Lɛta we di Gɔvnin Bɔdi fɔ Jiova Witnɛs dɛn Rayt
Di Baybul tɔk se: “Unasɛf fɔ bigin lan ɔda pipul” dɛn. (Ibru 5:12) Imajin se Jiova we na di Ticha we pas ɔl di ɔda ticha dɛn na di wan ol wɔl, de invayt wi fɔ tich ɔda pipul dɛn bɔt am! Na big big wok ɛn ɔnɔ wi gɛt if wi gɛt ɛni wok fɔ tich di trut bɔt Jiova na wi famili, insay di kɔngrigeshɔn, ɔ we wi de du wi prichin wok. Aw wi go ebul fɔ du dis wok fayn fayn wan?
Wi go gɛt di ansa frɔm wetin di apɔsul Pɔl bin rayt to Timoti we i se: “Yu fɔ de tray ɔltɛm fɔ rid dɛn tin we rayt na Gɔd in Buk bifo ɔlman, fɔ tɔk to pipul bɔt dɛn tin ya ɛn fɔ lan dɛn [di] tru tin we dɛn fɔ no bɔt Gɔd.” Pɔl kɔntinyu fɔ tɔk se: “If yu de du dɛn ɔltɛm yu go sev yusɛf ɛn ɔl dɛn wan we de lisin to yu.” (1 Tim. 4:13, 16) Di mɛsej we yu de tɛl pipul dɛn na wan we go sev dɛn layf. So i rili impɔtant fɔ lɛ wi de tray fɔ rid ɛn tich gud gud wan. Dɛn mek dis brosho fɔ ɛp yu fɔ du dat. Lɛ wi tɔk bɔt sɔm tin dɛn we de insay dis brosho.
Ɛni pej gɛt skripchɔ we de tɔk bɔt wan Baybul prinsipul we gɛt fɔ du wit di stɔdi pɔynt ɔ ɛgzampul bɔt aw fɔ du wetin di stɔdi pɔynt se
Jiova na di “Ticha” we pas ɔl. (Ayz. 30:20) Pan ɔl we dis brosho go ɛp yu fɔ lan aw fɔ rid ɛn tich gud gud wan, nɔ ɛva fɔgɛt se na Jiova gɛt di mɛsej we wi de tich ɛn na in de drɔ pipul dɛn to am. (Jɔn 6:44) So na fɔ de pre ɔltɛm fɔ oli spirit. Na fɔ de yuz Gɔd in Wɔd ɔltɛm. Mek lɛ pipul dɛn pe atɛnshɔn pan Jiova, nɔto pan yu. Tray fɔ mek di wan dɛn we de lisin to yu lɛk Jiova wit ɔl dɛn at.
Jiova dɔn invayt yu fɔ tich di mɛsej we impɔtant pas ɔl di mɛsej dɛn we i dɔn ɛva gi mɔtalman dɛn. Wi biliv tranga wan se as yu de abop pan “di trɛnk we Gɔd de gi,” dat go mek yu go bifo.—1 Pit. 4:11.
Una kɔmpin ticha dɛn,
Gɔvnin Bɔdi fɔ Jiova Witnɛs dɛn
