We Jizɔs bin de na di wɔl, i bin tɔk mɔ bɔt di lɔ we se: “Rɛspɛkt yu papa ɛn mama.” (Ɛks 20:​12; Mat 15:​4) Jizɔs nɔ bin de fred fɔ tɔk bɔt dis bikɔs we i bin yɔŋ, i bin de “yɛri [in mama ɛn papa] dɛn wɔd.” (Lyu 2:​51) We i big, i bin mek shɔ se bifo i day i fɛn pɔsin we go kia fɔ in mama.—Jɔn 19:​26, 27.

Insay wi yon tɛm, yɔŋ wan dɛn we na Kristian we de obe dɛn mama ɛn papa dɛn ɛn tɔk to dɛn fayn, de sho se dɛn rɛspɛkt dɛn. Infakt, di lɔ nɔ tɛl wi ustɛm wi fɔ lɛf fɔ rɛspɛkt wi mama ɛn papa. Ivin we wi mama ɛn papa dɛn dɔn ol, wi fɔ kɔntinyu fɔ rɛspɛkt dɛn bay we wi lisin to dɛn advays. (Prɔ 23:​22) Wi kin sho bak se wi de rɛspɛkt wi mama ɛn papa dɛn bay we wi kia fɔ dɛn we dɛn dɔn ol. (1Ti 5:​8) Ilɛksɛf wi yɔŋ ɔ ol, we wi kɔntinyu fɔ tɔk fayn to wi mama ɛn papa dɛn, wi de sho se wi rɛspɛkt dɛn.

WACH DI KATUN FIM WE GƐT DI TAYTUL, AW A GO EBUL TƆK TO MI MAMA ƐN PAPA? DƆN UNA TƆK BƆT DƐN KWƐSTYƆN DƐN YA:

• Wetin mek yu kin si am se i at fɔ tɔk to yu mama ɛn papa?

• Aw yu go sho se yu rɛspɛkt yu mama ɛn papa we yu de tɔk to dɛn?

• Us bɛnifit yu go gɛt we yu tɔk to yu mama ɛn papa? (Prɔ 15:​22)