Us tin dɛn yu kin tray fɔ du ɛvride we nɔ izi fɔ yu? Yu na pɔsin we de bifo na di famili we gɛt bɔku wok fɔ du? Na yu wan de sɔpɔt yu pikin dɛn as mama ɔ papa? Yu na yɔŋ pɔsin we yu kɔmpin dɛn de buli na skul? Yu gɛt wɛlbɔdi prɔblɛm ɔ ol ej de mɔna yu? Ɔlman gɛt prɔblɛm we de mɔna am. Bɔku Kristian dɛn gɛt difrɛn difrɛn prɔblɛm dɛn we de mɔna dɛn di sem tɛm. Bɔt, wi no se i nɔ go te igen ɔl dɛn prɔblɛm dɛn ya go dɔn.—2Kɔ 4:​16-18.

Bɔt te da tɛm de rich, wi go kɔntinyu fɔ gɛt kol at we wi no se Jiova ɔndastand wi prɔblɛm dɛn, i valyu di de we wi de biɛn am ɛn di bia we wi de bia, ɛn i go blɛs wi tumara bambay. (Jɛr 29:​11, 12) Jizɔs insɛf bisin bɔt wi. As wi de du di tin dɛn we Kristian dɛn fɔ du, Jizɔs gi wi kɔnfidɛns se i “go de wit wi.” (Mat 28:​20) We wi tek tɛm tink gud wan bɔt di kayn fridɔm we wi go gɛt tumara bambay ɔnda Gɔd in Kiŋdɔm, dat go mek wi gɛt op ɛn mekɔp wi maynd fɔ bia di prɔblɛm dɛn we de mit wi naw.—Rom 8:​19-21.

WACH DI FIM WE GƐT DI TAYTUL, KƆNTINYU FƆ DE PE ATƐNSHƆN TO JIZƆS AS DI BIG TRƆBUL DE KAM!—BLƐSIN DƐN WE WI GO ƐNJƆY ƆNDA DI KIŊDƆM, DƆN UNA ANSA DI KWƐSTYƆN DƐN WE DE DƆŊ:

• Aw mɔtalman tɔn dɛn bak pan Gɔd? Wetin apin afta dat?

• Aw layf go tan lɛk tumara bambay fɔ di wan dɛn we fetful to Jiova?

• Wetin go mek wi ɛnjɔy layf tumara bambay?

• Us wan pan di prɔmis dɛn insay di nyu wɔl yu go rili want fɔ ɛnjɔy?