Wetin mek wi kin rili ɛnjɔy wi kɔnvɛnshɔn dɛn ɛni ia? Jɔs lɛk aw i bin de apin insay Izrɛl trade, di kɔnvɛnshɔn dɛn tide de gi wi chans fɔ wɔship Jiova wit wi kɔmpin Kristian dɛn. Wi kin lan bɔku fayn fayn tin dɛn we de ɛp wi fɔ gɛt tayt padi biznɛs wit Jiova. Wi kin valyu bak di gud tɛm we wi kin spɛnd wit wi famili ɛn padi dɛn. Bikɔs wi rili gladi fɔ di program, dat kin mek wi want fɔ atɛnd ɔl tri di de dɛn fɔ di kɔnvɛnshɔn.

We wi gɛt di chans fɔ de togɛda wi nɔ fɔ jɔs tink bɔt aw wi go bɛnifit, bɔt wi fɔ tink bak bɔt aw wi go sho se wi lɛk ɔda pipul dɛn. (Gal 6:​10; Ibru 10:​24, 25) We wi kip di sidɔm ples dɛn nɔmɔ we wi nid, wi de sho se wi nɔ jɔs bisin bɔt wisɛf, bɔt wi bisin bɔt ɔda pipul dɛn. (Fil 2:​3, 4) Kɔnvɛnshɔn dɛn kin mek wi gɛt chans fɔ mek nyu padi dɛn. Bifo di program bigin ɛn afta di program ɔ ivin lɔnch tɛm, wi kin tray fɔ tɔk to pɔsin we wi nɔ sabi. (2Kɔ 6:​13) Di padi dɛn we wi kin gɛt na dɛn program dɛn ya kin bi wi padi dɛn sote go! Di tin we pas ɔl na dat, we ɔda pipul dɛn kin si di kayn lɔv we wi de sho, dat kin mek dɛn disayd fɔ kam jɔyn wi fɔ sav Jiova.—Jɔn 13:​35.

WACH DI FIM WE GƐT DI TAYTUL, “LƆV NƆ DE ƐVA FEL”! INTANASHƆNAL KƆNVƐNSHƆN DƐN, DƆN UNA ANSA DI KWƐSTYƆN DƐN WE DE DƆŊ:

• Aw dɛn bin sho lɔv to di brɔda ɛn sista dɛn we bin atɛnd di 2019 intanashɔnal kɔnvɛnshɔn dɛn?

• Wetin mek di wanwɔd ɛn lɔv we Jiova in pipul dɛn gɛt rili spɛshal?

• Uskayn Kristian lɔv di Gɔvnin Bɔdi mɛmba dɛn tɔk mɔ bɔt?

• Aw Kristian lɔv bin ɛp wi brɔda ɛn sista dɛn na Jamani ɛn Sawt Koria fɔ gɛt wanwɔd?

• Wetin wi fɔ mekɔp wi maynd fɔ du?