Imajin se yu bin de liv na Galili di tɛm we Jizɔs bin de na di wɔl. Yu dɔn travul go na Jerusɛlɛm fɔ sɛlibret di Bafa Fɛstival. Di siti ful-ɔp wit ɔda pipul dɛn we kɔmɔt fa fa say fɔ kam wɔship. Yu want fɔ gi yu gift to Jiova. So yu kam wit yu got ɛn bigin waka midul dɛn bɔku bɔku pipul dɛn de fɔ go na di tɛmpul. We yu rich, di tɛmpul ful-ɔp wit ɔda pipul dɛn we dɛnsɛf want fɔ gi dɛn sakrifays. Tɛm dɔn rich fɔ mek yu gi di prist yu got. Na da tɛm de yu mɛmba se yu brɔda vɛks pan yu ɛn sɔntɛm i go de midul dɛn bɔku pipul dɛn de ɔ i go de insay di siti. Jizɔs tɛl wi wetin fɔ du. (Rid Matyu 5:​24.) Aw yu ɛn yu brɔda we yu gɛt prɔblɛm wit go ebul fɔ mek pis lɛk aw Jizɔs bin se una fɔ du am? Insay ɛni wan pan di list dɛn we de dɔŋ, mak di kɔrɛkt ansa.

YU FƆ . . .

• tɔk wit yu brɔda we yu si se i gɛt gud rizin fɔ vɛks pan yu

• tray fɔ kɔrɛkt di we aw yu brɔda de tink if yu fil se in na pɔsin we kwik fɔ vɛks ɔ insɛf gɛt blem fɔ wetin apin

• peshɛnt lisin we yu brɔda de tɔk, ɛn ilɛksɛf yu nɔ ɔndastand ɔltin, tɛl am se yu rili sɔri fɔ we yu mek i fil bad ɔ fɔ di tin dɛn we yu mek apin to am

YU BRƆDA FƆ . . .

• tɛl ɔda pipul dɛn na di kɔngrigeshɔn bɔt wetin yu du fɔ mek dɛn sɔpɔt am

• tɔk pan yu, ɛksplen ɔl wetin yu du am, ɛn mek yu gri se yu du am bad

• gladi fɔ we yu put yusɛf dɔŋ ɛn gɛt kɔrej fɔ kam mit am, ɛn i fɔ fɔgiv yu wit ɔl in at

Pan ɔl we tide wi nɔ nid fɔ sakrifays animal we wi de wɔship Jiova, wetin Jizɔs bin tich wi bɔt wetin wi wɔship to Gɔd gɛt fɔ du wit di pis we wi de mek wit wi brɔda dɛn?