Frɔm tɛm, Jiova want lɛ famili dɛn kam togɛda fɔ lan bɔt am. Dis go mek dɛn lɛk Jiova ɛn dɛn fambul dɛn. (Ditarɔnɔmi 6:6, 7) Na dis mek Jiova Witnɛs famili dɛn kin pik de insay di wik fɔ lan bɔt Jiova. Dɛn kin tɔk bɔt tin dɛn na di Baybul we go ɛp di famili. Ilɛksɛf na yu wan de na os, yu kin stil yuz dis tɛm fɔ stɔdi bɔt ɛnitin na di Baybul.

Na tɛm fɔ go nia Gɔd. “Una kam klos Gɔd ɛn i go kam klos una.” (Jems 4:8) Di Baybul go ɛp wi fɔ no mɔ bɔt Jiova in kwaliti dɛn ɛn di tin dɛn we i dɔn du. Wan we fɔ bigin yu famili wɔship, na fɔ yuz sɔm pan di tɛm fɔ rid di Baybul togɛda lawd wan. Una kin ivin rid di say we wi gɛt fɔ du na di Kristian Layf ɛn Prichin Wok Mitin da wik de. I go fayn if una sheb di say dɛn we una fɔ rid na di Baybul, ɛn leta una tɔk bɔt wetin una lan.

Na tɛm fɔ lɛ di famili kam togɛda. Di wan dɛn we de insay di famili go lɛk dɛnsɛf mɔ we dɛn de stɔdi di Baybul togɛda. Ɔlman na di famili fɔ gladi we di tɛm fɔ di famili wɔship de nia ɛn dɛn fɔ ɛnjɔy am. Mama ɛn papa dɛn fɔ luk dɛn pikin dɛn ej dɛn ɛn fɛn fayn tɔpik dɛn fɔ tɔk bɔt. Una kin pul dɛn tɔpik ya na Di Wachtawa ɛn Awake! magazin dɛn ɔ na wi Wɛbsayt we na jw.org. Una kin tɔk bɔt di tin dɛn we kin mɔna una pikin dɛn na skul ɛn aw fɔ sɔlv dɛn. Una kin wach wan program na JW TV (tv.pr418.com) ɛn tɔk bɔt di program afta una dɔn wach am dɔn. Una kin lan fɔ siŋ di sɔng dɛn we wi gɛt fɔ siŋ na di mitin. I kin fayn fɔ mek smɔl it we una go ɛnjɔy afta di famili wɔship.

Dis tɛm we wi kin yuz ɛvri wik fɔ wɔship Jiova de ɛp ɔlman na di famili fɔ lɛk fɔ stɔdi bɔt am. Ɛn Jiova go blɛs wi fɔ dat.—Sam 1:1-3.

• Wetin mek wi kin pik de insay di wik fɔ du famili wɔship?

• Aw mama ɛn papa dɛn go mek shɔ se ɔlman ɛnjɔy di famili wɔship?