Bɔku inaktiv Kristian dɛn go atɛnd di Mɛmorial Tyusde, Epril 11. Dɛn Kristian dɛn ya na di wan dɛn we bin dɔn lɛf fɔ atɛnd mitin ɛn go fil savis. Dɛn bin bigin fɔ rɔn di res fɔ gɛt layf, bɔt bikɔs difrɛn tin dɛn bin apin to dɛn, dat bin mek dɛn nɔ gɛt bɛtɛ zil igen. Di buk we nem Kam Bak to Jiova tɔk bɔt sɔm pan dɛn tin dɛn de. (Ibru 12:1) Bɔt Jiova stil lɛk dɛn inaktiv wan dɛn ya, bikɔs i bin bay dɛn wit in Pikin in blɔd. (Akt 20:28, NW; 1 Pit. 1:18, 19) Aw wi go ɛp dɛn fɔ kam bak na di kɔngrigeshɔn?

Di ɛlda dɛn na di kɔngrigeshɔn de tray tranga wan fɔ fɛn ɛn ɛp inaktiv pɔblisha dɛn, jɔs lɛk aw shɛpad de tray tranga wan fɔ fɛn ɛni ship we dɔn kɔmɔt usay in kɔmpin dɛn de. (Lyuk 15:4-7) Dis de sho di we aw Jiova lɛk wi ɛn di we aw i de kia fɔ wi. (Jɛr. 23:3, 4) Wi ɔl kin ɛnkɔrej dɛn kayn pipul dɛn de, nɔto di ɛlda dɛn nɔmɔ fɔ du dat. Di tray we wi de tray tranga wan fɔ sho se wi lɛk wi kɔmpin Kristian dɛn, de mek Jiova gladi ɛn i go blɛs wi fɔ dat. (Prɔ. 19:17; Akt 20:35) So na fɔ tink bɔt udat yu go ebul fɔ ɛnkɔrej, ɛn nɔ westɛm fɔ du dat!

UNA WACH DI FIM WE GƐT DI TAYTUL ƐNKƆREJ INAKTIV KRISTIAN DƐN, DƆN UNA TƆK BƆT DƐN KWƐSTYƆN DƐN YA:

• Wetin na di fɔs tin we Abi bin du we i mit wan Jiova Witnɛs we i nɔ bin sabi?

• Wetin mek i fayn fɔ mek wi tɛl di ɛlda dɛn if wi want fɔ ɛp inaktiv pɔblisha?

• Wetin-ɛn-wetin Abi bin du fɔ go fɛn Lɔra di sɛkɔn tɛm?

• Aw Abi bin sho se i go kɔntinyu, i go peshɛnt, ɛn lɛk Lɔra we i bin de tray fɔ ɛnkɔrej am?

• Wetin wi go lan frɔm di ɛgzampul we Jizɔs bin yuz we de na Lyuk 15:8-10?

• Us gud tin dɛn bin apin we ɔlman bin tray tranga wan fɔ ɛp Lɔra?