GƆD bin wɔn in savant dɛn fɔ rɛdi bikɔs dɛn go gɛt fɔ tɛst dɛn fet. Gɔd in Wɔd tɔk se: “Ɔltɛm una fɔ de wach, bikɔs Setan we de fɛt una, de go ɔlɔbɔt lɛkɛ aŋri layɔn, fɔ fɛn udat in go fɔdɔm pan.” (Pita In Fɔs Lɛta 5:​8) Aw Setan kin tray fɔ ambɔg wi fet?

Setan kin yuz ɔda pipul dɛn ɛn ivin di wan dɛn we yu lɛk fɔ mek yu stɔp fɔ lan wetin de insay di Oli Skripchɔ dɛn. Na dat mek Jizɔs bin tɔk se: “Yu yon fambul go bi di wan we et yu pas ɔl.” (Matyu 10:​36) Yu padi dɛn ɛn fambul dɛn we yu rili rɛspɛkt, nɔ no di fayn tin dɛn we de insay Gɔd in Wɔd. Ɔ sɔntɛm, dɛn go de fred bɔt wetin ɔda pipul dɛn tink. Di skripchɔ dɛn se: “I nɔ fayn fɔ lɛ yu de mɛmba tumɔs bɔt wetin pipul de tink bɔt yu, wans yu put yu trɔs pan PAPA GƆD, yu sef.” (Prɔvabs 29:​25) If yu lɛf fɔ lan bɔt wetin de insay di Oli Skripchɔ dɛn jɔs fɔ mek yu padi ɛn fambul dɛn gladi, yu tink se dat go mek Gɔd gladi? Nɔ, dat nɔ go mek Gɔd gladi! Bɔt if wi sho se wi gɛt rial fet, Gɔd go ɛp wi bikɔs “wi nɔto dɛn pipul we go tɔn bak ɛn tap fɔ fala Gɔd, so wi nɔ go sev. Bɔt wi biliv Gɔd, so dat i go sev wi ɛn wi go de sote go.”—Di Ibru Pipul Dɛn 10:​39.

Yu mɛmba Dumas we wi bin dɔn tɔk bɔt. We i bin jɔs bigin fɔ stɔdi di Skripchɔ dɛn, in wɛf bin de provok am. But leta, in wɛf bin jɔyn am fɔ lan di tin dɛn we de na Gɔd in Wɔd. Semweso, if yu kɔntinyu fɔ du wetin rayt, yu go mek yu padi dɛn ɛn di wan dɛn we yu lɛk jɔyn yu fɔ lan bɔt Gɔd. Bɔku tɛm, wi nɔ go nid fɔ “tɔk to [wi fambul] dɛn bɔt Gɔd igen, . . . bikɔs dɛn go si se” wi “de waka tret” ɛn wi “de fred Gɔd.”—Pita In Fɔs Lɛta 3:​1, 2.

Setan kin mek pipul dɛn tink bak se dɛn tu bizi so dɛn nɔ gɛt chans fɔ stɔdi di Skripchɔ dɛn. I kin want fɔ mek di prɔblɛm dɛn we de na di wɔl, di tin dɛn we kin mek pipul dɛn wɔri, ɛn mɔni biznɛs, fɔ mek Gɔd in Wɔd “nɔ gɛt ples fɔ prɛd na dɛn at.” (Mak 4:​19) Nɔ tink dis kayn we atɔl! Gɔd in Wɔd se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ  no Jizɔs Krays, we yu sɛn kam to dɛn.” (Jɔn 17:​3) Fɔ tru, i rili impɔtant fɔ mek yu kɔntinyu fɔ lan bɔt Gɔd ɛn Jizɔs we na di Mɛsaya, bikɔs dat go mek yu gɛt layf we go de sote go na Paradays!

Tink bɔt Mozis we bin de na di kiŋ in os na Ijipt. Mozis bin fɔ dɔn ebul fɔ gɛt bɔku jɛntri, pawa, ɛn bɔku pipul dɛn fɔ dɔn no am. Bɔt Mozis bin si am se “i bɛtɛ mek i sɔfa wit Gɔd in pipul dɛn, pas fɔ mek i gladi fɔ du bad we i no se da gladi de nɔ go te.” Wetin mek? Na bikɔs “i bin de go lɛkɛ pɔsin we de si Gɔd we mɔtalman nɔ de si.” (Di Ibru Pipul Dɛn 11:​24, 25, 27) Fɔ tru, Mozis bin rili gɛt fet pan Gɔd. I bin put Gɔd biznɛs fɔs na in layf, ɛn Gɔd bin rili blɛs am fɔ dat. If yusɛf du di sem tin Gɔd go blɛs yu.

Setan go yuz difrɛn we dɛn fɔ ambɔg di fet we wi gɛt. Bɔt yu kin mek Setan nɔ ebul yu. Gɔd in Wɔd tɛl wi se: “Una tinap fɔ fɛt Setan, i go rɔnawe go lɛf una.” (Jems 4:​7) Aw yu go mek Setan nɔ ebul yu?

Go de stɔdi di Oli Skripchɔ dɛn. Rid Gɔd in Wɔd ɛnide. Go de stɔdi wetin Gɔd in Wɔd se ɛn du di tin dɛn we yu de lan. If yu de du dat, yu go “wɛr di klos we Gɔd gi . . . fɔ tek fɛt” Setan ɛn win am pan ɔl di kɔni kɔni we dɛn we i de pul.—Lɛta Fɔ Ɛfisɔs 6:​13.

Go de spɛn tɛm wit pipul dɛn we gɛt rial fet. Luk fɔ di wan dɛn we de rid, stɔdi, ɛn du wetin di Oli Skripchɔ dɛn se. Dɛn kayn pipul ya de tink bɔt “aw wi go ɛp wisɛf mek wi go lɛk wi kɔmpin dɛn ɛn du gud to dɛn.” Ɛn aw wi go “kɔrej wi kɔmpin dɛn.”—Di Ibru Pipul Dɛn 10:​24, 25.

Kam nia Jiova. Pre to Gɔd lɛ i ɛp yu ɛn abop pan am. Nɔ ɛva fɔgɛt se Gɔd want fɔ ɛp yu. Gɔd in Wɔd advays se: “Una lɛf ɔltin we de wɔri una na Gɔd in an, bikɔs i bisin bɔt una.” (Pita In Fɔs Lɛta 5:​6, 7, NW) Ɛn Gɔd in Wɔd se: “Gɔd we de du ɛnitin we i prɔmis fɔ du, nɔ go mek una fil fɔ du ɛni bad tin we una nɔ go gɛt pawa fɔ lɛf; bɔt wɛn una fil fɔ du bad, da sem tɛm de Gɔd go mek una ebul tinap traŋa ɛn i go sho una wetin fɔ du mek una nɔ go du di bad tin we una bin want fɔ du.”—Fɔs Lɛta Fɔ Kɔrint 10:​13.

Setan bin tɛl Gɔd se if pɔsin de sɔfa i nɔ go kɔntinyu fɔ sav Am. Bɔt yu gɛt di chans fɔ sho se Setan na layman! Gɔd tɛl wi se: “Mi pikin, sho se yu gɛt sɛns ɛn mek a gladi, so a go ebul ansa ɛnibɔdi we briŋ fityay to mi.” (Prɔvabs 27:​11) So mekɔp yu maynd fɔ sho se yu gɛt rial fet!