PIPUL dɛn de wɔship bɔku gɔd dɛn. Bɔt di Oli Skripchɔ dɛn tich se na wangren tru Gɔd de. In kayn nɔ de, i gɛt pawa pas ɔlman, ɛn i go de sote go. Na in mek ɔltin we de na ɛvin ɛn dis wɔl, ɛn na in gi wi layf. Na in nɔmɔ wi fit fɔ wɔship.

Gɔd gɛt nem. I bin tɛl Mozis se: “Tɛl di Izrɛlayt dɛn se, na PAPA GƆD [“Jiova,” NW] we una fɔstɛm-papa dɛn dat na di PAPA GƆD we Ebraam, Ayzak, ɛn Jekɔb bin de wɔship sɛn yu to dɛn. Na mi nem dis sote go. Na dis nem ya ɔl di jɛnareshɔn dɛn go de yuz fɔ kɔl mi.” (Ɛksodɔs 3:​15) Na lɛk 7,000 tɛm so di nem Jiova de insay di Oli Skripchɔ dɛn. Sam 83:​18 tɔk se: “Lɛ dɛn ɔl no se, yu na PAPA GƆD [“Jiova,” NW] di PAPA GƆD Ɔlmayti lɛ dɛn no se na yu wangren na PAPA GƆD fɔ di wɔl.”

No mɔtalman nɔ wande si Gɔd. Gɔd bin tɛl Mozis se: “A nɔ go mek yu si mi fes, bikɔs ɛnibɔdi we si mi fes go day.” (Ɛksodɔs 33:​20) Na ɛvin Gɔd de ɛn mɔtalman nɔ go ebul fɔ si am. I bad fɔ mek aydɔl ɛn i bad fɔ pre to aydɔl, pikchɔ, ɔ ɛnitin we pipul dɛn mek we tinap fɔ Gɔd. Jiova Gɔd bin yuz Mozis fɔ tɛl in pipul dɛn se: “Una nɔ fɔ mek nɔn aydɔl; ɔ ɛnitin we fiba sɔntin ɔp na ɛvin, ɔ dɔŋ na di wɔl, ɔ tin we de ɔnda wata ɔ ɔnda di grɔn. Una nɔ fɔ butu to ɛni lay lay gɔd fɔ wɔship am bikɔs mi GƆD we na una PAPA GƆD, a nɔ want wan rayval.” (Ɛksodɔs 20:​2-5) Leta, Gɔd bin yuz di prɔfɛt Ayzaya fɔ tɔk se: “Na mi na PAPA GƆD, [“Jiova,” NW] na dat na mi nem; a nɔ de gi mi glori to ɛni ɔda pɔsin, ɔ mi prez to dɛn lay lay gɔd.”—Ayzaya 42:​8.

Sɔm pipul dɛn biliv se Gɔd de bɔt dɛn nɔ de si am as pɔsin we wi go ebul fɔ sabi ɔ as pɔsin we wi go ebul fɔ go nia. Pipul dɛn fil se Gɔd na pɔsin we wi jɔs nid fɔ fred nɔto pɔsin we wi fɔ lɛk. Wetin yu tink? Yu tink se Gɔd rili bisin bɔt yu? Yu tink se yu go ebul fɔ no am ɛn ivin go nia am? Lɛ wi si wetin di Skripchɔ dɛn se bɔt di kayn pɔsin we Gɔd bi.