We dɛn disfɛloship pɔsin dat de ɛp fɔ protɛkt di kɔngrigeshɔn ɛn kɔrɛkt di pɔsin we nɔ ripɛnt fɔ di bad we i du. (1Kɔ 5:6, 11, NWT) Wi de sho lɔv we wi sɔpɔt di we aw Jiova de gi kɔrɛkshɔn. Bɔt wetin mek wi se fɔ disfɛloship pɔsin de sho lɔv, we i bi se dat kin mek ɔlman in at pwɛl, lɛk di fambul dɛn ɛn di judishal kɔmiti?

Wetin impɔtant pas ɔl na dat wi de sho se wi lɛk Jiova in gudnem ɛn di we aw i de du tin we oli. (1Pi 1:14-16, NWT) Wi de sho bak se wi lɛk di pɔsin we dɛn disfɛloship. Pan ɔl we i bi se di pɔsin we dɛn kɔrɛkt kin rili fil am, bɔt dat go mek i “gɛt pis ɛn du wetin rayt.” (Ibru. 12:5, 6, 11, NWT) If wi de kip kɔmpin wit pɔsin we disfɛloship ɔ we disayd se i nɔ want fɔ bi Jiova Witnɛs igen, i de sho se wi nɔ de sɔpɔt di we aw Jiova de kɔrɛkt di pɔsin. Lɛ wi mɛmba se, Jiova de kɔrɛkt in pipul dɛn “bay aw [dɛn] de biev.” (Jɛr 30:11) As wi de sɔpɔt di we aw Jiova de gi kɔrɛkshɔn ɛn kɔntinyu fɔ du tin dɛn we go ɛp wi fɔ gɛt tayt padi biznɛs wit am, wi go kɔntinyu fɔ op se di pɔsin go kam bak to wi Papa we gɛt sɔri-at.—Ayz 1:16-18; 55:7.

WACH DI FIM WE GƐT DI TAYTUL, DE BIƐN JIOVA WIT WAN MAYND, DƆN UNA ANSA DI KWƐSTYƆN DƐN WE DE DƆŊ:

• Aw mama ɛn papa dɛn we de sav Jiova kin fil we dɛn pikin lɛf fɔ sav Jiova?

• Aw di kɔngrigeshɔn go sɔpɔt di fambul dɛn we fetful?

• Us Baybul ɛgzampul sho se i impɔtant fɔ kɔntinyu fɔ de biɛn Jiova pas fɔ de biɛn wi fambul dɛn?

• Aw wi go sho se fɔ de biɛn Jiova impɔtant to wi pas fɔ de biɛn wi fambul dɛn?