Bɔku pipul dɛn tink se Jiova Witnɛs na nem we wan nyu rilijɔn gi dɛnsɛf. I dɔn te we dɛn bin de kɔl di pipul dɛn we de sav Gɔd, in “witnɛs dɛn.” Na lɛk 2,700 ia so dɔn pas we dɛn bin de kɔl dɛn da we de. (Ayzaya 43:10-12) Bifo di ia 1931, dɛn bin de kɔl wi Baybul Studɛnt. Wetin mek wi gi wisɛf di nem Jiova Witnɛs?

I de sho di Gɔd we wi de wɔship. We dɛn bin rayt di Baybul, Gɔd in nem bin de de bɔku bɔku tɛm. Bɔt insay bɔku Baybul dɛn tide, dɛn dɔn pul Gɔd in nem ɛn put Lɔd ɔ Gɔd. Trade trade, Gɔd bin tɛl Mozis se na in nem Jiova, ɛn i tɛl am bak se: “Na mi nem dis sote go.” (Ɛksodɔs 3:15) Gɔd gi insɛf nem fɔ sho se i difrɛn frɔm ɔl dɛn lay lay gɔd dɛn. Ɛn wi gladi fɔ gɛt Gɔd in nem.

I de sho di kayn wok we wi de du. Bɔku pipul dɛn bin dɔn de we bin de tɔk fɔ Jiova. Sɔm pan dɛn na Ebɛl, Noa, Ebraam, Sera, Mozis, ɛn Devid. (Di Ibru Pipul Dɛn 11:4–12:1) Lɛk we pɔsin kin tɔk fɔ in kɔmpin na kɔt, na so wisɛf rɛdi fɔ tɔk di tru bɔt Jiova to ɔlman.

Wi de falamakata Jizɔs. Di Baybul kɔl Jizɔs “di Wan we de tɔk tru ɔltɛm.” (Rɛvɛleshɔn 3:14) Jizɔs insɛf bin se i ‘mek pipul dɛn no’ Gɔd in nem ɛn i kɔntinyu fɔ “tɔk wetin tru” bɔt Gɔd. (Jɔn 17:26; 18:37) Di wan dɛn we de falamakata Jizɔs fɔ gɛt Jiova in nem ɛn tɛl ɔda pipul dɛn bɔt am. Na dis Jiova Witnɛs dɛn de du.

• Wetin mek di Baybul Studɛnt dɛn gi dɛnsɛf di nem Jiova Witnɛs?

• Aw lɔng Jiova dɔn gɛt pipul dɛn we de tɔk fɔ am na di wɔl?

• Udat na di pɔsin we dɔn tɔk fɔ Jiova pas ɛni ɔda pɔsin?