Wi kin go mitin ɔltɛm, ilɛksɛf wi gɛt fɔ waka fɔ lɔng tɛm, ɔ di san wam pasmak ɔ ebi ebi ren de kam. Sɔntɛnde, wi kin dɔn wok ol de ɛn wi kin taya, bɔt wetin mek wi kin stil go di mitin dɛn?

I de ɛp wi fɔ bia wit wi prɔblɛm dɛn. We Pɔl bin de tɔk bɔt aw wi fɔ de wit wi brɔda ɛn sista dɛn na di kɔngrigeshɔn, i bin se: “Una lɛ wi tink aw wi go ɛp wisɛf.” (Di Ibru Pipul Dɛn 10:24) Wetin Pɔl bin min? I bin min se wi fɔ tray fɔ no wi brɔda ɛn sista dɛn. So Pɔl bin de tɛl wi se wi fɔ bisin bɔt ɔda pipul dɛn. We wi no wi brɔda ɛn sista dɛn, wi go no se dɛnsɛf bin dɔn gɛt di sem prɔblɛm dɛn we wi gɛt. Ɛn dɛn go sho wi aw dɛn bin sɔlv dɛn.

I go mek wi gɛt tayt tayt padi dɛn. Di pipul dɛn we wi ɔl kin go mitin, na wi tayt tayt padi dɛn. Nɔto mitin nɔmɔ wi kin de wit dɛn, bɔt wan wan tɛm wi kin du ɔda tin dɛn fɔ ɛnjɔy wisɛf. Wetin ɔl dis go mek wi du? I go mek wi no di fayn abit dɛn we wi brɔda dɛn gɛt, ɛn dis go mek wi lɛk dɛn mɔ. Dɔn, i go mek wi rɛdi fɔ ɛp wi brɔda dɛn we dɛn gɛt prɔblɛm, bikɔs dɛn na wi tayt tayt padi dɛn. (Prɔvabs 17:17) We wi de miks wit wi brɔda ɛn sista dɛn na di kɔngrigeshɔn de sho se wi kia fɔ dɛn.—Fɔs Lɛta Fɔ Kɔrint 12:25, 26.

Wi want lɛ yu mek padi wit pipul dɛn we de du wetin Gɔd want. Yu go gɛt dɛn kayn padi ya we yu jɔyn Jiova Witnɛs dɛn. Duya, lɛ natin nɔ stɔp yu fɔ jɔyn wi.

• Wetin mek i fayn fɔ de wit wi brɔda dɛn na mitin?

• Ustɛm yu go lɛk fɔ kam di mitin dɛn so dat yu go no di brɔda dɛn?