LƐSIN 12
Pɔl in Sista in Pikin Bin Gɛt Maynd
Lɛ wi tɔk smɔl bɔt wan yɔŋ man we bin sev in ɔnkul in layf. Di yɔŋ man in ɔnkul na apɔsul Pɔl. Wi nɔ no di yɔŋ man in nem, bɔt wi no se i bin du sɔntin we sho se i gɛt maynd. Yu go want fɔ no wetin i bin du?—
Pɔl bin de na jel na Jerusɛlɛm. Dɛn bin ol am bikɔs i bin de prich bɔt Jizɔs. Bɔt sɔm bad pipul dɛn bin et Pɔl, so dɛn mek plan aw dɛn go kil am. Dɛn se: ‘Lɛ wi tɛl di sojaman dɛn bigman lɛ i mek in sojaman dɛn kɛr go Pɔl na kɔt. Wi go ayd na di rod, so dat we di sojaman dɛn go de pas wit Pɔl fɔ go na Sizeria, wi go kil am!’
Pɔl in sista in pikin bin tɛl Pɔl ɛn di sojaman dɛn bigman bɔt di plan we sɔm bad pipul dɛn bin mek
Di de bifo dɛn kɛr Pɔl go na Sizeria, Pɔl in sista in pikin bin yɛri bɔt di plan. Wetin i go du? I bin go mit Pɔl na jel ɛn tɛl am bɔt wetin i yɛri. Wantɛm wantɛm, Pɔl tɛl am mek i go tɛl di sojaman dɛn bigman bɔt di plan. Yu tink se i bin izi fɔ mek Pɔl in sista in pikin tɔk to di sojaman dɛn bigman?— Nɔ, i nɔ bin izi, bikɔs di sojaman dɛn bigman na bin impɔtant pɔsin. Bɔt Pɔl in sista in pikin bin gɛt maynd, so i bin go tɔk to di sojaman dɛn bigman.
Di sojaman dɛn bigman bin no wetin fɔ du. I rɛdi lɛk 500 sojaman dɛn so fɔ protɛkt Pɔl. I tɛl dɛn fɔ kɛr Pɔl go na Sizeria da nɛt de. Yu tink se ɛnitin bin apin to Pɔl we dɛn bin de go na Sizeria?— Nɔ, di bad pipul dɛn nɔ bin ebul fɔ du am natin. Dɛn nɔ bin ebul du di tin we dɛn bin dɔn plan.
Us lɛsin yu lan frɔm dis stori?— Yu dɔn lan se yusɛf go ebul gɛt maynd lɛk Pɔl in sista in pikin. Wi fɔ gɛt maynd we wi de tɔk to ɔda pipul dɛn bɔt Jiova. Yu go want fɔ gɛt maynd ɛn kɔntinyu fɔ tɔk bɔt Jiova?— If yu du dat, sɔntɛm yu go sev pɔsin in layf.
