SƐKSHƆN 7
Wetin Gɔd Bin Prɔmis we Dɛn Prɔfɛt dɛn Tɔk Bɔt
DI PRƆFƐT dɛn we bin de trade trade bin sho se dɛn gɛt fet pan Gɔd. Di we aw dɛn bin de liv dɛn layf bin sho se dɛn biliv di tin dɛn we Gɔd prɔmis. Wetin na sɔm pan di tin dɛn we Gɔd bin prɔmis?
Jɔs afta Adam ɛn Iv sin na di gadin we bin de na Idɛn, Gɔd prɔmis se i go pik sɔmbɔdi we go nyamanyama “di snek” in ed ɛn dɔnawe wit am. Di snek na di “big dragɔn . . . , we dɛn kɔl Debul ɔ Setan.” (Jɛnɛsis 3:14, 15; Rɛvɛleshɔn 12:9, 12) So di prɔfɛt dɛn bin de wet fɔ sɔmbɔdi we go kam fɔ ɛp dɛn. Udat na dis pɔsin?
Afta 2,000 ia dɔn pas we Jiova tɔk dat, i bin prɔmis prɔfɛt Ebraam se di pɔsin go bi wan pan in pikin dɛn. Gɔd bin tɛl Ebraam se: “Na yu grampikin pikin . . . a go tek fɔ blɛs ɔl di pipul dɛn na di wɔl.”—Di Apɔsul Dɛn Wok [Akt] 3:25.
Insay di ia 1473 bifo Krays, Gɔd bin tɛl prɔfɛt Mozis mɔ tin dɛn bɔt dis “pikin.” Mozis bin tɛl di Izrɛlayt dɛn se: “PAPA GƆD we na dɛn PAPA GƆD go mek wan pan dɛn bi prɔfɛt, ɛn dɛn fɔ lisin to am ɛn du ɔl wetin i tɛl dɛn fɔ du.” (Ditarɔnɔmi 18:15) Jɔs lɛk Mozis we na Ebraam in pikin, dis prɔfɛt sɛf go bi wan pan Ebraam in pikin dɛn.
Dis prɔfɛt go bi wan pan Devid in pikin bak ɛn insɛf go bi kiŋ. Gɔd bin promis Kiŋ Devid se: “Wɛn Devid in tɛm go dɔn dɔn ɛn i dɔn day, i go mek shɔ se na Devid in blɔd go bi kiŋ ɛn na so Devid in jɛnareshɔn dɛn go bi kiŋ te go.” (Sɛkɛn Samiɛl 7:12, 13) Gɔd tɔk bak se dɛn go kɔl dis pikin we go kɔmɔt na Devid in layn “Prins ɔf pis” ɛn i tɔk bak se: “Fɔ in gɔvmɛnt in bɛtɛ wan ɛn fɔ kol at, dat go de sote go, na Devid in tron ɛn nain kindɔm, fɔ bigin di kindɔm ɛn mek i tinap wit jɔstis ɛn fɔ waka tret wit PAPA GƆD, frɔm naw, sote go.” (Ayzaya 9:6, 7) Fɔ tru, dis lida we de du wetin rayt go mek pis de ɔlsay na di wɔl ɛn mek ɔlman du wetin rayt. Bɔt ustɛm i go kam?
Di “pikin” we Gɔd bin tɔk bɔt go . . . kɔmɔt frɔm Ebraam, bi prɔfɛt lɛk Mozis, kɔmɔt na Devid in layn, kam insay di ia 29, nyamanyama di snek we na Setan
Leta, enjɛl Gebrɛl bin tɛl prɔfɛt Daniɛl se: “A wan mek yu no ɛn ɔndastand se, frɔm di tɛm we dɛn tɔk se mek di pipul dɛn kam bak to PAPA GƆD ɛn bil Jerusɛlɛm, te di tɛm we di wan we dɛn dɔn anɔynt, we na prins, go kam, dat go bi sɛvin wik. Dɛn fɔ siksti tu wik.” (Daniɛl 9:25) Sɛvin wik plɔs 62 wik go gi wi 69 wik. Dɛn 69 wik ya nɔ min wik dɛn we gɛt sɛvin dez. Ɛni wan de pan dɛn 69 wik ya min wan ia. So fɔ no ɔmɔs ia de insay di 69 wik wi fɔ tayms 69 tayms 7 ia. Dis go gi wi 483 ia. Dis 483 ia bin bigin frɔm 455 bifo Krays to di ia 29. *
Yu tink se di mɛsaya we go bi prɔfɛt lɛk Mozis ɛn we na di “pikin” we dɛn dɔn de wet fɔ bin rili kam insay di ia 29? Lɛ wi si.
^ par. 8 Rid pej 197 to pej 199 insay wan buk we gɛt di taytul Wetin Rili di Baybul De Tich? Na Jiova Witnɛs dɛn mek am.
