsej Agabɔs kam wit? Aw dis mek di wan dɛn we yɛri am fil?

¹⁵ We Pɔl bin de to Filip, wan ɔda pɔsin we dɛn gɛt rɛspɛkt fɔ bin kam we nem Agabɔs. Ɔl di wan dɛn we bin de na Filip in os bin no se Agabɔs na prɔfɛt; i bin dɔn prɔfɛsay se tɛm go kam we tin fɔ it go rili shɔtin insay di tɛm we Klɔdiɔs bin de rul. (Akt 11:​27, 28) Sɔntɛm dɛn bin de wɔnda: ‘Wetin mek Agabɔs kam? Us mɛsej i kam wit?’ As dɛn bin de wach am, i tek Pɔl in bɛlt, we na wan lɔŋ pisis we dɛn kin rap rawnd pɔsin in wes, usay dɛn kin put mɔni ɛn ɔda tin dɛn. Agabɔs tek am ɛn tay in yon fut ɛn an dɛn wit am. Dɔn i bigin tɔk. Di mɛsej we i kam wit bin rili siriɔs, i se: “Di oli spirit se, ‘Na so di Ju dɛn na Jerusɛlɛm go tay di man we gɛt dis bɛlt ɛn an ova am to pipul dɛn we kɔmɔt na ɔda neshɔn dɛn.’”​—Akt 21:​11.

¹⁶ Dis prɔfɛsi bin sho se Pɔl go go na Jerusɛlɛm. I sho bak se di prich we i go prich to di Ju dɛn, go mek dɛn “an ova am to pipul dɛn we kɔmɔt na ɔda neshɔn dɛn.” Di prɔfɛsi bin rili tɔch di wan dɛn we bin de de. Lyuk rayt se: “We wi yɛri dis, wi ɛn di wan dɛn we bin de de bigin fɔ beg am  mek i nɔ go ɔp na Jerusɛlɛm. Dɔn Pɔl se: ‘Wetin una de du we una de kray ɛn tray fɔ mek a chenj mi maynd? A want mek una no se a nɔ jɔs rɛdi fɔ mek dɛn tay mi, bɔt a rɛdi bak fɔ day na Jerusɛlɛm fɔ Masta Jizɔs in nem.’”​—Akt 21:​12, 13.

17, 18. Aw Pɔl bin sho se i dɔn mekɔp in maynd fɔ du wetin Gɔd want? Wetin di brɔda dɛn bin du?

¹⁷ Tray fɔ imajin wetin bin apin. Lyuk ɛn di ɔda brɔda dɛn de beg Pɔl fɔ mek i nɔ kɔntinyu di patrol. Sɔm pan dɛn bin de kray. Di lɔv we di brɔda dɛn bin sho fɔ Pɔl bin rili tɔch in at, ɛn i mek i tɔk se dɛn de tray fɔ mek i “chenj in maynd,” ɔ as sɔm Baybul dɛn put am, “dɛn de mek in at pwɛl.” Pan ɔl dat, i bin stil dɔn mekɔp in maynd, ɛn jɔs lɛk aw i bin dɔn tɛl di brɔda dɛn na Taya, i nɔ go alaw di beg we dɛn de beg am ɔ di kray we dɛn de kray fɔ mek i chenj in maynd. Bifo dat, i ɛksplen to dɛn wetin mek i fɔ go. I bin rili sho se i gɛt zil ɛn maynd! Jɔs lɛk aw Jizɔs bin du, Pɔl insɛf bin dɔn mekɔp in maynd ɛn rɛdi fɔ go na Jerusɛlɛm. (Ibru. 12:​2) Nɔto we Pɔl bin de fɛn fɔ day, bɔt ivin if i kam to dat, Pɔl bin no se na big big ɔnɔ i gɛt fɔ day as Jizɔs Krays in disaypul.

¹⁸ Wetin di brɔda dɛn du? Dɛn bin sho se dɛn gɛt rɛspɛkt fɔ wetin Pɔl disayd. Wi rid se: “We wi nɔ ebul fɔ chenj in maynd, wi lɛf am ɛn se: ‘Mek wetin Jiova want apin.’” (Akt 21:​14) Di wan dɛn we bin de tray fɔ mek Pɔl nɔ go na Jerusɛlɛm nɔ bin tawa fɔ du wetin dɛn want. Dɛn bin lisin to Pɔl ɛn gri wit wetin i se. Dɛn bin kam fɔ no se na dat Jiova want pan ɔl we i nɔ bin izi fɔ lɛ dɛn gri. Pɔl bin de du sɔntin we go mek i day. I fɔ bin izi fɔ Pɔl if di wan dɛn we lɛk am nɔ bin tray fɔ stɔp am.

