Tin dɛn we pɔsin de si kin ɛp fɔ mek i pe atɛnshɔn, ɔndastand, ɛn mɛmba wetin i dɔn lan. Jiova we na di Bɛst ticha, dɔn yuz da kayn we de fɔ tich impɔtant lɛsin dɛn. (Jɛn 15:​5; Jɛr 18:​1-6) Jizɔs insɛf bin de tich fayn ɛn i bin de yuz tin dɛn we pɔsin de si fɔ tich. (Mat 18:​2-6; 22:​19-21) Wan pan di tin dɛn we pɔsin de si we dɔn rili bɛnifit bɔku pipul dɛn dis biɛn tɛm na fim. Yu de yuz fim dɛn we yu de tich yu Baybul studɛnt dɛn?

Dɛn dɔn mek tɛn fim dɛn fɔ ɛp wi fɔ tich di lɛsin dɛn we de na di buk we gɛt di taytul, Gɔd Gɛt Gud Nyuz fɔ Wi! Bɔku pan di fim dɛn gɛt taytul we mach wan kwɛstyɔn we dɛn rayt wit tik blak insay di buk. Di wan we de na jw.org, gɛt link we de ɛp wi fɔ mɛmba ustɛm fɔ ple ɛniwan pan di fim dɛn. Apat frɔm dat, ɔda fim dɛn de na wi Tichin Tulbɔks we wi kin yuz fɔ di ɔda buk dɛn we wi kin yuz fɔ stɔdi.

Yu de stɔdi yu Baybul studɛnt wan Baybul tɔpik we at fɔ mek i ɔndastand? Ɔ sɔntin de we de mɔna yu Baybul studɛnt? Luk fɔ fim dɛn na jw.org® ɛn JW TV® fɔ di wan we go ɛp am. Sɔntɛm yu ɛn yu studɛnt go luk di fim togɛda dɔn una tɔk bɔt am.

Ɛni mɔnt, dɛn de mek nyu fim dɛn. As yu de wach dɛn, tink bɔt aw yu go yuz dɛn we yu de tich ɔda pipul dɛn.