WETIN MEK I IMPƆTANT? Di Baybul buk we nem Fɔs Lɛta Fɔ Kɔrint na wan pan di 14 lɛta dɛn we di apɔsul Pɔl bin rayt fɔ ɛnkɔrej in kɔmpin Kristian dɛn. We pɔsin rayt lɛta, i de gɛt chans fɔ tek tɛm pik di wɔd dɛn we i go want fɔ rayt, ɛn di pɔsin we i de sɛn am to go ebul fɔ rid am bɔku tɛm. Fɔ rayt lɛta na fayn we fɔ prich to wi fambul, padi, ɛn pipul dɛn we wi sabi. Na fayn we bak fɔ prich to pipul dɛn we wi nɔ go ebul fɔ mit ɛn tɔk to. Fɔ ɛgzampul, sɔm pipul dɛn go dɔn sho se dɛn want fɔ no mɔ bɔt i nɔ izi fɔ mit dɛn na os. Ɔ sɔntɛm i kin at fɔ si sɔm pipul dɛn we de na wi tɛritri bikɔs dɛn de na say dɛn we gɛt tayt sikyɔriti, say dɛn we gɛt fɛns ɛn get dɛn, ɔ say dɛn we de fa frɔm usay bɔku pipul dɛn de. Wetin na sɔm tin dɛn fɔ mɛmba mɔ we yu de rayt to pɔsin we yu nɔ sabi?

AW FƆ DU AM?

• Rayt wetin yu bin fɔ tɔk if di pɔsin de bifo yu. As yu bigin rayt di lɛta, mek di pɔsin no udat yu bi ɛn wetin mek yu de rayt to am. Sɔntɛm yu kin aks kwɛstyɔn we di pɔsin go tink bɔt ɛn tɛl am bɔt wi wɛbsayt. Dɔn tɛl am bɔt di Baybul Lɛsin dɛn we de na di Intanɛt, tɔk bɔt aw wi kin arenj fɔ stɔdi di Baybul wit pipul dɛn na dɛn os, ɔ rayt di taytul fɔ sɔm chapta dɛn we de insay wan pan di buk dɛn we wi kin yuz fɔ stɔdi. Yu kin put tin dɛn lɛk, kɔntakt kad, inviteshɔn, ɔ trakt insay di ɛnvilɔp

• Mek am shɔt. Yu lɛta nɔ fɔ lɔng pasmak bikɔs dat go mek di pɔsin taya fɔ rid am.—Luk wan ɛgzampul na pej 8

• Rid di lɛta bak fɔ mek shɔ se i nɔ gɛt mistek, i nit, izi fɔ rid, yu rayt lɛk padi, yu rayt wit rɛspɛkt, ɛn yu tɔk bɔt gud tin. Mek shɔ se yu put di kɔrɛkt adrɛs so dat di lɛta go rich di pɔsin we yu rayt am to