19. Us fayn lɛsin wi lan frɔm wetin bin apin to Pɔl?

¹⁹ Wi lan fayn lɛsin frɔm wetin bin apin to Pɔl: Wi nɔ fɔ ɛva tray fɔ stɔp ɔda pipul dɛn fɔ mek dɛn nɔ sav Gɔd di kayn we we de sho se dɛn nɔ jɔs bisin bɔt dɛnsɛf. Wi fɔ mɛmba dis lɛsin we i kam to difrɛn tin dɛn, nɔto jɔs tin dɛn we gɛt fɔ du wit layf ɛn day. Fɔ ɛgzampul, i nɔ izi fɔ lɛ bɔku Kristian mama ɛn papa dɛn wach we dɛn pikin dɛn de lɛf os fɔ go sav Jiova fa fa say, bɔt dɛn dɔn mekɔp dɛn maynd se dɛn nɔ go mek dɛn pikin dɛn at pwɛl as dɛn de du da kayn tin de. Filis we de na Ingland mɛmba aw i bin fil we in wangren galpikin bin stat fɔ du mishɔnari wok na Afrika. Filis se: “Da tɛm de nɔ bin izi fɔ mi. A bin de fil am we a no se i go de fa we. Mi at bin pwɛl ɛn a bin gladi fɔ am di sem tɛm. A bin pre bɔt dat bɔku. Bɔt na wetin mi pikin bin dɔn disayd fɔ du, ɛn a nɔ ɛva tray fɔ tɛl am mek i kam bak, bikɔs a bin dɔn tich am ɔltɛm se i fɔ put di Kiŋdɔm fɔs na in layf. I dɔn pas 30 ia we i de sav na ɔda kɔntri dɛn, ɛn a de tɛl Jiova tɛnki ɛvride fɔ we i de sav am fetful wan.” I rili fayn fɔ lɛ wi ɛnkɔrej wi brɔda ɛn sista we de sho se dɛn nɔ jɔs bisin bɔt dɛnsɛf!

20, 21. Wetin sho se Pɔl bin want fɔ de wit di brɔda ɛn sista dɛn? Wetin mek i bin want fɔ de wit di wan dɛn we dɛn ɔl biliv di sem tin?

²⁰ So Pɔl bin rɛdi fɔ travul ɛn kɔntinyu fɔ go, ɛn brɔda dɛn we de sho se dɛn de sɔpɔt am wit ɔl dɛn at bin go wit am. Frɔm we Pɔl bigin fɔ go na Jerusɛlɛm, in ɛn di wan dɛn we bin de go wit am bin de tray fɔ spɛn tɛm wit dɛn Kristian brɔda ɛn sista dɛn. We dɛn bin de na Taya, dɛn bin go fɛn di disaypul dɛn ɛn kɔntinyu fɔ de wit dɛn fɔ sɛvin dez. We dɛn rich Tolemeis, dɛn bin grit dɛn brɔda ɛn sista dɛn ɛn spɛn wan de wit dɛn. We dɛn go na Sizeria, dɛn bin de na Filip in os fɔ sɔm dez. Dɔn sɔm pan di disaypul dɛn na Sizeria bin go lɛf Pɔl ɛn in kɔmpin dɛn na Jerusɛlɛm, usay Manesin we na wan pan di fɔs fɔs disaypul dɛn bin wɛlkɔm dɛn na in os. Dɔn we dɛn rich na Jerusɛlɛm, Lyuk rayt se: “Di brɔda dɛn wɛlkɔm wi fayn fayn wan.”​—Akt 21:​17.

²¹ Wi si klia wan se Pɔl bin want fɔ de wit di wan dɛn we dɛn ɔl biliv di sem tin. Di brɔda ɛn sista dɛn bin rili ɛnkɔrej apɔsul Pɔl jɔs lɛk aw di brɔda ɛn sista dɛn de ɛnkɔrej wi tide. Wan dawt nɔ de se na da ɛnkɔrejmɛnt de bin ɛp Pɔl fɔ bia we in ɛnimi dɛn bin tray fɔ kil am.